યૂના

૩ ફરી એક વાર યહોવાનો આ સંદેશો યૂના પાસે આવ્યો:+ ૨ “ઊઠ અને મોટા શહેર નિનવેહ જા.+ હું તને જે સંદેશો જણાવું એ ત્યાં જાહેર કર.”

૩ યૂના ઊઠ્યો અને યહોવાની આજ્ઞા માનીને+ નિનવેહ ગયો.+ નિનવેહ તો બહુ મોટું શહેર હતું.* એના એક છેડેથી બીજે છેડે ચાલીને જતાં ત્રણ દિવસ લાગતા.* ૪ યૂના શહેરમાં પ્રવેશ્યો અને તેણે એક દિવસની મુસાફરી કરી. તેણે આ સંદેશો જાહેર કર્યો: “૪૦ દિવસ પછી નિનવેહનો નાશ થશે!”

૫ નિનવેહના લોકોએ ઈશ્વરમાં શ્રદ્ધા મૂકી.+ તેઓએ ઉપવાસનો ઢંઢેરો પિટાવ્યો. ગરીબથી લઈને અમીર સુધી, નાનાથી લઈને મોટા સુધી બધાએ કંતાન પહેર્યું. ૬ નિનવેહના રાજાએ યૂનાનો સંદેશો સાંભળ્યો ત્યારે, તે પોતાની રાજગાદી પરથી ઊભો થયો. પોતાનાં રાજવી વસ્ત્રો ઉતારીને તેણે કંતાન પહેર્યું અને તે રાખમાં બેઠો. ૭ તેણે આખા નિનવેહમાં ઠરાવ જાહેર કર્યો,

“રાજા અને તેના દરબારીઓનો આ ઠરાવ છે: કોઈએ કંઈ ખાવું નહિ. માણસે, જાનવરે કે ઢોરઢાંકે કશું ખાવું નહિ કે પાણી પણ પીવું નહિ. ૮ માણસો અને જાનવરો, બધાં કંતાન પહેરે. લોકો પૂરા દિલથી ઈશ્વરને પોકાર કરે, પોતાના ખરાબ માર્ગમાંથી પાછા ફરે અને જોરજુલમ કરવાનું છોડી દે. ૯ કદાચ સાચા ઈશ્વર પોતે જે નક્કી કર્યું છે એના પર ફરી વિચાર* કરે અને પોતાનો ગુસ્સો શાંત પાડે, જેથી આપણે માર્યા ન જઈએ.”

૧૦ સાચા ઈશ્વરે જોયું કે, લોકો પોતાના ખરાબ માર્ગથી પાછા ફર્યા છે.+ એટલે તેમણે જે આફત લાવવાનું નક્કી કર્યું હતું, એના પર ફરી વિચાર* કર્યો અને એ આફત લાવ્યા નહિ.+