¿Mbaʼéichapa ñamombaʼeguasu vaʼerã Ñandejárape?

 1. ¿Máva añoitépa ikatu heʼi ñandéve mbaʼéichapa ñamombaʼeguasu vaʼerã Ñandejárape?

HETA rrelihión heʼi haʼekuéra oadoraha Ñandejárape haʼe oipotaháicha. Péro káda rrelihión omboʼe diferentepa mávapa añetehápe Ñandejára ha mbaʼéichapa jaadora vaʼerã chupe. Upévare ijetuʼu jaikuaa hag̃ua mbaʼe rrelihiónpa heʼi la verda. ¿Mávapa ikatu heʼi ñandéve mbaʼéichapa añetehápe ñamombaʼeguasu vaʼerã Ñandejárape? Jehová añoite ningo ikatu heʼi ñandéve mbaʼéichapa ñamombaʼeguasu vaʼerã chupe.

 2. ¿Mbaʼépa ñanepytyvõta jaikuaa hag̃ua mbaʼéichapa ñamombaʼeguasu vaʼerã Ñandejárape?

² Jehová ningo ñanderayhueterei, upévare omeʼẽ ñandéve la Biblia ikatu hag̃uáicha jaikuaa mbaʼéichapa jaadora vaʼerã chupe. Jastudiáramo la Biblia, haʼe ñanepytyvõta ñantende hag̃ua umi mbaʼe ohaʼarõva ñandehegui (Isaías 48:17).

 3. ¿Mbaʼépa oipota Ñandejára jajapo?

³ Oĩ opensáva Ñandejára oaseptaha entéro rrelihión, péro Jesús nomboʼéi vaʼekue upéva. Haʼe heʼi vaʼekue: “Naentéroi heʼíva chéve: ‘Señór, Señór’, oikéta pe Rréino yvagapeguápe. Síno umi ojapóva che Ru yvagapegua rembipota añoite oikéta”. Jesús heʼi vaʼekue voi umi ndojapóiva Ñandejára rembipota ‘ivaívante ojapoha’. Upévare iñimportanteterei jaikuaa mbaʼépa Ñandejára rembipota ha jajapo umi mbaʼe ohaʼarõva ñandehegui (Mateo 7:21-23).

 4. ¿Mbaʼépa ñaaprende Jesús heʼi vaʼekuégui?

⁴ Jesús heʼi vaʼekue jahasataha heta mbaʼe ijetuʼúva jajapo rupi Ñandejára rembipota. Haʼe heʼi: “Peikékena pe okẽ ipoʼívarupi, pórke tuicha pe okẽ ha tuicha pe tape oporogueraháva ñehundípe, ha upe okẽrupi heta oĩ oikéva. Péro ipoʼi pe okẽ ha ipoʼi pe tape oporogueraháva jeikove opaveʼỹvape, ha saʼi umi ojuhúva upe tape” (Mateo 7:13, 14). Upéicharõ, jaikove hag̃ua pára siémpre jaha vaʼerã pe tape poʼíre, upéva heʼise ñamombaʼeguasu vaʼerãha Jehovápe haʼe oipotaháicha. Péro jahánteramo pe tape tuichávare, térã jajapóramo umi mbaʼe ndogustáiva Jehovápe, ñañehundíta. Jehová ningo ndoipotái avavete oñehundi, upévare enterovépe omeʼẽ pe oportunida oikuaa hag̃ua chupe (2 Pedro 3:9).

 5. ¿Mbaʼéichapa ikatu jaikuaa mávapa hína umi oadoráva Ñandejárape haʼe oipotaháicha?

⁵ Jesús heʼi vaʼekue mbaʼéichapa ikatu jaikuaa mávapa umi oadoráva Jehovápe haʼe oipotaháicha. Haʼe heʼi: “Hembiapokuére pepilláta chupekuéra [...], entéro yvyramáta iporãva hiʼa porã” (Mateo 7:16, 17). Upéicharõ, jaikuaa vaʼerã mbaʼe rrelihiónpa hína pe omboʼe ha ojapóva Ñandejára heʼíva. Jehová ndeʼíri umi oadoráva chupe perfékto vaʼerãha, péro si oñehaʼã vaʼerãha ojapo opa mbaʼe haʼe oipotaháicha. Koʼág̃a jahecháta umi mbaʼe ñanepytyvõtava jaikuaa hag̃ua mávapa hína umi oadoráva Ñandejárape haʼe oipotaháicha.

6, 7. a) ¿Mbaʼérepa pe rrelihión verdadéra omboʼe vaʼerã la Bíbliape oĩvante? b) ¿Mbaʼépa ñaaprende Jesús ehémplogui?

⁶ Opa mbaʼe jakreéva oĩ vaʼerã Ñandejára Ñeʼẽme. La Biblia heʼi:“Entéro mbaʼe oĩva Ñandejára Ñeʼẽme ou Ñandejáragui, ha ideprovécho ñaporomboʼe hag̃ua, ohechauka hag̃ua ñandéve mbaʼépa oĩ vai, jakorrehi hag̃ua entéro mbaʼe, ha ñanemboʼe jajapo hag̃ua umi mbaʼe oĩ porãva, ikatu hag̃uáicha Ñandejára siérvo ikatupyry ojapo hag̃ua entéro mbaʼe, ha oĩ preparádo ojapo hag̃ua opaichagua mbaʼe porã” (2 Timoteo 3:16, 17). Apóstol Pablo heʼi vaʼekue kristianokuérape: “Pehendúrõ guare orehegui Ñandejára ñeʼẽ, peguerovia upéva añetehápe haʼeha Ñandejára ñeʼẽ ha ndahaʼéi kuimbaʼekuéra ñeʼẽnte” (1 Tesalonicenses 2:13). Umi mbaʼe omboʼéva pe rrelihión verdadéra, oĩ vaʼerã la Bíbliape ha ndahaʼéi vaʼerã ojesegínteva umi yvypóra heʼíva térã opensávare.

⁷ Jesús omboʼe vaʼekue Ñandejára Ñeʼẽme oĩvante (elee Juan 17:17). Haʼe oporomboʼe jave, pyʼỹi heʼími vaʼekue: “Ñandejára Ñeʼẽme heʼi” (Mateo 4:4, 7, 10). Umi oadoráva Jehovápe haʼe oipotaháicha, osegi Jesús ehémplo ha omboʼe la Bíbliape oĩvante.

 8. ¿Mávape añoitépa Jesús heʼi vaʼekue jaadora vaʼerãha?

⁸ Jaadora vaʼerã Jehovápe añoite. Salmo 83:18 heʼi: “Nde nderérava Jehová, nde añoite [...] Ñandejára Ndaijojaháiva ko yvy ape ári”. Jesús oipota vaʼekue umi hénte oikuaa porã mávapa pe Dios verdadéro ha upévare omombeʼu vaʼekue chupekuéra mbaʼéichapa héra Ñandejára (elee Juan 17:6). Jesús heʼi vaʼekue: “Ñandejára Jehovápe readora vaʼerã ha chupe añoite reservi vaʼerã” (Mateo 4:10). Upéicharõ, jasegi vaʼerã Jesús ehémplo ha ñamombaʼeguasu Jehovápe añoite, jaipuru héra, ha ñamboʼe ñande rapichakuérape oikuaa hag̃ua Jehovápe ha umi mbaʼe porã haʼe ojapótava ñanderehehápe.

9, 10. ¿Mbaʼéichapa ikatu jahechauka jajoayhuha?

⁹ Jahayhu vaʼerã ñande pyʼaite guive ñande rapichakuérape. Jesús heʼi vaʼekue idisipulokuérape ojoayhu vaʼerãha (elee Juan 13:35). Tahaʼe haʼéva ñane retã, ñanemboriahu térã ñandeplátaramo, enterove jajoayhu vaʼerã oñoermánoicha (Colosenses 3:14). Upéicharõ ndovaléi jaha gerrahápe ni jajuka ñande rapichápe. La Biblia heʼi: “Péicha ikatu jaikuaa mávapa hína Ñandejára raʼy ha mávapa pe Diablo raʼy: enterove umi ndojapomeméiva umi mbaʼe iporãva ndahaʼéi Ñandejára raʼy. Ha pe ndohayhúiva iñermánope ndahaʼéi avei Ñandejára raʼy”. Upéi heʼi avei jajoayhu vaʼerãha ani hag̃ua jajogua Caínpe, haʼe ningo haʼe vaʼekue pe Diablo raʼy pórke ojuka iñermánope (1 Juan 3:10-12; 4:20, 21).

¹⁰ Ñande jaservíva Jehovápe jaipuru ñane tiémpo, ñande fuérsa ha umi mbaʼe jarekóva ikatu hag̃uáicha ñañopytyvõ ha ñañomokyreʼỹ (Hebreos 10:24, 25). Ñande ñañehaʼã jajapo meme iporãva “enterove rehehápe” (Gálatas 6:10).

11. ¿Mbaʼérepa jaguerovia Jesús rupive añoite ikatuha jajesalva?

¹¹ Jaguerovia vaʼerã Jesús rupive añoite ikatuha jajesalva. La Biblia heʼi “ndaiporiha ótro ikatúva ñandesalva, ndaipórigui ótro téra ko yvy ape ári Ñandejára oiporavo vaʼekue yvyporakuéra apytégui ñandesalva hag̃ua” (Hechos 4:12). Kapítulo 5-pe jahecha kuri Jehová ombou hague Jesúspe ikatu hag̃uáicha osalva umi iñeʼẽrendúvape (Mateo 20:28). Jehová oiporavo Jesúspe ogoverna hag̃ua ko yvy. Upévare la Biblia heʼi ñandéve jaikove hag̃ua pára siémpre ñaneñeʼẽrendu vaʼerãha Jesúspe (elee Juan 3:36).

12. ¿Mbaʼérepa ndovaléi jaike ni ñañentremete polítikape?

¹² Ndovaléi jaike ni ñañentremete polítikape. Jesús noñentremetéi vaʼekue polítikape. Ojeguerahárõ guare chupe pe governadór Pilato renondépe, heʼi vaʼekue chupe: “Che Rréino ndahaʼéi ko mundopegua” (elee Juan 18:36). Jesús ojapo haguéicha, ñande jaapoja Ñandejára goviérno añoite. Upévare, tahaʼe haʼéva pe país jaikoha, ñande ndajaikéi polítikape. Péro la Biblia heʼi ñandéve jajapo vaʼerãha “umi autorida omandáva”, térã umi governánte omandáva (Romanos 13:1). Ñande ñakumpli vaʼerã umi léi oĩva ñane retãme. Péro upéva ndeʼiséi jajapotaha umi mbaʼe la Biblia heʼíva naiporãiha. Péicha jasegi hína apóstol Pedro ehémplo, haʼe heʼi vaʼekue: “Ore ningo oreñeʼẽrendu vaʼerã Ñandejárape ore governánteramo, yvypórape rangue” (Hechos 5:29; Marcos 12:17).

13. ¿Mbaʼépa ojapóta Ñandejára Rréino?

¹³ Jajerovia vaʼerã Ñandejára Goviérno añoite osolusionataha umi provléma oĩva ko múndope. Jesús heʼi vaʼekue “umi notísia porã oñeʼẽva Ñandejára Rréinore” oñemombeʼutaha oparupiete ko yvy ape ári (elee Mateo 24:14). Ndaipóri ni peteĩ goviérno umáno ikatúva ojapo ñanderehehápe umi mbaʼe porã ojapótava Ñandejára Goviérno (Salmo 146:3). Jesús ñanemboʼe vaʼekue jajerure hag̃ua Ñandejárape koʼã mbaʼe: Tou ne Rréino, tojejapo ne volunta yvágape ha avei ko yvy ape ári (Mateo 6:10). La Biblia heʼi Ñandejára Rréino ohunditaha entéro umi goviérno umáno ha Igoviérno añoite opytataha opa árare (Daniel 2:44).

14. ¿Mbaʼe rrelihiónpa nde rehechakuaa oadoraha Ñandejárape haʼe oipotaháicha?

¹⁴ Rehecha rire koʼã mbaʼe, eñeporandumi: “¿Mbaʼe rrelihiónpa omboʼe umi mbaʼe oĩva la Bíbliape añoite? ¿Mbaʼe rrelihiónpa omombeʼu enterovépe Ñandejára réra, ha ohechauka añetehápe ohayhuha hapichakuérape? ¿Mbaʼe rrelihiónpa oguerovia Ñandejára ombou hague Jesúspe ñandesalva hag̃ua? ¿Mbaʼe rrelihiónpa pe noñentremetéiva polítikape ha opredikáva Ñandejára Rréino añoite osolusionataha umi provléma oĩva ko múndope?”. Ajépa umi testígo de Jehová añoite ojapo hína koʼã mbaʼe (Isaías 43:10-12).

15. ¿Mbaʼépa jajapo vaʼerã ñamombaʼeguasu hag̃ua Ñandejárape haʼe oipotaháicha?

¹⁵ La Biblia heʼi umi demónio jepe ogueroviaha Ñandejára oexistiha, péro ndojapói hikuái Ñandejára oipotáva (Santiago 2:19). Upéicharõ, ñamombaʼeguasu hag̃ua Ñandejárape haʼe oipotaháicha, ndahaʼéi vaʼerã jagueroviánteva haʼe oexistiha, síno jajapo vaʼerã haʼe heʼíva.

16. ¿Mbaʼérepa ñamboyke vaʼerã opa mbaʼe oúva umi rrelihión fálsagui?

¹⁶ Ñamombaʼeguasu hag̃ua Ñandejárape haʼe oipotaháicha, ndajajeheʼái vaʼerã umi rrelihión fálsare. La Biblia heʼi voi: “Pesẽke ijapyteguikuéra, ha pejeíke chuguikuéra” (2 Corintios 6:17; Isaías 52:11). Upévare ñamboykete vaʼerã opa mbaʼe oúva umi rrelihión fálsagui.

17, 18. ¿Mbaʼépa hína “Babilonia Guasu” ha mbaʼérepa iñimportánte pyaʼe jaheja upéva?

¹⁷ Umi rrelihión fálsa ningo haʼe hína entéro umi rrelihión nomboʼéiva heta mbaʼe la Biblia heʼiháicha. Por ehémplo, nomboʼéi hikuái la héntepe mbaʼéichapa añetehápe Ñandejára oipota jaadora chupe. La Bíbliape oñehenói “Babilonia Guasu” entéro umi rrelihión fálsape (Apocalipsis 17:5). ¿Mbaʼérepa oñehenói chupekuéra upéicha? Pe dilúvio rire, Babilóniape oñepyrũ vaʼekue heta rrelihión fálsa. Upéi umi mbaʼe omboʼéva umi rrelihión oñepyrũ isarambi opárupi, por ehémplo upépe oñemombaʼeguasúma vaʼekue voi heta trinidápe. Koʼag̃aite peve oĩ heta rrelihión omboʼéva pe Trinida. Haʼekuéra omboʼe Ñandejára, Jesús ha pe espíritu sánto haʼeha peteĩnte. Péro la Biblia omboʼe Ñandejára Jehová peteĩnteha ha Jesús haʼeha Itaʼýra (Juan 17:3). Umi oiko vaʼekue Babilóniape oguerovia vaʼekue avei peteĩ persóna omano rire osegiha oikove algún ládo térã ohoha osufri infiérnope. Péro la Biblia nomboʼéi upéva (ehecha nóta 14, 17 ha 18).

¹⁸ Ñandejára heʼi koʼẽrõitéma ohunditaha umi rrelihión fálsape (Apocalipsis 18:8). Upévare Jehová ojerure ñandéve ani hag̃ua ñahaʼarõ jahejaite hag̃ua umi rrelihión fálsa (Apocalipsis 18:4).

19. ¿Mbaʼépa rehupytýta redesidíramo reservi Jehovápe?

¹⁹ Ikatu hína ne amígo ha ne hentekuérape ndogustái redesidi haguére reheja pe rrelihión fálsa ha reservi Jehovápe, ikatu voi heta nembohasa asy hikuái upe haguére. Péro Jehová oĩta nde ykére, haʼe nanderejamoʼãi. Reservíramo chupe, entéro umi persóna oservíva Jehovápe vyʼápe nderresivíta ha ohechaukáta ndéve nderayhu añeteha. Ha ndahaʼéi upévante, erekóta avei pe oportunida reikovévo pára siémpre Ñandejára ogoverna vove (Marcos 10:28-30). Ikatu hína avei umi ne hénte térã ne amígo oñemoĩ mbaretéva nderehe reservi haguére Jehovápe, oñepyrũ avei ostudia la Biblia.

20. ¿Mbaʼérepa iñimportánte koʼág̃ama readora Jehovápe haʼe oipotaháicha?

²⁰ Koʼẽrõitéma Jehová ohundíta entéro umi hénte iñaña ha ojapóvape mbaʼe vai, ha Irréino ogovernáta ko múndo (2 Pedro 3:9, 13). ¡Ajépa javyʼaitéta oiko vove upéva! Jehová goviérno poguýpe enterove oadoráta chupe haʼe oipotaháicha. Upévare iñimportanteterei koʼág̃ama rejapo umi mbaʼe Jehová ojeruréva ha readora chupe haʼe oipotaháicha.