Jasegíkena jaiko Ñandejára mborayhúpe

1, 2. ¿Mbaʼépa jajapo vaʼerã jasegi hag̃ua jaiko Ñandejára mborayhúpe?

ENTÉROPE ningo hiʼã ñaneresãi ha ñanembarete, upévare jajapo tekotevẽva guive ñañalimenta porã hag̃ua, avei jajapo ehersísio ha jakuida ñande retére. Ha upearã tekotevẽ ñañehaʼãmbaite, péro jajapo upéva pórke jaikuaa ojapo porãtaha ñanderehe. Upéicha avei, ñañehaʼãmbaitémante vaʼerã ha jajapo tekotevẽva guive jasegi hag̃ua jaiko Ñandejára mborayhúpe.

² Oiméne jajapóma raʼe heta mbaʼe ikatu hag̃uáicha jaikuaa jahávo Jehovápe, upéicharõ jepe jasegi vaʼerã ñañehaʼã ñañemoag̃uive hag̃ua hese. Pe disípulo Judas heʼi vaʼekue umi kristianokuérape: “Pesegi peiko Ñandejára mborayhúpe”, ha oexplika chupekuéra ohupyty hag̃ua upéva tekotevẽha ‘oñemombarete ijerovia sagrádo rupive’ (Judas 20, 21). Upéicharõ, ¿mbaʼépa ikatu ñande jajapo jajerovia mbareteve hag̃ua?

3-5. a) ¿Mbaʼépa oipota Satanás repensa Jehová mandamientokuérare? b) ¿Mbaʼépa nde repensa umi léi ha konsého Jehová omeʼẽvare?

³ Iñimportanteterei ningo ndete rehechakuaa siémpre iporãveha ñaneñeʼẽrendu Jehovápe. Satanás oipota ñapensa hasyetereiha ñakumpli hag̃ua Jehová mandamientokuéra, ha javyʼavetaha ñandete jadesidíramo mbaʼépa oĩ porã ha mbaʼépa oĩ vai. Ymaite guive Satanás oñehaʼã umi hénte opensa hag̃ua upéicha (Génesis 3:1-6). Ha koʼag̃aite peve ojapo gueteri upéva.

⁴ ¿Siértopa la heʼíva Satanás? ¿Añetehápe piko hasyeterei ñakumpli hag̃ua Jehová mandamientokuéra? Nahaniriete voi. Ñamoĩmína peteĩ ehémplo ñantende porãve hag̃ua. Eñeimahinamína resẽha rejepasea peteĩ rresérva ekolóhika iporãitereívare, ha peteĩ párte retopa oĩha peteĩ rréha ndaikatúiva rehasa. Oiméne reikuaase mbaʼérepa oĩ upépe pe rréha. Péro upéi ehendu pe ótro ládope hatã okororõha peteĩ león. Koʼág̃a reikuaáma mbaʼérepa oĩ upépe pe rréha, ha katuete revyʼáta pórke upéva mediánte pe león nandeatakamoʼãi. Umi konsého oúva Jehovágui ojogua upe rréhape, ha pe león ikatu ñakompara Satanásre. Upévare la Biblia heʼi voi ñandéve: “Penearandúkena ha peñatende porã. Pene enemígo pe Diablo okorre hína oikóvo pende jerére, haʼete peteĩ león okororõva hína ha oñehaʼã omokõ oimeraẽvape” (1 Pedro 5:8).

⁵ Jehová oipotaiterei jaiko porã ha javyʼa. Upévare omeʼẽ ñandéve umi léi ha konsého pono ñanembotavy Satanás, ha koʼã mbaʼe ñandeprotehe ha ñanepytyvõ javyʼa hag̃ua (Efesios 6:11). Santiago oskrivi vaʼekue: “Pe omaña porãva Ñandejára léi perféktare omeʼẽva liverta ha ojapo upépe heʼíva, [...] ovyʼáta ojapóvo upéva” (Santiago 1:25).

 6. ¿Mbaʼépa ñanepytyvõta ñaime hag̃ua segúro siémpre iporãveha ñaneñeʼẽrendu Jehovápe?

⁶ Ñaneñeʼẽrendúramo Jehovápe jaiko porãve ha ñañemoag̃uive hese. Por ehémplo, katuete ñañeñandu porãve ñañemboʼéramo chupe kontinuadoite (Mateo 6:5-8; 1 Tesalonicenses 5:17). Jehová ningo omanda ñandéve jaha meme vaʼerãha rreunionhápe ñamombaʼeguasu hag̃ua chupe ha ñañomokyreʼỹ hag̃ua. Avei omanda ñandéve ñaipytyvõ hag̃ua umi héntepe oiko hag̃ua chuguikuéra Jesús disípulo (Mateo 28:19, 20; Gálatas 6:2; Hebreos 10:24, 25). Oiméne jahecháma heta vése mbaʼéichapa koʼã mbaʼe ñanepytyvõ ha ñanembovyʼa, ha jajepyʼamongetávo umívare jajeroviave Jehováre ha ñaime segúro siémpre iporãveha ñaneñeʼẽrendu chupe.

7, 8. ¿Mbaʼépa ñanepytyvõta ani hag̃ua jajepyʼapy umi situasión ijetuʼúva ikatúvare ñambohovái amo gotyove?

⁷ Ikatu ningo rejepyʼapy oñepresentárõ g̃uarã ndéve umi situasión ijetuʼuetereíva. Oiméramo reñeñandu upéicha, Jehová heʼi ndéve: “Che hína nde Jára Jehová. Umi mbaʼe che romboʼéva ningo ideprovéchota ndéve, che rogia reho hag̃ua tape porãre. Aipotaite ningo rejapo umi mbaʼe amandáva ndéve. Upéicharõ, nde pyʼaguapy ojoguáta peteĩ rríope, ha nde hustísia ojoguáta umi oláda marpeguápe” (Isaías 48:17, 18).

⁸ Ñaneñeʼẽrendúramo Jehovápe ñande pyʼaguapy ojoguáta peteĩ rrío osyrývape kontinuadoite, ha ñande hustísia, térã umi mbaʼe porã jajapóva, ojoguáta umi oláda marpegua núnka ndopáivape. Ñande ikatu ñandefiél toiko la oikóva. La Biblia heʼi: “Emoĩ Jehová pópe umi mbaʼe ndepyʼapýva, ha haʼe katuete nepytyvõta. Ni mbaʼevéicharõ ndohejamoʼãi pe iñeʼẽrendúva hoʼa” (Salmo 55:22).

9, 10. ¿Mbaʼépa jajapóta añetehápe jajeroviáramo Jehováre?

⁹ Reñemoag̃uivévo rehóvo Jehováre, resegíta rekakuaa iservísiope, térã rejeroviavéta rehóvo hese (Hebreos 6:1). ¿Mbaʼépa jajapóta añetehápe jajeroviáramo Jehováre?

¹⁰ Ndahaʼéi jaservi haguérente Jehovápe heta áñore katuete jajeroviavétamava hese. Jakakuaapa Jehová servísiope heʼise jarekoha chupe ñane amígoramo ha ñañehaʼãha jahecha opa mbaʼe haʼéicha (Juan 4:23). Apóstol Pablo heʼi vaʼekue: “Umi persóna ojaposéva hete oipotávante, siémpre opensa umi mbaʼe hete ojaposévare. Péro umi persóna ohejáva pe espíritu sánto ogia chupekuéra, siémpre opensa umi mbaʼe pe espíritu sánto oguerohorývare” (Romanos 8:5). Peteĩ kristiáno ojerovia mbaretéva Jehováre nopensái iñimportanteveha umi vyʼarã térã oreko heta mbaʼe. Upéva rangue oñekonsentra umi mbaʼe ikatúvare ojapo Jehová servísiope ha oñehaʼã odesidi porã opa mbaʼépe (Proverbios 27:11; elee Santiago 1:2, 3). Pe ojerovia mbaretéva Jehováre oikuaa porã mbaʼépa pe iporãva ha oĩ desidído ojapotaha upéva, upévare ndohejái avave ombotavy chupe ojapo hag̃ua ivaíva.

11, 12. a) ¿Mbaʼéichapa heʼi vaʼekue Pablo jaipuru vaʼerãha ñane akã? b) ¿Mbaʼe ehémplopa ikatu jaipuru ñantende porã hag̃ua mbaʼépa jajapo vaʼerã jajerovia mbarete hag̃ua?

¹¹ Ñañehaʼãmbaite vaʼerã jajerovia hag̃ua Jehováre ñande pyʼaite guive. Apóstol Pablo heʼi vaʼekue: “Péro umi okakuaapámava hoʼu tembiʼu iñaliméntova, haʼekuéra siémpre oipuru iñakã ha upéicha rupi oaprendéma odiferensia hag̃ua mbaʼépa iporã ha mbaʼépa ivai” (Hebreos 5:14). Griégope ojeʼe hag̃ua pe fráse “oaprendéma odiferensia”, ojepuru peteĩ palávra heʼiséva upe persóna tekotevẽha oñentrena ojapoháicha peteĩ atléta.

¹² Peteĩ atléta ikatupyry hag̃ua, oipuru vaʼerã ifuersakue ha itiémpo oñentrena porã hag̃ua. Ndaipóri voi ni peteĩ persóna haʼémava atléta onase guive. Ñanase vove ningo ndaikatúi gueteri jaipuru porã ñande jyva ha ñane retyma, péro mbeguekatúpe ñaaprendéma mbaʼéichapa ikatu jajagarra peteĩ mbaʼe ha ñaaprendéma avei jaguatakuaa hag̃ua. Péro peteĩ persóna oñentrenáramo, ikatu voi oiko chugui peteĩ atléta. Upéicha avei, ñañemotiémpo ha ñañentrena porã vaʼerã jajerovia mbarete hag̃ua Jehováre.

13. ¿Mbaʼépa ñanepytyvõta jahecha hag̃ua opa mbaʼe Jehová ohechaháicha?

¹³ Ko lívrope ñaaprendéma mbaʼépa jajapo vaʼerã jahecha hag̃ua opa mbaʼe Jehová ohechaháicha, ha ñaaprende avei jahayhuve hag̃ua imandamientokuéra. Upévare jadesidíta jave oimeraẽ mbaʼe ñañeporandu vaʼerã: “¿Mbaʼe léi térã konsého bíblicopa ikatu chepytyvõ ko situasiónpe? ¿Mbaʼéichapa ikatu asegi umíva? ¿Mbaʼépa Jehová ohaʼarõ ajapo ko situasiónpe?” (elee Proverbios 3:5, 6; Santiago 1:5).

14. ¿Mbaʼépa jajapo vaʼerã jasegi hag̃ua jajerovia mbarete?

¹⁴ Ñañehaʼã meme vaʼerã jasegi hag̃ua jajerovia mbarete Jehováre. Jaikuaaháicha, ñañalimenta porãramo ñanembaretéta, ha upéicha avei ñaaprendevévo jahávo Jehovágui jajeroviavéta hese. Ñañepyrũrõ guare jastudia la Biblia ñaaprende kuri umi mbaʼe iñimportantevéva oñeʼẽva Jehováre ha imandamientokuérare. Péro ohasávo pe tiémpo tekotevẽ ñaaprende umi mbaʼe hypyʼũvéva. Upévare apóstol Pablo heʼi vaʼekue: “Umi okakuaapámava hoʼu tembiʼu iñaliméntova”. Jajapóvo umi mbaʼe ñaaprendéva katuete ñanearanduvéta. La Biblia heʼi voi ñandéve: “Pe arandu ningo pe iñimportantevéva hína” (Proverbios 4:5-7; 1 Pedro 2:2).

15. ¿Mbaʼérepa jahayhu vaʼerã Jehovápe ha ñane ermanokuérape?

¹⁵ Peteĩ persóna osegi hag̃ua hesãi ha imbarete okuida meme vaʼerã ijehe. Upéicha avei, peteĩ kristiáno ojerovia mbaretéva osegi vaʼerã oñehaʼã oñemoag̃uive hag̃ua Jehováre. Upévare Pablo ñanemomanduʼa: “Pesegíkena peñatende pendejehe pehecha hag̃ua peikópa hína heʼiháicha umi enseñánsa Cristo omeʼẽ vaʼekue. Pesegíkena pehecha mbaʼeichagua persónapa peẽ” (2 Corintios 13:5). Jahechakuaa upéicharõ jajerovia mbarete vaʼerãha Jehováre, péro ndahaʼéi upévante. Iñimportanteterei avei jahayhuve jahávo chupe ha ñane ermanokuérape. Pablo heʼi vaʼekue: “Aikuaáramo entéro mbaʼe, ha che jerovia imbaretéramo amomýi hag̃ua umi montáña, péro ndaporohayhúi, la che ajapóva ndovaléi mbaʼeverã” (1 Corintios 13:1-3).

16. ¿Mbaʼépa oipota ñapensa Satanás?

¹⁶ Satanás oipota ñapensa Jehová arakaʼeve nañandeguerohorymoʼãiha. Haʼe oipota ñañedesanima ha ñapensa noñesolusionamoʼãiha umi provléma jarekóva. Ndoipotái jajerovia ermanokuérare ha ndoipotái javyʼa (Efesios 2:2). Haʼe oikuaa péicha ñanekangytaha, ha ikatuha ñañemomombyry Jehovágui. Péro Ñandejára omeʼẽ ñandéve peteĩ mbaʼe iporãitereíva ñandepuʼaka hag̃ua koʼãichagua pensamiéntore. Upéva haʼe hína ñane esperánsa.

17. ¿Mbaʼérepa iñimportantete ñane esperánsa?

¹⁷ Primera a Tesalonicenses 5:8-pe oñekompara pe esperánsa jarekóva peteĩ kásko oipuru vaʼekuére umi soldádo rrománo pe gerrahápe. Ko kásko orrepresenta “pe esperánsa jajesalvataha”. Pe esperánsa jarekóva Jehová promesakuérare, ñanepytyvõ ani hag̃ua ñañekonsentra umi mbaʼe ikatúvare ñanemokangy térã ñanemoñeñandu vai.

18, 19. ¿Mbaʼéichapa omombarete vaʼekue Jesúspe iñesperánsa?

¹⁸ Jesúspe omombarete vaʼekue iñesperánsa. Pe pyhare omano mboyve haʼe ohasa kuri heta mbaʼe ijetuʼuetereíva. Peteĩ iñamígo otraisiona chupe, ótro heʼi ndoikuaaiha chupe, ha oĩ avei oheja vaʼekue Jesúspe haʼeño rei. Avei umi hénte hetãmegua oñemoĩ hese ha ojerure hikuái ojetortura hag̃ua chupe omano meve. ¿Mbaʼépa oipytyvõ Jesúspe oaguanta hag̃ua koʼã mbaʼe? Hebreos 12:2 heʼi: “Haʼe siémpre opensa umi mbaʼe oñemoĩvare henonderãme, ha upéva ombovyʼa chupe. Upéicha rupi haʼe oaguanta omano meve ha notĩri omano hag̃ua pe yvyráre, ha koʼág̃a oguapýma hína Ñandejára deréchape”.

¹⁹ Jesús oikuaa vaʼekue osegíramo ifiél ombotuichataha Jehovápe, ha ohechaukataha Satanás ijapuha. Jesús ovyʼaiterei vaʼekue opensávo koʼã mbaʼe ohupytýtavare. Haʼe oikuaa vaʼekue oho jey potaitemaha yvágape oĩ hag̃ua Itúa ykére, ha upe esperánsa oipytyvõ chupe oaguanta hag̃ua. Ñande jasegi vaʼerã Jesús ehémplo ha ñañekonsentra meme pe esperánsa jarekóvare. Upéva ñanepytyvõta jagueropuʼaka hag̃ua oimeraẽ mbaʼe oñepresentáva ñandéve.

20. ¿Mbaʼépa ñanepytyvõta ñañekonsentra meme hag̃ua ñane esperánsare?

²⁰ Jehová ohecha mbaʼeichaitépa rejerovia hese ha reaguantaha umi mbaʼe rehasáva (Isaías 30:18; elee Malaquías 3:10). La Biblia opromete: “Haʼe katuete omeʼẽta ndéve umi mbaʼe ne korasõ oipotáva” (Salmo 37:4). Upévare, eñekonsentrákena siémpre ne esperánsare. Satanás oipota nderesarái upe esperánsagui, ha oipota epensa arakaʼeve noñekumplimoʼãiha Jehová promesakuéra. Péro ani reguerovia koʼã mbaʼe ha ani reheja umíva nemokangy. Ha reñandúramo saʼive rejeroviaha ñane esperánsare, ejerurékena Jehovápe tanepytyvõ. Nemanduʼákena Filipenses 4:6, 7 heʼívare: “Ani pejepyʼapyeterei mbaʼevére, síno oimeraẽ situasiónpe pejerure Ñandejárape penepytyvõ hag̃ua, peñemboʼe ha pejerure asývo chupe, ha peagradese avei chupe. Ha Ñandejára pyʼaguapy tuichavéva entéro mbaʼe yvyporakuéra ikatúvagui ontende, oñangarekóta pene korasõre ha umi mbaʼe pepensávare Cristo Jesús rupive”.

21, 22. a) ¿Mbaʼéichapa jaikóta pe múndo pyahúpe? b) ¿Mbaʼépa nde rejedesidi rejapotaha?

²¹ Pyʼỹi ejepyʼamongeta vaʼerã umi mbaʼe porãite ñaneraʼarõvare. Koʼẽrõite enterovéva ikatúta ñamombaʼeguasu Jehovápe oñondivepa (Apocalipsis 7:9, 14). Epensamína mbaʼéichapa jaikóta pe múndo pyahúpe. Katuete iporãitevéta opa mbaʼe ikatúvagui ñañeimahina. Upépe ndaiporimoʼãvéima Satanás ni idemoniokuéra, umi mbaʼasy opáta pára siémpre ha ndaiporimoʼãvéima omanóva. Upéva rangue, káda día ñañeñandu porãvéta ha javyʼaitereíta ñaime rupi upépe. Jajapóta ko yvýgui peteĩ paraíso, oĩta heta jaʼu vaʼerã ha peteĩ lugár neporãva jaiko hag̃ua. Ndaiporimoʼãvéima iñaña ha ivioléntova, upéva rangue, entéronte horýta ojupe. Ha tiémpo rire, enterovéva ‘oguerekóta pe liverta ijojahaʼỹva’ oñemeʼẽva Ñandejára raʼykuérape (Romanos 8:21).

²² Jehová ningo oikoseterei ne amigoitéramo. Upévare, ejapókena ikatúva entéro neñeʼẽrendu ha emombarete hag̃ua káda día ne amista hendive. ¡Hiʼãite ningo enterovetéva jasegi jaiko Ñandejára mborayhúpe pára siémpre! (Judas 21).