LEKSIÓN 17
¿Mbaʼeichagua persónapa Jesús?
Amáske ñaaprende umi mbaʼe Jesús heʼi ha ojapo vaʼekue ko yvy ape ári jaikuaa porãve mbaʼeichagua persónapa haʼe, ha upéva ñanemoag̃uive hese ha Itúa Jehováre. ¿Reikuaasépa mbaʼeichagua kualida porãpa oreko Jesús? ¿Mbaʼéichapa ikatu ñande jasegi iñehémplo?
1. ¿Mbaʼe mbaʼépepa ojojogua Jesús ha Itúa?
Jesús oĩrõ guare yvágape oaprende vaʼekue hetaiterei mbaʼe Itúa ohayhuetévagui oĩ rupi ijykére hetaiterei áñore. Upéicha rupi haʼe opensa, oñandu ha ojapo opa mbaʼe Ituaichaite (elee Juan 5:19). Jesús ningo ojoguaiterei Itúape, upévare haʼe voi heʼi vaʼekue: “Upe chéve cherecháva ohecháma avei pe Túape” (Juan 14:9). Amáske reikuaa mbaʼeichagua persónapa Jesús reikuaa porãvéta avei Jehovápe. Por ehémplo, Jesús oñeinteresaiterei vaʼekue la héntere, ha upéva ohechauka mbaʼeichaitépa Jehová oñeinteresa avei nderehe.
2. ¿Mbaʼéichapa Jesús ohechauka vaʼekue ohayhuha Jehovápe?
Jesús heʼi vaʼekue: “Ko múndo oikuaa hag̃ua che ahayhuha pe Túape, ajapopaite pe Túa omanda hagueichaite chéve” (Juan 14:31). Oĩrõ guare ko yvy ape ári Jesús ohechauka vaʼekue ohayhuetereiha Itúape ojapóvo opa mbaʼe haʼe ojeruréva chupe, ijetuʼúramo jepe sapyʼánte ojapo upéva. Avei ohechauka ohayhuetereiha Itúape oñeʼẽ memévo hese la héntepe ha oipytyvõvo chupekuéra oñemoag̃uive hag̃ua Jehováre (Juan 14:23).
3. ¿Mbaʼéichapa Jesús ohechauka vaʼekue ohayhuha la héntepe?
La Biblia heʼi Jesús ‘ohayhuetereiha yvyporakuérape’ (Proverbios 8:31). Haʼe ohechauka vaʼekue upéva omokyreʼỹ ha oipytyvõvo la héntepe ohaʼarõʼỹre chuguikuéra mbaʼeve. Ha ojapo umi milágro ndahaʼéi ohechauka hag̃uánte ipodér, síno ombyasýgui umi osufrívape (Marcos 1:40-42). Haʼe otrata enterovévape peteĩchante ha horyeterei opavavéndi, avei omeʼẽ konsuélo ha esperánsa umi ipyʼaporãvape. Haʼe oĩ vaʼekue dispuésto osufri ha omanóvo ñanderehehápe pórke ñanderayhueterei, ha koʼýte ohayhu umi oñehaʼãvape ojapo haʼe heʼíva (elee Juan 15:13, 14).
EJEPYʼAMONGETAMÍNA
Jahechavemína mbaʼeichagua persónapa rakaʼe Jesús ha mbaʼéichapa ñande avei ikatu jahechauka japorohayhuha ha ñandepojeraha Jesús ojapo haguéicha.
4. Jesús ohayhu Itúape
Iñehémplo rupive, Jesús ñanemboʼe mbaʼéichapa ñande ikatu jahechauka jahayhuha Ñandejárape. Elee Lucas 6:12; Juan 15:10 ha 17:26. Elee rire káda téxto erresponde ko porandu:
¿Mbaʼéichapa ñande avei ikatu jahechauka jahayhuha Jehovápe, Jesús ojapo haguéicha?
Jesús ohayhu Itúa yvagapeguápe ha pyʼỹinte oñemboʼémi chupe oñemongeta hag̃ua hendive
5. Jesús ojepyʼapy umi osufrívare
Jesús ojepyʼapyve vaʼekue umi héntere omeʼẽ rangue ijupe gústo. Ikaneʼõramo jepe, oipuru itiémpo ha iñenerhía oipytyvõ hag̃ua ótrope. Elee Marcos 6:30-44, ha upéi erresponde koʼã porandu:
Según ko rreláto, ¿mbaʼe mbaʼépa ojapo vaʼekue Jesús ohechaukáva ojepyʼapyha la héntere? (Ehecha jey versíkulo 31, 34, 41 ha 42).
¿Mbaʼérepa Jesús oipytyvõse vaʼekue chupekuéra? (Ehecha jey versíkulo 34).
Jesús ojoguaiterei Itúape, ¿mbaʼépa upéicharõ ñanemboʼe Jehovágui umi mbaʼe jahecha vaʼekue?
¿Mbaʼéichapa ñande avei ikatu jahechauka jajepyʼapyha ñande rapicháre Jesús ojapo haguéicha?
6. Jesús ipojera
Jesús ningo ndorekói vaʼekue heta mbaʼe, upéicharõ jepe haʼe siémpre ipojeraiterei vaʼekue. Ha ñanemokyreʼỹ ñandéve ñandepojera hag̃ua avei. Elee Hechos 20:35, ha upéi erresponde ko porandu:
¿Mbaʼépa heʼi vaʼekue Jesús ñanembovyʼataha?
Ehecha pe VIDÉO, ha upéi erresponde ko porandu:
¿Mbaʼéichapa ikatu ñandepojera ndajarekóiramo jepe heta mbaʼe?
¿Reikuaápa raʼe?
La Biblia ohechauka ñandéve ñañemboʼe vaʼerãha Jehovápe Jesús rérape (elee Juan 16:23, 24). Jajapóvo upéicha jahechauka jaagradeseha Jesúspe umi mbaʼe ojapo vaʼekuére ñanepytyvõ hag̃ua ikatu hag̃uáicha oiko ñandehegui Jehová amígo.
OĨRAMO HEʼÍVA: “Ñande ningo jasufri Ñandejára ñandeprova rupi”.
Jesús ojoguaiterei rupi Itúape, ¿mbaʼéichapa umi mbaʼe haʼe ojapóva ohechauka Jehová ndoipotaiha jasufri?
RRESÚMEN
Jesús ohayhueterei Jehovápe ha umi héntepe. Haʼe ojoguaiterei Itúape, upévare amáske jaikuaa porãve Jesúspe jaikuaa porãvéta avei Jehovápe.
Rrepáso
¿Mbaʼéichapa ikatu jahechauka jahayhuha Jehovápe, Jesús ojapo haguéicha?
¿Mbaʼéichapa ikatu jahechauka jahayhuha ñande rapichápe, Jesús ojapo haguéicha?
¿Mbaʼe kualida Jesús orekóvapa ndéve ndegustave?
EINVESTIGA HAG̃UA
Ehecha mbaʼe kualida Jesús orekóvapa ikatu jahechauka.
Ehecha mbaʼéichapa ikatu jahechauka jaagradeseha Jesús ojapo vaʼekuére ñanderehehápe ñañemboʼe jave Ñandejárape.
“¿Mbaʼérepa ñañemboʼe vaʼerã Jesús rérape?” (La Atalaya 1 de febrero de 2008)
¿Oñeʼẽpa la Biblia Jesús píntare?
Jesús otrata porãiterei vaʼekue kuñanguérape, ¿mbaʼépa ñande ikatu ñaaprende chugui?
“Ñandejára omombaʼe ha orrespeta kuñanguérape” (Ñemañaha Octubre-Diciembre de 2012)