Pe ñemoingove jey ñahaʼarõva: jajeroviápa oikotaha?

“Omanovaʼekue oikove jevy vaʼerã[...].” (HECHOS 24:15.)

1. Mbaʼérepa ndaikatúi jajehekýi ñemanógui?

“KO MÚNDOPE ndaipóri ojehekýiva impuésto jepaga ha ñemanógui.” Upéicha heʼi porã vaʼekue 1789-pe Benjamín Franklin, peteĩ polítiko norteamerikáno. Upéicharamo jepe, heta oĩ oporombotavýva ha ndopagáiva umi impuésto. Pe ñemanógui katu ndaikatúi jajehekýi; amo ipahápe ñanderupyty katuete. Arakaʼeve nahyg̃uatãigui, pe Seol térã sepultúra ohohápe opa omanovaʼekue, omokõ umi jahayhúvape (Proverbios 27:20). Upéicharamo jepe, oĩ esperánsa.

2, 3. a) Mbaʼérepa jaʼe ikatuha jajehekýi ñemanógui? b) Mbaʼépa jahecháta koʼág̃a?

² Ñandejára Ñeʼẽ ohechauka ñandéve umi omanovaʼekue oñemoingove jeytaha katuete, térã opuʼã jeytaha hikuái. Upéva ndahaʼéi hiʼã reínteva ñandéve, ha ndaipóri ojokovaʼerã Jehovápe ojapo hag̃ua upéva. Heta tapicha oikóva koʼág̃a, ikatúta ojehekýi ñemanógui. Mbaʼérepa jaʼe upéicha? Oĩtagui peteĩ “aty guasu” ohasátava pe “jehasa asy guasu[...]” hiʼag̃uimbaitémava koʼág̃a (Apocalipsis [Revelación] 7:​9, 10, 14, BNP). Upéva ohasa rire, ohaʼarõtama hikuái pe jeikove opaveʼỹva. Upévare, pe ñemano ikatu ndohupytýi koʼã tapichápe. Ha hiʼarive, ojepeʼaitétama pe ñemano (1 Corintios 15:26).

³ Koʼág̃a rupi, tekotevẽ jajerovia mbarete oikotaha pe ñemoingove jey, ojeroviahaguéicha apóstol Pablo. Haʼe heʼi: “Umi omanovaʼekue oikove jevy vaʼerã[...], tahaʼe imarangatúva, tahaʼe heko añáva” (Hechos 24:15). Jahechami mbohapy mbaʼe ikatúva ñañeporandu ko mbaʼére. Primero, mbaʼérepa ikatu jajerovia oñemoingove jeytaha omanovaʼekue? Segundo, mbaʼéichapa ikatu ñanemokyreʼỹ upéva? Ha tercero, mbaʼépa jajapovaʼerã koʼág̃a jaikuaágui upe mbaʼe?

Pe ñemoingove jey oikóta katuete

4. Mbaʼérepa pe ñemoingove jey tuichaiterei mbaʼe ojejapo hag̃ua Jehová oipotáva?

⁴ Oĩ heta mbaʼe omombaretéva ñande jerovia oñemoingove jeytaha umi omanovaʼekue. Pe iñimportantevevahína Jehová ojapovaʼerãha voi upéva. Ñanemanduʼavaʼerã Satanás oityhague pekádope kuimbaʼépe, ha upéicha rupi ouha ñemano. Upévare Jesús heʼivaʼekue Satanás rehe: “Haʼe ñepyrũmby guive yvyporakuéra jukaha” (Juan 8:​44, JMP). Péro Jehová opromete pe “kuña”, ojeʼéva umi ánhel yvagapegua rehe ha oñembojojáva peteĩ tembirekóre, orekotaha “iñemoñare” opyrũtava pe mbói akãre. Upéva heʼise ohunditaha Satanáspe (Génesis 3:​1-6, 15; Apocalipsis [Revelación] 12:​9, 10; 20:10). Omyesakãvévo Jehová mbaʼépa ojapóta ko Ñemoñare rupive, hesakã porã ñandéve ndahaʼeiha ohundítanteva Satanáspe. La Biblia heʼi: “Ñandejára Raʼy ouvaʼekue ombyai hag̃ua voi pe aña rembiapokue” (1 Juan 3:​8, BNP). Pe ñemano oúva Adán opekahaguére omoakãhína umi mbaʼe Jehová oipotáva Jesucristo ombyai, térã ohundi. Upearã, Jesús sakrifísio ha pe ñemoingove jey tuichaiterei mbaʼe (Hechos 2:​22-24; Romanos 6:​23).

5. Mbaʼéichapa oñemombaʼeguasúta Jehová réra pe ñemoingove jey rupive?

⁵ Jehová heʼíma omombaʼeguasutaha héra. Satanás omongyʼa Ñandejára réra ijapúrõ guare. Ijapu heʼírõ guare Adán ha Eva nomanomoʼãiha hoʼúramo pe yva (Génesis 2:​16, 17; 3:4). Ha ijapúnte oikóvo ogueroviaukávo pe álma nomanoiha peteĩ tapicha omano vove. Péro, pe ñemoingove jey rupive, Jehová ohechaukáta umi mbaʼe japu reiha. Hesakã porãta haʼe añoite ikatuha oñangareko ha omeʼẽ jey ñandéve ñande rekove.

6, 7. Mbaʼépa opensa Jehová pe ñemoingove jeýre, ha mbaʼéichapa jaikuaa upéva?

⁶ Jehovápe hiʼãiterei omoingove jey umi omanovaʼekuépe. La Biblia heʼi porã mbaʼéichapa Ñandejára oñandu ko mbaʼe. Jahechami mbaʼépa heʼivaʼekue Job upévare: “Oiméramo omanóva, oikove jevýnepa? Aikove pukukue ahaʼarõne, opi peve cheremimbyasy. Cherenóine nde ha che rohendúne, ha revyʼáne cherechávo, nde niko che Apohare” (Job 14:​14, 15). Mbaʼépa heʼise Job?

⁷ Job oikuaavaʼekue omano vove, opytavaʼerãha upéicha; ohaʼarõvaʼerãha ‘ohasa peve hemimbyasy’. Haʼe ojeroviaitereivaʼekue oñemoingove jeytaha. Mbaʼérepa ojeroviaiterei upévare? Oikuaágui Jehová remiandu; oikuaa hiʼãitereitaha Chupe ohecha jey pe hembiguái jeroviahápe. Upeichaite, Ñandejára omoingovese jey umi ihústovape. Ha avei omoingove jeýta heta tapichápe ikatu hag̃uáicha oikove opa ára g̃uarã ko Yvy iporãitereítavape (Lucas 23:43; Juan 5:​28, 29). Ha Ñandejára ojaposérõ, mávapa ojokóta chupe?

8. Mbaʼéichapa Jehová omombarete ñande jerovia pe ñahaʼarõvare?

⁸ Umi mbaʼe ñahaʼarõva oikopaitéta oñemoingove jey rupi Jesúspe. Omeʼẽrõ guare peteĩ diskúrso Aténaspe, Pablo heʼi: “[Ñandejára] omoĩ[...] peteĩ ára ombojovake hag̃ua opa yvypórape tekojojápe, peteĩ kuimbaʼe rupi, haʼe oiporavovaʼekue, ha upéva ohechauka opavavépe omoingove jeývo chupe” (Hechos 17:31). Oĩ umi ohendúvo Páblope oñeʼẽ pe ñemoingove jeýre oñembohorýva hese, péro oĩ avei oikóva chugui kristiáno, ohechávo ikatuha ojerovia upe heʼivaʼekuére. Omoingove jeýrõ guare Jesúspe, Jehová ojapo pe milágro tuichavéva oikóva koʼág̃a peve. Omoingove jey chupe omanohágui ha oiko chugui peteĩ espíritu ipoderósova (1 Pedro 3:​18). Oñemoingove jey rire, Jesúspe oñemeʼẽ hetave mbaʼe orekovaʼekuégui ou mboyve ko Yvy ape ári. Nomanovéimagui koʼág̃a ha oñemoĩgui chupe Jehová riremíntema, ikatu ojapo umi mbaʼe guasu omeʼẽva chupe Itúva ojapo hag̃ua. Jesús rupive Jehová omoingove jeýta enterovetépe, tahaʼe oiko hag̃ua yvágape térã Yvy ape ári. Haʼe voi heʼivaʼekue: “Chéko haʼe pe jeikove jevy ha pe tekove” (Juan 5:25; 11:​25, JMP). Omoingove jeývo Itaʼýrape, Jehová omombarete isiervokuéra jerovia oikotaha ko mbaʼe ohaʼarõva hikuái.

9. Mbaʼéichapa ohechauka la Biblia pe ñemoingove jey oikotaha katuete?

⁹ Pe ñemoingove jey ojejapovaʼekue heta renondépe ha oñemoĩ Ñandejára Ñeʼẽme. La Bíbliape oñemombeʼu porã mbaʼéichapa ocho ñande rapicha oñemoingove jey vaʼekue ko Yvy ape ári. Umi milágro ndojejapói kañyhápe, ha umíva apytépe oĩvaʼekue ojejapóva heta renondépe. Jesús omopuʼãvaʼekue Lázarope, cuatro día omano riréma. Ojapo upéva hetaiterei tapicha renondépe, ha umíva apytépe oĩnerakaʼe hogaygua, iñamígo ha ivesinokuéra. Ko mbaʼe ohechauka porã vaʼekue Ñandejára ombouhague chupe, ha umi ndaijaʼéiva hese jepe ohechakuaa upéva. Upévare oñehaʼã hikuái ojuka Jesús ha Lázarope (Juan 11:​17-​44, 53; 12:​9-​11). Upeichaite, jajeroviakuaa pe ñemoingove jey oikotaha katuete. Ñandejára omoĩuka Iñeʼẽme koʼã mbaʼe oikovaʼekue ikatu hag̃ua ñanembopyʼaguapy ha omombarete ñande jerovia.

Pe ñemoingove jey oikótava ñanembopyʼaguapy

10. Mbaʼéichapa ikatu ñanembopyʼaguapy umi ñemoingove jey omombeʼúva la Biblia?

¹⁰ Omano vove peteĩ jahayhúva, hiʼãpa ñandéve jajuhu peteĩ mbaʼe ikatúva ñanembopyʼaguapy? Upéva jajuhúta jaleévo umi ñemoingove jey la Biblia omombeʼúva. Jaleéramo ha jajepyʼamongeta umi mbaʼére jahecharõguáicha, omombaretéta ñande jerovia ñemoingove jeýre (Romanos 15:4). Umi mbaʼe ndahaʼéi ñemombeʼu guaʼúnte. Umi tapicha añetehápe oikovaʼekue. Jahechamíta koʼág̃a pe ñemoingove jey oñemombeʼu raẽvéva la Bíbliape.

11, 12. a) Mbaʼe ivaívapa ojehu peteĩ viúdape oikóva Saréptape, ha mbaʼépa ojapo ñepyrũrã? b) Mbaʼépa ojapo Jehová pe viúda rehehápe Elías rupive?

¹¹ Jahechami upe oikovaʼekue. Ojapóma heta semána proféta Elías opytahague peteĩ viúda rógape, oĩva Saréptape, ha oiko pe koty yvateguápe. Péro upe jave oiko heta mbaʼe ivaíva upe rupi. Areterei ndokyvéi ha hetaitereíma iñembyahýiva. Upéicha rupi hetáma avei oĩ omanóva. Elías rupive, Jehová ojapóma peteĩ milágro ko viúda rehehápe ojeroviahaguére hese. Haʼe ha imemby ohasáma heta ñembyahýi. Peteĩ tembiʼurãntema oreko Ñandejára omeʼẽrõ guare Elíaspe omboheta hag̃ua pe arína ha aséite orekovaʼekue hikuái. Koʼág̃a katu ojere vaive upe viúdape. Ohaʼarõʼỹve jave, imemby ou hasy ha omano. Ko kuñakarai opyta vaieterei. Ijetuʼúma voi chupe oiko imenaʼỹre, ha koʼág̃a katu omanóma avei imemby peteĩmi. Ombyasyeterei rupi, ombojáma upéva Elías ha Jehováre. Mbaʼépa ojapo pe proféta?

¹² Elías nomongavajúi chupe upévare, heʼi uvei: “Eru koʼápe nememby”. Ogueraha pe mitãme koty yvateguápe ha ojerure jey jey Ñandejárape tomoingove jey chupe. Ha ipahápe, Jehová ohendu iñemboʼe. Jajepyʼamongetami mbaʼeichaitépa oiméne ovyʼáraʼe Elías ohechávo ou jeyha pe mitã pytu ha oñepyrũha omaña jey. Pe proféta omeʼẽ pe mitã isýpe, ha heʼi chupe: “Kóina ápe, oikove jevýma nememby!”. Ovyʼaitereívo, ko kuñakarai heʼi: “Koʼág̃a katu aikuaa ndeha Ñandejára remimbou, ha oikoha pe Ñandejára heʼíva nde rupi” (1 Reyes 17:​8-24). Koʼág̃a ojeroviaitereive Jehová ha hemimboúre.

13. Mbaʼérepa ñanembopyʼaguapy jaikuaávo pe viúda memby oñemoingove jey hague?

¹³ Ajépa tuichaite ñanembopyʼaguapy jajepyʼamongeta ko mbaʼe oikovaʼekuére. Hesakã porãiterei Jehová oipeʼaitetaha ñemano, pe mbaʼe ñanemongyhyjetéva. Ñapensami mbaʼeichaitétapa upe ára heʼi vove Itaʼýrape oporomoingove jey hag̃ua ko Yvy tuichakuére. Hetaiterei ñande rapichakuéra ovyʼáta pe viúdaicha, ha avei yvágape ojevyʼaitereíta (Juan 5:​28, 29). Omanómapa ndehegui peteĩ nde rogaygua? Ajépa javyʼaite jaikuaávo Jehová omoingove jeytaha umi omanovaʼekuépe!

Pe ñemoingove jey ha ñande rekove koʼag̃agua

14. Mbaʼéichapa ñanepytyvõ ñande rekovépe pe ñemoingove jey ñahaʼarõva?

¹⁴ Mbaʼéichapa ñanepytyvõ ñande rekovépe pe ñemoingove jey ñahaʼarõva? Ikatu tuichaiterei ñanemokyreʼỹ jajepersegi térã jahasa jave jejopy vaíre. Satanás oipota jakyhyjeterei ñamanóramo g̃uarã ha upéicha jaheja rei ñande jerovia jajejopy vai jave. Ñanemanduʼavaʼerã Satanás heʼihague Jehovápe: “Yvypóra oĩ omeʼẽ hag̃uáicha oimeraẽ mbaʼe oikove hag̃ua rehehápe” (Job 2:4). Heʼírõ guare upéicha, oñeʼẽ vai opavave yvypórare, ñanderehe avei. Jaheja reítapa Ñandejárape jajejopy vaíramo? Jajepyʼamongetáramo pe ñemoingove jeýre, ñanembaretevéta jajapo meme hag̃ua ñande Ru yvagapegua oipotáva.

15. Mbaʼéichapa upe heʼivaʼekue Jesús Mateo 10:​28-pe ñanembopyʼaguapy ñaime vai jave?

¹⁵ Jesús heʼivaʼekue: “Ani pekyhyje umi pende reténte ojukávagui, ha ikatuʼỹva ohundi pene ánga. Pekyhyje uvei [Ñandejáragui], ikatúva ohundi pene ánga ha pende rete [Gehénape]” (Mateo 10:28). Ndaipóri mbaʼérepa jakyhyje hag̃ua Satanás térã umi yvypóra ipoguýpe oĩvagui. Añete, jaikuaa oĩha ikatúva ojapo mbaʼe vai ñanderehe, térã ikatu voi ñandejuka; upéicharamo jepe, upéva sapyʼamítante. Jehová omyatyrõta oimeraẽ mbaʼe vai ohasáva isiervokuéra, umíva apytépe ikatu omoingove jey chupekuéra. Chupe añoite ñamombaʼeguasuvaʼerã ha jakyhyje chugui. Haʼe añoite ikatu ñandejukaite ohundívo ñande rete ha ñane álma Gehénape. Péro Jehová ndoipotái oiko ñanderehe upéva (2 Pedro 3:9). Jaikuaágui jaikove jeytaha, ñande jaservíva Ñandejárape ndaipóri jakyhyje hag̃ua. Tekove opaveʼỹva ohaʼarõ umi oñemoĩvape Jehová ykére, ha ndaipóri mbaʼeve ikatúva ojapo Satanás ha hembiguaikuéra ojoko hag̃ua upéva (Salmo 118:6; Hebreos 13:6).

16. Jajeroviáramo ñañemoingove jeytaha mbaʼépa jajapóta?

¹⁶ Jajerovia añetéramo ñañemoingove jeytaha, jaiporu porãvéta ñande rekove. Jahechakuaáta “jaikovérõ ha ñamanórõ, Ñandejára mbaʼe[nteha] ñande” (Romanos 14:​7, 8). Upéva ñanemomýita jajapo hag̃ua Pablo heʼivaʼekue: “Aníkena peiko ko Yvy ári ojeikoháicha, peñemoʼambue uvei pembopyahúvo pendepyʼapypegua. Upéicha pehechakuaáta mbaʼépa pe [Ñandejára] rembipota, pe mbaʼe porã, ha pe teko porã oguerohoryetéva” (Romanos 12:​2, JMP). Heta tapicha ipyʼaropu hag̃uáicha oñehaʼã ohupyty opa mbaʼe oipotáva. Ohecha rupi hekove mbykyetereiha, ojapo opa mbaʼe rei vyʼa rapykuéri. Ha oiméramo jepe irrelihión, upéva noĩri Ñandejára ‘oguerohoryháicha’.

17, 18. a) Mbaʼéichapa Ñandejára Ñeʼẽ ohechauka mbykyha yvypóra rekove, péro mbaʼépa Ñandejára oipota ñandéve g̃uarã? b) Mbaʼérepa ñamombaʼeguasuse Jehovápe ára ha ára?

¹⁷ Añetehápe, mbyky ñande rekove, ha “pyaʼe ohasa”. Ikatu jaikove setenta térã ochenta áñonte (Salmo 90:10). Ñande rekove haʼete pe kapiʼipe hovyũ asýva, pe kuarahyʼã ohasa pyaʼéva térã peteĩ pytuhẽicha: koʼág̃a ñaime koʼápe ha koʼẽramo g̃uarã nañaimevéima (Salmo 103:15; 144:​3, 4). Péro Ñandejára nañandeʼapoivaʼekue jakakuaa ha ñañemoarandu hag̃ua sapyʼamínte, ha upéi ñañepyrũ hag̃ua ñandetuja, ñanderasy ha ipahápe ñamano. Jehová ñandeʼapo jaikovese hag̃uáicha opa ára g̃uarã. “Omoĩ avei yvypóra akãme mbaʼe paveʼỹ [tiempo indefinido, NM]”, heʼi la Biblia (Eclesiastés 3:​11). Ipyʼahatãpa Ñandejára ñandeʼapóvo jaikovese hag̃uáicha ha upéi ndohupytykái ñandéve upéva? Mbaʼevéicharõ, “Ñandejára niko mborayhu” (1 Juan 4:​8, BNP). Umi omanovaʼekuépe haʼe omoingove jeýta ikatu hag̃uáicha oikove opa ára g̃uarã.

¹⁸ Jajeroviágui jaikove jeytaha, jaikuaa jahupytytaha umi mbaʼe porã ñahaʼarõva. Natekotevẽi ñandepyʼatarova, jajapose rupi opa mbaʼe ikatúva. Oñehundipotaitémagui ko múndo, natekotevẽi jaiporupaite umi mbaʼe oĩva ipype (1 Corintios 7:​29-​31; 1 Juan 2:​17). Jaikuaa ñaneraʼarõha peteĩ mbaʼe ijojahaʼỹva ñañemoĩramo Ñandejára ykére. Ikatúta ñamombaʼeguasu chupe ha javyʼa oñondive opa ára g̃uarã. Upévare, ñamombaʼeguasúkena Jehovápe ára ha ára, omombaretéva ñande jerovia jaikove jeytaha.

Mbaʼéichapa ñambohováita?

• Mbaʼéichapa ñañeñanduvaʼerã jaikuaágui jaikove jeytaha?

• Mbaʼe mbaʼépa omombarete ñande jerovia oikotaha pe ñemoingove jey?

• Mbaʼéichapa ikatu ñanemokyreʼỹ jaikuaa jaikove jeytaha?

• Mbaʼéichapa ñanepytyvõ ñande rekovépe pe ñemoingove jey ñahaʼarõva?

[Nóta oĩva taʼanga ndive páhina 18]

Job oikuaavaʼekue Jehovápe hiʼãitereiha omoingove jey umi chupe oservívape

[Nóta oĩva taʼanga ndive páhina 20]

“Kóina ápe, oikove jevýma nememby!”