¿Rehechápa pe hustísia Jehová ohechaháicha?

1, 2. a) ¿Mbaʼeichagua inhustísiapa ohasa vaʼekue Nabot ha itaʼyrakuéra? b) ¿Mbaʼépa ñanemboʼéta umi mokõi ehémplo jahechátava ko artíkulope?

MOKÕI kuimbaʼe iñañáva oakusa peteĩ karaípe ojapo hague peteĩ mbaʼe ivaietereíva. Péro añetehápe ijapu hikuái. Upéicharõ jepe oñekondena a muérte pe kuimbaʼépe. Epensamíntema mbaʼéichapa oiméne oñeñandu umi persóna ndaijaʼéiva pe inhustísiare ohechávo ojejapiha itápe ko kuimbaʼe inoséntepe ha itaʼyrakuérape omano meve. Ko istória añetehápe oiko vaʼekue peteĩ Ñandejára siérvo iñeʼẽrendúvare hérava Nabot, rréi Acab ogovernaha tiémpope Israel (1 Rey. 21:11-13; 2 Rey. 9:26).

² Ko artíkulope jahecháta la oiko vaʼekue Nabot rehe. Avei ñañeʼẽta peteĩ mbaʼe vai ojapo vaʼekuére peteĩ ansiáno síglo primero guare. Koʼã mokõi ehémplo ohechaukáta ñandéve tekotevẽtereiha ñaneumílde ha ñaporoperdona ikatu hag̃uáicha jasegi Jehová ehémplo ha jahecha pe hustísia haʼe ohechaháicha.

3, 4. ¿Mbaʼeichagua persónapa raʼe Nabot, ha mbaʼérepa orrechasa rréi Acab oférta?

³ Nabot iñeʼẽrendu vaʼekue Jehovápe heta israelita osegíramo jepe pe ehémplo vai omoĩva rréi Acab ha hembireko iñañaitéva, rréina Jezabel. Haʼekuéra omombaʼeguasu pe dios fálsope hérava Baal, ha ndorrespetái Jehová Léi. Péro Nabot ovaloraiterei pe amista orekóva Jehovándi, haʼe omombaʼeve voi upéva hekovégui.

⁴ (Elee 1 Reyes 21:1-3). Acab oipota kuri Nabot parralty, upévare heʼi ojoguaseha chugui térã okambiase chupe ótro iporãvévare. ¿Mbaʼépa ojapo Nabot? Rrespetuósamente heʼi pe rréipe: “Che ningo ndaikatumoʼãi ameʼẽ ndéve pe erénsia oheja vaʼekue chéve umi che tuakuéra ypykue, pórke Jehová oproivi upéva”. Pe Léi heʼi umi israelita ndaikatuiha arakaʼeve ovende peteĩ erénsia ohejáva chupekuéra ifamília, upévare Nabot orrechasa pe oférta (Lev. 25:23; Núm. 36:7). Jahechaháicha, Nabot iñeʼẽrendu Jehovápe.

 5. ¿Mbaʼépa ojapo Jezabel okonsegi hag̃ua Nabot parralty?

⁵ Nabot orrechasa rire pe oférta, rréi Acab ha hembireko ojapo peteĩ mbaʼe ivaietereíva. Haʼekuéra oipotaiterei kuri pe parralty, upévare rréina Jezabel ojerure mokõi kuimbaʼépe heʼi hag̃ua Nabot ojapo hague peteĩ mbaʼe ivaietereíva. Upéi, ojejuka chupe ha itaʼyrakuérape. ¿Mbaʼépa ojapo Jehová ohechávo ko inhustísia vaiete?

6, 7. ¿Mbaʼéichapa Jehová ohechauka ohayhuha pe hustísia, ha mbaʼérepa upéva oime vaʼerã ombopyʼaguapyve Nabot hentekuéra ha umi iñamígope?

⁶ Pyaʼe voi Jehová omondo Elíaspe omeʼẽ hag̃ua peteĩ mensáhe Acábpe. Elías heʼi pe rréipe haʼeha mondaha ha asesíno. ¿Mbaʼépa odesidi ojapo Jehová? Ojejukataha avei Acab, hembireko ha itaʼyrakuérape, ojapo haguéicha hikuái Nabot rehe (1 Rey. 21:17-25).

⁷ Nabot hentekuéra ha umi iñamígo heta osufri umi mbaʼe vaiete Acab ojapo vaʼekuére. Péro Jehová ohecha pe inhustísia ha ndohejareíri la oikóva. Oiméne upéva okonsola raʼe Nabot hentekuéra ha iñamigokuérape. Péro upéi oiko peteĩ mbaʼe ijetuʼuetereíva chupekuéra tekotevẽtahápe ohechauka iñumildeha ha ojeroviaha hikuái Jehováre.

 8. ¿Mbaʼépa ojapo Acab oikuaa rire Jehová odesidíva, ha mbaʼépa oiko upe rire?

⁸ ¿Mbaʼépa ojapo Acab oikuaa rire Jehová odesidíva? La Biblia heʼi: “Acab ohendu rire koʼã mbaʼe, omondoro ijao ha omonde ao ohechaukáva oñembyasyha, ha oñepyrũ oajuna. Haʼe osegi oñeno ijao ohechaukáva reheve oñembyasyha, itindy ha ndovyʼaieterei oikóvo”. Acab oñeumilla Jehová renondépe. ¿Mbaʼépa oiko upe rire? Jehová heʼi Elíaspe: “Haʼe oñemomirĩ haguére che renondépe, ndaguerumoʼãi hiʼári umi mbaʼe vai haʼe oikove aja. Itaʼýra tiémpope aguerúta hogaygua ári umi mbaʼe vai” (1 Rey. 21:27-29, TNM; 2 Rey. 10:10, 11, 17). Jehová, pe omañáva “mbaʼépa oĩ ñane korasõme”, odesidi oiporiahuvereko Acábpe (Prov. 17:3, TNM).

 9. ¿Mbaʼérepa jaʼekuaa pe umilda oprotehéne hague Nabot hentekuérape ha umi iñamígope?

⁹ Nabot hentekuéra ha umi iñamígo ohendu Acab ha hogayguakuérape ndojekastigamoʼãiha Acab oikove aja. ¿Mbaʼéichapa oñeñandu hikuái? Katuete ningo tekotevẽ kuri ohechauka ojeroviaha Ñandejárare. Haʼekuéra iñumílderamo ikatúta oprotehe iñamista Jehovándi. ¿Mbaʼérepa jaʼe upéva? Pórke iñumílderamo noñemomombyrymoʼãi Jehovágui ha oikuaa porãta haʼe arakaʼeve ndojapomoʼãiha peteĩ inhustísia (elee Deuteronomio 32:3, 4). Ág̃a Nabot ha itaʼyrakuéra oikove jey vove, ihénte ha iñamigokuéra ohecháta mbaʼeichaitépa Jehová ihústo ha ovendesi chupekuéra (Job 14:14, 15; Juan 5:28, 29). Umi persóna ihústova oikuaa Ñandejára ohusgataha “enterovépe umi mbaʼe ojapo vaʼekuére. Haʼe heʼíta oimépa oĩ porã térã oĩ vai pe jajapo vaʼekue ñemiháme jepe” (Ecl. 12:14, TNM). Jehová odesidi mboyve peteĩ mbaʼe, ohecha raẽ ha oreko enkuénta umi mbaʼe ñande ndajaikuaáiva. Upévare, ñaneumílderamo japrotehe hína ñane amista Jehovándi.

10, 11. a) ¿Mbaʼe situasiónpepa tekotevẽta jahecha pe hustísia Jehová ohechaháicha? b) ¿Mbaʼéichapa pe umilda ñandeprotehe?

¹⁰ ¿Mbaʼépa rejapóta umi ansiáno odesidíramo peteĩ mbaʼe nerentendéiva térã nandegustáiva? Ñamoĩ chupe peteĩ ermáno rehayhúva operdeha ipriviléhio Jehová servísiope. Térã oñemosẽha kongregasióngui ne ména térã ne rembireko, ỹrõ ne família o peteĩ ne amígo rehayhúva ha nde nereiméi de akuérdo umi ansiáno odesidívare. Ikatu avei repensa umi ansiáno ojavy hague odesidívo nomosẽi kongregasióngui peteĩ ermáno opeka vai vaʼekuépe. ¿Mbaʼéichapa rerreaksionáta koʼã situasiónpe? Katuete ningo tekotevẽta rehechauka rejeroviaha Jehováre, avei rejeroviaha haʼe odirihi porãha iñorganisasión ñane tiémpope. ¿Mbaʼérepa jaʼekuaa peteĩ persóna iñumílderamo koʼã situasiónpe oproteheha hína iñamista Jehovándi? Pe umilda ningo ñanepytyvõ mokõi hendáicha. Jahechamína.

¹¹ Primero, ñaneumílderamo ñarrekonoséta ndaikatumoʼãiha jaikuaapaite la oikóva. Sapyʼánte ikatu ñapensa ñantende porãha peteĩ situasión, péro ani ñanderesarái Jehová oikuaaha mbaʼépa oĩ káda persóna pyʼapýpe (1 Sam. 16:7). Péicha jajapóramo jahechakuaáta tekotevẽha sapyʼánte ñakambia ñapensa lája. Segundo, jahasáramo peteĩ inhustísia térã jahecháramo ótro ohasaha upe situasiónre, ñañehaʼãmbaite vaʼerã ñaneumílde. Péva ñanepytyvõta ikatu hag̃uáicha ñaneñeʼẽrendu, ñanepasiénsia ha ñahaʼarõ Jehová tokorrehi pe situasión. La Biblia heʼi: “Oho porãve umi orrespetávape Ñandejárape”. Avei heʼi: “Umi iñañáva katu nosẽporãmoʼãi, ha ndaikatumoʼãi ombopukuve hekove” (Ecl. 8:12, 13, TNM). Jasegíramo ñaneumílde, ñasẽ porãta ñande ha avei ñande rapichakuéra (elee 1 Pedro 5:5).

12. ¿Mbaʼépa ñahesaʼỹijóta koʼág̃a, ha mbaʼérepa?

¹² Síglo primérope, umi kristiáno Antioquía de Siriagua ohasa peteĩ situasión tekotevẽ haguépe ohechauka iñumildeha ha oĩha dispuésto oporoperdonávo. Ñañeʼẽmína ko rrelátore ha jahecha mbaʼeichaite pevépa ñande ñaime dispuésto ñaporoperdonávo. Upéva ñanepytyvõta ñantende hag̃ua mbaʼéichapa Jehová osegi ojapo hustísia oipurúramo jepe yvypóra imperféktope.

13, 14. a) ¿Mbaʼe rresponsavilidápa oñemeʼẽ apóstol Pédrope? b) ¿Mbaʼéichapa Pedro ohechauka ipyʼaguasuha?

¹³ Apóstol Pedro haʼe kuri peteĩ ansiáno ikonosidoitereíva umi kristiáno ypykue apytépe. Jesús haʼe vaʼekue iñamígo ha omeʼẽ chupe heta rresponsavilida (Mat. 16:19). Por ehémplo, áño 36-pe oñasigna chupe opredika hag̃ua Cornelio ha umi oĩvape hógape. ¿Mbaʼérepa upe asignasión iñimportantete kuri? Pórke Cornelio ndahaʼéi judío. Haʼe, ihentekuéra ha umi iñamígo orresivírõ guare espíritu sánto, Pedro heʼi: “Koʼã kuimbaʼépe oñemeʼẽ avei espíritu sánto, ñandéve oñemeʼẽ haguéicha, ¿máva piko upéicharõ heʼíta ndaikatuiha ojevautisa chupekuéra ýpe?” (Hech. 10:47).

¹⁴ Áño 49-pe, umi apóstol ha ansianokuéra Jerusalengua oñerreuni ohecha hag̃ua tekotevẽtapa oñesirkunsida umi kristiáno ndahaʼéiva judío. Upe rreuniónpe Pedro pyʼaguasúpe heʼi ohecha hague umi kristiáno ndahaʼéiva judío orresiviha espíritu sánto. Upéva tuicha oipytyvõ pe Kuérpo Governántepe odesidi hag̃ua la ojejapótava (Hech. 15:6-11, 13, 14, 28, 29). Katuete ningo umi kristiáno judío ha umi ndahaʼéiva ovyʼáne raʼe Pedro ipyʼaguasu haguére. Oime vaʼerã ndahasýi kuri chupekuéra okonfia hag̃ua peteĩ kuimbaʼe ijerovia mbaretévare (Heb. 13:7).

15. ¿Mbaʼépa ojapo vai Pedro oĩ aja Antioquía de Síriape? (Ehecha pe taʼanga oĩva iñepyrũme).

¹⁵ Pe rreunión rire, Pedro oho Antioquía de Síriape. Upépe ohasa heta tiémpo umi ermáno ndahaʼéivandi judío. Oime vaʼerã mbaʼeichaitépa oaprende raʼe hikuái Pédrogui, pórke haʼe oikuaa heta mbaʼe Ñandejára Ñeʼẽgui ha iñexperiénsia heta. Péro peichaháguinte Pedro ndokaruvéi hendivekuéra. Katuete ningo hasyetereíne raʼe upéva umi ermánope, hiʼarive nontendéi hikuái mbaʼérepa Pedro ou okambia hendivekuéra. Unos kuánto ermáno judío, ijapytepekuéra Bernabé, osegi pe ehémplo vai omoĩva Pedro. ¿Mbaʼérepa peteĩ ansiáno ijerovia mbaretéva ou peichaite peve ojavy ha ojapo peteĩ mbaʼe ikatúva oporomoingo vaipa kongregasiónpe? Koʼág̃a avei, ikatu peteĩ ansiáno heʼi térã ojapo peteĩ mbaʼe ñanemoñeñandu vaíva. ¿Mbaʼéichapa ñarreaksionáta? ¿Ikatúpa ñanepytyvõ Pedro ehémplo?

16. a) ¿Mbaʼéichapa ojekorrehi Pédrope? b) ¿Mbaʼépa ikatu ñañeporandu?

¹⁶ (Elee Gálatas 2:11-14). Pedro okyhyje hapicha yvypóragui (Prov. 29:25). Haʼe oikuaa porã mbaʼépa Jehová opensa umi ndahaʼéivare judío. Péro oipyʼapyeterei chupe la ikatúva opensa umi kristiáno Jerusalengua ohechávo chupe ojeheʼaha umi kristiáno ndahaʼéivare judío. Apóstol Pablo heʼi Pédrope hovamokõiha. Pablo oĩ kuri pe rreunión ojejapo vaʼekuépe áño 49-pe Pedro odefendérõ guare umi kristiáno ndahaʼéivape judío (Hech. 15:12; Gál. 2:13). ¿Mbaʼéichapa orreaksionáta umi kristiáno noñesirkunsidáiva Pedro omboyke haguére chupekuéra? ¿Omboguapýtapa ijehe upe oikóva ha ohejáta ombotropesa chupekuéra? ¿Operdétapa Pedro ipriviléhio upe ojapo vaʼekuére?

17. ¿Mbaʼéichapa Pedro oñevenefisia Jehová operdona haguére chupe?

¹⁷ Apóstol Pedro iñumílde ha oasepta Pablo okorrehírõ guare chupe. La Biblia ndeʼíri Pedro operde hague algún priviléhio upe haguére. Upe rire, haʼe ohai kuri espíritu sánto rupive mokõi kárta opytáva Ñandejára Ñeʼẽme. Pe segunda kárta ohai vaʼekuépe oñeʼẽ Páblore ha ohenói chupe “ñane ermáno Pablo jahayhuetéva” (2 Ped. 3:15). Umi mbaʼe Pedro ojapo vai vaʼekue katuete omoñeñandu vai umi kristiáno ndahaʼéivape judío. Upéicharõ jepe Jesús, pe omoakãva umi kongregasión, osegi oipuru chupe (Efes. 1:22). Jesús ha Itúa operdona vaʼekue Pédrope. Heta ermáno ha ermána osegi kuri iñehemplokuéra operdonávo Pédrope, ha ndohejáivo umi ótro fálla ombotropesa chupekuéra.

18. ¿Mbaʼe situasiónpepa tekotevẽta jahecha pe hustísia Jehová ohechaháicha?

¹⁸ Umi ansiáno síglo primero guare ningo ndahaʼéi vaʼekue perfékto, ha umi ansiáno koʼag̃agua upéichante avei. La Biblia heʼi: “Enterovéva ningo jajavy heta vése” (Sant. 3:2). Péro, ¿mbaʼéichapa ñarreaksionáta ñane ermáno heʼi térã ojapóramo peteĩ mbaʼe ñanemoñeñandu vaíva? ¿Ikatútapa péicha jave jahecha pe hustísia Jehová ohechaháicha? Ñamoĩ chupe peteĩ ansiáno heʼiha opensa porãʼỹre peteĩ mbaʼe ñaneofendéva térã ñanemoñeñandu vaíva, ¿jatropesátapa upe haguére? ¿Ñapensátapa pe ermáno ndaikatuveimaha oservi kómo ansiáno? ¿Térãpa ñanepasiénsiata ha jahejáta Jesús, haʼéva pe omoakãva kongregasión, todesidi la oikótava? ¿Ñañekonsentrátapa pe ermáno fállare térãpa jarekóta enkuénta umi áño oservímava Jehovápe fiélmente? ¿Javyʼápa peteĩ ansiáno ofalláva ñanendive osegíramo oservi kómo ansiáno térã oñemeʼẽvérõ chupe priviléhio? Ñaĩramo dispuésto ñaperdonávo jahechaukáta jahechaha pe hustísia Jehová ohechaháicha (elee Mateo 6:14, 15).

19. ¿Mbaʼépa ñañehaʼãmbaite vaʼerã jajapo?

¹⁹ Entéro jahayhúva pe tekojoja jaipotaitereíma og̃uahẽ pe día opatahápe umi inhustísia oĩva Satanás ha imúndo aña káusare (Is. 65:17). Upéicharõ, jahasáramo peteĩ inhustísia ñarrekonose vaʼerã ndaikatumoʼãiha jaikuaa entéro mbaʼe oikóva peteĩ situasiónpe, ha ñaperdona umi ofallávape ñanendive. Jajapóramo koʼã mbaʼe jasegíta Jehová ehémplo ha jahecháta pe hustísia haʼe ohechaháicha.