“Jehová ivuenoiterei” orendive

Che rembireko ningo pyaʼe voi opilla jepi la oikóva, ha heʼi chéve mbeguekatumi che apysápe: “Natekotevẽi rehenói polisíape, napépe ja oúma hikuái”. Upe javete, peteĩ veíkulo opyta pe otél renondépe ha sapyʼaitérõ g̃uarã rojarrestáma mokõivéva. Péro Danièle cheavisa pyaʼe rupi, antrega jepe peteĩ ermánope oñongatu hag̃ua unos kuánto dokuménto.

Rojegueraha aja pe komisaríape, apensa mbaʼeichaitépa chepytyvõ areko rupi peteĩ tembireko ipyʼaguasuetéva ha ijespirituálva. Danièle ha che roñontendeterei voi, upévare heta vése roñopytyvõ rombohovái hag̃ua koʼãichagua situasión. Tamombeʼumína peẽme mbaʼéicha rupípa rovisita umi tetã ojeproivihápe kristianokuéragui opredika.

Anase vaʼekue 1930-pe peteĩ puevloʼi héravape Croix, opytáva nórte gotyo Fránciape. Che hentekuéra ningo ikatolikoiterei vaʼekue. Rohómi misahápe káda semána, ha che túa oipytyvõ meme kualkiér aktivida ojejapóvape pe kapíllape. Péro arekórõ guare 14 áñorupi, oiko peteĩ mbaʼe cheresapeʼáva ha ahechakuaa pe iglésia hovamokõiha.

Umi alemán ningo ojagarra kuri Francia pe segunda gérra mundiál aja. Upérõ pe paʼi ojapo umi sermón omokyreʼỹva enterovépe oipytyvõ hag̃ua pe goviérno de Vichy, oĩva umi nazi favórpe. Ni ndorogueroviaséi la heʼíva idiskúrsope upe paʼi. Péro upe tiémpope, ojapoháicha heta persóna Fránciape, kañyhapete rohendu jepi rrádio BBC roikuaa hag̃ua umi notísia oúva umi aliádogui. Péro septiembre de 1944-pe, pe paʼi ou okambiaite de vándo ha oorganisa peteĩ mísa oagradese hag̃ua Ñandejárape umi aliádo oavansa haguére. Chereja vaiete voi upéva. Upe rire aju ndajeroviavéi paʼikuérare.

Opamírente pe gérra che túa omano. Che ermána majór omenda ha oho oiko Bélgicape. Upévare che apyta añangareko che sýre. Aike ambaʼapo peteĩ fávrika de télape. Che patrón ha itaʼyrakuéra ikatolikoiterei vaʼekue. Haʼetévaicha kuri la ikatútava ahupyty heta mbaʼe upe emprésape, péro oñepresenta peteĩ situasión tekotevẽva ambohovái.

Che ermána Simónegui oiko testígo de Jehová. Haʼe ou orevisita 1953-pe, ha oipuru porã la Biblia omyesakã hag̃ua umi enseñánsa fálsa iglésia katólika omboʼéva. Umíva apytépe umi oñeʼẽva infiérnore, trinidáre ha ñane álma nomanoiha. Ñepyrũrã haʼe chupe ndoipuruiha pe Biblia katólika, péro ensegída ahechakuaa che reindy omboʼéva haʼeha pe añetegua. Simone ogueru vaʼekue chéve umi rrevísta Ñemañaha are guare, ha che alee meme umíva pyharekue ake mboyve. Pyaʼe ahechakuaa atopa hague pe añetegua, péro akyhyje aperdérõ g̃uarã che traváho añemoĩ rupi Jehová ykére.

Un tiémpore astudia kuri che kuéntare la Biblia ha umi artíkulo osẽva Ñemañaháme. Péro upéi adesidi aha Salón del Réinope. Upéicha rupi, ahecha mbaʼéichapa ojoayhu joa ermanokuéra kongregasiónpe ha upéva opokoiterei cherehe. Añepyrũ astudia la Biblia 6 mésere peteĩ ermáno iñexperiénsiava ndive, ha ajevautisa septiembre de 1954-pe. Tiémpo riremi, avyʼaiterei ahechávo oikoha avei Testígo che sy ha che ermána imitãvévagui.

Che sy omano unas kuánta semána oñepyrũ mboyve pe asambléa internasionál aha haguépe kuri, ha oiko vaʼekue Nueva Yórkpe 1958-pe. Aju rire, ndarekovéima rresponsavilida che rogapýpe. Upévare asẽ che traváhogui ha añepyrũ aservi kómo prekursór. Upe tiémpope, añemoĩ de nóvio peteĩ prekursóra iguapaitereívandi hérava Danièle Delie, ha romenda mayo de 1959-pe.

Danièle oñepyrũ vaʼekue oservi de tiémpo kompléto kampañaháre Bretáñape, mombyry hógagui. Tekotevẽ vaʼekue ipyʼaguasu opredika hag̃ua pórke umi lugárpe ikatolikoiterei la hénte, hiʼarive haʼe oñemaneha visikléta ári. Che ha Danièle rohechakuaa rojapo vaʼerãha la ikatúva guive oĩ reheve tiémpo, ndoroikuaáigui arakaʼetépa og̃uahẽta pe ára paha (Mat. 25:13). Danièle nopensáiva ijehénte, ha upéva orepytyvõiterei vaʼekue rosegi hag̃ua roservi de tiémpo kompléto.

Unos kuánto día romenda rire, añeasigna aservi hag̃ua kómo superintendénte de sirkuíto. Upe asignasiónpe rojeadapta roiko hag̃ua sensillomínte. Pe primera kongregasión rovisita hague oreko 14 puvlikadór, ha umi ermáno ndaikatúi vaʼekue orealoha. Upévare romoĩ vaʼekue kochõ pe Salón del Reino platafórmape roke hag̃ua upépe. Ndahaʼéi ningo la ikomodopáva péro ou porã kuri ore kolúmnape.

Heta ningo la tembiapo, péro Danièle ojadapta porã vaʼekue upe asignasiónpe. Pyʼỹinte haʼe cheraʼarõ vaʼekue ore autoʼípe tekotevẽramo kuri añerreuni ansianokuérandi. Upéicharõ jepe, haʼe arakaʼeve ndojekeháiva. Aservi kómo superintendénte de sirkuíto 2 áñorente, péro upe tiémpope rohechakuaa mbaʼéichapa iñimportánte peteĩ matrimónio nomokañýi mbaʼeve ojuehegui ha oñopytyvõ meme la tembiapópe (Ecl. 4:9).

Áño 1962-pe, roñeinvita rojapo hag̃ua pe kúrso de 10 mése Eskuéla de Galaádpe, ojejapóva Broóklynpe (Nueva York). Péva haʼe kuri pe kláse número 37, ha roime 100 alúmno. Roĩ kuri 13 matrimónio, ha roagradeseterei che rembirekóndi ikatu haguére roasisti oñondive ko eskuélape. Avyʼa chemanduʼávo areko hague pe oportunida ajeheʼa hag̃ua heta ermáno ifieletévare, por ehémplo Frederick Franz, Ulysses Glass ha Alexander Macmillan.

Pe kúrso rojapóvape ojeʼe jey jey oréve tekotevẽha roime aténto rohechakuaa hag̃ua la oikóva ore jerére. Upéicha rupi unos kuánto sábado kaʼaru, opa rire la ore kláse ha kómo párte del entrenamiénto roho rojepasea roikuaave hag̃ua pe siuda de Nueva York. Ha lunekue rojapo vaʼerã kuri peteĩ exámen eskríto romombeʼu hag̃ua mbaʼépa rohecha kuri. Heta vése orekaneʼõ rog̃uahẽ rire umi paséogui sábado pyhare. Péro pe gía oreasignáva Betel, ombaʼeporandu oréve ikatu hag̃uáicha oremanduʼa umi mbaʼe iñimportantevévare. Peteĩ sábado roguata vaʼekue tódo el kaʼaru pe siudáre. Upérõ rovisita kuri peteĩ ovservatório ha roaprende mbaʼépa umi meteóro ha mbaʼépa umi meteoríto. Pe muséo de istória naturálpe katu roaprende mbaʼépepa idiferénte peteĩ kaimán ha peteĩ jakare. Rog̃uahẽ rire Betélpe, ore gía oporandu: “¿Mbaʼépepa idiferénte peteĩ meteóro ha peteĩ meteoríto?”. Danièle ikaneʼõitereígui osẽ heʼi: “Vuéno, umi meteoríto ningo hãi guasuve”.

Roñesorprende roñeasignárõ guare roservi hag̃ua Betel de Fránciape, upépe roime vaʼekue che rembirekóndi mas de 53 áño. Aservi kómo koordinadór pe Komite de Sukursálpe 1976 guive, ha avisita avei heta tetã oĩva Áfricape ha Médio Oriéntepe ojeproivihápe Testigokuéragui opredika. Upe tiémpope roho kuri Gabónpe ha oiko orerehe la amombeʼúva iñepyrũme. Añetehápe ningo sapyʼánte apensa ndaikatuiha akumpli porã umi rresponsavilida oñemeʼẽva chéve, péro Danièle chepytyvõiterei vaʼekue akumpli porã hag̃ua heta asignasión.

Roñepyrũ guive roservi Betélpe rovyʼáma kuri. Danièle ningo oaprende vaʼekue inglés 5 mésepente, roho mboyve Galaádpe. Upéva oipytyvõ chupe oiko hag̃ua chugui peteĩ traduktóra ikatupyrýva. Oregustaiterei la rojapóva Betélpe, ha rovyʼavéntema umi mbaʼe ikatúvape roipytyvõ kongregasiónpe. Chembopyʼarory apensa jave umi tiémpo roviahárõ guare pe tren suvterráneo de Paríspe roho hag̃ua rombostudia la Biblia umi hénte oprogresa porãvape. Pyharepytéma rojevými ore reʼongue ore apére, péro rovyʼa ikatu haguére roipytyvõ umi persónape. Péro upéi derrepentete che rembireko ou nahesãivéi ha upévare ndaikatuvéi ojapo heta mbaʼe.

Áño 1993-pe roikuaa che rembireko orekoha kánser de máma. Ijetuʼu kuri la tratamiénto, pórke ojejapo vaʼerã chupe peteĩ siruhía ha kimioterápia. Ohasa rire 15 áño, oreko jey kuri kánser ha upérõ imbaretevéntema pe mbaʼasy. Péro haʼe ningo omombaʼeterei iñasignasión kómo traduktóra ha osegi ombaʼapo pe traváhope omehoramie jey rire isalu.

Danièle ningo hasyete kuri, péro ni upeichavérõ noropensáiva rosẽ Betélgui. Upépe ningo tekotevẽ kuri rombohovái umi situasión oñepresentáva, koʼýte oĩramo la noñemeʼẽiva enkuénta ijetuʼuetereiha la Danièle ohasáva (Prov. 14:13). Danièle orekóma vaʼekue mas de 75 áño, péro hory ha siémpre iñelegánteva. Oiméne upévare ndojekuaaguasúi hese hasyeteha. Haʼe opensa rangue ijehénte, oñehaʼã meme oipytyvõ hapichápe. Oikuaa porã ñañehaʼãramo ñaporohendukuaa tuicha ikatuha ñaipytyvõ umi osufrívape (Prov. 17:17). Danièle ndoikói vaʼekue oporoakonseha katuete, péro ojevale la oikuaávare oipytyvõ hag̃ua heta ermánape ani hag̃ua okyhyje pe kánsergui.

Roime rupi ko situasiónpe, roikuaa ndaikatuveimaha rojapo heta mbaʼe. Danièle ndaikatuvéi ombaʼapo tódo el día, péro oñehaʼã cheapoja heta hendáicha. Haʼe chepytyvõ rupi, ikatu aservi kómo koordinadór pe Komite de Sukursálpe 37 áñore. Por ehémplo, oñehaʼã ikatumiháicha oĩmbaite hag̃ua preparádo rokaru hag̃ua oñondive kotýpe ha roguereko hag̃ua peteĩ tiémpo roime hag̃ua trankílo káda día (Prov. 18:22).

Danièle núnka noñentregáiva, ikyreʼỹ guei. Péro upéi oaparese jey la kánser 3 veseha. Upéva orereja vaʼekue yvýre. Pe kimioterápia ha rradioterápia oheja vaiete voi chupe, upévare ndaikatúi kuri ni oguata porã. Ambyasyeterei vaʼekue ahechávo che rembireko ahayhuetéva ha haʼéva peteĩ traduktóra katupyry, naimanduʼaiha ni umi palávra heʼi vaʼerãre.

Ijetuʼu kuri rogueropuʼaka hag̃ua ko situasión, péro rosegi roñemboʼe. Roikuaa porã ningo Jehová arakaʼeve ndohejamoʼãiha rosufri ndaikatumoʼãirõ roaguanta (1 Cor. 10:13). Roñehaʼã avei romombaʼe la ojapóva Jehová oipytyvõ hag̃ua entéro isiérvope. Omeʼẽ ñandéve Iñeʼẽ, umi ermáno oñangarekóva ñande salúre oĩva Betélpe ha entéro umi ermáno mborayhúpe ñanepytyvõva.

Rojerure meme vaʼekue Jehovápe ohechaukamínte hag̃ua oréve mbaʼe tratamiéntopa ikatu roasepta. Og̃uahẽ peteĩ moménto ndorotopaihápe ni peteĩ tratamiénto ikatúva osegi che rembireko. Pe doktór oñatendéva 23 áñorema Danièle rehe ndaikatúi oexplika oréve mbaʼérepa haʼe odesmaja káda sesión de kimioterápia rire. Pe doktór ndoikuaavéi anga mbaʼépa ojapóta. Ko situasión orepokua ha orepykua, ha roñeporandúma voi mbaʼépepa opáta. Upéi rotopa peteĩ espesialísta ikatútava oñatende che rembirekóre. Rohechakuaa mbaʼéichapa Jehová orepytyvõ rombohovái hag̃ua ko provléma orepyʼapyetéva.

Ikatu hag̃uáicha rombohovái ko situasión rohechakuaa ndorojepyʼapýi vaʼerãha koʼẽrõ g̃uarãre. Jesús heʼi vaʼekue voi ‘káda día ñambohovái vaʼerãha heta mbaʼe vai’ (Mat. 6:34). Roñehaʼãmbaite roñekonsentra la iporãvare ha rochistea, upéva tuicha orepytyvõ. Por ehémplo, Danièle opytárõ guare 2 mése ojapoʼỹre kimioterápia, opukavy ha heʼi: “¡Añeñandu porãiterei!” (Prov. 17:22). Ijetuʼúramo jepe hendive, oñeñandu porã opurahéi hatã jave umi kántiko pyahu.

Danièle ningo ipositíva vaʼekue, ha péicha chepytyvõ añehaʼãve hag̃ua. Ore matrimónio odura kuri 57 áño ha añetehápe haʼe la oñangareko vaʼekue cherehe. Danièle ningo ndohechaukaséi vaʼekue chéve ni mbaʼéichapa ñambochyryry vaʼerã ryguasu rupiʼa. Péro ndaikatuvéirõ guare ojapo heta mbaʼe, añekampaneámante ajoheikuaa hag̃ua tembiporu, ao ha aprepara hag̃ua umi tembiʼu isensillovéva. Ajoka mimi jepi umi váso, péro avyʼaiterei ikatúgui aservi che rembirekópe.a

Heta mbaʼe porã aaprende la rohasávagui pe mbaʼasy káusare ha oreedavégui rohóvo. Primero, aaprende núnka nañanerembiapoitereíri vaʼerãha jahechauka hag̃ua mbaʼeichaitépa jahayhu ñane rembiayhúpe. Upévare jaaprovecha vaʼerã ñanembarete aja gueteri ñakomparti hag̃ua upe persónandi (Ecl. 9:9). Segundo, ani jaiko ñañekevranta rei umi mbaʼe naiñimportanteguasúivare, pono ohasa rei ñandehegui umi vendisión jarresivíva káda día (Prov. 15:15).

Ajepyʼamongetávo umi áño roservi vaʼekuére de tiémpo kompléto, ahechakuaa Jehová orevendesi hague roimoʼãʼỹháicha. Añeñandu pe salmísta oñeñandu haguéicha heʼírõ guare: “Jehová ivuenoiterei chendive” (Sal. 116:7).