Mitãrusukuéra, pende Apohare oipota pevyʼa

1, 2. ¿Mbaʼérepa ñanearandu hína ñahendúrõ ñande Apoharépe jadesidi mboyve? (Ehecha umi taʼanga oĩva iñepyrũme).

OIMÉRÕ nemitã gueteri katuete heta konséhoma oñemeʼẽ ndéve amo gotyove g̃uarã. Umi mboʼehára, umi konsehéro eskolár, ha hetave persóna ikatu heʼíma ndéve tekotevẽha rehupyty umi estúdio ijyvatevéva ikatu hag̃uáicha ndepláta heta. Péro, ¿mbaʼépa heʼi Jehová? Haʼe ningo oipota reñehaʼã meme eskuéla térã koléhiope pórke umíva nepytyvõta reñemantene hag̃ua (Col. 3:23). Péro Jehová oikuaa nemitã aja gueteri tekotevẽha redesidi heta mbaʼe iñimportánteva amo gotyove g̃uarã. Upearã haʼe omeʼẽ umi prinsípio bíblico ikatúva ndegia ha nepytyvõ reiko hag̃ua koʼã ára pahápe chupe ogustaháicha (Mat. 24:14).

² Ani nderesarái Jehová oikuaaha entéro mbaʼe. Haʼe oikuaa mbaʼépa oikóta amo gotyove, ha oikuaa porãiterei oñehundi potaitemaha ko múndo aña (Is. 46:10; Mat. 24:3, 36). Jehová ndekuaa avei ndéve. Oikuaa mbaʼépa nembovyʼa ha mbaʼépa nemoñeñandu vai. Péro umi konsého omeʼẽva yvyporakuéra ndorekói enkuénta Ñandejára Ñeʼẽ. Upévare, haʼetéramo jepe la iporãva, ndojegiái pe arandu añeteguávare (Prov. 19:21).

3, 4. ¿Mbaʼéichapa peteĩ konsého ogueraha vai Adán, Eva ha ifamiliarépe?

³ Heta tiémporema oñemeʼẽ umi konsého ndaideprovéchoiva. Satanás haʼe vaʼekue pe oñepyrũva oakonseha vai yvyporakuérape. Haʼe heʼi Évape ovyʼavetaha Adándi odesidíramo hikuái ijeheguieténte la ojapótava (Gén. 3:1-6). Péro añetehápe Satanás ojapo upéva openságui ijehénte. Haʼe oipota Adán, Eva ha umi mitã orekótava hikuái omboyke Jehovápe ha oadora ha iñeʼẽrendu chupe. Péro Satanás núnka ndojapóiva mbaʼeve yvyporakuéra rehehápe, Jehová hína la omeʼẽmbaitéva yvyporakuérape opa mbaʼe oikotevẽva. Haʼe omoĩ pe primera paréhape peteĩ hardín neporãvape, avei iperfékto kuri hikuái ha ikatu kuri oiko opa árare.

⁴ Ñambyasýramo jepe, Adán ha Eva naiñeʼẽrendúi kuri Jehovápe. Péicha haʼekuéra oñemomombyry pe persóna omeʼẽvagui chupekuéra hekove. ¿Mbaʼépepa opa? Upéva káusare sarambi oiko. Jaipoʼo rire peteĩ yvoty, katuete oúta ipiru ha omano, upéicha avei Adán ha Eva mbeguekatúpe ijeda ohóvo ha upéi omano. Entéro yvypóra oúva chuguikuéra ohasa asy avei, ha umíva apytépe ñaime avei ñande (Rom. 5:12). Hetaiterei persóna ningo nopenái Ñandejárare ha ojapónte la ojaposéva (Efes. 2:1-3). ¿Mbaʼépa oiko upe haguére? La Biblia heʼi ‘ndaiporiha arandu ikatúva ñanepytyvõ’ ñañemoĩramo Jehová kóntrape (Prov. 21:30).

 5. ¿Mbaʼéichapa Ñandejára ohechauka ojeroviaha yvyporakuérare, ha orekópa raʼe rrasón?

⁵ Jehová oikuaa porã kuri oĩtaha heta persóna oikuaasétava ha oservisétava chupe, umíva apytépe oĩ mitãrusu ha mitãkuña (Sal. 103:17, 18; 110:3). Koʼã mitãrusukuéra ningo ivaliosoiterei Jehovápe g̃uarã. ¿Ndépa reime hína umíva apytépe? Oimérõ upéicha katuete revyʼa rehupyty haguére “hetaiterei mbaʼe porã” Ñandejáragui, ha la nde rekove katu isentidove (elee Salmo 103:5; Prov. 10:22). Jahechamína 4 “mbaʼe porã” Ñandejára omeʼẽva ndéve. Umíva hína 1) pe aliménto espirituál, 2) amígo teete, 3) umi méta ikatúva rehupyty, ha 4) pe liverta teete.

 6. ¿Mbaʼérepa tekotevẽ ñañalimenta espirituálmente, ha mbaʼépa ojapo Jehová ñanepytyvõ hag̃ua?

⁶ Umi mymba ningo noñemeʼẽi enkuénta oikotevẽha Ñandejárare. Haʼekuéra ndorekói nesesida oikuaávo Ijapoharépe, péro ñande si tekotevẽ jajapo upéva (Mat. 4:4). Ñahendu jave Ñandejárape, jaikuaave heta mbaʼe, ñanearanduve ha javyʼave. Jesús heʼi vaʼekue: “Ovyʼa umi ohechakuaáva oikotevẽha Ñandejárare” (Mat. 5:3). Jehová omeʼẽ ñandéve la Biblia ha ojevale pe “tembiguái jeroviaha ha iñarandúva” rehe ikatu hag̃uáicha jareko umi puvlikasión ñanepytyvõva jajeroviave hag̃ua (Mat. 24:45). Ñande ñahenói aliménto espirituál koʼã puvlikasiónpe pórke omombarete ñande jerovia ha ñanemoag̃uive Jehováre. Añetehápe ningo jareko hetaiterei aliménto espirituál (Is. 65:13, 14).

 7. ¿Mbaʼéichapa nepytyvõ pe aliménto espirituál oúva Ñandejáragui?

⁷ Pe aliménto espirituál ikatu nemoarandu ha nepytyvõ epensa hag̃ua hekoitépe. Upéva nepytyvõta emboyke hag̃ua heta mbaʼe ikatúva ndeperhudika (elee Proverbios 2:10-14). Por ehémplo, nepytyvõta epilla hag̃ua japuha ojeʼe jave ndaiporiha peteĩ Apohare, térã pe pláta ha umi mbaʼerepy nembovyʼataha. Avei remboykéta umi deséo ha kostúmbre ndeperhudikáva. Upévare, ejapókena ikatúva guive nearandu hag̃ua ha epensa hag̃ua hekoitépe. Péicha ndete rehecháta Jehová nderayhuha ha oipotaha la iporãvéva ndéve g̃uarã (Sal. 34:8; Is. 48:17, 18).

 8. ¿Mbaʼérepa tekotevẽ reñemoag̃ui Ñandejárare koʼág̃ama voi, ha mbaʼéichapa upéva nepytyvõta amo gotyove?

⁸ Koʼẽrõite, entéro mbaʼe oĩva Satanás múndope oñehundíta. Jehová añoite ikatúta oñangareko ñanderehe ha omeʼẽta ñandéve umi mbaʼe ñaikotevẽva, por ehémplo umi hiʼupy káda día g̃uarã (Hab. 3:2, 12-19). Upévare koʼág̃a koʼýte iñimportánte reñemoag̃ui Ñandejárare ha eñehaʼã ejeroviave hese (2 Ped. 2:9). Rejapóramo péicha tahaʼe haʼéva situasiónpe, katuete reñeñandúta David oñeñandu haguéicha heʼívo: “Che siémpre areko Jehovápe che renondépe. Haʼe oĩ rupi che deréchape che núnka nañekevrantamoʼãi” (Sal. 16:8).

 9. a) ¿Mbaʼépa Jehová ojapo heʼiháicha Juan 6:44? b) ¿Mbaʼépa jaikuaáma hína ñakonose ypy guive peteĩ ermánope?

⁹ Reikuaa ramo jave peteĩ persóna ndahaʼéivape Testígo, ¿mbaʼépa hína la añetehápe reikuaáva chugui? Ikatu reikuaa héra ha ipínta, ha upévantema. Péro reikuaa ramo jave peteĩ ermánope, reĩ segúro ohayhuha Jehovápe. Avei Jehová ohecha hague hese umi mbaʼe iporãva, ha upévare oasepta hague chupe isiervokuéra apytépe (elee Juan 6:44). Tahaʼe haʼéva la iválle, térã mbaʼéichapa oñemongakuaa raʼe chupe, nde reikuaa heta mbaʼéma chugui ha haʼe avei oikuaa heta mbaʼe ndehegui.

10, 11. ¿Mbaʼépa oreko entéro persóna oservíva Jehovápe, ha mbaʼépa epensa upévare?

¹⁰ Reikuaa ñepyrũ guive peteĩ ermánope, rehechakuaáma pepensaha peteĩchaite umi mbaʼe iñimportantevévare. Oimérõ jepe káda uno peñeʼẽ diferénte idióma, mokõivéva peipuru ‘pe idióma ipotĩva’, haʼéva hína pe añetegua (Sof. 3:9). Upéva heʼise mokõivéva pejeroviaha Ñandejárare, pejegiaha umi mbaʼe haʼe oipotávare ha perekoha la mísma esperánsa. Koʼã mbaʼe penepytyvõta pekonfia hag̃ua ojuehe ha pemombarete hag̃ua pe amista odurátava opa árare.

¹¹ Readoráramo Jehovápe, añetehápe ikatu ere reguerekoha Ñandejára puévlope umi amígo iporãvéva. Opárupi oĩ ne amigokuerarã, neʼĩraramo jepe reikuaa enterovépe. ¿Oĩpa peteĩ persóna ndahaʼéiva Jehová siérvo orekóva ko rregálo ijojahaʼỹva?

12. ¿Mbaʼe mbaʼe iporãitereívapa ikatu hína rehupyty?

¹² (Elee Eclesiastés 11:9–12:1). ¿Oĩpa algúna kósa rehupytyséva? Ikatu oime reñehaʼã relee la Biblia káda día, térã rejeprepara porã rekomenta hag̃ua rreunionhápe. ¿Eñehaʼãpa avei reipurukuaave hag̃ua la Biblia predikasiónpe? ¿Mbaʼéichapa reñeñandu rehupyty jave koʼã méta remoĩva, térã ótro heʼi jave ndéve rejapo porãha? Katuete revyʼaiterei, pórke Jesús ojapo haguéicha remotenonde hína Jehovápe (Sal. 40:8; Prov. 27:11).

13. ¿Mbaʼérepa ikatu jaʼe iporãveha jaservi Ñandejárape ñamotenonde rangue umi mbaʼe ikatúva jahupyty ko múndope?

¹³ Remotenondéramo Jehová servísio, rejapo hína peteĩ mbaʼe nembovyʼátava ha isentídota la nde rekove. Pablo heʼi vaʼekue: “Pejepytaso mbaretékena, ani peheja mbaʼeve penemomýi, ha akóinte penerembiapo heta ñande Ruvicha servísiope, peikuaágui umi mbaʼe pejapóva chupe g̃uarã ndopytareimoʼãiha” (1 Cor. 15:58). Upéicharõ jepe, heta hénte omotenonde umi mbaʼe ikatúva ohupyty ko múndope, por ehémplo oñehaʼã ipláta heta térã ifamóso. Péro koʼã mbaʼe nombovyʼái chupekuéra. Ohupytýramo jepe umíva, heta vése noñeñanduporãi la ojapóvare (Luc. 9:25). Rréi Salomón ohasáva ohechauka siertoha upéva (Rom. 15:4).

14. ¿Mbaʼépa ikatu reaprende Salomón ojapo vaʼekuégui?

¹⁴ Salomón ningo haʼe vaʼekue peteĩva umi kuimbaʼe irrikovéva ha omanda guasuvéva oiko vaʼekue ko yvy ape ári. Haʼe okomprovase kuri peteĩ mbaʼe. Salomón heʼi: “Koʼág̃a aiko porã ha ajedivertíta, péicha aikuaáta mbaʼépepa ideprovécho upéva” (Ecl. 2:1-10). Salomón ojapo umi óga iporãitereíva ha odiseña umi hardín ha párke neporãmba jepéva. Añetehápe ojapo la oñantoháva chupe. ¿Oñekontentápa la ojapóvare? ¿Ombovyʼápa chupe? Haʼe ohecha entéro mbaʼe ojapóva ha heʼi: “Ahechakuaa opa mbaʼe vyroreiha”. Ha heʼi avei: “Ndaipóri mbaʼeve ovalemíva ko yvy ape ári” (Ecl. 2:11). ¿Rehechakuaápa siertoha la oaprendéva Salomón?

15. ¿Mbaʼérepa iñimportánte rejerovia meme, ha mbaʼéichapa upéva nepytyvõta heʼiháicha Salmo 32:8?

¹⁵ Oĩ persóna oaprendéva heta mbaʼe oñakãmbota rire ae, térã ohasa asy rire odesidi vai haguére. Péro Jehová ndoipotái oiko nderehe upéva. Haʼe oipota rehendu chupe ha rejapo la heʼíva ndéve. Upearã tekotevẽ rejerovia, péicha arakaʼeve nerembyasymoʼãi la redesidíva. Ñandejára núnka ‘ndahesaraimoʼãi umi mbaʼe rejapo vaʼekuégui ha mbaʼéichapa rehayhu héra’ (Heb. 6:10). Upévare eñehaʼã meme vaʼerã emombarete hag̃ua nde jerovia. Péicha edesidi porãta ha ndete ehecháta Ñande Ru yvagapegua oipotaha la iporãvéva ndéve g̃uarã (elee Salmo 32:8).

16. ¿Mbaʼérepa ñamombaʼe ha jaipuru porã vaʼerã pe liverta jarekóva?

¹⁶ Pablo heʼi vaʼekue: “Jehová hína peteĩ Espíritu; ha oĩháme Jehová espíritu sánto, upépe oĩ liverta” (2 Cor. 3:17). Jehová omombaʼeterei pe liverta, ha ndeapo rehayhu hag̃uáicha upéva. Péro haʼe oipota reipuru porã pe liverta omeʼẽva ndéve reho porã hag̃ua hese. Ikatu hína umi nde avegua ojepokuaa ohecha pornografía, hekovai, oapeligra hekove peteĩ depórtepe térã ojedroga ha omokõiterei. Ikatu opensa hikuái koʼã mbaʼe iñentretenidoha térã ombovyʼaha chupekuéra, péro pyʼỹinte opa vai. Por ehémplo, ou hasy hikuái, ndaikatuvéi opoi umi vísiogui ha ikatu voi umi mbaʼe ojapóva ojuka chupekuéra (Gál. 6:7, 8). Umi mitãrusu oñemaneháva péicha ikatu opensa ilivreha, péro ndaupeichaiete hína (Tito 3:3).

17, 18. a) ¿Mbaʼérepa jaʼekuaa jarekotaha pe liverta teete ñaneñeʼẽrendúrõ Ñandejárape? b) ¿Mbaʼérepa ikatu jaʼe Adán ha Eva ilivreve hague yvyporakuéra ñane tiempopeguágui?

¹⁷ Ñaneñeʼẽrendúramo Jehovápe ou porãitereíta ñandéve. Por ehémplo, ñanepytyvõ ñaneresãi hag̃ua ha omeʼẽ ñandéve pe liverta teete (Sal. 19:7-11). Reipuru porãramo pe liverta erekóva, ejegiáta Ñandejára léi ha iprinsipiokuérare redesidíta jave. Avei rehechaukáta nde tuakuérape ha Ñandejárape neakãguapyha. Péicha nde túa ha nde sy okonfiavéta nderehe ha omeʼẽvéta ndéve liverta. Ndahaʼéi upéva añónte, Jehová opromete koʼẽrõitéma omeʼẽtaha entéro isiérvope pe liverta iporãvéva, Iñeʼẽme oñehenóiva “Ñandejára raʼykuéra liverta ijojahaʼỹva” (Rom. 8:21).

¹⁸ Adán ha Eva oreko vaʼekue peichagua liverta. Peteĩ mbaʼe añoite Ñandejára oproivi vaʼekue chuguikuéra oikórõ guare pe hardín de Edénpe. Haʼekuéra ndoʼúi vaʼerã kuri peteĩ frúta (Gén. 2:9, 17). ¿Repensápa Ñandejára iñinhústo térã ojopyeterei hague hendivekuéra? Ojekuaa porãiterei ndaupéichai hague. Ñapensamíntena mboy léipa yvyporakuéra ojapo ha ojopy umi héntepe osegi hag̃ua. Jehová katu omeʼẽ peteĩ léi añoite Adán ha Évape.

19. ¿Mbaʼéichapa ñanepytyvõ Jehová ha Jesús jahupyty hag̃ua pe liverta teete?

¹⁹ Ñandetrata lájare Jehová ohechauka iñaranduetereiha. Omeʼẽ rangue ñandéve heta léi, kon pasiénsia ñanemboʼe jasegi hag̃ua pe léi oúva mborayhúgui. Ñanemboʼe jajegia hag̃ua ikonséhore ha ndajachaʼéi hag̃ua la ivaívare (Rom. 12:9). Pe Sermón del Móntepe, Itaʼýra Jesús ñanepytyvõ kuri ñantende hag̃ua mbaʼérepa umi hénte ojapo la ivaíva (Mat. 5:27, 28). Og̃uahẽ vove pe múndo pyahu Jesús ñanegovernáta, pórke haʼe hína pe Rréi Ñandejára Rreinopegua. Upe tiémpope osegíta ñanemboʼe ikatu hag̃uáicha jahecha la iporãva ha ivaíva haʼe ohechaháicha (Heb. 1:9). Jesús ñanepytyvõta ñandeperfékto hag̃ua ñande retépe ha ñapensa lájape. Ñañeimahinamíntena mbaʼeichaitépa igústota nañandestiravéi vove umi mbaʼe vai, ha ndajahasaʼasyvéi vove ñaneimperfékto rupi. Upérõ g̃uarã, javyʼáta ikatútagui jareko pe “liverta ijojahaʼỹva” Jehová oprometéva.

20. a) ¿Mbaʼéichapa Jehová oipuru iliverta? b) ¿Mbaʼéichapa ikatu ñahaʼanga chupe?

²⁰ Pe múndo pyahúpe, oñemoĩta avei límite pe liverta jarekótavape. ¿Mbaʼéichapa oikóta upéva? Siémpre jajapóta entéro mbaʼe jahayhúgui Ñandejárape ha ñande rapichakuérape. Ñandegia jave pe mborayhu ñahaʼanga hína Jehovápe. Jehová liverta ningo ndorekói límite, upéicharõ jepe haʼe ohechauka ñanderayhuha opa mbaʼe ojapóvape, ha upéva ojekuaa ñandetrata lájare (1 Juan 4:7, 8). Upévare, jaikuaa hag̃ua mbaʼépa pe liverta teete ñañehaʼã vaʼerã ñahaʼanga Ñandejárape.

21. a) ¿Mbaʼépa David heʼi kuri Jehovápe? b) ¿Mbaʼépa jahecháta pe sigiénte artíkulope?

²¹ ¿Reagradesépa Jehovápe opa mbaʼe porã omeʼẽvare ndéve? Haʼe ningo omeʼẽ ndéve pe aliménto espirituál, amígo teete, umi méta iporãva, pe liverta ijojahaʼỹva jarresivítava amo gotyove ha hetave rregálo iporãitereíva (Sal. 103:5). Oiméne reñeñandu David oñeñandu haguéicha oñemboʼérõ guare, ojechaukaháicha Salmo 16:11-pe: “Nde reikuaauka chéve mbaʼe tapérupipa aguata vaʼerã ahupyty hag̃ua jeikove opaveʼỹva. Ne renondépe che aikóta vyʼápe opa árare, nde cheguereko rupi nde ykére”. Pe artíkulo oúvape ñaaprendéta hetave mbaʼe Salmo 16-gui. Umi mbaʼe ñanepytyvõta jaikuaa hag̃ua mbaʼéichapa ikatu jahupyty pe jeikove iporãvéva.