¡Jaity yvýre entéro pensamiénto oñemoĩva Ñandejára ñanemboʼévare!

 1. ¿Mbaʼe konséhopa omeʼẽ vaʼekue apóstol Pablo umi unhídope?

APÓSTOL Pablo omeʼẽ vaʼekue peteĩ konsého umi kristiáno síglo primérope guarépe. Haʼe heʼi chupekuéra: “Anive pehaʼanga umi hénte oĩva ko múndope” (Rom. 12:2). ¿Mbaʼére piko haʼe omeʼẽ rakaʼe ko konsého imbaretetéva umi kuña ha kuimbaʼe ipyʼaite guive oservívape Jehovápe, ha oñeunhívape espíritu sánto rupive? (Rom. 1:7).

2, 3. a) ¿Mbaʼépa ojapo Satanás ñanemomombyry hag̃ua Jehovágui? b) ¿Mbaʼéichapa ikatu jaipeʼa ñandejehegui umi mbaʼe vai “hapo pypukúva” ñande pype?

² Apóstol Pablo ningo ojepyʼapy vaʼekue hesekuéra, pórke amalisia umi pensamiénto vai ojeguerekóva Satanás múndope oafektáma hína kuri unos kuánto kristiánope (Efes. 4:17-19). Ha upéva ikatu hína oiko enterove rehe. Satanás ningo ogoverna hína ko múndo ha itarovaite ñanemomombyryse Jehovágui, ha upearã oipuru heta kláse ñuhã. Por ehémplo, oiméramo ñande ñañemoimportantese térã ñanefamosose, Satanás ikatu oipuru upéva ñanemomombyry hag̃ua Jehovágui. Haʼe ikatu avei oipuru umi mbaʼe jahasa vaʼekue, ñande kultúra ha edukasión jarresivi vaʼekue ikatu hag̃uáicha ñapensa haʼe opensaháicha.

³ ¿Ikatúpa ñande jaipeʼa ñandejehegui umi kondúkta térã pensamiénto vai “hapo pypukúva” ñande pype? (2 Cor. 10:4). Jahechami mbaʼéichapa Pablo okontesta upéva: “Roity yvýre umi pensamiénto japu ha opa mbaʼe ijyvatéva ha ojokóva umi héntepe oikuaa hag̃ua Ñandejárape; entéro pensamiénto roguereko ore poguýpe peteĩ présoicha, ikatu hag̃uáicha iñeʼẽrendu Crístope” (2 Cor. 10:5). Jehová rupive ñande ikatu hína ñakambia ha jaipeʼaite ñandejehegui umi kondúkta térã pensamiénto vai jarekóva. Peteĩ pohã ikatuháicha ipuʼaka peteĩ venénore, péicha avei Ñandejára Ñeʼẽ ikatu ñanepytyvõ ani hag̃ua ojapo ñanderehe mbaʼeve Satanás múndo venéno.

 4. ¿Mbaʼe kámbiopa tekotevẽ vaʼekue jajapo jaservi hag̃ua Jehovápe?

⁴ Ñapensamíntena umi mbaʼe tekotevẽ vaʼekue ñakambia ñaaprendérõ guare mbaʼépa omboʼe la Biblia ha jajedesidi jaservitaha Jehovápe. Heta oĩva ñande apytépe, oheja vaʼerã kuri heta mbaʼe vai ojapo vaʼekue oikóvo ymave ikatu hag̃uáicha oservi Jehovápe (1 Cor. 6:9-11). Ñande ningo jaagradeseterei Jehovápe ñanepytyvõ haguére jahejaite hag̃ua umi mbaʼe vai jajapo vaʼekue.

 5. ¿Mbaʼépa hína umi mokõi mbaʼe jajapo vaʼerã heʼiháicha Romanos 12:2-pe?

⁵ Péro aníkena arakaʼeve ñapensa natekotevẽveimaha ñakambia mbaʼevépe. Ndajajapovéiramo jepe umi pekádo ivaietereíva jajapo vaʼekue jajevautisa mboyve, tekotevẽ gueteri jasegi ñamboykete oimeraẽ mbaʼe ikatúva ojapoka jey ñandéve umi pekádo vaiete ymave jajapo vaʼekue. ¿Ha mbaʼéichapa ikatu jajapo upéva? Apóstol Pablo omombeʼu ñandéve: “Anive pehaʼanga umi hénte oĩva ko múndope, pekambia guei pepensa lája” (Rom. 12:2). Upearã jajapo vaʼerã mokõi mbaʼe. Primero ndovalevéima ‘ñahaʼanga umi hénte oĩvape ko múndope’ térã jaheja chupekuéra ñanekambia. Segundo, tekotevẽ ‘ñakambia ñapensa lája’ térã ñane kondúkta.

 6. ¿Mbaʼépa ñaaprende Jesús heʼi vaʼekuégui Mateo 12:43-45-pe?

⁶ Apóstol Pablo heʼírõ guare ñakambia vaʼerãha noñeʼẽi vaʼekue ñanepíntarente. Ñakambia vaʼerã ñande pyʼaite guive (ehecha pe rrekuádro “¿Ñakambiaite térãpa jajedisfrasánte?”). Tekotevẽ ñakambiaite ñapensa lája, upéva heʼise ñakambia ñane kondúkta, umi mbaʼe ñañandúva ha jajaposéva. Upévare káda uno ñañeporandu vaʼerã: “¿Mbaʼeichagua kámbiopa ajapo hína ajoguave hag̃ua Jesúspe? ¿Akambia guaʼúntepa ajechauka hag̃ua ótrope, térãpa che pyʼaite guive voi akambia hína?”. Iñimportánte ningo ñambohovái porã koʼã pregúnta. Mateo 12:43-45-pe jatopa Jesús heʼi hague mbaʼépa tekotevẽ jajapo (elee). Umi mbaʼe heʼi vaʼekue ñanemboʼe peteĩ mbaʼe iñimportánteva: Ndahaʼéi jaipeʼánte vaʼerã ñane akãgui umi pensamiénto vai, síno tekotevẽ ñamoinge hekovia umi pensamiénto ogustáva Ñandejárape.

 7. ¿Mbaʼéichapa ikatu ñakambia térã ñambopyahu ñande pyʼaite guive ñapensa lája?

⁷ ¿Ikatu piko ñakambia térã ñambopyahu ñande pyʼaite guive ñapensa lája? La Biblia ombohovái ñandéve: “Akóinte pembopyahu vaʼerã pepensa lája, ha pemonde vaʼerã pe teko pyahu ojejapo vaʼekue Ñandejára oipotaháicha ha oñemopyendáva tekojoja ha jerovia teetépe” (Efes. 4:23, 24). Upéicharõ, si ikatu ñakambia, péro ndahaʼéi hína la ifasilpáva. Ñande ndahaʼéi jajejokónteva ani hag̃ua jareko umi deséo vai ha ani hag̃ua jajapo umi mbaʼe ivaíva. Tekotevẽ voi ‘ñambopyahu ñapensa lája’. Upéva heʼise ñakambia vaʼerãha umi mbaʼe jajaposéva térã ñandegustáva, ñane kondúkta ha mbaʼépa ñanemomýi jajapo hag̃ua peteĩ mbaʼe. Jajapo hag̃ua upéva ñañehaʼã vaʼerã kontinuadoite.

8, 9. ¿Mbaʼéichapa peteĩ ermáno rembiasakue ohechauka tekotevẽha ñakambia ñande pyʼaite guive?

⁸ Koʼág̃a jahechamíta peteĩ ermáno ehémplo. Haʼe ningo omokõiterei vaʼekue yma ha iviolénto avei, péro upéi ou okambia ha ojevautisa. Haʼe oiko vaʼekue peteĩ puevloʼípe ha enterove ivesinokuéra ohecharamoiterei umi kámbio haʼe ojapóva. Péro peteĩ kaʼarúpe, haʼe ojevautisa riremínte, ombohovái peteĩ mbaʼe nohaʼarõietéva. Peteĩ okaʼúva ou hógape ha odesafia chupe oñorairõ hag̃ua hendive. Primerorã pe ermáno ojejoko ha noñorairõi hendive. Péro upéi pe okaʼúva oñepyrũ oñeʼẽ vai Jehová rérare, ha upépe pe ermáno pyahu noñaguantavéima ha oho oinupã chupe. ¿Mbaʼérepa haʼe ojapo raʼe upéva? Ijestúdio de la Biblia oipytyvõ kuri chupe ojejoko hag̃ua pono iviolénto, upéicharõ jepe haʼe ndaikatúi gueteri ombopyahu opensa lája. Ha upéva ohechauka haʼe nokambiái hague gueteri ipyʼaite guive.

⁹ Upéicharõ jepe, ko ermáno noñentregái ha osegi oñehaʼã okambia (Prov. 24:16). Umi ansianokuéra oipytyvõ chupe, ha haʼe osegi oprogresa porã oiko peve chugui ansiáno. Upéi peteĩ kaʼarúpe, oĩ jave Salón del Reino renondépe, haʼe ombohovái jey la mísma situasión oiko vaʼekue hese. Peteĩ okaʼúva oinupãʼíntema hína kuri peteĩ ansiánope. ¿Ha mbaʼépa ojapo ko ermáno? Pyʼaguapýpe ha trankílo porãnte oñeʼẽ pe okaʼúvandi ha oñehaʼã otrankilisa chupe. Upe rire oipytyvõ pe okaʼúvape oho hag̃ua hógape. ¿Mbaʼérepa ko ermáno ojapo upéicha ko vuéltape? Pórke ko ermáno ombopyahúma la opensa lája. Haʼe ningo añetehápe okambiáma ipyʼaite guive ha oiko chugui peteĩ persóna iñumíldeva ha ipyʼaguapýva, ha ojapo haguére upéicha oñemombaʼeguasu Jehovápe.

10. ¿Mbaʼépa tekotevẽ jajapo ñakambia hag̃ua ñande pyʼaite guive?

¹⁰ Koʼã kámbio ningo ndoikói peteĩ tesapirĩme térã ñañehaʼãʼỹre. Sapyʼánte tekotevẽ voi ñañehaʼãmbaite heta áñore ñakambia hag̃ua (2 Ped. 1:5). Koʼã kámbio ndoikomoʼãi avei jaservi haguérente Jehovápe heta tiémpore. Tekotevẽ jajapo ikatúva entéro ñakambia hag̃ua ñande pyʼaite guive. ¿Mbaʼépa ñanepytyvõta upearã? Jahechamína koʼág̃a mbaʼe mbaʼépa jajapo vaʼerã.

11. ¿Mbaʼéichapa ñañemboʼéramo ikatu ñanepytyvõ ñakambia hag̃ua ñapensa lája?

¹¹ Ñañemboʼe. Upéva hína pe primer mbaʼe iñimportánteva jajapo vaʼerã. Ñañemboʼe vaʼerã pe salmísta ojapo haguéicha: “Ñandejára, emeʼẽmína chéve peteĩ korasõ ipotĩva, ha peteĩ ménte ipyahúva chepytyvõtava siémpre ajapo hag̃ua iporãva” (Sal. 51:10). Ñande ñarrekonose vaʼerã tekotevẽha ñakambia ñapensa lája ha jajerure Jehovápe tañanepytyvõ. ¿Mbaʼérepa ikatu jaʼe Jehová katuete ñanepytyvõtaha ñakambia hag̃ua? Ikatu ñanemokyreʼỹ Jehová opromete vaʼekue umi israelita ikaprichosoitéva oiko vaʼekuépe Ezequiel tiémpope, haʼe heʼi chupekuéra: “Poipytyvõta peiko hag̃ua peteĩ ñeʼẽme, ha amoĩta pende pyʼapýpe peteĩ espíritu pyahu. Aipeʼáta pende retégui pene korasõ hatãva itáicha ha amoĩta hendaguépe peteĩ korasõ huʼũ asýva”. Péva heʼise ohendusetaha hikuái Ñandejára heʼíva (Ezeq. 11:19, nóta). Jehová ningo oipytyvõseterei vaʼekue umi israelítape okambia hag̃ua, ha ñandéve avei ñanepytyvõse katuete.

12, 13. a) Heʼiháicha Salmo 119:59, ¿mbaʼe rehepa jajepyʼamongeta vaʼerã? b) ¿Mbaʼe mbaʼépa iporãta ñañeporandu?

¹² Jajepyʼamongeta. Upéva hína pe segundo mbaʼe iñimportánteva jajapo vaʼerã. Jalee vaʼerã la Biblia káda día ha ñañemotiémpo jajepyʼamongeta hag̃ua hese, térã ñapensa porã umi mbaʼe tekotevẽvare ñakambia, tahaʼe umi mbaʼe ñapensáva térã ñañandúva (elee Salmo 119:59; Heb. 4:12; Sant. 1:25). Ñañehaʼã vaʼerã jahechakuaa noiméipa ováma hína ñanderehe ko múndo opensa lája. Ñanesinséro vaʼerã ha ñarrekonose mbaʼe mbaʼépepa ñanekangy ha ñañehaʼãmbaite ñakambia.

¹³ Upévare iporãta ñañeporandúramo: “¿Che piko cheenvidiosoʼimi jepi sapyʼánte che pyʼapýpe?” (1 Ped. 2:1). “¿Chépa añemombaʼeguasuse aju haguére ótro lugárgui, cheestúdio porã térã chepláta haguére?” (Prov. 16:5). “¿Aapoʼi piko che rapichápe che pyʼapýpe ndorekói haguére umi mbaʼe che arekóva, térã apensa cheimportanteveha ótrogui che pire kolór diferénte haguére?” (Sant. 2:2-4). “¿Chegusta piko umi mbaʼe oofreséva Satanás múndo?” (1 Juan 2:15-17). “¿Chegusta piko umi diversión oĩháme hekovaíva térã ivioléntova?” (Sal. 97:10; 101:3; Amós 5:15). Ñambohováivo koʼã porandu ikatu hína jahechakuaa algúna kósa tekotevẽva ñakambia. Jaipeʼávo ñane korasõgui “umi mbaʼe hapo pypukúva”, ñambovyʼáta ñande Ru yvagapeguápe (Sal. 19:14).

14. ¿Mbaʼérepa iñimportantete jaiporavo porã ñane amigorã?

¹⁴ Jaiporavo porã ñane amigorã. Upéva hína pe tercer mbaʼe iñimportánteva jajapo vaʼerã. Ndajahechakuaáiramo jepe, umi ñane amigokuéra katuete orova ñanderehe la ilája (Prov. 13:20). Tahaʼe eskuéla, koléhiope térã ñande travahohápe, oĩ ñande jerére heta hénte nañanepytyvõmoʼãiva ñapensa hag̃ua Ñandejára oipotaháicha. Péro umi ñane rreunionhápe ikatu jatopa umi amígo iporãvéva, pórke upépe haʼekuéra ñanemokyreʼỹta “japorohayhu ha jajapo hag̃ua iporãva” (Heb. 10:24, 25).

15, 16. ¿Mbaʼéichapa Satanás oñehaʼã okambia ñandehegui ñapensa lája?

¹⁵ Ñanemanduʼa vaʼerã Satanás ojerresolvemaha okambiataha ñandehegui ñapensa lája. Haʼe oipuru opaichagua enseñánsa ha pensamiénto ombyai hag̃ua umi mbaʼe porã ojapóva Ñandejára Ñeʼẽ ñane pensamiéntore.

¹⁶ Satanás osegínte oipuru la mísma pregúnta oipuru vaʼekue Évare pe hardín de Edénpe, heʼírõ guare: “¿Añetéiko Ñandejára heʼi peẽme...?” (Gén. 3:1). Ko múndo oĩvape Satanás poguýpe, oñeporandu jepi ñandéve koʼãichagua pregúnta ñanemboduda hag̃ua: “¿Añetéiko Ñandejára heʼi peẽme ndovaleiha omenda kuimbaʼe kuimbaʼéndi térã kuña kuñándi? ¿Añetéiko Ñandejára heʼi peẽme ndovaleiha pefesteha Navidad ha kumpleáño? ¿Añetéiko Ñandejára heʼi peẽme ndovaleiha pemoĩka tuguy? ¿Añetéiko Ñandejára heʼi peẽme ndovaleiha pejeheʼa umi pene hénte térã pene amígo oñemosẽ vaʼekuére kongregasióngui?”.

17. a) ¿Mbaʼépa jajapo vaʼerã oĩ jave oporandúva ñandéve peteĩ mbaʼe ñanemboduda hag̃ua? b) ¿Mbaʼépa jahupytýta jajapóramo upéicha asegún Colosenses 2:6, 7?

¹⁷ Tekotevẽterei ningo ñaime segúro umi mbaʼe jagueroviávare. Nañakontestáiramo umi pregúnta iñimportánteva ikatu hína ñañepyrũ jaduda umi mbaʼe jagueroviávagui. Umi mbaʼe ñanembodudáva ikatu mbeguekatúpe ombyai ñapensa lája ha ohundi ñandehegui ñande jerovia. ¿Mbaʼépa upéicharõ tekotevẽ jajapo? La Biblia heʼi ñandéve ñakambia hag̃ua ñapensa lája ikatu hag̃uáicha jaikuaa porã “Ñandejára rembipota iporãva, hekopeguáva ha haʼe oguerohorýva” (Rom. 12:2). Jastudia pyʼỹiramo la Biblia ha ñane puvlikasionkuéra, ñaiméta segúro ha jaikuaa porãta siertoha umi mbaʼe ñaaprende vaʼekue, ha ñañekonvenséta oĩ porãha umi mandamiénto ha léi Jehová omeʼẽva. Péicha ñaime hatãta ñande jeroviápe peteĩ yvyramáta hapo pypukúvaicha (elee Colosenses 2:6, 7).

18. ¿Mbaʼépa ñanepytyvõta ani hag̃ua ojapo ñanderehe mbaʼeve Satanás múndo venéno?

¹⁸ Ñande añoite ikatu hína ñamombarete ñande jerovia. Upévare jasegi vaʼerã ñambopyahu ñapensa lája, ñañemboʼe kontinuadoite ha jajerure asy Jehovápe tañanepytyvõ ijespíritu rupive. Jajepyʼamongeta vaʼerã avei ha jasegi jahecha tekotevẽpa ñakambia ñapensa lája ha umi mbaʼe ñanemomýiva jajapo hag̃ua álgo. Jaiporavo porãkena ñane amigorã ha jajeheʼa umi ñanepytyvõtavare ñambopyahu hag̃ua ñapensa lája. Jajapóramo upéicha, Satanás múndo venéno ndojapomoʼãi ñanderehe mbaʼeve ha jaitýta yvýre “umi pensamiénto japu ha opa mbaʼe ijyvatéva ha ojokóva umi héntepe oikuaa hag̃ua Ñandejárape” (2 Cor. 10:5).