¿Mbaʼépa la Biblia ñanemboʼe Ijapoharégui?

 1. ¿Mbaʼérepa jaagradesete Jehovápe omeʼẽ haguére ñandéve la Biblia?

¡AJÉPA jaagradesete Jehovápe omeʼẽ haguére ñandéve la Biblia! Pype ningo ikatu jatopa umi konsého ñanepytyvõva ñambohovái hag̃ua umi provléma oñepresentáva ñandéve koʼág̃arupi. Avei jatopa pype umi esperánsa ñaneraʼarõva amo gotyove g̃uarã. Ha la iñimportantevéva katu, ohechauka ñandéve mbaʼeichaguápa hína Jehová ha mbaʼe kualidápa haʼe oreko. Opokoiterei ningo ñanderehe jajepyʼamongetáramo umi kualida porãite Jehová orekóvare ha mbaʼeichaguápa haʼe. Upéva ñanemomýi voi ñañemoag̃ui hag̃ua hese ha oikose hag̃ua ñandehegui iñamigoite (Sal. 25:14).

 2. ¿Mbaʼéichapa Jehová oikuaauka ñandéve mbaʼeichaguápa haʼe?

² Jehová ningo oipota ñande jaikuaa chupe. Upéicha rupi yma haʼe omombeʼu vaʼekue umi suéño, visión ha anhelkuéra rupive mbaʼeichaguápa haʼe (Núm. 12:6; Hech. 10:3, 4). Péro koʼã mbaʼe haʼe oikuaauka vaʼekue ndojeskrivíririre moõve hendápe, ndajaikuaamoʼãi kuri mbaʼeichaguápa haʼe. Upévare Jehová omanda vaʼekue ojeskrivi hag̃ua peteĩ lívrope opa mbaʼe haʼe oipotáva ñande jaikuaa (Jer. 30:2). Ha kóva ko ojapóva añetehápe ndaijojahái. Ndareíri la Bíbliape heʼi voi hese: “Ñandejára ojapóva guive siémpre iporã”. Jahechakuaa Ñandejára oñekomunika rupi péicha ñanendive, ñanepytyvõiterei ha ideprovécho ñandéve g̃uarã (Sal. 18:30).

 3. ¿Mbaʼépa Jehová ojapo ñande jareko hag̃ua la Biblia koʼág̃a peve? (Isaías 40:8).

³ (Elee Isaías 40:8). Ñandejára Ñeʼẽ ningo hetaiterei áñorema ideprovécho umi kuimbaʼe ha kuña ifiélvape. ¿Péro mbaʼéichapa ojapo upéva? La Biblia ningo ojeskrivi ypy vaʼekue umi materiál ndoduráivare, upévare ñane tiémpope ndajarekói ni peteĩ manuskríto orihinál. Péro Jehová oñenkarga vaʼekue ojekopia hag̃ua pe oĩva Iñeʼẽme og̃uahẽ hag̃ua ñane tiémpo peve. Umi okopia vaʼekue la Biblia heʼíva ningo iñimperfékto vaʼekue, péro haʼekuéra oñatende porã vaʼekue ojapo hag̃ua upe traváho. Peteĩ expérto pe Escrituras Hebreaspegua heʼi: “Ndaipóri ningo ótro lívro yma guare peichaite peve ojekopia porãva”. Ohasáramo jepe hetaiterei tiémpo ojeskrivi hague la Biblia, ojeskrivíramo jepe umi materiál ikatúvare oñembyai, ha umi okopiáva iñimperféktoramo jepe, ikatu ñaime segúro jalee jave la Biblia jatopaha pype Jehová pensamiénto.

 4. ¿Mbaʼépa jahecháta ko artíkulope?

⁴ Jehovágui ningo ou “entéro mbaʼe porã ha rregálo iporãva” (Sant. 1:17). Ha la Biblia haʼe hína peteĩva umi rregálo iporãvéva Jehová omeʼẽ vaʼekue ñandéve. Peteĩ persóna ñanderregaláramo álgo, upe rregálo ohechauka ñandéve upe persóna ñandekuaa porãha ha oikuaaha mbaʼépa la ñaikotevẽva. Upeichaite avei pe omeʼẽ vaʼekuégui ñandéve la Biblia. Jajepyʼamongetávo ko rregálo Jehová omeʼẽ vaʼekuére ñandéve, ikatu jaikuaa hetaiterei mbaʼe chugui. Jahechakuaa haʼe ñandekuaa porãitereiha ha oikuaa porãha avei umi mbaʼe ñaikotevẽva. Kóva ko artíkulope jahecháta mbohapy mbaʼe la Biblia ñanemboʼéva Jehovágui: Mbaʼéichapa haʼe iñarandu, ihústo ha oporohayhu. Ñañepyrũna jahechami koʼág̃a pe primer mbaʼe ñaanalisátava: Mbaʼéichapa la Biblia ohechauka Jehová iñaranduha.

 5. ¿Mbaʼéichapa la Biblia ohechauka Ñandejára iñaranduha?

⁵ Jehová ningo oikuaa porãiterei ñande ñaikotevẽha umi konsého haʼe omeʼẽva. Upévare haʼe omeʼẽ ñandéve la Biblia jalee hag̃ua pype ikonsého, pórke upépe jatopa hína Jehová arandu. Hetaitereípema ningo la Biblia oipytyvõ okambia hag̃ua hekove. Moisés oskrivírõ guare pe primer lívro jatopáva la Bíbliape, heʼi voi vaʼekue umi israelitakuérape: “Kóva ndahaʼéi hína ñeʼẽ rei peẽme g̃uarã, síno pende rekove odepende hína hese” (Deut. 32:47). Umi osegíva umi konsého porã oĩva la Bíbliape ningo katuetei osẽ porã ha ovyʼave (Sal. 1:2, 3). Ohasáramo jepe hetaiterei tiémpo la Biblia ojeskrivi hague, koʼag̃aite peve umi mbaʼe heʼíva pype okambiáiti la hénte rekove. Por ehémplo, jw.org-pe oĩ pe párte “La Biblia okambia chupekuéra”, upépe ikatu etopa mas de 30 experiénsia ohechaukáva mbaʼéichapa la Biblia ‘oipytyvõ’ vaʼekue chupekuéra okambia hag̃ua hekove (1 Tes. 2:13).

 6. ¿Mbaʼérepa ikatu jaʼe ndaikatuiha ñambojoja la Biblia ótro lívrore?

⁶ Ndaipóri ningo ótro lívro ohupyty vaʼerã la Bíbliape. ¿Mbaʼérepa? Pórke Ijapohare haʼe hína Jehová, pe Todopoderóso, haʼéva Etérno ha ndaipóri voi haʼéicha iñarandúva. Oĩ avei umi lívro ymaiterei guarémava ojeleéva koʼag̃aite peve omanombáramo jepe la oskrivi vaʼekue umi lívro. Péro kon el tiémpo umi konsého oĩva pype ndaideprovechovéima. La Biblia katu ndahaʼéi upéicha, umi konsého oĩva pype ohechaukáma hetaiterei áñore ideprovécho hague. Amedída ke jalee ha jajepyʼamongeta la Bíbliape oĩvare, Jehová voi ñanepytyvõ ijespíritu rupive ikatu hag̃uáicha ideprovécho ñandéve umi konsého oĩva pype (Sal. 119:27; Mal. 3:16; Heb. 4:12). Pe Biblia Apohare ningo ñanepytyvõse voi ñandéve. ¡Ajépa ñanemokyreʼỹete jaikuaávo upéva jaleese hag̃ua la Biblia káda día!

 7. ¿Mbaʼéichapa yma la Biblia oipytyvõ vaʼekue Ñandejára puévlope oĩ hag̃ua unído?

⁷ Jahecharamoiterei avei mbaʼéichapa Jehová ohechauka iñaranduha oipytyvõvo la Biblia rupive umi isiervokuérape oĩ hag̃ua unído. Yma umi israelita oikérõ guare pe Tiérra Prometídape, oho oiko hikuái diferénte lugárpe. Oĩ vaʼekue umi ojededikáva péskape, oĩ vaʼekue oñemitỹva ha oĩ avei umi omongakuaáva animalkuéra. Káda uno mombyrymbyry oiko vaʼekue ojuehegui, upévare ikatu kuri ndojepreokupái hikuái ojuehe. Péro Jehová oñenkarga vaʼekue ikatu hag̃uáicha haʼekuéra siémpre oĩ unído. Upearã haʼe omanda chupekuéra oho hag̃ua jepi Jerusalénpe ikatu hag̃uáicha ohendu ojelee ha ojeexplika jave Ñandejára Ñeʼẽ (Deut. 31:10-13; Neh. 8:2, 8, 18). Eñeimahinamína mbaʼéichapa oñeñandu vaʼekue umi israelita ohechávo umi iñermanokuéra mombyryguápe oho jave avei el mísmo lugárpe oadora hag̃ua Jehovápe. Péicha Jehová oipytyvõ vaʼekue chupekuéra osegi hag̃ua oĩ unído. Ha oñepyrũ rire pe kongregasión kristiána, avei oĩ vaʼekue umi kristiáno oparupigua oñeʼẽva diferénte idióma, orekóva diferénte profesión térã okakuaa vaʼekue diferénte lugárpe. Péro omombaʼeterei rupi umi mbaʼe oĩva Ñandejára Ñeʼẽme, osegi vaʼekue oservi hikuái Jehovápe en unida. Umi oñepyrũ vaʼekue ojerovia Jehováre ikatu vaʼekue ontende umi mbaʼe oĩva Iñeʼẽme, pórke oipytyvõ chupekuéra umi ótro kristiáno ha oñembyaty hendivekuéra (Hech. 2:42; 8:30, 31).

 8. ¿Mbaʼéichapa la Biblia oipytyvõ avei Jehová siervokuérape koʼág̃arupi oĩ hag̃ua unído?

⁸ Jehová ningo koʼag̃aite peve osegi ouni ha omboʼe isiervokuérape la Biblia rupive. La Bíbliape ningo oĩ opaite mbaʼe ñaikotevẽva jaikuaa Jehovágui. Ñande ningo jajepokuaa ñañembyaty umi rreunión ha asambleakuérape ñahendu hag̃ua ojeleévo, ojeexplikávo ha avei oñekomentávo opa mbaʼe oñeaprende vaʼekue Ñandejára Ñeʼẽgui. La Biblia ningo añetehápe iñimportanteterei ikatu hag̃uáicha jaadora Jehovápe “peteĩ ñeʼẽme” (Sof. 3:9).

 9. ¿Mbaʼe kualidápa ñaikotevẽ ñantende hag̃ua pe mensáhe oĩva la Bíbliape? (Lucas 10:21).

⁹ Jahechamína ótra kósa ohechaukáva Jehová iñaranduetereiha. Heta mbaʼe oĩva la Bíbliape ningo ikatu ñantende ñaneumílderamo añoite (elee Lucas 10:21). Persóna oparupigua ningo olee la Biblia. Ha peteĩ expérto heʼi voi la Biblia “haʼeha pe lívro ojeleevéva entéro umi ótro lívrogui”. Upéva heʼise haʼeha pe lívro ojestudia porãvéva. Péro umi iñumíldeva añoite ontende ha ojapo la heʼíva pype (2 Cor. 3:15, 16).

10. ¿Mbaʼéichapa la Biblia ohechauka de ótra fórma Jehová iñaranduetereiha?

¹⁰ Jehová ningo ohechauka iñaranduha oipurúvo la Biblia ñanepytyvõ hag̃ua de ótra fórma. Jahecháma haguéicha haʼe oipuru la Biblia omboʼe hag̃ua hetaiterei héntepe. Péro avei haʼe oipuru pe oĩva pype ñanepytyvõ ha ñanekonsola hag̃ua káda únope. Jaleévo Ñandejára Ñeʼẽ jahechakuaa mbaʼeichaitépa haʼe ojepyʼapy káda únore (Is. 30:21). Mboy vésemapa oime vaʼerã oiko ñanderehe jareko jave provléma, jaheka algún konsého la Bíbliape ha jatopa peteĩ téxto ñandéve g̃uarãitéva voi. La Biblia ojeskrivíramo jepe hetaiterei héntepe g̃uarã, ¿mbaʼéichapa ikatu oĩ pype pe kavalete ñaikotevẽva? Upéva ningo oiko pórke pe iñaranduvéva ko univérsope la oskrivika vaʼekue la Biblia (2 Tim. 3:16, 17).

11. ¿Mbaʼéichapa Ñandejára ohechauka nomboykeiha avavépe ojeskrivírõ guare la Biblia?

¹¹ Jehová ningo ihústo ha péva hína peteĩva umi ikualida iñimportantevéva (Deut. 32:4). Peteĩ persóna ihústova ningo otrata enterovépe peteĩcha, ha Jehová otrata enterovépe peteĩcha (Hech. 10:34, 35; Rom. 2:11). Ha upéva jahechakuaa pe ojeskrivi lájare la Biblia, por ehémplo pe idióma ojeskrivi haguépe. Umi 39 lívro oĩva ñepyrũrã la Bíbliape haimete kompletoite ojeskrivi vaʼekue idióma hebréope. ¿Mbaʼérepa? Pórke upe idióma haʼe vaʼekue la Jehová puévlo oñeʼẽva upe tiémpope. Péro pe síglo primérope pe idióma griego haʼe vaʼekue la oñeñeʼẽvéva. Upéicha rupi umi 27 lívro oúva upe rire, ojeskrivi vaʼekue upe idiómape. Péicha jahechakuaa Jehová ndoipurúi hague peteĩ idiómante ojeskrivi hag̃ua la Biblia. Koʼág̃a ningo umi 8.000 millón de persónarupi oikóva ko yvy ape ári oñeʼẽ diferénte idiómape. ¿Mbaʼéichapa upéicharõ ikatu oñemog̃uahẽ enterove héntepe umi mbaʼe Jehová omboʼeséva chupekuéra?

12. ¿Mbaʼéichapa oñekumpli pe heʼíva Daniel 12:4-pe koʼã ára pahápe?

¹² Proféta Daniel rupive Jehová opromete vaʼekue ‘umi enseñánsa verdadéra heta hetavetaha’ umi ára pahápe, upéva heʼise heta hénte ontendetaha la Bíbliape oĩva (elee Daniel 12:4). Upéva oiko pórke ñane tiémpope ojetradusíma hetaiterei idiómape, oñeguenohẽ ha oñemosarambi opárupi la Biblia ha umi puvlikasión bíblica. La Biblia haʼe voi pe lívro ojetradusi ha oñemosarambivéva ko múndo tuichakuére. Heta organisasión otradusíva la Biblia ningo ovende hepyeterei voi. Péro Jehová puévlo otradusíma la Biblia en párte térã kompletoite mas de 240 idiómape, ha upéva ári koʼã Biblia enterovetéva ikatu okonsegi opagaʼỹre hese mbaʼevete. Upévare enterove hénte ko múndope ikatu ohendu “umi notísia porã oñeʼẽva Ñandejára Rréinore” og̃uahẽ mboyve pe fin (Mat. 24:14). Péicha Jehová omeʼẽ la oportunida enterovetépe oikuaa porãve hag̃ua chupe ha olee hag̃ua la Biblia iñidiomaitépe. ¡Ajépa ñanderayhuete Jehová ojapóvo ko mbaʼe ñanderehehápe!

13. ¿Mbaʼéichapa la Biblia ohechauka Jehová ñanderayhuha? (Juan 21:25).

¹³ La Biblia ningo ohechauka porãiterei pe kualida iñimportantevéva orekóva Jehová: Pe mborayhu (1 Juan 4:8). Upearã ikatu ñapensa umi mbaʼe Jehová omoĩvare ha nomoĩrivare la Bíbliape. Pype ningo ikatu jatopa mbaʼéichapa ikatu ñañemoag̃ui Jehováre, mbaʼéichapa koʼág̃ama voi ikatu jaiko vyʼápe, ha avei mbaʼépa jajapo vaʼerã jahupyty hag̃ua pe vída etérna. Péro Jehová nomoĩri la Bíbliape hetaiterei informasión térã detálle ndaideprovechomoʼãiva jaservi hag̃ua chupe ha ñanderesareapa reítava (elee Juan 21:25).

14. ¿Mbaʼéichapa la Biblia ohechauka avei ñandéve Jehová ñanderayhuha?

¹⁴ Jehová ohechauka ñanemombaʼe ha ñanderayhuha oñekomunika lájare ñanendive, ha omeʼẽvo ñandéve la oportunida ñandete jadesidi hag̃ua mbaʼépa jajapóta. Upévare haʼe nomoĩri la Bíbliape umi rrégla opa mbaʼépe g̃uarã ñande rekovépe. Upéva rangue haʼe omeʼẽ ñandéve umi ehémplo, umi profesía ha konsého ideprovéchotava ñandéve jadesidi porã hag̃ua. Péicha Ñandejára Ñeʼẽ ñanemomýi jahayhu ha ñaneñeʼẽrendu hag̃ua chupe ñande pyʼaite guive.

15. a) ¿Mbaʼéichapa la Biblia ohechauka Jehová oñeinteresaha ñanderehe? b) Jahechaháicha pe taʼangápe, ¿mbaʼe personáhe oĩvare la Bíbliapepa ojepyʼamongeta hína pe mitãkuñaʼi, pe ermáno imitãva ha pe ermána ijedáva? (Gén. 39:1, 10-12; 2 Rey. 5:1-3; Luc. 2:25-38).

¹⁵ La Biblia ohechauka avei Jehová oñeinteresaha ñanderehe. Upéva jaikuaa pórke pype jatopa heta rreláto ohechaukáva mbaʼéichapa Jehová siervokuéra oñeñandu vaʼekue. Jaleévo umíva ñantende mbaʼéichapa oñeñandu vaʼekue hikuái, pórke “peteĩ yvypóra ñandeichaguánte avei” haʼekuéra (Sant. 5:17). Jahechakuaa avei “Jehová oporombyasy ha oporoporiahuverekoha” pe otrata lájare umi isiérvo yma guarépe (Sant. 5:11).

16. ¿Mbaʼépa ñaaprende Jehovágui jalee jave la Bíbliape haʼe operdona hague umi ofalla vaʼekuépe? (Isaías 55:7).

¹⁶ La Bíbliape jatopa avei ótra fórma ohechaukáva ñandéve Jehová ñanderayhuha. Jafalla jave hendive haʼe oasegura ñandéve nañanderejamoʼãiha. Por ehémplo, umi israelita ofalla vaietereíramo jepe heta vése Jehovándi, haʼe operdona vaʼekue chupekuéra oñarrepentírõ guare ipyʼaite guive (elee Isaías 55:7). Umi kristiáno síglo primérope guare ohecha vaʼekue avei Jehová ohayhuha chupekuéra. Apóstol Pablo rupive, Jehová heʼi vaʼekue chupekuéra operdona ha okonsola vaʼerãha pe kuimbaʼe opeka vaʼekuépe péro upe rire oñarrepentívape (2 Cor. 2:6, 7; 1 Cor. 5:1-5). ¡Ajépa javyʼaite Jehová nañanemboykéi haguére jajavýramo jepe! Upéva rangue haʼe ñandekorrehi ha ñanepytyvõ ñaime porã jey hag̃ua hendive. Ha haʼe ohechauka voi oĩha operdona hag̃uáicha enterove oñarrepentívape (Sant. 4:8-10).

17. ¿Mbaʼérepa ikatu jaʼe la Biblia haʼeha peteĩ rregálo ndaijojaháiva oúva Jehovágui?

¹⁷ La Biblia ningo añetehápe haʼe peteĩ rregálo oúva Jehovágui. ¡Ajépa ndaijojahái ko rregálo omeʼẽ vaʼekue ñandéve! Pórke la Biblia ohechauka ñandéve Ñandejára ihústo, iñarandu ha ñanderayhuetereiha. Kóva haʼe peteĩ pruéva ohechauka porãva Jehová oipotaha jaikuaa porã chupe ha jaiko iñamígoramo.

18. ¿Mbaʼéichapa ikatu jahechauka jaagradeseha Jehovápe omeʼẽ haguére ñandéve la Biblia?

¹⁸ Aníkena núnka ñanderesarái ko rregálo porãite omeʼẽvagui ñandéve Ñandejára (Sant. 1:17). Jaagradesékena Jehovápe ko rregálore. Upéva ikatu jajapo ñañemboʼévo ha jastudia memévo la Biblia ha jajepyʼamongeta umi mbaʼe ñaaprende vaʼekuére. Amedída ke jajapo koʼã mbaʼe katuete ñanevendesíta la Biblia Apohare ha avei ‘jaikuaa porãvéta chupe’ (Prov. 2:5).