¿Mávapepa ñambotuicha ha jarrespeta vaʼerã?

 1. ¿Mbaʼeichagua persónapepa oñemombaʼe, ha mbaʼépa ñaaprendéta ko artíkulope?

¿MBAʼÉICHAPA jahechauka ñamombaʼeha ótrope? Por ehémplo, jatrata porã ha jarrespeta jave chupekuéra. ¿Mbaʼeichagua persónapepa oñemombaʼe jepi? Umi orekóvape peteĩ asignasión térã puésto iñimportánteva, ỹrõ oĩ jave omereséva ojehechauka chupe upéva. Ko artíkulope jahecháta mbaʼeichagua persónapa omerese ñamombaʼe chupe ha mbaʼérepa.

2, 3. a) ¿Mbaʼérepa Jehová omerese ñambotuicha chupe? (Ehecha pe taʼanga oĩva iñepyrũme). b) ¿Mávapa pe Ovecharaʼy oñeñeʼẽha Apocalipsis 5:13-pe, ha mbaʼérepa omerese oñembotuicha chupe?

² Apocalipsis 5:13 heʼi ñamombaʼe vaʼerãha “Pe oguapýva pe trónope ha pe Ovecharaʼýpe”. Jehová haʼe hína “Pe oguapýva pe trónope”. Apocalipsis kapítulo 4 omombeʼu mbaʼérepa Jehová omerese ojerrespeta ha oñembotuicha chupe. Umi ánhel ipuésto yvatéva heʼi Jehovápe, “pe oikovéva opa ára g̃uarã”: “Ñandejára Jehová, nde ningo remerese opavave nemombaʼe ha omeʼẽ ndéve tekomimbipa ha podér, nde rejapo rupi opa mbaʼe, ha nde reipotágui oĩ ha ojejapo vaʼekue opaite mbaʼe” (Apoc. 4:9-11).

³ Pe Ovecharaʼy oñeñeʼẽha Apocalipsis 5:13-pe haʼe hína Jesucristo. ¿Mbaʼéichapa jaikuaa upéva? Haʼe oĩrõ guare ko yvy ape ári oñehenói vaʼekue chupe “Ñandejára Ovecharaʼy, oipeʼáva yvyporakuéra pekádo” (Juan 1:29). Jaʼekuaa Jesús omereseha ñamombaʼe chupe upe haguére. Ajépa ndaipóri ótro omeʼẽva hekove yvyporakuéra pekadór rehehápe. Añetehápe Jesús haʼe “Rréi umi rreikuéra ári ha Mburuvicha mburuvichakuéra ári. Haʼe añoite hína pe ikatuʼỹva omano, oikóva peteĩ lugár omimbipávape, avave ikatuʼỹháme og̃uahẽ, chupe avave ndohechái vaʼekue ha ndaikatúi ojehecha” (1 Tim. 6:14-16). Oime vaʼerã reñeñandu umi ánhel ipoderósova oñeñandu haguéicha. Haʼekuéra opurahéi: “Pe Ovecharaʼy ojejuka vaʼekue omerese ojehovasa ha oñemeʼẽ chupe podér, mbaʼerepy, arandu, puʼaka, ñemombaʼe ha tekomimbipa” (Apoc. 5:12).

 4. ¿Mbaʼérepa oñemombaʼe vaʼerã katuete Jehová ha Jesúspe?

⁴ Añetehápe Jehová ha Jesúspe oñemombaʼe vaʼerã katuete, ndajajapóiramo upéva ndaikatumoʼãi jahupyty jeikove opaveʼỹva. Jesús heʼíva Juan 5:22, 23-pe ohechauka porã upeichaha: “Pe Túva ndohusgái avavépe, síno oheja pe Taʼýra kárgope oporohusga hag̃ua, opavave omombaʼe hag̃ua pe Taʼýrape, omombaʼeháicha pe Túvape. Upe nomombaʼéiva pe Taʼýrape, nomombaʼéi avei pe Túvape, upe ombou vaʼekue chupe” (elee Salmo 2:11, 12).

 5. ¿Mbaʼérepa yvyporakuéra omerese avei rrespéto?

⁵ Ñandejára ojapo vaʼekue “yvypórape ijoguaháramo” (Gén. 1:27, TNM). Upéva heʼise heta persóna ikatuha ohechauka umi kualida orekóva Ñandejára. Por ehémplo, ikatu oporohayhu, imbaʼeporã ha oporombyasy. Avei yvyporakuéra oreko konsiénsia ha oikuaa mbaʼépa oĩ porã ha mbaʼépa oĩ vai (Rom. 2:14, 15). Hetápe ñandegusta umi mbaʼe iporãva ha ipotĩva, avei jaiko porãse ñande rapichakuérandi. Koʼã mbaʼe ñandegusta pórke Jehová ndojapói mbaʼeve sarambikuépe, síno omoĩ pyʼaguapy. Jahechaháicha, Jehová ojapo yvyporakuérape ikatu hag̃uáicha ohaʼanga chupe, upévare entéro omerese rrespéto (Sal. 8:5).

6, 7. ¿Mbaʼépepa idiferénte umi kristiáno añetegua ambue tapichágui?

⁶ Yvyporakuéra omerese avei rrespéto, péro sapyʼánte ijetuʼu jaikuaa hag̃ua mbaʼeichaite pevépa jahechauka vaʼerã jarrespeta ha ñamombaʼeha peteĩ persónape. Koʼýte ijetuʼu upéva pórke ñaneimperfékto ha Satanás múndo ñandejopy. Heta oĩ orekóva hiʼídoloramo tahaʼe kuña térã kuimbaʼépe. Orrespeta ha omombaʼe rangue Jehovápe, otrata algún umánope haʼerõguáicha peteĩ dios. Por ehémplo, ohaʼanga oñemonde térã oñekomporta lájape umi líder rrelihióso térã polítikope, deportístape, aktórpe térã ambue ifamósovape.

⁷ Péro umi kristiáno añetegua oikuaa porã nomombaʼéi vaʼerãha peichaite peve peteĩ umánope. Jesús añoite haʼe vaʼekue pe yvypóra ohejáva ñandéve pe ehémplo iporãvéva jasegi hag̃ua (1 Ped. 2:21). Ani ñanderesarái yvyporakuéra pekadorha ha “ndohupytýi Ñandejára rekomimbipa” (Rom. 3:23). Ni peteĩ umáno nomereséi ojereko chupe Ñandejáraicha. Jehová katuete ipochýta jajúramo ñamombaʼeterei peteĩ yvypórape.

8, 9. a) ¿Mbaʼéichapa testígo de Jehová ohecha umi autoridápe? b) ¿Mbaʼéicha javépa ndajajapói umi autorida ojeruréva ñandéve?

⁸ Oĩ persóna omereséva ñamombaʼe chupe oreko rupi peteĩ puésto de autorida. Por ehémplo, ñapensamína mbaʼe mbaʼépa ojapo umi polisía térã funsionário púvliko. Haʼekuéra ombaʼapo ikatu hag̃uáicha pe várrio isegúro, oñekumpli pe léi ha omeʼẽ hag̃ua umi héntepe la oikotevẽva. Koʼa mbaʼe ningo ou porã enterovévape, upévare apóstol Pablo heʼi kuri umi kristiánope “oñemoĩ hag̃ua umi mburuvichakuéra poguýpe”. Avei heʼi: “Pemeʼẽ enterovévape umi mbaʼe ojeruréva peẽme. Ojerurévape impuésto, pemeʼẽ chupe pe impuésto; [...] oipotávape pemombaʼe chupe, pemombaʼe vaʼerã” (Rom. 13:1, 7).

⁹ Ñande kristianokuéra jajapo ikatúva guive jahechauka hag̃ua jarrespetaha umi autoridápe. Péro jaikuaaháicha oĩ diferénte kultúra ha kostúmbre, upévare oĩ lugár oñehaʼarõhápe ñandehegui jajapo peteĩ mbaʼe, péro ambue lugárpe nahániri. Péicharõ jepe ñañehaʼãmbaite jarrespeta umi autoridápe. Péro ojeruréramo ñandéve hikuái jajapo hag̃ua peteĩ mbaʼe ñandereja vaítava Ñandejára renondépe, jadesidi ñaneñeʼẽrendu Ñandejárape. Péicha jahechauka jarrespeta ha ñamombaʼeveha Jehovápe yvypórape rangue (elee 1 Pedro 2:13-17).

10. ¿Mbaʼe ehémplopa oheja ñandéve Ñandejára siervokuéra yma guare?

¹⁰ Jehová siervokuéra yma guare orrespeta vaʼekue avei umi autoridápe. José ha María oheja ñandéve ehémplo porã. Pe goviérno romano ojapórõ guare peteĩ sénso, haʼekuéra oviaha Belénpe María hyeguasuetéramo jepe (Luc. 2:1-5). Apóstol Pablo orrespeta vaʼekue avei umi autoridápe. Ojeakusárõ guare chupe ojapoha ivaíva, haʼe rrespetuósamente oñedefende rréi Herodes Agripa ha Festo renondépe, haʼéva pe governadór Judeagua (Hech. 25:1-12; 26:1-3).

11, 12. a) ¿Mbaʼérepa naiporãi ñamombaʼeterei umi líder rrelihiósope? b) ¿Mbaʼépa oiko peteĩ Testígo Austriagua ohechauka haguére orrespetaha peteĩ polítikope?

¹¹ ¿Mbaʼépa ikatu jaʼe umi líder rrelihiósogui? ¿Omeresépa oñemombaʼeve chupekuéra? Nahániri. Ñande jarrespeta chupekuéra jarrespetaháicha umi ótra héntepe. Péro naiporãmoʼãi ñamombaʼetereíramo chupekuéra, jepe ohaʼarõ hikuái upéva. ¿Mbaʼérepa? Pórke umi rrelihión japu nomboʼéi pe añetegua Ñandejáragui ni la Bíbliagui. Jesús oĩrõ guare ko yvy ape ári otaky vaʼekue umi líder rrelihiósore, heʼi hesekuéra hovamokõiha ha ndodirihiporãiha Ñandejára puévlope (Mat. 23:23, 24). Péro ndaivaíri jahechauka jarrespeta ha ñamombaʼeha umi ombaʼapóvape goviérnope g̃uarã. Jajapóramo upéva, haʼekuéra ikyreʼỹvéta ñanepytyvõ hag̃ua.

¹² Por ehémplo, pe segunda gérra mundiál aja umi nási oarresta kuri peteĩ polítiko austriácope hérava Heinrich Gleissner. Oñemoĩrõ guare chupe peteĩ trénpe ojegueraha hag̃ua peteĩ kámpo de konsentrasiónpe, oikuaa Leopold Éngleitnerpe, peteĩ ermáno ifiélva Austriagua. Ermáno Engleitner rrespetuósamente oexplika Heinrich Gléissnerpe umi mbaʼe ogueroviáva, ha pe karai ojapysaka porã hese. Opa rire pe gérra, Gleissner heta vése oipuru pe autorida orekóva oipytyvõ hag̃ua umi Testígo Austriaguápe. Oime vaʼerã ñande ñanemanduʼa avei ambue ehémplore ohechaukáva mbaʼéichapa ñane ermanokuéra ohupyty heta mbaʼe porã orrespeta haguére umi autoridápe.

13. ¿Máva mávapepa koʼýte ñamombaʼe ha jarrespeta vaʼerã, ha mbaʼérepa?

¹³ Ñane ermanokuéra omerese avei ñamombaʼe ha jarrespeta chupekuéra, koʼýte umi omoakãva Jehová organisasión. Por ehémplo, umi ansiáno, superintendénte de sirkuíto, miémbro del Komité de Sukursál ha umi oĩva pe Kuérpo Governántepe (elee 1 Timoteo 5:17). Haʼekuéra oñangareko Ñandejára siervokuérare, ndareíri la Biblia heʼi koʼã kuimbaʼe oñemeʼẽha ñandéve “rregáloramo” (Efes. 4:8). Upévare omerese ñamombaʼe ha jarrespeta chupekuéra, tahaʼe haʼéva inasionalida, ijestúdio, térã tove taipláta heta térã taimboriahu. Umi kristiáno ypykue omoĩ ñandéve ehémplo porã. Haʼekuéra omombaʼe vaʼekue umi kuimbaʼe omoakãvape kongregasión, ha ñande jajapo avei upéicha. Ñaime jave hendivekuéra, nañamombaʼeguasúi ni ndajatratái chupekuéra haʼeramoguáicha peteĩ ánhel. Péro ñamombaʼeterei ha jarrespeta chupekuéra iñumílde ha ombaʼapo jejopy rupi (elee 2 Corintios 1:24 ha Apocalipsis 19:10).

14, 15. ¿Mbaʼérepa ikatu jaʼe umi ansiáno idiferenteha umi líder rrelihiósogui?

¹⁴ Umi ansiáno ningo iñumílde, upévare ndoipotái ojetrata chupekuéra peteĩ persóna ifamósovaicha. Haʼekuéra idiferentete voi umi líder rrelihióso koʼag̃agua ha Jesús tiémpope guarégui. Jesús heʼi vaʼekue umi rrelihión omoakãvare: “Oho jave karu guasuhápe oipota umi lugár iñimportantevéva. Ha umi sinagógape katu, oguapyse tenondete. Oipota ojesaluda chupekuéra umi plasahárupi” (Mat. 23:6, 7).

¹⁵ Umi ansiáno osegi Jesús heʼi vaʼekue: “Ani peheja avave penerenói Mboʼehára. Pene Mboʼehára ningo peteĩnte, ha peẽ enterovéva oñoermáno. Ha ani peje, ore ru avavépe ko yvy ape ári. Peteĩnte pende Ru, oĩva yvágape. Ani avei peheja avave heʼi peẽme ‘che ruvicha’. Pende Ruvicha ningo peteĩnte, haʼe hína Cristo. Ha pe tuichavéva pende apytépe, oiko vaʼerã pene rembijokuáirõ. Pe oñembotuichávape, ojeapoʼíta, ha pe oñemomirĩvape katu oñembotuicháta” (Mat. 23:8-12). Ansianokuéra osegi jave koʼã mbaʼe Jesús heʼi vaʼekue, umi ermáno ohayhu, orrespeta ha omombaʼeve chupekuéra.

16. ¿Mbaʼérepa jasegi vaʼerã ñamombaʼe ha jarrespeta ñande rapichápe?

¹⁶ Ijetuʼu ningo sapyʼánte jahechakuaa hag̃ua mbaʼeichaite pevépa ñamombaʼe ha jarrespeta vaʼerã ótrope. Upéva ijetuʼu vaʼekue avei umi kristiáno ypykuépe (Hech. 10:22-26; 3 Juan 9, 10). Upéicharõ jepe, ñamombaʼéramo ñande rapichápe Jehová oipotaháicha, jahupytýta heta mbaʼe porã.

17. ¿Mbaʼépa ojehupyty ojerrespetávo umi orekóvape autorida?

¹⁷ Jahechauka jave ñamombaʼe ha jarrespetaha umi autoridápe, ikatu hína oĩve dispuésto hikuái odefendévo pe derécho jarekóva japredika hag̃ua lívremente. Avei ikatu ogusta chupekuéra pe marandu porã. Ojapo unos kuánto áño oiko hague upéva Alemániape. Peteĩ ermána prekursóra hérava Birgit oho kuri imembykuña ojegraduárõ guare eskuélape. Umi profesór heʼi chupe ovyʼaha hikuái oreko haguére iklásepe umi mitã haʼéva Testígo, ha ombyasytaha ndorekovéirõ Testígova iñalumnokuéra apytépe. Birgit heʼi chupekuéra: “Ore ningo romboʼe ore membykuérape oñekomporta hag̃ua la Biblia heʼiháicha, ha upéva heʼise orrespeta vaʼerãha avei hikuái iprofesorkuérape”. Peteĩva umi profesór osẽ heʼi: “Entéro umi mitã ojoguáramo ne membýpe, igustoitereíta ñamboʼe chupekuéra, haʼetéta voi roĩva peteĩ paraísope”. Una semána upe rire, peteĩva umi mboʼehára oho pe asambléa ojejapo vaʼekuépe Léipzigpe.

18, 19. ¿Mbaʼéguipa nañanderesaráiri vaʼerã jahechauka jave ñamombaʼe ha jarrespetaha umi ansiánope?

¹⁸ Ñandejára Ñeʼẽ ñanepytyvõ ñantende hag̃ua mbaʼéichapa jahechauka vaʼerã jarrespeta ha ñamombaʼeha umi ansiáno kongregasionguápe (elee Hebreos 13:7, 17). Ikatu jafelisita chupekuéra iguápo haguére Jehová servísiope. Jasegi jave umi instruksión omeʼẽva umi ansiáno, ñaipytyvõ hína chupekuéra okumpli hag̃ua vyʼápe umi rresponsavilida orekóva. La Biblia ñanemokyreʼỹ avei ñañehaʼã hag̃ua jajerovia haʼekuéraicha. Péro upéva ndeʼiséi jakopia vaʼerãha opaite mbaʼe ojapóva peteĩ ansiáno ikatupyrýva térã iñexperiénsia hetáva, por ehémplo oñemonde lája, oñeʼẽ lája ha ojapo lája idiskúrso. Upéva jajapóramo, jahechaukáta jajesegiha yvypórare, jasegi rangue Cristo ehémplo. Ani ñanderesarái umi ansiáno iñimperfektoha avei ñandéicha.

¹⁹ Jahechauka jave jarrespetaha umi ansiánope ha ndajatratái jave chupekuéra iñimportantetereirõguáicha, añetehápe ñaipytyvõ hína koʼã ermánope. ¿Mbaʼéichapa? Por ehémplo, osegi hag̃ua iñumílde hikuái, ha pono opensa iñimportanteveha ótrogui térã ndojavyiha voi.

20. ¿Mbaʼéichapa ñanevenefisia jahechaukáramo ñamombaʼe ha jarrespetaha ñande rapichápe?

²⁰ Jahechauka jave ñamombaʼe ha jarrespetaha ñande rapichápe, ñanepytyvõ ani hag̃ua jaju ñapensaiterei ñandejehe ha jasegi hag̃ua ñaneumílde oĩramo ñandeguerohorýva. Avei ñandeprotehe pórke ndajatropesái peteĩ persóna jarrespetáva oúramo ñanedesepsiona. Avei ñanepytyvõ jasegi hag̃ua Jehová organisasión ykére. Ko organisasión ndoikói ombotuichaiterei ni peteĩ yvypórape, tahaʼe Testígo térã nahániri.

21. ¿Mbaʼépa la iñimportantevéva jahupytýva ñamombaʼe jave ótrope?

²¹ Jahechauka jave ñamombaʼeha ñande rapichakuérape, ñambovyʼa hína Jehovápe, ha ndaipóri ambue mbaʼe iñimportantevéva upévagui. Avei, péicha jajapóta haʼe omandáva ha jasegíta ñandefiél chupe. Jehová ikatúta ohechauka Satanás ijapuha, pórke haʼe heʼi avave ndaikatuiha ifiél Ñandejárape (Prov. 27:11). La majoría umi hénte oĩva ko múndope ndoikuaái mbaʼeichaite pevépa ohechauka vaʼerã omombaʼeha hapichápe. Péro ñande javyʼaiterei jaikuaa haguére mbaʼéichapa Jehová oipota jarrespeta ha ñamombaʼe ótrope.