Apocalipsis: ¿Mbaʼépa oikóta Ñandejára enemigokuérare?

 1. ¿Mbaʼépa omombeʼu ñandéve lívro de Apocalipsis?

LÍVRO de Apocalípsis ohechauka ñandéve Ñandejára Rréino oñepyrũma hague ogoverna yvágape ha upe rire oñemosẽ hague Satanáspe upégui (Apoc. 12:1-9). Oiko rire koʼã mbaʼe, umi ánhel oikóva yvágape tuichaiterei ipyʼaguapy jey, péro ko yvy ape ári katu oñepyrũ heta provléma. ¿Mbaʼérepa? Pórke Satanás ipochyeterei ha oñehaʼãmbaite operhudika Jehová siervokuéra oĩvape ko yvy ape ári (Apoc. 12:12, 15, 17).

 2. ¿Mbaʼépa ñanepytyvõta jasegi hag̃ua ñaaguanta?

² ¿Mbaʼépa ñanepytyvõta jasegi hag̃ua ñaaguanta Satanás oñemoĩ mbaretéramo jepe ñanderehe? (Apoc. 13:10). Peteĩ mbaʼe haʼe hína jaikuaáramo mbaʼépa ñaneraʼarõ amo gotyove. Por ehémplo Apocalípsispe apóstol Juan omombeʼu mbaʼeichaitépa Jehová ñanevendesíta koʼẽrõite, ha umíva apytépe heʼi Ñandejára koʼẽrõitéma ohunditaha entéro ikontrariokuérape. Jahechamína mbaʼépa heʼi ñandéve lívro de Apocalipsis umi Ñandejára kontrariokuérare ha avei mbaʼépa heʼi oikotaha hesekuéra.

 3. ¿Mbaʼeichagua animál salváherepa oñeñeʼẽ lívro de Apocalípsispe?

³ Pe primer versíkulope voi, lívro de Apocalipsis omombeʼu Juan ohecha hague umi “visión” orrepresentáva heta mbaʼe (Apoc. 1:1). Koʼã visiónpe haʼe ohecha vaʼekue unos kuánto animál salváhe orrepresentáva Ñandejára kontrariokuérape. Por ehémplo, ohecha kuri “peteĩ animál salváhe osẽva pe márgui”. Upe animál salváhe “10 hatĩ ha 7 iñakã” (Apoc. 13:1). Upéi katu ohecha “ótro animál salváhe ojupíva pe yvýgui”. Péva katu oñeʼẽ haʼeramoguáicha peteĩ dragón ha “omanda hoʼa hag̃ua yvágagui tata ko yvy ape ári” (Apoc. 13:11-13). Upéi Juan heʼi avei ohecha hague “peteĩ animál salváhe pytãitéva”, ha péva pe animál salváhe ári oĩ peteĩ prostitúta. Entéro koʼã animál salváhe orrepresenta Jehová kontrariokuérape, ymaite guive oñemoĩ mbaretéva hína hese ha irréinore. Upévare iñimportanteterei ñantende porã máva mávapepa orrepresenta hína koʼãva (Apoc. 17:1, 3).

4, 5. ¿Mbaʼéichapa Daniel 7:15-17 ñanepytyvõ ñantende hag̃ua mbaʼépa orrepresenta umi mbaʼe ohecha vaʼekue Juan?

⁴ Jaikuaa hag̃ua máva mávapa hína Jehová enemigokuéra, ñantendémante vaʼerã mávapepa orrepresenta koʼã animál salváhe ha pe prostitúta. Ha upearã jahechámante vaʼerã mbaʼépa la Biblia voi oexplika ko témare. ¿Mbaʼérepa jaʼe upéva? Pórke heta mbaʼe apóstol Juan ohecha vaʼekue ojeexplika mbaʼépa heʼise ótro lívro de la Bíbliape. Por ehémplo, pe proféta Daniel ohecha vaʼekue iképe ‘osẽha pe márgui 4 animál salváhe tuichaitereíva’ (Dan. 7:1-3). Ha Daniel voi oexplika vaʼekue koʼã 4 animál orrepresentaha 4 “rréipe” térã 4 goviérnope (elee Daniel 7:15-17). Péva pe explikasión omeʼẽ vaʼekue Daniel isensilloiterei ñantende hag̃ua, ha ñanepytyvõ japilla hag̃ua umi animál salváhe oñeñeʼẽha Apocalípsispe orrepresentaha avei umi goviérno polítikope.

⁵ Ñaanalisamína koʼág̃a unas kuánta kósa apóstol Juan ohecha vaʼekue umi visiónpe. Ha jajapokuévo upéva jahejáta la Biblia voi toexplika ñandéve mbaʼépa heʼise koʼã mbaʼe. Primero ñaanalisáta mávapepa orrepresenta umi animál salváhe haʼe ohecha vaʼekue. Upéi jahecháta mbaʼépa ojehúta koʼã animál salváhepe, ha ultimoitépe katu mbaʼérepa koʼã mbaʼe iñimportantete ñandéve g̃uarã.

 6. ¿Mbaʼépa orrepresenta umi animál salváhe 7 iñakãva oñeñeʼẽha Apocalipsis 13:1-4-pe?

⁶ ¿Mávapepa orrepresenta umi animál salváhe 7 iñakãva? (Elee Apocalipsis 13:1-4). Péva pe animál salváhe ojogua peteĩ jaguaretépe, péro la ipy ojogua umi óso pýpe, ijuru umi león jurúpe ha avei oreko 10 hatĩ. Entéro koʼã mbaʼe ojogua avei umi ótro animál salváhe oñeñeʼẽha Daniel kapítulo 7-pe. Péro lívro de Apocalípsispe ndahaʼéi oĩva 4 animál salváhe orekóva apárte apárte koʼã mbaʼe síno peteĩnte. Ha ikatu jaʼe koʼã animál salváhe norrepresentaiha peteĩ goviérnopente térã peteĩ poténsia mundiálpente. Ojeʼe ningo hese omandaha ‘entéro trívu, puévlo, ha umi oñeʼẽvare diferénte idióma ha oĩva entéro tetãme’. Upévare ikatu jaʼe ndahaʼeiha peteĩ goviérno omandáva peteĩ país rehe añónte (Apoc. 13:7). Upéicharõ, ¿mávapepa orrepresenta ko animál salváhe ohecha vaʼekue Juan? Orrepresenta hína entéro umi poténsia mundiál oexisti vaʼekue ymaite guive (Ecl. 8:9).b

 7. ¿Mbaʼépa orrepresenta káda uno umi akã orekóva ko animál salváhe?

⁷ ¿Máva mávapepa orrepresenta umi 7 akã orekóva pe animál salváhe? La heʼíva Apocalipsis kapítulo 17-pe ñanepytyvõ ñantende hag̃ua upéva, pórke upépe oñemombeʼu ojejapo hague ko animál salváhegui pateĩ taʼanga. Apocalipsis 17:10-pe heʼi: “Umíva hína 7 rréi: 5 hoʼáma, peteĩva oĩ hína, pe ótro neʼĩra og̃uahẽ, péro ág̃a haʼe og̃uahẽ vove opyta vaʼerã peteĩ tiémpo mbykymíre”. Satanás ningo ymaite guive oipurúmava heta goviérno ipoderosoitereíva oĩva ko yvy ape ári. Péro umíva apytépe 7 haʼe la iñimportantevéva ha orrepresentáva koʼã animál salváhe akã. Koʼãva hína umi poténsia mundiál oreko vaʼekue la podér operhudika térã oipytyvõ hag̃ua Ñandejára puévlope. Apóstol Juan tiémpope 5 umi poténsia mundiál apytégui ndaiporivéima kuri, umíva hína: Egipto, Asiria, Babilonia, Medopersia ha Grecia. Pe sexta poténsia mundiál katu haʼe vaʼekue Roma, ha upe goviérno oĩ gueteri kuri apóstol Juan ohechárõ guare koʼã visión. ¿Péro mávapa haʼéta pe séptima poténsia mundiál?

 8. ¿Mávapepa orrepresenta pe animál salváhe akã sieteha?

⁸ Jahechataháicha, umi profesía oĩva lívro de Daniélpe ñanepytyvõta jaikuaa hag̃ua mávapepa orrepresenta pe animál salváhe akã sieteha. ¿Mávapa haʼe pe poténsia mundiál omandáva koʼã ára pahápe, térã heʼiháicha Apocalipsis 1:10 “ñande Ruvicha díape”? Haʼe hína pe poténsia mundiál oĩháme Gran Bretaña ha Estados Unidos, pévape oñehenói jepi avei pe poténsia mundiál angloamericana. Upévare ikatu jaʼe ko animál salváhe akã sieteha oñeñeʼẽha Apocalipsis 13:1-4-pe orrepresentaha kóva ko poténsia mundiálpe.

 9. ¿Mávapepa orrepresenta pe animál salváhe ‘mokõi hatĩva peteĩ ovecha raʼýicha’?

⁹ Apocalipsis kapítulo 13 omombeʼu pe poténsia mundiál angloamericana haʼéva pe animál salváhe akã sieteha haʼeha avei pe animál salváhe ‘mokõi hatĩva peteĩ ovecha raʼýicha, péro oñepyrũvo oñeʼẽ, ojoguáva peteĩ dragónpe’. Ko animál salváhe “ojapo umi señál tuichaitereíva umi hénte renondépe, haʼe omanda hoʼa hag̃ua yvágagui tata ko yvy ape ári” (Apoc. 13:11-15). Ha Apocalipsis kapítulo 16 ha 19-pe katu ojeʼe péva pe animál salváhe haʼeha peteĩ ‘proféta japu’ (Apoc. 16:13; 19:20). La heʼíva Daniel profesía ojogualénto avei koʼã mbaʼépe, pórke ohechauka pe poténsia mundiál angloamericana ohunditaha hetaiterei mbaʼe, ha heʼi voi hese oguerutaha “tuichaiterei ñehundi” (Dan. 8:19, 23, 24). Ha upe profesía oñekumpli kuri pe segunda gérra mundiál aja. Upérõ guare umi mokõi vómba atómika Estados Unidos oipuru vaʼekue omohuʼã upe gérra, ha ojapo hag̃ua upe vómba ombaʼapo kuri oñondive umi sientífiko Gran Bretaña ha Estados Unidospegua. Upévare ikatu jaʼe pe poténsia mundiál agloamericana ‘omanda hague hoʼa hag̃ua yvágagui tata ko yvy ape ári’.

10. ¿Mbaʼépepa orrepresenta “pe primer animál salváhe raʼanga”? (Apocalipsis 13:14, 15; 17:3, 8, 11).

¹⁰ Upéi Juan ohecha ótro animál salváhe. Péva ojoguaiterei pe animál ñamensionáma vaʼekuépe anteve. Péro oĩ peteĩ diferénsia, kóva ko animál salváhe pytãite ha ojeʼe avei hese haʼeha pe “animál salváhe raʼanga” ha peteĩ rréi, “pe ochoha” (elee Apocalipsis 13:14, 15; 17:3, 8, 11).c Ko rréire ojeʼe oexisti hague, péro upéi ndoexistivéima hague ha amo ipahápe oaparese jey hague. Péva pe deskripsión opyta porãiterei pe Organización de las Naciones Unidas rehe, hiʼarive ko organisasión siémpre omotenonde umi mbaʼe oipotáva umi polítiko oĩva ko múndope. Ko organisasión oexistíma vaʼekue voi anteve ha oñehenói vaʼekue chupe Líga de Naciones. Péro upe organisasión opaite vaʼekue pe segunda gérra mundiál aja, ha upéi katu oaparese jey ñane tiémpope péro oñehenóima chupe Organización de las Naciones Unidas térã ONU.

11. ¿Mbaʼépa ojapo umi goviernokuéra, ha mbaʼérepa natekotevẽi jakyhyje chuguikuéra?

¹¹ Umi goviérno omosarambi heta propagánda omomýi hag̃ua la héntepe opuʼã hag̃ua Jehová puévlore. Upéicha haʼete hína ombyatýva hikuái ‘entéro umi rréi ko yvy ariguápe’ oñorairõ hag̃ua pe gérra de Armagedónpe, haʼéva pe gérra “oikótava Ñandejára Todopoderóso ára guasúpe” (Apoc. 16:13, 14, 16). Péro ñande natekotevẽi jakyhyje. Pórke Jehová pyaʼeterei orreaksionáta osalva hag̃ua entéro umi oservíva chupe ha oapojávape igoviérno (Ezeq. 38:21-23).

12. ¿Mbaʼépa oikóta entéro umi animál salváhere?

¹² ¿Mbaʼépa ojehúta entéro koʼã animál salváhepe? Apocalipsis 19:20 heʼi ñandéve: “Pe ohóva pe kavaju ári ojagarra pe animál salváhepe ha pe proféta japúpe, upe ojapóva umi señál pe animál salváhe renondépe, ombotavy hag̃ua entéro umi orresivi vaʼekuépe pe animál salváhe márka, ha oadoráva haʼangápe. Ha oikove aja gueteri pe animál salváhe ha pe proféta japu, haʼe opoi chupekuéra pe lágo oĩháme tatarendy ha asúfre”. Ko profesía ohechauka koʼã goviérno omanda aja gueteri Jehová ohundietetaha chupekuéra.

13. ¿Mbaʼépa ñandejopy jepi umi goviérno jajapo hag̃ua?

¹³ ¿Mbaʼérepa iñimportánte ñandéve g̃uarã koʼã mbaʼe? Ñande kristiáno ningo ñandefiél vaʼerã Jehovápe ha irréinope (Juan 18:36). Upévare ndovaléi ñañentremete polítikare. Ha upéva ningo ikatu sapyʼánte ijetuʼu, pórke umi goviérno oexihi ñandéve jaapoja hag̃ua chupekuéra tahaʼe umi mbaʼe jaʼéva térã jajapóvape. Ha umi oapojáva chupekuéra orresivi pe animál salváhe márka (Apoc. 13:16, 17). Péro Jehová ndoguerohorymoʼãi ni peteĩva umi orresivívape ko márka, ha upéicha rupi haʼekuéra ndaikatumoʼãi oiko pára siémpre (Apoc. 14:9, 10; 20:4). Upévare iñimportanteterei ñande jaapoja sólamente Jehová goviérno, oĩramo jepe heta ñandejopýva jaapoja hag̃ua umi goviérnope.

14. Ohechaukaháicha Apocalipsis 17:3-5, ¿mbaʼépa osorprendeterei apóstol Juánpe?

¹⁴ Apóstol Juan heʼi upéi ohecha hague álgo osorprendetereíva chupe. ¿Mbaʼe mbaʼéiko la oikóva? Haʼe heʼi ohecha hague peteĩ kuña oĩha peteĩva koʼã animál salváhe ári (Apoc. 17:1, 2, 6). Heʼi péva haʼeha peteĩ “kuña rekovai” oñehenóiva avei “Babilonia Guasu”. Ha heʼi hese ‘umi rréi yvy arigua hekovaiha hendive’ (elee Apocalipsis 17:3-5).

15, 16. ¿Mávapa hína Babilonia Guasu, ha mbaʼéichapa jaikuaa upéva?

¹⁵ ¿Mávapepa orrepresenta “Babilonia Guasu”? Ko kuña ndaikatúi orrepresenta umi goviérnope, pórke ojeʼe hese hekovaiha umi rréi ko yvy ariguándi (Apoc. 18:9). Avei haʼe oñehaʼã okontrola koʼã goviérnope, upévare ojeʼe hese oĩha pe animál salváhe ári. Ndaikatúi avei jaʼe ko kuña orrepresentaha pe sistéma komersiál oĩvape Satanás múndope, pórke la Biblia oñeʼẽ apárte ‘umi komersiánte yvy ariguáre’ (Apoc. 18:11, 15, 16).

¹⁶ La Bíbliape oñekompara jepi peteĩ prostitútare umi heʼívape ijehe oadoraha Ñandejárape, péro oadora avei umi dios guaʼúpe, térã ojapóva algúna ótra kósa ojeheʼa hag̃ua ko múndore (1 Crón. 5:25; Sant. 4:4). Péro umi ifiélva ha oadorávare Jehovápe añoite, ojeʼe haʼeha “vírhen” ha ‘hekopotĩha’ (2 Cor. 11:2; Apoc. 14:4). Entéro umi enseñánsa japu oĩva koʼág̃arupi oñepyrũ vaʼekue Babilóniape. Jarekóvo enkuénta koʼã mbaʼe, ikatu jaʼe Babilonia Guasu orrepresentaha entéro umi rrelihión fálsape (Apoc. 17:5, 18. Eikuaave hag̃ua ko témagui ehecha jw.org-pe pe artíkulo hérava “¿Qué es Babilonia la Grande?”).

17. ¿Mbaʼépa oikóta Babilonia Guasúre?

¹⁷ ¿Mbaʼépa ojehúta Babilonia Guasúpe? Apocalipsis 17:16, 17 heʼi ñandéve: “Pe animál salváhe 10 hatĩva nde rehecha vaʼekue ndochaʼemoʼãi pe kuña rekovaíre, oipeʼapaitéta chugui ikosakuéra ha ohejáta chupe opío, hoʼúta hoʼo ha ohapýta chupe kompletoite tatápe. Upéva oikóta pórke Ñandejára omoĩta iñakãmekuéra peteĩ plan ojapo hag̃ua haʼe oipotáva”. Jahechaháicha, Jehová omomýita umi goviérnope oipuru hag̃ua pe animál salváhe pytãitévape térã pe Organización de las Naciones Unídaspe ohundiete hag̃ua umi rrelihión fálsape (Apoc. 18:21-24).

18. ¿Mbaʼe mbaʼépa jajapo vaʼerã pono jaapoja Babilonia Guasúpe?

¹⁸ ¿Mbaʼérepa iñimportánte ñandéve g̃uarã koʼã mbaʼe? Pórke ñanepytyvõ ñantende hag̃ua mbaʼépa jajapo vaʼerã ñameʼẽ hag̃ua Jehovápe “pe adorasión ipotĩva ha ndaikyʼáiva” henondépe (Sant. 1:27). Ñande ni mbaʼevéicharõ ndajaipotái ñanembotavy umi enseñánsa japu, avei ndajapartisipái umi fiésta oúvape umi rrelihión fálsagui, siémpre ñañehaʼãmbaite ñanderekopotĩ oiméramo jepe koʼág̃arupi la héntepe noimportavéima upéva, ha ni mbaʼevéicharõ ndajapraktikaséi mbaʼeveichagua espiritísmo. Péro ndahaʼéi upévante, avei ñañehaʼãmbaite ñaipytyvõ la héntepe oheja hag̃ua koʼã práktika, haʼete voi jaʼéva chupekuéra “pesẽke chugui”. Ha upéicha ñaipytyvõ ñande rapichakuérape ani hag̃ua ojapo mbaʼeve oheja vaítava chupekuéra Ñandejára renondépe (Apoc. 18:4).

19. ¿Mávapa hína ‘pe dragón guasu pytãitéva’?

¹⁹ Lívro de Apocalípsispe oñeñeʼẽ avei ‘peteĩ dragón guasu pytãitévare’ (Apoc. 12:3). Péva pe dragón oñorairõ Jesús ha hiʼanhelkuéra kóntrape (Apoc. 12:7-9). Avei oataka Ñandejára puévlope ha omeʼẽ autorida umi animál salváhepe (Apoc. 12:17; 13:4). ¿Ha mávapa hína pe dragón? Péva ningo “pe mbói ypykue oñehenóiva Diablo ha Satanás” (Apoc. 12:9; 20:2). Ha Satanás oreko hína ipoguýpe entéro umi ótro Jehová kontrariokuérape.

20. ¿Mbaʼépa oikóta pe dragónre?

²⁰ ¿Mbaʼépa ojehúta pe dragónpe? Apocalipsis 20:1-3 heʼi Satanás ha idemoniokuérape oñemombotaha pe yvykua pypukúpe, ha upéva ikatu ñakompara peteĩ kársel rehe. Satanás ha idemoniokuéra oĩ aja upépe ndaikatumoʼãvéima “ombotavy umi tetãnguérape opa peve umi 1.000 áño”. Upe rire Satanás ha idemoniokuérape oñehundíta pára siémpre. Upévare la Biblia heʼi ojepoitaha chupekuéra “pe lágo oĩháme tatarendy ha asúfre” (Apoc. 20:10). ¡Epensamíntena mbaʼeichaitépa javyʼáta ág̃a ndoexistivéi vove Satanás ha idemoniokuéra! ¡Impresionánte mbaʼeichaitépa la jaiko porãta!

21. ¿Mbaʼérepa javyʼaite ñaanalisapa rire ko artíkulo?

²¹ ¡Ajépa javyʼaite ñantendévo umi visión ohecha vaʼekue apóstol Juan! Ndahaʼéi sólamente ñantendénteva máva mávapa hína Jehová kontrariokuéra, síno avei jaikuaáma mbaʼépa oikóta hesekuéra. Heʼiháicha Apocalipsis 1:3: ‘Ovyʼa pe persóna olee hatãva ko profesía, ha ovyʼa umi ohendúva la heʼíva pype’. ¿Péro mbaʼépa ohupytýta Jehová siervokuéra oñehundi rire umi iñenemigokuérape? Ko pregúnta oñembohováita pe artíkulo oúvape.