“Umi oñehaʼãvape oñemoag̃ui Jehováre ndofaltamoʼãi mbaʼevete”

 1. ¿Mbaʼe ijetuʼúvapa ohasa vaʼekue David?

SAÚL, pe rréi ipoderosoitéva oĩva Israélpe, ojukase oikóvo Davídpe, ha David okañýmante chugui. Péro upéi David ndoguerekovéima la hoʼu vaʼerã, upémarõ oho pe siuda héravape Nob ha upépe ojerure oñemeʼẽmi hag̃ua chupe 5 pan (1 Sam. 21:1, 3). Upéi, haʼe ha umi kuimbaʼe oĩva hendive oho okañy peteĩ kuévape (1 Sam. 22:1). ¿Mbaʼéicha rupípa David ojecha upe situasiónpe?

 2. ¿Mbaʼérepa Saúlpe nokonveniriete hína kuri la ojapóva? (1 Samuel 23:16, 17).

² Israélpe ningo entéro omombaʼe vaʼekue Davídpe pórke haʼe ogana heta gérra, ha upévare Saúl oúma oenvidiaiterei Davídpe. Saúl oikuaa vaʼekue avei Jehová omboykemaha chupe pórke haʼe naiñeʼẽrendúi, ha upévare oelehi hague Davídpe opyta hag̃ua rréiramo hendaguépe (elee 1 Samuel 23:16, 17). Upéicharõ jepe, Saúl haʼe gueteri rréi Israélpe, upévare oreko peteĩ ehérsito tuicháva ipoguýpe ha heta oipytyvõva chupe. Upévare David okañýmante chugui pono omano. ¿Oimoʼãne piko Saúl ikatutaha ojoko Jehovápe ani hag̃ua omoĩ Davídpe rréiramo? (Is. 55:11). La Biblia ndeʼíri upéva, péro oĩ peteĩ mbaʼe jaikuaa porãva: Umi oñemoĩva Jehováre katuete osẽ vaíta. Upévare Saúlpe nokonveniriete hína kuri la ojapóva.

 3. ¿Mbaʼépa la ndojapói vaʼekue David ijetuʼúramo jepe la isituasión, ha mbaʼépa la si ojapo vaʼekue?

³ David ndahaʼéi vaʼekue itavyetéva oipotágui oiko chugui rréi, ni noñehaʼãi vaʼekue voi upearã. Jehovánte la omoĩva chupe rréiramo (1 Sam. 16:1, 12, 13). Upévare Saúl ndochaʼeiete voi Davídre ha ojukase chupe. Péro David ndokulpái vaʼekue Jehovápe ojecha haguére upe situasiónpe, ha ndojeplageái avei chupe ndorekoguasúi haguére la hoʼu vaʼerã ni opyta haguére okañy peteĩ kuévape. Upéva rangue, posívlemente oĩ aja upe kuévape la ojapo raʼe pe purahéi porãite jatopáva Salmo 34-pe. Ha upe sálmogui oñeguenohẽ pe téxto omopyendáva ko artíkulo. Salmo 34:10-pe heʼi: “Umi oñehaʼãvape oñemoag̃ui Jehováre ndofaltamoʼãi mbaʼevete”.

 4. ¿Mbaʼe mbaʼépa jahecháta hína ko artíkulope, ha mbaʼérepa umíva iñimportantete?

⁴ Sapyʼánte Jehová siervokuérape ofalta umi mbaʼe oikotevẽva oikove hag̃ua, por ehémplo la hoʼumi vaʼerã.b Upéva koʼytevéntema ojekuaa porã kuri pe pandémia aja. Ha amáske hiʼag̃ui ohóvo pe “jehasa asy guasu”, heta mbaʼe ijetuʼuvétantema hína (Mat. 24:21). Jarekóvo koʼã mbaʼe enkuénta, ñambohovaimína 4 porandu: ¿Mbaʼe sentídope la Davídpe ‘ndofaltái raʼe mbaʼevete’? ¿Mbaʼérepa ñañehaʼã vaʼerã ñañekontenta pe jarekomívare? ¿Mbaʼérepa ikatu ñaĩ segúro Jehová okuidataha ñanderehe? ¿Ha mbaʼéichapa koʼág̃ama voi ikatu jajeprepara amo gotyove g̃uarã?

5, 6. ¿Mbaʼépa David ontendekase raʼe heʼírõ guare Jehová siervokuérape ‘ndofaltamoʼãiha mbaʼevete’? (Salmo 23:1-6).

⁵ ¿Mbaʼépa David ontendekase raʼe heʼírõ guare Jehová siervokuérape ‘ndofaltamoʼãiha mbaʼevete’? Jaikuaa hag̃ua upéva, ikatu jahecha la heʼíva pe Salmo 23-pe (elee Salmo 23:1-6). Ko sálmope David heʼi mas o ménos la mísma kósa heʼi vaʼekue pe Salmo 34-pe. Omoñepyrũvo pe Salmo 23 David heʼi: “Jehová hína che Pastór. Mbaʼevete asy ndofaltamoʼãi chéve”. Upéi David omombeʼu umi vendisión haʼe orresivíva Jehová haʼe haguére Ipastór, ha koʼãva hína la añetehápe iñimportánteva ha núnka ndofaltamoʼãiva chupe. Por ehémplo, Jehová ‘ogia chupe tape porãre’, ha oĩ hendive ivai ha iporã jave la situasión. David oikuaa vaʼekue Jehová ombopytuʼutaha chupe “umi kapiʼipe vérde asýva oĩháme”, péro oikuaa avei upéva ndeʼiseiha núnka naiprovlemamoʼãiha. Sapyʼánte oñedesanimátante voi, ku oguatárõguáicha haʼeño peteĩ “sérro paʼũ iñypytũhárupi”, ha orekótante voi avei enemígo. Péro Jehová ningo la Ipastór, upévare David heʼi: “Che ndakyhyjéi”.

⁶ Ko salmo rupive jaikuaáma mbaʼe sentídopepa Davídpe ‘ndofaltái raʼe mbaʼevete’. Haʼe orekopaite vaʼekue la oikotevẽva haʼe hag̃ua Jehová amígo. David noikotevẽi vaʼekue heta mbaʼe ovyʼa hag̃ua, pórke haʼe oñekontentáma umi mbaʼe Jehová omeʼẽvare chupe. Jehová ovendesi ha oprotehe vaʼekue Davídpe, ha upéva la iñimportanteve vaʼekue Davídpe g̃uarã.

 7. Según Lucas 21:20-24, ¿mbaʼe ijetuʼúvapa ohasa vaʼekue umi kristiáno oiko vaʼekue Judéape?

⁷ Umi mbaʼe David heʼi vaʼekuére jahechakuaa umi mbaʼerepy ndahaʼéi vaʼerãha la iñimportantevéva ñandéve g̃uarã. Ndaivaíri ningo javyʼa jareko haguére la ñande kosami, péro koʼãva ndahaʼéi vaʼerã la iñimportantevéva ñande rekovépe. Umi kristiáno oiko vaʼekue Judéape ontende porã vaʼerã kuri ko asúnto, pórke upéicharõmante ikatúta kuri ojesalva (elee Lucas 21:20-24). Jesús oavisa vaʼekue umi kristiánope ‘umi ehérsito omongorataha Jerusalén’, ha haʼekuéra ohecha vove upéva tekotevẽtaha ‘odipara oho umi montáñape’. Iñeʼẽrendu hag̃ua Jesúspe, haʼekuéra tekotevẽta kuri osakrifika heta mbaʼe, péro ojesalváta ojapóramo upéva. Ojapóma unos kuánto áño peteĩ Ñemañaha oñeʼẽ hague koʼã kristiánore, ha heʼi: “Haʼekuéra oheja ikokue ha la hóga, haʼekuéra ni naitiémpoi ombyaty hag̃ua la ikosakuéra. Péro ojapo hikuái upéicha oikuaágui Jehová okuidataha hesekuéra. Chupekuéra g̃uarã Jehová iñimportanteve vaʼekue oimeraẽ ótra kósagui”.

 8. ¿Mbaʼépa ikatu ñaaprende umi kristiáno oiko vaʼekuégui Judéape?

⁸ ¿Mbaʼépa ikatu ñaaprende umi kristiáno oiko vaʼekuégui Judéape? Pe Ñemañaha ajeʼi ñañeʼẽ hague heʼi: “Ikatu hína amo gotyove oñepresenta ñandéve umi situasión tekotevẽtahápe jahechauka mbaʼépa la iñimportantevéva ñandéve g̃uarã. ¿Iñimportantevépa ñandéve g̃uarã umi mbaʼerepy? ¿Térãpa iñimportanteve ñandefiél Jehovápe ikatu hag̃uáicha jajesalva? Ág̃a og̃uahẽ vove pe fin ikatu hína ijetuʼu ñanendive ofaltágui ñandéve heta mbaʼe. Upévare koʼág̃ama jajeprepara vaʼerã jajapo hag̃ua la tekotevẽva guive jajesalva hag̃ua. Péicha jajapóramo jajoguáta umi kristiáno yma guarépe, osẽ vaʼekue odipara ojesalva hag̃ua”.c

 9. ¿Mbaʼéichapa nemokyreʼỹ ndéve umi mbaʼe heʼi vaʼekue apóstol Pablo Hebreos 13:5, 6-pe?

⁹ Koʼã kristiáno ningo ohejapa lénto la orekomíva Jerusalénpe, ha oho ótro ládo oñepyrũ deceroite. ¡Eñeimahinamíntena mbaʼeichaitépa oiméne ijetuʼu raʼe chupekuéra upéva! Upévare koʼã kristiáno ojeroviámante vaʼerã kuri Jehová omeʼẽtaha chupekuéra la oikotevẽva. Péro oĩ vaʼekue peteĩ mbaʼe oipytyvõva chupekuéra. Cinco áño umi rrománo omongora mboyve Jerusalén, apóstol Pablo omeʼẽ peteĩ konsého iporãitereíva Hebreos 13:5, 6-pe. Upépe haʼe heʼi: “Aníkena peiko pendeplatarayhu, upéva rangue pevyʼáma vaʼerã umi mbaʼe perekóvare. Ñandejára heʼi voi: ‘Núnka ndorohejamoʼãi ha núnka nderepytamoʼãi neaño’. Upéicharõ, ani jakyhyje, síno jaʼe vaʼerã: ‘Jehová chepytyvõ hína, ndakyhyjemoʼãi asy, ¿mbaʼe piko ojapóta cherehe peteĩ persóna cheichagua?’”. Ko konsého oiméne tuicha oipytyvõ raʼe umi kristiáno iñeʼẽrendúvape, pórke ou mboyve jepe pe ehérsito rrománo haʼekuéra ja ojepokuaátama kuri oiko sensillomie. Ha upéi ohóvo oiko ótro lugárpe, ndahaʼemoʼãvéima ijetuʼuetereíva chupekuéra ojeadapta hag̃ua, ni ojerovia hag̃ua Jehová omeʼẽtaha chupekuéra la oikotevẽva oikove hag̃ua. Umi mbaʼe Pablo heʼi vaʼekue ohechauka ñande avei ikatuha ñaĩ segúro Jehová omeʼẽtaha ñandéve la ñaikotevẽva.

10. ¿Mbaʼépa la Pablo oaprende vaʼekue péro “naentéroi oikuaáva”?

¹⁰ Pablo omeʼẽ vaʼekue avei peichagua konsého Timotéope, ha upe konsého ñandéve avei ideprovéchota. Haʼe heʼi chupe: “Upéicharõ, jarekóma guive jaʼumi vaʼerã ha ñande aorã, javyʼáma vaʼerã koʼã mbaʼére” (1 Tim. 6:8). ¿Upévapa heʼise ñande ndaikatuiha jaʼu la ñandegustáva, ni jaiko peteĩ lugár iporãmívape, ni jajogua ñande ao pyahurã káda tánto? Ndahaʼéi upéva la Pablo heʼise vaʼekue. Pablo la heʼise vaʼekue ñañekontentáma vaʼerãha la jarekomívare, tahaʼe haʼéva (Filip. 4:12). Upéva haʼe vaʼekue peteĩ mbaʼe Pablo oaprendéva péro “naentéroi oikuaáva”. ¿Mbaʼépa la iporãvéva jarekóva? Pe amista jarekóva Jehovándi ha ndaipóri mbaʼeve ko múndope iporãvéva upévagui (Hab. 3:17, 18).

11. ¿Mbaʼéichapa umi mbaʼe Moisés heʼi vaʼekue umi israelítape ñanepytyvõ ñañekontentáma hag̃ua la jarekomívare?

¹¹ Sapyʼánte ñande ñapensa ñaikotevẽha peteĩ mbaʼe, péro Jehová ikatu hína ótra kosaite opensa. Eñatendemíntena mbaʼépa Moisés heʼi vaʼekue umi israelítape ohasa rire hikuái 40 áño pe desiértope. Moisés heʼi: “Jehová pende Jára ningo penevendesi opa mbaʼe pejapóvape. Haʼe oikuaapaite umi mbaʼe pehasa vaʼekue ko desiérto tuichaitévape. Koʼã 40 áño aja Jehová pende Jára oĩ penendive ha ndofaltái peẽme mbaʼeve” (Deut. 2:7). Umi 40 áño aja, Jehová omeʼẽ vaʼekue maná umi israelítape hoʼu hag̃ua, ha ijaokuéra ndojegastái vaʼekue. Hiʼarive upe ao reheve haʼekuéra osẽ vaʼekue Egíptogui (Deut. 8:3, 4). Ikatu oĩ heʼíva umi israelita ohasa hague heta nesesida, péro Moisés heʼi chupekuéra mbaʼevete ndofaltái hague chupekuéra. Jehovápe ogustaiterei ñande javyʼáramo pe jarekomívare, pórke ñanembovyʼáta entéro mbaʼe haʼe omeʼẽva ñandéve, haʼetéramo jepe sonseraitereíva.

12. ¿Mbaʼérepa jaʼe David ojerovia hague Jehováre ha ndahaʼéi ijehe?

¹² David oikuaa porã vaʼekue Jehová núnka ndohejamoʼãiha umi ohayhúvape chupe, ha oñeinteresaitereiha isiervokuérare. David oskrivírõ guare pe Salmo 34 ijetuʼu vaʼekue la isituasión ha ikatu vaʼekue voi omano. Péro David ojeroviaiterei rupi, oikuaa porã vaʼekue ‘Jehová ánhel oĩha ijerére’ (Sal. 34:7). Ikatu oime David okompara raʼe Jehová ánhelpe peteĩ soldádore, pórke umi soldádo siémpre oñatende ani hag̃ua ou chupekuéra la iñenemígo de sorpresaite. David ikatu vaʼekue ojerovia ijehénte, pórke haʼe haʼe vaʼekue peteĩ soldádo ipyʼaguasúva ha Jehová ja oprometéma kuri ojapotaha chugui rréi. David ipulsoiterei vaʼekue avei la óndape ha ivaleterei la espádape. Péro David ndojeroviái ijehe, haʼe ojerovia Ñandejárare (1 Sam. 16:13; 24:12). David oikuaa vaʼekue Jehová ánhel osalvaha ‘umi orrespetávape Ñandejárape’. Ñande ningo koʼág̃a nañahaʼarõmoʼãi Jehová ñandeprotehe milagrósamente, péro jaikuaa porã umi ojeroviáva Jehováre ikatutaha oikove pára siémpre. Omanóramo jepe koʼág̃a, Jehová omoingove jeýta chupe.

13. ¿Mbaʼérepa Gog de Magog opensáta sapyʼaitépe ikatutaha ñanerundi, péro mbaʼérepa ndajakyhyjéi vaʼerã? (Ehecha pe taʼanga oĩva ko rrevísta apére).

¹³ Koʼẽrõitéma tekotevẽta jahechauka añetehápepa jajerovia Jehová ikatutaha ñandesalva. Gog de Magog (pe grúpo de nasión) ñandeataka vove, haʼetéta voi ñandéve haʼekuéra ñandejukapátava. Péro ág̃a upérõ, jajerovia mbarete vaʼerã Jehováre, ha ndajadudái vaʼerã haʼe ñandesalvataha. Chupekuéra g̃uarã ñande jajoguáta umi ovecha ndorekóivape odefende vaʼerã chupekuéra (Ezeq. 38:10-12). Ñande ndajarekói árma ha ndajaikovaikuaái gerrahápe, upévare opensáta hikuái sapyʼaitépe ñanerundipataha. Péro ñande jaikuaa oĩha hetaiterei ánhel ñande jerére ikatu hag̃uáicha ñanedefende, péro ñane enemigokuéra ndoikuaái upéva pórke ndojeroviái Ñandejárare. Upévare tuichaiterei oñesorprendéta hikuái ou vove hetaiterei ánhel ñandesalva hag̃ua (Apoc. 19:11, 14, 15).

14. ¿Mbaʼe mbaʼépa tekotevẽ jajapo koʼág̃a jajepreparáma hag̃ua amo gotyove g̃uarã?

¹⁴ ¿Mbaʼépa ikatu jajapo koʼág̃a jajepreparáma hag̃ua amo gotyove g̃uarã? Primeroite voi, ndovaléi ñamombaʼeterei umi mbaʼerepy jaikuaágui koʼẽrõitéma tekotevẽtaha jahejapa umíva. Tekotevẽ avei ñañekontenta umi mbaʼe jarekomívare ha javyʼa Jehová haʼe haguére ñane amígo, pórke upéva hína la iñimportantevéva. Amáske jaikuaa porãve Jehovápe, jaikuaa porãvétantema avei haʼe ikatutaha ñandeprotehe Gog de Magog ñandeataka vove.

15. ¿Mbaʼe mbaʼépa ohasa raʼe David oipytyvõva chupe ohechakuaa hag̃ua Jehová ndohejareimoʼãiha chupe?

¹⁵ Oĩ vaʼekue ótra kósa oipytyvõva Davídpe ha ikatúva avei ñanepytyvõ ñandéve jajeprepara hag̃ua. David heʼi vaʼekue: “Petanteána ha pehecha mbaʼeichaitépa Jehová ivuéno. Ovyʼa pe persóna oñemoag̃uíva hese ojeprotehe hag̃ua” (Sal. 34:8). Ko téxto rupive jaikuaa mbaʼérepa David ojeroviaite vaʼekue Jehováre. David siémpre ojerovia Jehováre ha Jehová núnka ndohejareíri chupe. David imitárõ guare oiko vai vaʼekue Goliat ndive, ha Goliat tuichavéramo jepe chugui, David heʼi chupe: “Koestedía Jehová chepytyvõta rogana hag̃ua” (1 Sam. 17:46). Upéi David oñepyrũ ombaʼapo pe rréi Saúlpe g̃uarã, ha ko rréi hetaiterei vése oñehaʼã ojuka chupe péro Jehová siémpre ‘oipytyvõ Davídpe’ (1 Sam. 18:12). David hetaiterei vésema voi ohecha kuri Jehová oipytyvõha chupe, upévare ndodudavéima Jehová ojapotaha upéva hesehápe.

16. ¿Mbaʼe mbaʼépa ikatu jajapo ‘ñatantea’ hag̃ua Jehová ivuenoha?

¹⁶ Amáske jaheja Jehová ñandegia, japilla porãvétantema haʼe ikatutaha ñandesalva amo gotyove. Jajeroviámante vaʼerã Jehováre, ikatu hag̃uáicha jajerure permíso ñane patrónpe jaha hag̃ua peteĩ aty guasúpe, térã jaʼe hag̃ua chupe ndaikatuichénepa saʼimie ñambaʼapo ikatu hag̃uáicha jaha rreunionhápe ha japredikave hag̃ua. Péro ñamoĩ chupe ne patrón nomeʼẽseiha ndéve permíso ha nemosẽha. ¿Ejeroviátapa Jehová nanderejamoʼãiha ha omeʼẽtaha ndéve la reikotevẽva? (Heb. 13:5). Umi oservíva de tiémpo kompléto, ikatu omombeʼu heta experiénsia ohechaukáva Jehová oipytyvõ hague chupekuéra oikotevẽve jave hikuái. Jehová núnka ndohejareíri chupekuéra.

17. ¿Mbaʼépa hína pe téxto áño 2022-pe g̃uarã, ha mbaʼérepa ou porãite ñandéve?

¹⁷ Jehová oĩramo ñande ykére ndaipóri ñanemongyhyje vaʼerã, ni umi mbaʼe oikótava amo gotyove. Ñandejára Jehová ndahesaraimoʼãi ñandehegui ñamotenondéma guive Irréino ñande rekovépe. Koʼág̃ama jajeprepara vaʼerã amo gotyove g̃uarã ha ndajadudái vaʼerã Jehová nañanderejareimoʼãiha. Ñanemanduʼa hag̃ua koʼã mbaʼére, pe Kuérpo Governánte odesidi pe Salmo 34:10 haʼetaha pe téxto ko áñope g̃uarã. Upépe heʼi: “Umi oñehaʼãvape oñemoag̃ui Jehováre ndofaltamoʼãi mbaʼevete”.