“Tapeho pemboʼe umi hénte opa tetãyguápe oiko hag̃ua chuguikuéra che disípulo”

1, 2. Jaleévo Mateo 24:14, ¿mbaʼépa ikatu ñañeporandu?

JESÚS oprofetisa vaʼekue umi ára pahápe, pe marandu porã oñeʼẽva Ñandejára Rréinore ojepredikataha oparupiete (Mat. 24:14). Ko yvy tuichakuére umi hénte ñandekuaa ñasẽ rupi japredika opárupi. Oĩ heta persóna oaseptáva pe mensáhe jagueraháva, péro oĩ avei umi ndoaseptáiva. Upéicharõ jepe haʼekuéra ñanderrespeta jajapo haguére ko tembiapo. ¿Mbaʼérepa ikatu ñaime segúro ñande testígo de Jehová ñakumpliha pe profesía Jesús omeʼẽ vaʼekue? ¿Ñañembotuichápa jajapo rupi ko tembiapo iñimportantetéva?

² Heta rrelihión oasegura okumpliha pe mandáto Jesús oheja vaʼekue. Haʼekuéra heʼi opredikaha pe marandu porã ojapóvo mísa térã sermón ijiglésiape, térã otransmitíramo imensáhe téle ha Internet rupive. Oĩ avei heʼíva opredikaha omombeʼúvo itestimónio ótrope, oipytyvõvo umi hénte oikotevẽvape, ombaʼapóvo ospitalhárupi, térã omboʼévo umi eskuéla ha koléhiore. Péro, ¿añetehápepa okumpli hikuái Jesús omanda vaʼekue?

 3. Heʼiháicha Mateo 28:19, 20, ¿mbaʼe mbaʼépa ojapo vaʼerã Jesús segidorkuéra?

³ Ñapensamíntena Jesús disipulokuérare. ¿Ohaʼarõpa raʼe hikuái umi hénte ou hendapekuéra ikatu hag̃uáicha opredika chupekuéra? Nahániri. Jesús oikove jey rire, haʼe heʼi vaʼekue idisipulokuérape: “Tapeho pemboʼe umi hénte opa tetãyguápe oiko hag̃ua chuguikuéra che disípulo; ha pevautisa [...] ha pemboʼe chupekuéra ojapo hag̃ua opa mbaʼe amanda vaʼekue peẽme” (Mat. 28:19, 20). Péicha jahecha Jesús segidorkuéra ojapo vaʼerãha 4 kósa: Primero, oho vaʼerã hikuái oheka umi héntepe. Segundo, oipytyvõ vaʼerã umi héntepe oiko hag̃ua chuguikuéra Jesús disípulo. Tercero, ovautisa vaʼerã chupekuéra. Ha cuarto omboʼe vaʼerã chupekuéra ikatu hag̃uáicha ojapo opa mbaʼe Jesús omanda vaʼekue. Peteĩ mboʼehára ostudiáva umi palávra ojepurúva la Bíbliape, oexplika: “Jesús heʼívo ‘tapeho’, heʼise káda uno isegidorkuéra oho vaʼerãha opredika, tekotevẽramo jepe okrusa kálle térã mar ojapo hag̃ua upéva” (Mat. 10:7; Luc. 10:3).

 4. ¿Mbaʼérehepa oñeʼẽ Jesús heʼívo idisipulokuérape ‘ojagarra vaʼerãha hénte, ojagarraháicha pira’?

⁴ ¿Heʼisépa raʼe Jesús isegidorkuéra opredika vaʼerãha haʼeño, térãpa oipota oñeorganisa porã hikuái? Peteĩ persónante ningo ndaikatumoʼãi opredika haʼeño umi hénte “opa tetãguápe”. Upévare, Jesús segidorkuéra tekotevẽ oñeorganisa porã ojapo hag̃ua ko tembiapo. Peteĩ jey, Jesús heʼi voi idisipulokuérape ‘ojagarra vaʼerãha hénte, ojagarraháicha pira’ (elee Mateo 4:18-22). Upérõ Jesús noñeʼẽi peteĩ kuimbaʼe oipurúvare pinda opeska hag̃ua, ha oguapýva ohaʼarõ umi pira opika ikarnáda. Síno Jesús oñeʼẽ umi péska oñekotevẽhápe rred tuicháva. Koichagua péskape heta persóna oñopytyvõ vaʼerã onohẽ hag̃ua pe rred henyhẽva pirágui (Luc. 5:1-11).

 5. ¿Mbaʼe porandúpa ñakontesta vaʼerã, ha mbaʼérepa?

⁵ Jaikuaa hag̃ua mávapa umi okumplíva Jesús profesía ha opredikáva pe marandu porã koʼág̃arupi, ñarresponde vaʼerã koʼã 4 porandu:

• ¿Mbaʼe mensáhepa opredika vaʼerã Jesús segidorkuéra?

• ¿Mbaʼépa omomýi chupekuéra ojapo hag̃ua ko tembiapo?

• ¿Mbaʼe métodopa oipuru hikuái?

• ¿Mbaʼe mbaʼépa ohupyty hikuái ipredikasión rupive, ha arakaʼe pevépa opredika vaʼerã?

Ñarresponde rire koʼã pregúnta, jaikuaáta mávapa añetehápe umi ojapóva ko tembiapo iñimportantetéva osalvátava hetaiterei persónape, ha ñanemombaretéta jasegi hag̃ua japredika (1 Tim. 4:16).

 6. ¿Mbaʼérepa ikatu jaʼe testígo de Jehová añoite opredikaha umi marandu porã?

⁶ (Elee Lucas 4:43.) Jesús ningo opredika vaʼekue “umi marandu porã oñeʼẽva Ñandejára Rréinore”, ha oipota avei idisipulokuéra ojapo upéva. ¿Mávapa umi oñeʼẽva Ñandejára Rréinore “oparupiete ko yvy ape ári”? Umi testígo de Jehová añoite. Heta héntepe ndogustái ñane rembiapo, upéicharõ jepe orrekonose hikuái ñande añoite japredikaha pe mensáhe Jesús omboʼe vaʼekue. Por ehémplo, peteĩ paʼi oservímava diferénte paíspe, heʼi peteĩ ermánope káda paíspe oporandu hague umi Testígope mbaʼe mensáhepa la opredikáva hikuái. Pe paʼi omombeʼu: “Enterovetéva ningo ivyroiterei pórke peteĩchapa orresponde hikuái: ‘Pe marandu porã oñeʼẽva Ñandejára Rréinore’”. Péro añetehápe umi Testígo ndaivyroiete hína. Haʼekuéra ningo kristiáno verdadéro ha oiko peteĩ ñeʼẽme (1 Cor. 1:10). Ko rrevísta hérava Ñemañaha. Oanunsia Jehová Goviérno, oñeʼẽ avei Ñandejára Rréinore. Káda número oñeimprimi haimete 59 millón ha oñeguenohẽ 254 idiómape. Ndaipóri ótra rrevísta peichaite peve ojekuaáva opárupi ko yvy ape ári.

 7. ¿Mbaʼérepa ikatu jaʼe umi líder rrelihióso ndopredikaiha pe marandu porã?

⁷ Umi líder rrelihióso heʼíva ijehe kristianoha noñeʼẽi umi héntepe Ñandejára Rréinore. Ha oimérõ oñeʼẽ pe Rréinore, heʼínte haʼeha peteĩ mbaʼe jarekóva ñane korasõme (Luc. 17:21). Haʼekuéra nomboʼéi umi héntepe pe Rréino haʼeha peteĩ goviérno yvagapegua oĩva Jesucristo pópe. Ni ndeʼíri ko goviérno osolusionataha entéro umi provléma oĩva ko múndope ha oipeʼataha opa mbaʼe vai (Apoc. 19:11-21). Upéva rangue, oñeʼẽ hikuái Jesús rehe Navidad ha Semána Sánta javénte. Jahechaháicha, haʼete voi umi líder rrelihióso ndoikuaáiva mbaʼépa Jesús ojapóta ogoverna vove. Ha haʼekuéra nontendéi rupi mbaʼe mensáhepa Jesús opredika vaʼekue, nontendéi avei maʼerãpa opredika vaʼerã.

 8. ¿Mbaʼépa nohaʼarõi vaʼerã umi opredikáva pe marandu porã?

⁸ Umi kristiáno verdadéro ndopredikái ombyaty hag̃ua pláta ni omopuʼã hag̃ua umi tupao de lúho ha tuichaicháva. Jesús heʼi vaʼekue: “Javyʼaiteve ñameʼẽvo, ñandéve oñemeʼẽ rangue” (Mat. 10:8). Upéicharõ, Ñandejára Ñeʼẽ ndojepurúi vaʼerã ojejapo hag̃ua negósio (2 Cor. 2:17). Umi opredikáva nohaʼarõi vaʼerã ojepaga chupekuéra opredika haguére (elee Hechos 20:33-35). Hesakã porãramo jepe Jesús heʼi vaʼekue, la majoría umi líder rrelihiósope g̃uarã iñimportanteve hína ombyaty pláta omantene hag̃ua itupaokuéra, ha opaga hag̃ua umi saserdóte ha umi ombaʼapóvape umi iglésiape. Upéicha rupi, heta líder rrelihióso ou irrikoiterei (Apoc. 17:4, 5).

 9. ¿Mbaʼépa ñanemomýi vaʼerã japredika hag̃ua?

⁹ Ha ¿mbaʼépa ikatu jaʼe umi testígo de Jehováre? ¿Ojerurépa hikuái pláta irreunionkuéra ha umi asambleahápe? Nahániri. Entéro umi gásto oĩva Jehová organisasiónpe, ojepaga kontrivusión voluntária rupive (2 Cor. 9:7). Pe áño ohasa vaʼekuépe, umi testígo de Jehová odedika 1.930 millones de óra opredika hag̃ua pe marandu porã, ha ojapo 9 millones de estúdio bíblico grátis káda mes. Chupekuéra ndojepagái opredika haguére, ha vyʼápe oipuru irrekursokuéra ojapo hag̃ua ko tembiapo. Peteĩ investigadór heʼi umi testígo de Jehováre: “Chupekuéra g̃uarã iñimportanteterei opredika ha oporomboʼe [...]. Ha ndoikói rupi ombosuéldo umi omoakãvape chupekuéra, saʼive avei umi gásto”. Upéicharõ, ¿mbaʼépa ñanemomýi japredika hag̃ua? Jahecháma haguéicha, ñande nañahaʼarõi ojepaga ñandéve, síno jajapo ko tembiapo jahayhúgui Jehovápe ha umi héntepe. Péicha ñakumpli pe profesía oĩva Salmo 110:3-pe (elee).

10. ¿Mbaʼe métodopa oipuru vaʼekue Jesús ha idisipulokuéra opredika hag̃ua?

¹⁰ Jesús ha idisipulokuéra oho vaʼekue opredika hag̃ua umi lugár oĩhárupi hénte, tahaʼe kállere, merkádore, térã umi hénte rogaitépe voi (Mat. 10:11; Luc. 8:1; Hech. 5:42; 20:20). Ohóvo hikuái de kása en kása, ohechauka oĩha dispuésto opredikávo opaichagua persónape.

11, 12. ¿Mbaʼépepa umi testígo de Jehová idiferénte umi ótro rrelihióngui?

¹¹ ¿Opredikápa pe marandu porã umi heʼíva ijehe kristianoha? La majoría umi hénte opensa umi omoakãva chupekuérante la opredika vaʼerãha, pórke ojepaga chupekuéra upearã. Umi líder rrelihióso noñehaʼãiete oheka umi héntepe omboʼe hag̃ua chupekuéra la Biblia, pórke oñekontentáma umi oĩvare ijeglesiakuérape. Haʼekuéra omokyreʼỹ mimi avei umi héntepe opredika hag̃ua, upéicharõ jepe noñepenaguasúi hesekuéra. Por ehémplo, áño 2001-pe, el pápa Juan Pablo II oguenohẽ peteĩ kárta heʼíva: “Koʼã áño ohasávape heta vésema ajapo peteĩ ‘llamádo’ umi kristiánope oñemoĩ hag̃ua opredika pe Evanhélio. Ha koʼág̃a poinvita jey [...]. Ñanekyreʼỹ vaʼerã apóstol Pablo ikyreʼỹ haguéicha. Haʼe heʼi vaʼekue: ‘Aichejáranga che, namoherakuãiramo pe Marandu Porã’”. Upéi heʼi avei: “Ko tembiapo ningo ndaikatúi jahejánte unas kuánta persóna ikatupyrývape, síno enterovetéva ñaiméva Ñandejára puévlope jareko upe rresponsavilida”. Upéicharõ jepe, saʼieterei oĩ openáva pe mensáhe omeʼẽ vaʼekuére el pápa.

¹² ¿Ha mbaʼépa ojapo umi testígo de Jehová? Haʼekuéra añoite la opredikáva Jesús ogovernamaha áño 1914 guive. Umi Testígo iñeʼẽrendu Jesúspe ha omotenonde pe predikasión (Mar. 13:10). Peteĩ lívrope heʼi: “Umi testígo de Jehovápe g̃uarã pe predikasión iñimportanteve opa mbaʼégui”. Upéi heʼi avei: “Haʼekuéra ojuhu vove umi persóna hasykatúva, iñembyahýiva ha ojecháva haʼeño, oñehaʼãmbaite oipytyvõ chupekuéra, [...] péro siémpre imanduʼa iñimportanteveha omombeʼu umi héntepe pe fin hiʼag̃uimaha, ha omboʼe chupekuéra mbaʼépa ojapo vaʼerã ojesalva hag̃ua” (Pillars of Faith—American Congregations and Their Partners). Añetehápe, umi testígo de Jehová osegi oipuru umi método Jesús ha idisipulokuéra oipuru vaʼekue opredika hag̃ua.

13. ¿Mbaʼeichaite pevépa ojepredika vaʼerã?

¹³ Jesús heʼi vaʼekue isegidorkuéra opredika ha omboʼe vaʼerãha pe marandu porã “oparupiete ko yvy ape ári” (Mat. 24:14). Haʼekuéra oipytyvõ vaʼerã umi hénte “opa tetãyguápe oiko hag̃ua chuguikuéra” Jesús disípulo (Mat. 28:19, 20). Upéva heʼise ko tembiapo ojejapotaha ko yvy tuichakuére.

14, 15. ¿Mbaʼérepa jaʼekuaa testígo de Jehová okumpliha Jesús profesía? (Ehecha umi taʼanga oĩva iñepyrũme.)

¹⁴ Umi testígo de Jehová añoite okumpli pe profesía Jesús omeʼẽ vaʼekue: opredika pe marandu porã oparupiete ko yvy ape ári. ¿Mbaʼérepa jaʼe upéva? Por ehémplo, Estados Unídospe oĩ 1.200.000 rupi testígo de Jehová, péro oĩ 600.000 líder rrelihiósonte omoakãva diferénte rrelihión upe paíspe. Ko yvy tuichakuére oĩ ménos de 400.000 saserdóte Iglésia Katólika Románape, péro oĩ mas de 8 millón testígo de Jehová opredikáva voluntáriamente 240 paíspe. Péicha jahecha testígo de Jehová añoite opredikaha ko múndo tuichakuére, ha ko tembiapo rupive oñembotuicha Jehovápe (Sal. 34:1; 51:15).

¹⁵ Ñande testígo de Jehová ningo jaipota heta hetave persóna ohendu pe marandu porã og̃uahẽ mboyve pe fin. Upévare jatradusi ha ñaimprimi mas de 700 idiómape millones de lívro, rrevísta, tratádo ha invitasión Konmemorasión ha asambléape g̃uarã. Hiʼarive ndajakovrái umi héntepe koʼã mbaʼére, síno ñameʼẽ chupekuéra grátis. Pe áño ohasa vaʼekuépente voi, ñaimprimi haimete 4.500 millones puvlikasión oñeʼẽva la Bíbliare. Avei ñaimprimi mas de 200 millones pe Traducción del Nuevo Mundo de las Santas Escrituras mas de 130 idiómape. Ha ñande páhina de Internet oĩma disponívle mas de 750 idiómape. ¿Oĩpa ótra organisasión rrelihiósa ojapóva koʼã mbaʼe?

16. ¿Mbaʼérepa ikatu jaʼe testígo de Jehová orekoha Ñandejára espíritu?

¹⁶ ¿Arakaʼe pevépa japredika vaʼerã? Jesús heʼi vaʼekue pe marandu porã ojepredika vaʼerãha og̃uahẽ meve “pe ára pahaite” (Mat. 24:14). Ñande testígo de Jehová jasegi japredika koʼã ára pahápe, ijetuʼúramo jepe. Ha ikatu jajapo upéva Jehová espíritu sánto ñanepytyvõ rupi (Hech. 1:8; 1 Ped. 4:14). Heta persóna rrelihiósa heʼi: “Peẽ pesẽ pepredika, péro ore hína la roguerekóva pe espíritu sánto”. Péro, ¿siértopa upéva? Ñapensamína: ¿Ikatútapa jasegi japredika koʼã ára pahápe nañanepytyvõirire pe espíritu sánto? Ni mbaʼevéicharõ. Heta rrelihión ningo oñehaʼãma opredika ojapoháicha umi testígo de Jehová, péro sapyʼaitépe ojedeha jey hikuái. Ótro katu osẽ opredika, péro peteĩ tiémporente. Oĩ avei umi ohóva de kása en kása, péro noñeʼẽi hikuái Ñandejára Rréinore. Opa umívare ikatu jaʼe koʼã persóna ndojapoiha pe tembiapo Jesús omanda vaʼekue.

17, 18. a) ¿Mbaʼérepa ikatu jaʼe testígo de Jehová añoite opredikaha pe marandu porã? b) ¿Mbaʼépa ñanepytyvõ japredika hag̃ua pe marandu porã ko yvy tuichakuére?

¹⁷ ¿Máva mávapa opredika umi marandu porã ko tiémpope? Ñande testígo de Jehová añoite. ¿Mbaʼérepa jaʼe upéva? Pórke japredika pe mensáhe oñeʼẽva Ñandejára Rréinore. Ñande voi jaha jaheka umi héntepe. Avei japredika jahayhúgui Jehovápe ha ñande rapichakuérape. Ha ñane predikasión rupive ñag̃uahẽma hetaiterei hénte opa tetãguápe, ha japredika diferénte idiómape. Hiʼarive jasegíta jajapo ko tembiapo og̃uahẽ meve pe fin.

¹⁸ ¡Ajépa iñimportantete ko tembiapo jajapóva koʼã ára pahápe! Péro, ¿mbaʼépa ñanepytyvõ japredika hag̃ua pe marandu porã ko yvy tuichakuére? Apóstol Pablo heʼi vaʼekue: “Ñandejára ojapo hína umi mbaʼe chupe ogustáva, ha penemombarete pejapose hag̃ua opa mbaʼe haʼe oipotáva” (Filip. 2:13). Jehová ningo katuete ñanemombaretéta jasegi hag̃ua japredika pe marandu porã Jesucristo omanda haguéicha (2 Tim. 4:5).