Jaservi hekoitépe ‘Ñandejára omeʼẽvape pyʼaguapy’

1, 2. ¿Mbaʼépa oñekambia Ñemañaha rehe enero de 1895-pe, ha mbaʼépa heʼi ermanokuéra?

PETEĨ ermáno hérava John Bohnet ovyʼaiterei ohechárõ guare pe rrevísta Ñemañaha osẽ vaʼekue enero de 1895-pe. Upe rrevísta apére oñemoĩ peteĩ divúho pyahu: peteĩ tórre yvate orekóva peteĩ lus ohesapéva pyharekue pe mar pochy gotyo. Pe rrevísta heʼi pe Ñemañaha koʼág̃a orekoha peteĩ ao pyahu.

² Ermáno Bohnet ohecharamoiterei upéva. Upévare oguerahauka peteĩ kárta ermáno Rússellpe ha heʼi: “Chepyʼarory ahechávo Ñemañaha ijape pyahuha. Opyta porãiterei”. Ótro ermáno hérava John Brown ohai avei: “Pe divúhope jahecha mbaʼéichapa isimiénto porã pe tórre ha ojepytaso mbarete ojejapetéramo jepe hese umi oláda tuichaicháva ha pe torménta”. Upe áñope oñekambia Ñemañaha ape, péro ndahaʼéi upévante la oñekambiáva. Noviémbrepe oñekambia ótra kósa iñimportánteva, ha upe oikóva upe méspe ojogua avei peteĩ mar pochýpe.

3, 4. ¿Mbaʼe provlémarepa oñeʼẽ Ñemañaha 15 de noviembre de 1895, ha mbaʼe ipyahúvapa ojejapo?

³ Ñemañaha 15 de noviembre de 1895-pe osẽ peteĩ artíkulo ipukúva oñeʼẽva pe situasión oĩvare upe tiémpope. Heʼi umi Estudiánte de la Biblia apytépe oĩha provléma ojoguáva oláda tuichaichávape. Oĩ heta ermáno oiko vaíva ótrondi omandaségui kongregasiónpe. Upéicha rupi ndoikovéima pyʼaguapýpe. Umi ermáno ohechakuaa hag̃ua tekotevẽha oiko porã jey, pe artíkulo heʼi Jehová organisasión ojoguaha peteĩ várkope. Heʼi avei umi omoakãva pe organisasión ndopreparái hague umi ermánope ombohovái hag̃ua koʼãichagua provléma ojoguáva torméntape. ¿Mbaʼépa ojejapo vaʼerã?

⁴ Pe artíkulo heʼi peteĩ kapitán ivakeánova ohechaha ivárkopepa oĩ umi salvavída oñekotevẽtava térã umi marinéropa oikuaa mbaʼépa ojapóta ohecha vove ouha peteĩ torménta vai. Upéicha avei umi omoakãva Jehová organisasión oprepara vaʼerã kongregasionkuérape ombohovái hag̃ua umi provléma ijetuʼúva. Upearã pe rrevísta heʼi ojejapotaha peteĩ kámbio iñimportantetereíva. Heʼi: “entéro kongregasiónpe ojeporavo vaʼerã ansiáno oñangareko hag̃ua ermanokuérare” (Hech. 20:28).

 5. a) ¿Mbaʼépa ojehupyty oñenombra rire ansianokuérape? b) ¿Mbaʼe porandúpa ñahesaʼỹijóta?

⁵ Oñenombra rire umi ansiánope tuichaiterei oñepytyvõ kongregasionkuérape ombaʼapo porã hag̃ua oñondivepa. Upéicha rupi ñane ermanokuéra ogueropuʼaka umi provlemaita oĩ vaʼekue primera gérra mundiál aja. Umi áño oúvape upe rire oñekambia hetave mbaʼe oipytyvõva ermanokuérape oservi porãve hag̃ua Jehovápe. ¿Mbaʼe profesíapa oñeʼẽ raʼe umi kámbiore? ¿Mbaʼe mbaʼépa nde rehecháma oñekambiáramo Jehová organisasiónpe? ¿Mbaʼéichapa nepytyvõ raʼe umíva?

6, 7. a) ¿Mbaʼépa heʼise Isaías 60:17? b) ¿Mbaʼépa heʼise ‘pyʼaguapy ogovernataha’ ha ‘hustísia omeʼẽtaha tembiaporã’?

⁶ Jahecháma haguéicha kapítulo 9-pe, proféta Isaías heʼi vaʼekue Jehová ovendesitaha ipuévlope ha hetavetaha ohóvo hikuái (Is. 60:22). Péro Jehová opromete avei: ‘Vrónse rangue ameʼẽta ndéve óro, iérro rangue pláta, madéra rangue vrónse ha ita rangue iérro. Che amoĩta pyʼaguapy negoverna hag̃ua ha pe hustísia omeʼẽta ndéve ne rembiaporã’ (Is. 60:17). ¿Mbaʼépa heʼise ko profesía? ¿Mbaʼéichapa oñekumpli ñane tiémpope?

⁷ Proféta Isaías heʼi ojeguerutaha umi mbaʼe iporãvéva. Ndeʼíri peteĩ mbaʼe vai rekovia ojeguerutaha iporãva síno iporãhágui ojeguerúta iporãitevéva. Por ehémplo pe óro iporãve vrónsegui, pláta iporãve iérrogui. Péicha Jehová ohechauka ipuévlo oñemoporãvetaha koʼẽ koʼẽre. ¿Mbaʼe mbaʼépa oñekambia vaʼerã upearã? Pe téxto heʼi: ‘Che amoĩta pyʼaguapy negoverna hag̃ua ha pe hustísia omeʼẽta ndéve ne rembiaporã’. Upéva heʼise mbeguekatúpe ojepreparataha umi oñangarekótavape Ñandejára puévlore.

 8. a) ¿Mávapa ojapo umi kámbio oñeʼẽ hague proféta Isaías? b) ¿Mbaʼéichapa ideprovécho ñandéve umi mbaʼe porã Jehová omeʼẽva? (Ehecha avei pe rrekuádro “Haʼe iñumílde ha okambia”.)

⁸ ¿Mávapa ojapóta koʼã kámbio? Jehová heʼi: ‘Ameʼẽta ndéve óro, pláta’ ha ‘Che amoĩta pyʼaguapy negoverna hag̃ua’. Upéva ohechauka ndahaʼeiha yvypóra rupive ojehupytýva umi mbaʼe porã Ñandejára organisasiónpe, síno Jehová la ojapóva upéva. Ha Itaʼýra Jesúsgui oiko rire Rréi, Jehová ojevale hese oipytyvõ hag̃ua iñorganisasiónpe. ¿Mbaʼéichapa ideprovécho ñandéve koʼã mbaʼe porã? Pe téxto heʼi ojehupytytaha ‘pyʼaguapy’ ha ‘hustísia’. Jahayhu rupi pe hustísia jaservi Jehovápe, ha jajapóvo haʼe omandáva ha ñakambia tekotevẽhápe, enterove jaiko pyʼaguapýpe. Apóstol Pablo heʼi voi Jehová haʼeha “Ñandejára omeʼẽva pyʼaguapy” (Filip. 4:9).

 9. ¿Mbaʼépa ñaikotevẽ jaiko porã hag̃ua oñondivepa kongregasiónpe, ha mbaʼérepa?

⁹ Apóstol Pablo heʼi avei Jehová rehe: “Ñandejára ndojapói mbaʼeve sarambikuépe, síno omoĩ pyʼaguapy” (1 Cor. 14:33). Ikatu ñapensa pono oĩ sarambi tekotevẽha oñemoĩ opa mbaʼe ilugárpe. ¿Mbaʼérepa upéicharõ Pablo heʼi Jehová omoĩha pyʼaguapy ani hag̃ua oĩ sarambi? Ñapensamíntena umi soldádo ohóvare gerrahápe. Haʼekuéra ndohói sarambikuépe síno káda uno oreko ipuésto ha opyta ilugárpe. Péro umi soldádo ndoguerúi pyʼaguapy síno ñorairõ. Upévare iporã ñanemanduʼa káda uno orekóramo jepe hembiapo Jehová organisasiónpe, ndojejapóiramo pyʼaguapýpe nosẽporãmoʼãi ha ikatu opa rei. Pe pyʼaguapy oúva Ñandejáragui katu ñanepytyvõ jajapo hag̃ua opa mbaʼe hendaitépe ha haʼe oipotahaichaite. Ajépa javyʼaite ñanemoakã ha ñandekorrehi haguére “Ñandejára omeʼẽva pyʼaguapy” (Rom. 15:33). Upe pyʼaguapy rupive ikatu jaiko porã oñondivepa entéro kongregasiónpe ko múndo tuichakuére. Ajépa jaagradesete upéva (Sal. 29:11).

10. a) ¿Mbaʼe kámbiopa ojejapo rakaʼe Jehová organisasiónpe? (Ehecha pe rrekuádro “Mbaʼéichapa oñemoakã porãve kongregasión”.) b) ¿Mbaʼe porandúpa ñambohováita?

¹⁰ Pe rrekuádro “Mbaʼéichapa oñemoakã porãve kongregasión” ohechauka ideprovechoitereiha umi kámbio ojejapo vaʼekue yma. Péro ramove, ¿mbaʼéichapa Jehová ojevale Jesús rehe ogueru hag̃ua ‘óro’ ‘vrónse’ rekovia? ¿Mbaʼéichapa umi kámbio oipytyvõ kongregasionkuérape ko múndo tuichakuére ombaʼapo hag̃ua pyʼaguapýpe? ¿Mbaʼéichapa nepytyvõ ndéve reservi porãve hag̃ua ‘Ñandejára omeʼẽvape pyʼaguapy’?

11. a) ¿Mbaʼépa ontende porãve raʼe pe kuérpo governánte? b) ¿Mbaʼépa odesidi pe kuérpo governánte?

¹¹ Pe kuérpo governánte onkarga peteĩ grúpope ohesaʼỹijo hag̃ua heta téma oĩva la Bíbliape. Por ehémplo mbaʼéichapa ombaʼapo vaʼekue pe kongregasión ypykue. Ko estúdio ojejapo áño 1964 guive 1971 peve.a Upévo ohechakuaa hikuái umi kongregasión ypykuépe omoakã hague peteĩ grúpo de ansiáno ha ndahaʼéi peteĩ ansiánonte la omoakãva (elee Filipenses 1:1; 1 Timoteo 4:14). Ontende porãvévo upéva pe kuérpo governánte ohechakuaa Jesucristo oipytyvõha chupekuéra okambia hag̃ua oñembaʼapo lája kongregasiónpe. Haʼekuéra odesidi iñeʼẽrendutaha Jesucrístope, upévare pyaʼe voi okambia hikuái oñekotevẽva ha oñenombra umi ansiánope la Biblia heʼiháicha. ¿Mbaʼe ótra kósapa oñekambia raʼe áño 1970 oñepyrũ rire?

12. a) ¿Mbaʼépa oñekambia kuérpo governántepe? b) Emyesakã mbaʼéichapa ombaʼapo pe Kuérpo Governánte (ehecha pe rrekuádro “Pe Kuérpo Governánte oñangareko Jehová puévlore”).

¹² Pe kámbio oñepyrũ ojejapo kuérpo governánte guive. Upe grúpope ningo oĩ vaʼekue siete ermáno unhído omotenondéva avei pe Watch Tower Bible and Tract Society of Pennsylvania. Áño 1971-pe oñenombra cuatro ermáno oĩ hag̃ua avei kuérpo governántepe ha péicha oĩma hikuái once. Upe guive nomotenondevéima hikuái pe Sociedad Watch Tower. Upe fécha guive ndojeʼevéima pe kuérpo governánte ha pe Sociedad Watch Tower haʼeha el mísmo grúpo. Kuérpo governántepe ndaiporivéima peteĩ omandavéva ótrogui ha oñoturna hikuái káda áño omoakã hag̃ua pe grúpo.

13. a) ¿Mbaʼéichapa oñemoakã vaʼekue kongregasión 1932 guive 1972 peve? b) ¿Mbaʼépa ojapo pe Kuérpo Governánte 1972-pe?

¹³ Pe segundo kámbio ojejapo kongregasionkuérape. ¿Mbaʼéichapa? Áño 1932 guive 1972 peve káda kongregasiónpe peteĩ ansiánonte la odesidíva opa mbaʼe. Áño 1936 peve oñehenói chupe direktór de servísio, upe rire oñekambia jey ha oñehenói siérvo de kongregasión ha ipahápe superintendénte de kongregasión. Umi ermáno oñangareko porã kongregasión rehe. Péro pe superintendénte de kongregasión noporandúi vaʼekue mbaʼeve ótro ansiánope odesidíta jave peteĩ mbaʼe. Upéi áño 1972-pe Kuérpo Governánte oñepyrũ ombohape oñekambia hag̃ua peteĩ mbaʼe iñimportantetereíva. Jahechami mbaʼépa raʼe.

14. a) ¿Mbaʼe kámbiopa oñepyrũ 1 de octubre de 1972? b) ¿Mbaʼéichapa umi koordinadór ojapo Filipenses 2:3 heʼíva?

¹⁴ Upe áño guive ndahaʼevéima peteĩ ermánonte oservíva de superintendénte kongregasiónpe. Upéva rangue, oñenombra ansiánoramo ótro ermanokuérape. Upearã ojehecha okumplípa la Biblia ojeruréva ansianokuéragui. Upéicha peteĩ grúpo de ansiáno oñangareko káda kongregasión rehe. Ko kámbio oñepyrũ 1 de octubre de 1972. Koʼág̃a káda grúpo de ansiánope oĩ peteĩ koordinadór, péro haʼe nopensái iñimportanteveha umi ótrogui síno ‘oñemomichĩ’ ijapytepekuéra (Luc. 9:48). Enterovénte ningo javyʼa oĩ haguére peichagua ermáno iñumíldeva Jehová puévlope (Filip. 2:3).

15. a) ¿Mbaʼe iporãvapa ojehupyty oñemoĩ rire umi grúpo de ansiáno? b) ¿Mbaʼérepa jaʼekuaa Jesucristo iñarandu hague?

¹⁵ Heta mbaʼe porã ojehupyty oñemoĩ rire umi grúpo de ansiáno oñangareko hag̃ua kongregasionkuérare. Jahechami mbohapy mbaʼe ojehupytýva: Primero, entéro ansiáno ohechakuaa Jesús haʼeha pe omoakãva kongregasión, tahaʼe haʼéva pe rresponsavilida orekóva hikuái (Efes. 5:23). Segundo, oñekumpli Proverbios 15:22 heʼíva: “Hetahápe umi oñemoñeʼẽva, katuete oñesẽ porã”. Umi ansiáno ningo odesidi vaʼerã heta mbaʼe iñimportánteva kongregasiónpe. Péro ifasilve odesidi hag̃ua hikuái la Bíbliape heʼiháicha, oñemongeta porã rupi ha ohendu mbaʼépa opensa káda uno. Ha Jehová ovendesi umi mbaʼe ojedesidíva, upévare ojehupyty heta mbaʼe porã (Prov. 27:17). Tercero, oĩ rupi hetave ermáno oservíva de ansiáno, Jehová organisasión ikatu omoakã porã ermanokuérape ha oñangareko hesekuéra. Péva iporã pórke koʼẽ koʼẽre hetave umi oikéva Jehová organisasiónpe (Is. 60:3-5). Epensamíntena, áño 1971-pe oĩ vaʼekue 27.000 kongregasiónrupi ha 2013-pe katu oĩma mas de 113.000 ko múndo tuichakuére. Ojehecha mbaʼéichapa ñande Ruvicha Jesucristo iñarandu ha omoĩ umi ansiáno oñangareko hag̃ua ñanderehe itiempoitépe (Miq. 5:5).

16. a) ¿Mbaʼe rresponsavilidápa oreko ansianokuéra? b) ¿Mbaʼépa opensa umi Estudiánte de la Biblia Jesús heʼi vaʼekuére Juan 21:15-17-pe?

¹⁶ Yma guive umi ansiáno ohechakuaáma oipytyvõ vaʼerãha iñermanokuérape osegi hag̃ua oservi Ñandejárape (elee Gálatas 6:10). Áño 1908-pe Ñemañaháme osẽ peteĩ artíkulo ohesaʼỹijóva Jesús heʼi vaʼekue Juan 21:15-17-pe: “Eñangareko che ovecha mimíre”. Upe artíkulope ojeʼe ansianokuérape: “Tekotevẽterei jajapo kyreʼỹme ko tembiapo oheja vaʼekue ñandéve Jesucristo. Ñande ñañangareko vaʼerã Jesucristo segidorkuérare ha ñamombaʼe vaʼerã ñane rresponsavilida”. Áño 1925-pe Ñemañaha omomanduʼa jey umi ansiánope: “Pe kongregasión ningo Ñandejára mbaʼe ha hendive ojecháta entéro umi oservíva de ansiáno nokumpliporãiramo hembiapo”.

17. ¿Mbaʼéichapa oñembokatupyry ansianokuérape oñangareko hag̃ua ermanokuérare?

¹⁷ Jehová organisasión ombokatupyry ansianokuérape oñangareko porãve hag̃ua ermanokuérare. Haʼete voi ningo Jehová oguerúva ‘pláta’ ‘iérro’ rekovia. ¿Mbaʼéichapa ojapo upéva? Ohekomboʼe chupekuéra umi eskuéla rupive. Áño 1959-pe ojejapo pe primera Eskuéla del Ministério del Rréino ansianokuérape g̃uarã. Peteĩ téma ohesaʼỹijo vaʼekue hikuái héra: “Mbaʼéichapa ikatu reñatende káda ermánore”. Upévape oñemokyreʼỹ umi ansiánope “oñemotiémpo hag̃ua ha ovisita umi ermánope hogaitépe”. Ojeʼe chupekuéra mbaʼéichapa ikatu omokyreʼỹ ermanokuérape. Áño 1966-pe osẽ informasión pyahu oñehesaʼỹijo hag̃ua Eskuéla del Ministério del Rréinope. Upérõ ojehecha mbaʼérepa iñimportánte umi ansiáno oñatende ermanokuérare peteĩ ovecharerekua oñangarekoháicha ijovecháre. Ojeʼe chupekuéra “oñatende vaʼerãha mborayhúpe ermanokuérare, péro ndahaʼéi upe haguére ombotapykuétava ifamíliape ni predikasión”. Umi áño ohasa vaʼekuépe ojejapo hetave eskuéla ansianokuérape g̃uarã. ¿Mbaʼe iporãvapa ojehupyty péicha oñembokatupyry haguére chupekuéra? Koʼág̃a kongregasionkuérape oĩma hetaiterei ansiáno ikatupyrýva oñangareko hag̃ua ermanokuérare.

18. a) ¿Mbaʼe tembiapópa oñemeʼẽ ansianokuérape? b) ¿Mbaʼérepa Jehová ha Jesús omombaʼeterei umi ansiáno iguápovape?

¹⁸ Jehová onombra ansianokuérape ñande Ruvicha Jesucristo rupive ikatu hag̃uáicha ojapo hikuái peteĩ tembiapo iñimportantetereíva. ¿Mbaʼépa upéva? Omoakã Jehová siervokuérape koʼã ára paha ijetuʼuetévape (Efes. 4:11, 12; 2 Tim. 3:1). Jehová ha Jesús omombaʼeterei umi ansiáno iguápovape ha oñehaʼãva osegi ko mandamiénto oĩva la Bíbliape: ‘Peñangarekóke peteĩ ovecharerekuáicha Ñandejára ovechakuérare oĩva pende poguýpe, ani pejapo upéva oĩgui pendeovligáva; síno pejapo vaʼerã kyreʼỹme. Peẽ ningo ehémplo vaʼerã pe ovecha atýpe g̃uarã’ (1 Ped. 5:2, 3). Umi ansiáno omoĩ ehémplo porã heta mbaʼépe. Koʼág̃a jahecháta mokõi mbaʼe ojapóva hikuái ojeiko hag̃ua pyʼaguapy ha vyʼápe kongregasiónpe.

19. ¿Mbaʼépa ñapensa umi ansiáno osẽvare opredika ñanendive?

¹⁹ Primeroite voi umi ansiáno osẽ opredika umi ermánondi. Lucas 8:1 heʼi Jesús rehe: “Upe riremínte Jesús oho entéro umi siuda ha puevlokuérarupi opredika ha oikuaauka umi marandu porã oñeʼẽva Ñandejára Rréinore. Ha omoirũ chupe umi doce apóstol” (Luc. 8:1). Jesús ningo opredika vaʼekue ijapostolkuérandi, upévare umi ansiáno osẽ meme avei predikasiónpe ermanokuérandi. Haʼekuéra oikuaa péicha ikatuha omokyreʼỹ enterovévape. ¿Mbaʼépa opensa ermanokuéra koʼã ansiánore? Peteĩ ermána hérava Jeannine orekómava 90 áñorupi heʼi: “Asẽ jave apredika peteĩ ansiánondi, ikatu añemongeta porãve hendive ha aikuaave chupe”. Peteĩ ermáno hérava Steven ha orekóva más de 30 áño heʼi: “Peteĩ ansiáno opredika jave chendive ahechakuaa chepytyvõseha ha avyʼaiterei upévare”.

20, 21. ¿Mbaʼéichapa umi ansiáno ikatu ojapo pe ovecharerekua ojapo haguéicha? Emoĩ peteĩ ehémplo (ehecha avei pe rrekuádro “Ovisita chupekuéra káda semána”).

²⁰ Avei Jehová organisasión ombokatupyry umi ansiánope oipytyvõ hag̃ua umi oñemomombyry vaʼekuépe kongregasióngui (Heb. 12:12). ¿Mbaʼérepa umi ansiáno oipytyvõ vaʼerã umi ijerovia kangývape? Ha, ¿mbaʼéichapa ojapo vaʼerã upéva? Jaikuaa hag̃ua jahechami peteĩ ehémplo Jesús omombeʼu vaʼekue. Haʼe oñeʼẽ peteĩ ovecharerekua ha ijovecha okañy vaʼekuére (elee Lucas 15:4-7). Pe ovecharerekua opillávo okañy hague chugui peteĩ ijovechami, pyaʼe oho oheka. Haʼete voi upévante mbaʼe la orekóva. ¿Mbaʼéichapa umi ansiáno ojapokuaa avei upéva? Oĩ ningo umi oñemomombyrýva Jehová puévlogui, péro umi ansiáno omombaʼe chupekuéra ha ni mbaʼevéicharõ nopensái naipohãveimaha. Pe ovecharerekua ningo ‘oho oheka pe okañy vaʼekuépe otopa peve’, upéicha avei umi ansiáno oho umi ijerovia kangýva rendápe ha oñehaʼã oipytyvõ chupekuéra.

²¹ ¿Mbaʼépa ojapo pe ovecharerekua otopávo ijovecha? Ohupi mbeguekatu asy “ijatiʼy ári” ha ogueraha jey pe ovecha atýpe. Upéicha avei umi ansiáno oñemoñeʼẽ pyʼaguapýpe porã umi ijerovia kangývape ha ohechauka ojepyʼapyha hesekuéra. Péicha umi ermáno ikatu ikyreʼỹ ha oñemoag̃ui jey kongregasiónre. Upéva oiko Victor rehe, peteĩ ermáno Africagua ndohovéi vaʼekue rreunionhápe. Haʼe omombeʼu: “Ocho áño aja ndapredikavéi ni ndahavéi rreunionhápe, péro umi ansiáno siémpre oñehaʼã chepytyvõ”. ¿Mbaʼépa la omokyreʼỹve vaʼekue chupe oho jey hag̃ua kongregasiónpe? Haʼe heʼi: “Peteĩ día ou chevisita peteĩ ansiáno hérava John. Ore ningo roho vaʼekue oñondive eskuéla de prekursórpe ha haʼe ogueru ohechauka chéve umi fóto ronohẽ vaʼekue upépe. Upéva chemomanduʼa hetaite mbaʼe porã ahasa vaʼekuére aservírõ guare Jehovápe. Ha añepyrũ ahechagaʼu heta mbaʼe”. Tiémpo riremi Victor oñemoag̃ui jey kongregasión rehe ha koʼág̃a ojapo jey iprekursorádo. Jahechakuaa umi ansiáno oñangareko porãva iñermanokuérare oipytyvõha enterovéva ovyʼa hag̃ua (2 Cor. 1:24).b

22. ¿Mbaʼéichapa oĩ rupi hustísia ha pyʼaguapy ñambaʼapo peteĩ ñeʼẽme kongregasiónpe? (Ehecha avei pe rrekuádro “Orejurujái ropytávo”.)

²² Jahecháma haguéicha Jehová heʼíma vaʼekue koʼẽ koʼẽre oĩvetaha hustísia ha pyʼaguapy ipuévlope (Is. 60:17). Koʼã mbaʼe oipytyvõ kongregasionkuérape ombaʼapo hag̃ua peteĩ ñeʼẽme. ¿Mbaʼéichapa upéva? Jehová leikuéra peteĩchapa entéro kongregasiónpe g̃uarã. La Biblia heʼi ‘Ñandejára Jehová, haʼe peteĩnte hína’ (Deut. 6:4, ÑÑB). Upévare ‘enterove umi kongregasiónpe’ ojejapo opa mbaʼe Jehová oipotaháicha. Umi testígo oĩramo jepe diferénte tetãme, Jehová léi noñekambiái (1 Cor. 14:33). Upéicha rupi peteĩ kongregasión iñeʼẽrendúramo añoite oho porãta hese. Avei ñande Ruvicha Jesucristo ndahaʼéi oipotánteva oĩ pyʼaguapy kongregasiónpe síno oipota káda uno oñehaʼã oiko porã hapichándi (Mat. 5:9). Upearã ‘jajapo meme vaʼerã opa mbaʼe oguerúva pyʼaguapy’. Por ehémplo jajoavyʼimíramo peteĩ ermánondi, ñande voi ñañemboja vaʼerã hendápe ñasolusiona hag̃ua pe provléma (Rom. 14:19). Péicha enterove ñaipytyvõ oĩ hag̃ua pyʼaguapy kongregasiónpe ha ñambaʼapo hag̃ua peteĩ ñeʼẽme (Is. 60:18).

23. ¿Mbaʼérepa javyʼaite ko tiémpope?

²³ Ñemañaha de noviembre de 1895-pe oñemombeʼúrõ guare oĩtaha ansiáno, umi ermáno omoakãva organisasión heʼi avei mbaʼépa oipota hikuái ipyʼaite guive. ¿Mbaʼépa raʼe upéva? Ojerure hikuái Jehovápe upe kámbio oipytyvõ hag̃ua ipuévlope ikatu hag̃uáicha “ombaʼapo oñondivepa peteĩ ñeʼẽme”. Javyʼaiterei jahechávo mbaʼéichapa yma guivéma Jehová ojevale Jesús rehe okambia hag̃ua heta mbaʼe. Péicha ñamombaʼeguasu Jehovápe oñondivepa ha oñeñangareko porã ñanderehe (Sal. 99:4). Entéro ñaiméva Jehová puévlope javyʼaiterei jaiko haguére “peteĩ ñeʼẽme”, jasegi “peteĩ tapénte” ha jajepytaso ojoykére jaservívo ‘Ñandejára omeʼẽvape pyʼaguapy’ (2 Cor. 12:18; elee Filipenses 1:27).