“¿Mbaʼéichapa oñemopuʼãta umi omanóvape?”

1, 2. ¿Mbaʼérepa enterove kristiánope ointeresa vaʼerã pe rresurreksión oikótava yvágape?

KOʼÁG̃ARUPI la majoría jaservíva Jehovápe jareko la esperánsa jaikóvo ko yvy ape ári pára siémpre. Péro Jehová oiporavo mbovymi kristiánope oho hag̃ua oiko yvágape. Koʼã unhídope ningo ointeresaiterei mbaʼéichapa oikóta hikuái oho vove yvágape. ¿Péro mbaʼérepa ko rresurreksión ointeresa vaʼerã avei umi oikótavape ko yvy ape ári? Jahechataháicha, pe rresurreksión oikótava yvágape oguerúta avei hetaiterei vendisión umi oikótavape g̃uarã pára siémpre ko yvy ape ári. Upévare, tahaʼe jaikótaramo yvágape térã ko yvy ape ári, ñaneinteresa vaʼerã pe rresurreksión oikótava yvágape.

² Ñandejára ogia vaʼekue unos kuánto Jesús disipulokuéra ypykuépe, oskrivi hag̃ua pe rresurreksión oikótavare yvágape. Apóstol Juan heʼi vaʼekue: “Koʼág̃a ningo ñande Ñandejára raʼy hína, péro ndojekuaaukái gueteri ñandéve mbaʼéichatapa ñande rekove amo gotyove. Péro jaikuaa ningo jajoguataha chupe” (1 Juan 3:2). Upéicharõ, umi unhidokuéra ndoikuaái hína mbaʼéichatapa ipínta, ág̃a oñemoingove jey vove chupekuéra yvágape. Péro si oikuaa hikuái ohechataha Jehovápe hesa teérupi, ág̃a orresivi vove hikuái iprémio. La Biblia ningo nomombeʼúi ñandéve entéro mbaʼe pe rresurreksión oikótavagui yvágape. Péro apóstol Pablo omombeʼu ñandéve michĩmi upévagui. Por ehémplo, heʼi ñandéve umi unhído oĩtaha Crístondi haʼe ohundi vove “entéro goviérno, autorida ha podér”. Umíva apytépe oĩ pe ñemano, haʼéva “ñane enemígo ultimoite oñehundítava”. Ha ipahaite, ág̃a entéro mbaʼe oñemoĩ vove Jesús poguýpe, haʼe ha umi ogovernáva hendive ijeheguiete voi oñemoĩta Jehová poguýpe (1 Cor. 15:24-28). ¡Ajépa iporãitéta ág̃a oiko vove upéva!b

 3. Ohechaukaháicha 1 Corintios 15:30-32, ¿mbaʼéichapa oipytyvõ vaʼekue Páblope ojerovia haguére pe rresurreksiónre?

³ Pablo ojerovia vaʼekue pe rresurreksiónre, ha upéva oipytyvõ chupe oaguanta hag̃ua heta pruéva ijetuʼúva (elee 1 Corintios 15:30-32). Haʼe heʼi vaʼekue umi Corintoguápe: “Che ningo káda día ajapeligra”. Ha heʼi vaʼekue avei: “Añorairõ umi animál salváhe ndive Éfesope”. Koʼápe oiméne Pablo omombeʼu Éfesope oñorairõ hague umi animál de verdándi peteĩ koliséope (2 Cor. 1:8; 4:10; 11:23). Térã oiméne oñeʼẽ raʼe umi judío ha umi ótro oñemoĩ mbaretévare hese, ha ojoguáva ‘umi animál salváhepe’ (Hech. 19:26-34; 1 Cor. 16:9). Tahaʼe haʼeháicha, Pablo ohasa vaʼekue heta mbaʼe ipeligrosoitereíva. Péro haʼe osegi oguerovia ohaʼarõha chupe heta mbaʼe porã amo gotyove (2 Cor. 4:16-18).

 4. ¿Mbaʼéichapa pe esperánsa oĩtaha rresurreksión omombarete koʼág̃arupi kristianokuérape? (Ehecha pe taʼanga oĩva ko rrevísta apére).

⁴ Koʼág̃arupi jaiko umi tiémpo ipeligrósovape. Heta ermánope ojeasalta, ha oĩ avei umi oikóva umi lugár oĩháme gérra, ha upéicha rupi noĩri hikuái segúro. Ha oĩ avei umi lugár Jehová siervokuéragui ojeproivihápe opredika, ha oservi chupe hikuái oikuaáramo jepe ikatuha oho kárselpe térã ojejuka chupekuéra upe haguére. Upéicharõ jepe, koʼã ermáno ha ermána osegi oadora Jehovápe, ha omoĩ ehémplo porã ñandéve g̃uarã. Haʼekuéra ndokyhyjéi oikuaáramo jepe ikatuha omano, pórke Jehová opromete chupekuéra umi mbaʼe iporãvéva amo gotyove g̃uarã.

 5. ¿Mbaʼe pensamiénto ipeligrósovapa ikatu ova ñanderehe nañañatendéiramo?

⁵ Pablo oavisa vaʼekue iñermanokuérape ani hag̃ua ova hesekuéra ko pensamiénto ipeligrosoitéva: “La oimérõ umi omanóva ndaikatumoʼãi orresusita, ‘jakaru ha ñamokõ katu, pórke koʼẽrõ ñamanóta’”. Pablo oikoha tiémpo mboyve jepe oĩma vaʼekue umi opensáva upéicha. Haʼe oiméne imanduʼa raʼe pe heʼívare Isaías 22:13. Upépe oñemombeʼu mbaʼéichapa vaʼekue umi israelita lája. Haʼekuéra oñehaʼã rangue ohayhuve Ñandejárape, oñehaʼãnte oiko vyʼarã rapykuéri. Haʼetévaicha umi israelita heʼíva hína: “Jaaprovecha katu koʼág̃a javyʼa hag̃ua, pórke oimeha óra ikatu hína ñamano”. Ha koʼág̃a peve ningo oĩ heta opensáva upéicha. Péro la Biblia omombeʼu umi mbaʼe vai oiko vaʼekue umi israelítare opensa haguére upéicha (2 Crón. 36:15-20).

 6. Jajerovia rupi pe rresurreksiónre, ¿mbaʼérepa ñañatende vaʼerã mbaʼeichagua persónarepa jajeheʼa?

⁶ Jaikuaa ningo Jehová omoingove jeytaha umi omano vaʼekuépe, ha upéva ñanepytyvõ vaʼerã jaiporavo porã hag̃ua ñane amigorã. Yma umi ermanokuéra Corintopegua oñatende vaʼerã ani hag̃ua ojeheʼa umi onegávare oĩtaha rresurreksión. ¿Mbaʼépa ikatu ñaaprende upévagui? Tuicha ikatuha jajeperhudika jajeheʼáramo umi noimportáivare chupe mbaʼépa oikóta amo gotyove, síno oikosénteva vyʼarã rapykuéri. Upéicharõ, peteĩ kristiáno ohasáramo hetaiterei tiémpo peichagua persónandi ikatu hína operde umi mbaʼe porã ojepokuaáva ojapo. Umichagua hénte ikatu voi ojapoka chupe umi pekádo ivaietereíva Ñandejára renondépe. Upévare Pablo oñemoñeʼẽ mbarete vaʼekue heʼívo: “Pendehuísio porã jeýna ha pejapo iporãva, anive pepeka” (1 Cor. 15:33, 34).

 7. ¿Mbaʼépa ikatu peteĩ persóna oporandu pe rresurreksiónre, ohechaukaháicha 1 Corintios 15:35-38?

⁷ (Elee 1 Corintios 15:35-38). Peteĩ persóna ombodudaséva ótrope pe rresurreksiónre ikatu hína oporandu: “¿Mbaʼéichapa oñemopuʼãta umi omanóvape? ¿Mbaʼeichaguáta piko hete oñemopuʼã vove?”. Iporãta ñapensa mbaʼéichapa Pablo ombohovái vaʼekue upéva, pórke koʼág̃arupi káda persóna oreko ikreénsia pe oikóvare ñanderehe ñamano rire. ¿Péro mbaʼépa omboʼe la Biblia?

 8. ¿Mbaʼe ehémplopa ñanepytyvõ ñantende hag̃ua pe rresurreksión oikótava yvágape?

⁸ Peteĩ persóna omano rire, upéi pe hetekue oñembyaipa. Péro pe ojapo vaʼekue ko univérso ikatu omoingove jey upe persónape, ha omeʼẽ chupe pe kuérpo haʼe oikotevẽtava (Gén. 1:1; 2:7). Pablo oipuru vaʼekue peteĩ ehémplo ohechauka hag̃ua Ñandejára noikotevẽiha omoingove jey peteĩ persónape el mísmo kuérpo reheve. Ñapensamína peteĩ semíllare. Ñañotỹ jave peteĩ semílla, upéva heñói, okakuaa ha oiko chugui peteĩ plánta. Upe plánta ningo idiferéntema pe semíllagui. Pablo oñeʼẽrõ guare pe rresurreksión oikótavare yvágape oipuru vaʼekue ko ehémplo. Upéicha ohechauka ñande Apohare ikatuha omeʼẽ pe persóna orresusitávape peteĩ kuérpo “haʼe oipotaháicha”.

 9. ¿Mbaʼépa heʼi 1 Corintios 15:39-41 umi diferénte kuérpo rehe?

⁹ (Elee 1 Corintios 15:39-41). Pablo heʼi vaʼekue Ñandejára okreárõ guare ndojapói hague entéro mbaʼe peteĩchapa. Por ehémplo, ojapo diferénte umi animál rete, tahaʼe umi vaka, guyra térã umi pira rete. Avei heʼi vaʼekue pe kuarahy ha pe jasy idiferenteha ojuehegui, “ha umi estrélla apytépe jey, káda estrélla iporã peteĩ hendáicha”. Ha ndaikatúiramo jepe jahecha upéva ñande resa teérupi, umi sientífiko heʼi oĩha diferénte kláse estrélla, oĩ tuicháva, michĩva, pytãva, morotĩva, ha oĩ umi saʼyjúva ñande kuarahýicha. Pablo heʼi vaʼekue avei: “Umi oikóva yvágape hete diferénte umi oikóvagui ko yvy ape ári”. ¿Mbaʼépa heʼise vaʼekue Pablo? Ñande jaikóva ko yvy ape ári ningo jareko kuérpo umáno, péro umi oikóva yvágape oreko kuérpo espirituál, por ehémplo orekoháicha umi ánhel.

10. ¿Mbaʼeichagua kuérpopa orekóta umi oñemoingove jeýva yvágape?

¹⁰ Jahechami mbaʼépa heʼi vaʼekue Pablo upéi: “Upéicha avei oiko oñemoingove jey vove umi omanóvape. Oñeñotỹ peteĩ kuérpo ikatúva oñembyai ha oñemopuʼã peteĩ kuérpo ndaikatúiva oñembyai”. Jaikuaa ningo peteĩ persóna omano jave, pe hetekue oñembyai ha oiko jeyha chugui yvy (Gén. 3:19). ¿Mbaʼéichapa upéicharõ ikatúta “oñemopuʼã peteĩ kuérpo ndaikatúiva oñembyai”? Pablo noñeʼẽi kuri umi persóna orresusitávare ko yvy ape ári. Elías, Eliseo ha Jesús ojapo vaʼekue peichagua rresurreksión, ha omoingove jey umi héntepe ko yvy ape ári. Upéva rangue, Pablo oñeʼẽ kuri peteĩ persóna oñemoingovévare yvágape peteĩ espírituicha (1 Cor. 15:42-44).

11, 12. a) ¿Mbaʼe kámbiopa oreko vaʼekue Jesús oñemoingove jeýrõ guare? b) ¿Mbaʼéichapa upéva oikóta avei umi unhídore?

¹¹ Jesús oĩrõ guare ko yvy ape ári oreko vaʼekue peteĩ kuérpo umáno. Péro oñemoingove jeýrõ guare chupe, oiko chugui “peteĩ espíritu oporomoingovéva”, ha oho jey yvágape. Upéicha avei, umi unhído orresusita vove orekóta peteĩ kuérpo ikatu hag̃uáicha oiko yvágape. Pablo omyesakã upéva heʼívo: “Jajoguaháicha pe kuimbaʼe Ñandejára ojapo vaʼekuépe yvýgui, upéicha avei jajoguáta upe kuimbaʼe ou vaʼekuépe yvágagui” (1 Cor. 15:45-49).

¹² Iñimportánte ningo ñanemanduʼa Jesúspe noñemoingovejeýi hague peteĩ kuérpo umáno reheve. Pablo omyesakã vaʼekue mbaʼérepa, heʼívo: “Peteĩ kuérpo umáno ndaikatúi oĩ Ñandejára Rréinope” yvágape (1 Cor. 15:50). Umi apóstol ha umi ótro unhído ndorresusitamoʼãi yvágape peteĩ kuérpo umáno reheve, ikatúva oñembyai. ¿Arakaʼépa oñemoingove jeýta raʼe chupekuéra? Pablo heʼi vaʼekue oñemoingove jeýta hague chupekuéra amo gotyove ae, ndahaʼéi upe tiémpope omano riremínte. Pablo oskrivírõ guare 1 Corintios oĩma vaʼekue umi disípulo “omanómava”, por ehémplo apóstol Santiago (Hech. 12:1, 2). Upe rire, umi ótro apóstol ha unhidokuéra omanóta kuri avei (1 Cor. 15:6).

13. ¿Mbaʼépa oikóta kuri Cristo presénsia aja?

¹³ Jesús ha Pablo oprofetisa vaʼekue oĩtaha peteĩ tiémpo iñimportantetereíva. Upéva hína Cristo presénsia. Upe tiémpo aja oĩ vaʼerã gérra, terremóto, mbaʼasy ha hetave mbaʼe vai ko múndo tuichakuére. Ñande ningo jahecháma mbaʼéichapa 1914 guive oñekumpli hína ko profesía oĩva la Bíbliape. Péro oĩta avei kuri ótra kósa iñimportantetereíva oikótava upe tiémpope. Jesús heʼi vaʼekue umi notísia porã heʼíva Ñandejára Rréino ogovernamaha ojepredika vaʼerãha “oparupiete ko yvy ape ári”. Péicha “upe mensáhe ojekuaa hag̃ua entéro tetãrupi, ha upéi og̃uahẽta pe fin” (Mat. 24:3, 7-14). Pablo heʼi vaʼekue “ñande Ruvicha presénsia aja” oñemoingove jeytaha yvágape umi unhído omanóma vaʼekuépe (1 Tes. 4:14-16, nóta; 1 Cor. 15:23).

14. ¿Mbaʼépa oiko umi unhído omanóvagui Cristo presénsia aja?

¹⁴ Umi unhído oikóva ñane tiémpope omanóramo, peteĩ tesapirĩme oñemoingove jeýma chupekuéra yvágape. Pablo ohechauka vaʼekue upéva siertoha oskrivírõ guare umi mbaʼe jatopáva 1 Corintios 15:51, 52-pe. Upépe heʼi: “Naentéroi japytáta jake ñemanóme, péro enterove ñañekambiáta. Upéva oikóta sapyʼaitépe, peteĩ tesapirĩme, ipu vove pe última trompéta”. Koʼã mbaʼe Pablo heʼi vaʼekue oñekumpli hína ñane tiémpope. Koʼã Cristo ermanokuéra ovyʼaitereíta orresusita rire, ha ‘siémpre oĩta hikuái ñande Ruvichándi’ (1 Tes. 4:17).

15. ¿Mbaʼe traváhopa orekóta umi unhído orresusitáva yvágape?

¹⁵ La Biblia omombeʼu ñandéve mbaʼe traváhopa ojapóta umi unhído oikove jeýva yvágape. Jesús heʼi chupekuéra: “Pe oganávape pe ñorairõ ha ojapóva pe che haʼéva pe fin peve, ameʼẽta chupe autorida ogoverna hag̃ua umi tetãnguérare. Peichagua autorida che arresivi avei che Túagui. Ha pe persóna oipurúta peteĩ vastón de iérro okastiga hag̃ua umi hénte añáme. Haʼe ohundíta chupekuéra ha ojoguáta hikuái umi kambuchi ojekapaitévape” (Apoc. 2:26, 27). Haʼekuéra ningo omoirũta Jesúspe ha oipurúta peteĩ vastón de iérro okastiga hag̃ua umi tetãme (Apoc. 19:11-15).

16. ¿Mbaʼéichapa hetaiterei hénte oganáta pe ñemanóme?

¹⁶ Jahechaháicha, umi unhído oganáta pe ñemanóme (1 Cor. 15:54-57). Péicha oñemoingove jey rupi chupekuéra, oipytyvõta hikuái pe gérra de Armagedónpe ojepeʼaite hag̃ua entéro mbaʼe vai ko yvy ape árigui. Hetaiterei kuimbaʼe ha kuña oservíva Ñandejárape osẽta pe jehasa asy guasúgui, ojesalváta ha oikéta pe múndo pyahúpe (Apoc. 7:14). Koʼã hénte ohecháta mbaʼéichapa avei oñegana pe ñemanóme, ág̃a oñemoingove jey vove hetaiterei hénte omano vaʼekuépe yma. ¡Ñapensamíntena mbaʼeichaitépa javyʼáta oiko vove ko mbaʼe ijojahaʼỹva! (Hech. 24:15). Ha enterove umi ohechaukáva ifielha Jehovápe ipyʼaite guive, oganáta avei pe ñemano ombohasa vaʼekuépe chupekuéra Adán. Upéicha rupi ikatúta voi oiko hikuái pára siémpre.

17. ¿Mbaʼépa ñañehaʼã vaʼerã jajapo koʼág̃a, heʼiháicha 1 Corintios 15:58?

¹⁷ Enterove kristiáno koʼag̃agua jaagradeseterei umi mbaʼe Pablo oskrivi vaʼekue umi Corintoguápe pe rresurreksiónre. Koʼã mbaʼe ningo añetehápe ñanemokyreʼỹeterei ha ñanekonsola. Upévare ñande koʼýte jasegise pe konsého Pablo omeʼẽ vaʼekue, ha ‘ñanerembiapo heta ñande Ruvicha servísiope’ (elee 1 Corintios 15:58). Ñande siémpre jajapóramo opa ikatúva Ñandejára servísiope, jarekóta la esperánsa jaikovévo vyʼápe amo gotyove. Ha oiko vove upéva entéro mbaʼe iporãitereivéta umi mbaʼe ikatúvagui ñañeimahina. Ha upépe jahechakuaáta nañañehaʼãreíri hague ñambaʼapo jejopy ñande Ruvicha servísiope.