“Pe jeikove jevy tenondegua” oñepyrũma

“Ha umi omanovaʼekue ogueroviávo Crístope, umíva raẽte oikove jevýta.” (1 TESALONICENSES 4:16.)

1, 2. a) Ikatúnepa oikove jey umi omanovaʼekue? b) Mbaʼérepa nde reguerovia oñemoingove jeytaha umi omanovaʼekuépe? (Ehechami nóta.)

“OIKOVÉVA oikuaa omanovaʼerãha.” Upéicha hína Adán opeka guive. Ymaite guivéma yvyporakuéra oikuaa porã omanovaʼerãha. Upévare oĩ heta oikuaaséva: Mbaʼépa oiko ñamano rire? Mbaʼépa oiko umi omanovaʼekuégui? La Biblia heʼi: “Omanóva katu ndoikuaái mbaʼeve” (Eclesiastés 9:5).

² Upéicharõ, ikatúnepa oikove jey umi omanovaʼekue? Ikatu. Upéicha vaʼerã oiko hag̃ua Ñandejára oipotáva yvyporakuérape g̃uarã. Ymaite guive Jehová siervokuéra ojerovia ipromésare. Haʼe heʼivaʼekue outaha peteĩ Ñemoñare ohundítava Satanáspe ha omyatyrõtava opa mbaʼe vai ojapóva (Génesis 3:15). Heta Jehová siervokuéra omanóma ha oikove jey mante vaʼerã ohecha hag̃ua oikórõ Jehová oprometevaʼekue (Hebreos 11:13). Péro oikónepa upéva? Oikóta. Apóstol Pablo heʼi “oikove jevy vaʼerãha, tahaʼe imarangatúva, tahaʼe heko añáva” (Hechos 24:15). Peteĩ jey Pablo omoingove jey peteĩ mitãrusu hérava Eutícope. Haʼe ningo hoʼa peteĩ ventánagui mbohapy pisohágui ha “omopuʼã hikuái heʼõnguéma”. La Biblia oñeʼẽ nueve ñemoingove jeýre ha kóva hína ipaha (Hechos 20:​7-12).a

3. Mbaʼéichapa ñanembopyʼaguapy Jesús heʼíva Juan 5:​28, 29-pe ha mbaʼérepa?

³ Umi nueve ñemoingove jey ñanepytyvõ jajerovia hag̃ua Pablo heʼivaʼekuére. Avei ñanepytyvõ jajerovia hag̃ua Jesús promésare: “Og̃uahẽtahína ára opa omanóva ohendu hag̃ua che ñeʼẽ ha osẽmbáta” (Juan 5:​28, 29). Mbaʼeichaitépa ñanembopyʼaguapy ko mbaʼe! Ha katuetei ombopyʼaguapy avei umi ihénte manóvape!

4, 5. Mbaʼeichagua ñemoingove jeýrepa oñeʼẽ la Biblia, ha mbaʼépa jahecháta koʼág̃a?

⁴ Hetaiterei tapicha oikove jeýta ko Yvy ape ári Ñandejára goviérno poguýpe (Salmo 37:​10, 11, 29; Isaías 11:​6-9; 35:​5, 6; 65:​21-23). Péro oiko mboyve upéva, oikovaʼerã ambue ñemoingove jey. Ñepyrũrã, Jesús oikove jey vaʼerã omeʼẽ hag̃ua Ñandejárape isakrifísio repykue ñanderehehápe. Haʼe omano ha oñemoingove jey áño 33-pe.

⁵ Upe rire umi ohótava yvágape oñehenóiva ‘Israel Ñandejára mbaʼe’ oikove jey vaʼerã oĩ hag̃ua Jesucristo ndive “opa ára g̃uarã” (Gálatas 6:​16, JMP; 1 Tesalonicenses 4:17). Haʼekuéra hína umi ‘tenondete oikove jevýva’ (Filipenses 3:​10, 11; Apocalipsis [Revelación] 20:6). Opa rire pe ñemoingove jevy tenondegua, oñemopuʼãta hetaiterei tapichápe ko Yvy ape ári oiko hag̃ua Paraísope opa ára g̃uarã. Upéicharõ, ñahaʼarõramo jaiko yvágape térã Yvýpe, jaikuaase mbaʼépa hína pe “ñemoingove jevy tenondegua”. Mbaʼeichaguápa hína? Ha arakaʼépa oiko?

“Mbaʼeichaguáta piko umi hete?”

6, 7. a) Mbaʼépa ojehuvaʼerã umi yvágape ohótavape? b) Oñemoingove jeývo, mbaʼeichaguáta piko umi hete?

⁶ Ohaírõ guare umi Corintoyguápe, Pablo oporandu pe ñemoingove jevy tenondeguáre: “Mbaʼéicha piko oikove jevýta umi omanovaʼekue? Mbaʼeichaguáta piko umi hete?”. Haʼe voi ombohovái: ‘Oñeñemitỹramo, pe mbaʼe raʼỹi omanovaʼerã heñói hag̃ua mbaʼe roky pyahu. Upéi Ñandejára ojapo chugui oipotaháicha, umi yvategua rete iporã peteĩ hendáicha, ha iporã ambue umi yvypegua’ (1 Corintios 15:​35-40).

⁷ Koʼápe ojehechauka umi ohótava yvágape omano raẽ vaʼerãha oho hag̃ua. Oiko jey vaʼerã hetekuéragui yvy (Génesis 3:19). Ha Ñandejára oipota vove omopuʼãta chupekuéra ikatu hag̃uáicha oiko yvágape (1 Juan 3:2). Ñandejára omeʼẽ chupekuéra tekove ikatuʼỹva oñehundi. Upéva ndeʼiséi orekoha hikuái peteĩ álma nomanóiva. Pablo heʼi ‘ko ñande rete omanóva tekotevẽ oñemonde peteĩ omanoveʼỹvaʼerãgui’. Ñandejára omeʼẽ ko mbaʼe porãite umi oikove jey raẽvape (1 Corintios 15:​50, 53; Génesis 2:7; 2 Corintios 5:​1, 2, 8).

8. Mbaʼéichapa jaikuaa Ñandejára ndoiporavoiha heta rrelihión apytégui umi 144.000?

⁸ Pe ñemoingove jevy tenondeguápe oikove 144.000 añónte. Jehová oñepyrũ oiporavo chupekuéra Pentecostés 33-pe, omoingove jey riremi Jesúspe. Enterove ‘oguereko isyváre Jesús ha Itúva réra’ (Apocalipsis [Revelación] 14:​1, 3). Upéicharõ ndojeporavói chupekuéra heta rrelihión apytégui. Haʼekuéra Jesucristo remimboʼe ha ovyʼa oñeʼẽhaguére Jehová rérape. Oikove jeývo oñemeʼẽ chupekuéra hembiaporã yvágape. Ovyʼaiterei hikuái ombaʼapótagui Ñandejárape g̃uarã ag̃uiete chugui.

Oñepyrũmapa?

9. Mbaʼéichapa Apocalipsis 12:7 ha 17:14 ñanepytyvõ jaikuaa hag̃ua arakaʼe rupípa oñepyrũ pe ñemoingove jevy tenondegua?

⁹ Arakaʼépa oñepyrũ pe ñemoingove jevy tenondegua? Heta mbaʼe ohechauka oñepyrũmahague. Jahechamína Apocalipsis kapítulo 12 ha 17. Pe 12 omombeʼu mbaʼépa oiko Jesús oñepyrũ riremi ogoverna. Haʼe ha hiʼanhelkuéra oñorairõ Satanás ha idemoniokuérandi (Apocalipsis [Revelación] 12:​7-9). Ko rrevísta ohechaukáma heta vése upéva oikohague 1914-pe.b Péro pe téysto ndeʼíri umi ohótava yvágape omoirũha Jesúspe ko ñorairõme. Jahechami koʼág̃a kapítulo 17. Upépe ohechauka Babilonia guasu oñehundi rire, pe Ovecha Raʼy ipuʼakataha tetãnguérare ha oĩha hendive umi ‘Ñandejára ohenói ha oiporavovaʼekue’ (Apocalipsis [Revelación] 17:​5, 14). Omoirũ hag̃ua Jesúspe ohundi vove Satanás múndo aña umi ‘oñehenói ha ojeporavovaʼekue’ oikove jey mante vaʼerã upéva oiko mboyve. Upévare ikatu jaʼe umi ohótava yvágape omanóva Armagedón mboyve oñemoingove jeyha 1914 rire.

10, 11. a) Mávapa umi 24 karai ha mbaʼépa peteĩ omombeʼu Juánpe? b) Mbaʼépa ohechauka ñandéve upéva?

¹⁰ Ikatúpa jaikuaa porãve arakaʼépa oñepyrũ pe ñemoingove jevy tenondegua? Apocalipsis 7:​9-15 (BNP) heʼíva ñanepytyvõ upearã. Upépe oñemombeʼu apóstol Juan ohechahague “peteĩ aty guasu avave ikatuʼỹvaʼerã oipapa”. Heʼi avei oĩha 24 karai ha peteĩ omombeʼuha Juánpe mávapa umi oĩva pe aty guasúpe. Koʼã 24 karai orrepresenta umi 144.000 ohótava yvágape ogoverna Jesucristo ndive (Lucas 22:​28-30; Apocalipsis [Revelación] 4:4).c Juan oĩ umi 144.000 apytépe, péro upérõ oĩ gueteri ko Yvy ape ári. Upéicharõ Juan orrepresenta umi ohótava yvágape oĩva gueteri ko Yvy ape ári.

¹¹ Mbaʼépa ohechauka ñandéve peteĩ karai omombeʼuhaguére Juánpe mbaʼépa heʼise upe ohecháva? Ohechauka umi 24 karai apytégui umi oĩmava yvágape oipytyvõha hesakãve hag̃ua ñandéve Ñandejára ñeʼẽ koʼág̃a rupi. Mbaʼérepa iñimportánte ko mbaʼe? Áño 1935-pe oñemyesakã umi kristiáno yvágape ohótavape mávapa hína umi oĩva pe aty guasúpe. Oiméramo Jehová oiporu peteĩ umi 24 karai apytégui omyesakã hag̃ua ko mbaʼe, upéva heʼise oñemoingove jey hague yvágape upe áño mboyve. Koʼã mbaʼe ohechauka pe ñemoingove jevy tenondegua oñepyrũhague 1914 rire 1935 peve. Ikatúpa jaikuaa porãve?

12. Emombeʼu mbaʼérepa ikatu jaʼe pe ñemoingove jevy tenondegua oñepyrũhague primavéra 1918-pe.

¹² Koʼág̃a iporã ñambojojami peteĩ mbaʼe la Biblia omombeʼúvare. Ñandejára oiporavo Jesúspe rreirã otóño 29-pe. Ohasa rire 3 áño ha 6 mése, primavéra 33-pe omoingove jey chupe oiko hag̃ua yvágape. Jaikuaáma Jesús oñepyrũhague ogoverna otóño 1914-pe. Upéicharõ, ikatúpa jaʼe 3 áño ha 6 mése rire primavéra 1918-pe oñepyrũhague oñemoingove jey umi ohótava yvágape? Ikatu. Ndaikatúiramo jepe jahechauka la Bíbliape, oĩ heta téysto ohechaukáva pe ñemoingove jevy tenondegua oñepyrũhague Jesús ogoverna riremi.

13. Mbaʼéichapa 1 Tesalonicenses 4:​15-17 ohechauka pe ñemoingove jevy tenondegua oñepyrũhague Cristo ogoverna riremi?

¹³ Pór ehémplo, Pablo heʼi: ‘Opa jaikovéva ou peve Jesús [oñepyrũ peve ogoverna ndahaʼéi opa peve], nañanetenondemoʼãi umi omanovaʼekuére. Oñehendúta peteĩ ñeʼẽ hatã, peteĩ arkánhel ñeʼẽ ha Ñandejára trompéta pu, ha Jesús voi oguejýta yvágagui. Ha umi omanovaʼekue ogueroviávo Crístope, umíva raẽte oikove jevýta. Upéi umi jaikovéva gueteri, jajereraháne hendivekuéra araíre, jajojuhu hag̃ua Jesús ndive amo yvate, ha upéicha ñaiméta hendive opa ára g̃uarã’ (1 Tesalonicenses 4:​15-17). Upéicharõ umi omanóva Jesús ogoverna mboyve oñemoingove jey raẽta yvágape. Upéva heʼise pe ñemoingove jevy tenondegua oñepyrũhague Cristo oñepyrũ riremi ogoverna ha osegi upe aja (1 Corintios 15:23). Noñemoingovejeýi chupekuéra oñondivepa, saʼi saʼípe katu.

‘Oñemeʼẽ chupekuéra ao morotĩ’

14. a) Arakaʼépa oiko umi mbaʼe omombeʼúva Apocalipsis kapítulo 6? b) Mbaʼépa ohechauka Apocalipsis 6:9?

¹⁴ Apocalipsis kapítulo 6 ñanepytyvõ avei. Upépe omombeʼu Jesús osẽha kavaju ári ipuʼaka hag̃ua umi oñemoĩvare hese (Apocalipsis [Revelación] 6:2). Umi tetãnguéra katu opuʼã ojuehe ñorairõ guasúpe (Apocalipsis [Revelación] 6:4). Ñembyahýimante ojehecha opárupi (Apocalipsis [Revelación] 6:​5, 6). Hetaitereípe ojuka mbaʼasy vai (Apocalipsis [Revelación] 6:8). Koʼã mbaʼe oikopaitéma 1914 guive. Péro oĩve peteĩ mbaʼe. Oñemombeʼu pe altár guýpe oĩha ‘umi ojejukavaʼekue angakuéra Ñandejára ñeʼẽ rehe, ha omoherakuãhaguére pe ñeʼẽ’ (Apocalipsis [Revelación] 6:​9, BNP). La Biblia heʼi “umi oikovéva rekove [ánga] niko oĩ huguýpe”, upéicharõ pe altár guýpe ojehecha umi kristiáno ruguy. Chupekuéra ojejuka opredika meme haguére pyʼaguasúpe (Levítico 17:11).

15, 16. Emyesakãmi mbaʼéichapa Apocalipsis 6:​10, 11 heʼíva oñekumpli pe ñemoingove jevy tenondeguáre.

¹⁵ Abel ruguy osapukaihaguéicha Ñandejárape, péicha avei umi kristiáno ojejukáva ruguy ojerure hustísia (Génesis 4:10). “Umíva hatã heʼi: ‘Arakaʼe pevépa, Ñandejára marangatu, ne añetéva ne ñeʼẽme, nderehusga ha nerevengamoʼãi ore ruguy oñeñohẽvaʼekue yvyporakuéra po rupi?’.” Mbaʼépa oiko upe rire? “Ha oñemeʼẽ ichupekuéra ao morotĩ, ha ojeʼe ichupekuéra opytuʼu sapyʼamivénte hag̃ua gueteri ojejukapa peve umi iñermanokuéra, Cristo rembijokuái, ojejukavaʼerã avei haʼekuéra ojejukahaguéicha.” (Apocalipsis [Revelación] 6:​10, 11, BNP.)

¹⁶ Oñemeʼẽpa ao morotĩ pe tuguy oĩvape altár guýpe? Ndaikatumoʼãiningo upéva! Umi ao oñemeʼẽ umi tapicha oñohẽvaʼekuépe huguy altár ári. Chupekuéra ojejuka ojerovia rupi Jesús rehe ha koʼág̃a oñemoingove jey oiko hag̃ua yvágape. Mbaʼéichapa jaikuaa upéva? Apocalipsis heʼi avei: “Pe ovenséva oñemondevaʼerã ao morotĩme ha ndaipeʼaichéne herakuéra pe kuatiañeʼẽ tekovete reheguágui”. Ñanemanduʼavaʼerã avei umi 24 karai oñemondeha ‘ao morotĩme ha orekoha koróna oroguiguáva iñakãnguéra rehe’ (Apocalipsis [Revelación] 3:5; 4:​4, BNP). Upéicharõ, oñepyrũ rire ko Yvy ape ári heta ñorairõ, ñembyahýi ha mbaʼasy oñemoingove jey yvágape umi omanóva 144.000 apytégui. Oñemeʼẽ chupekuéra ijao morotĩrã. Pe tuguy oĩva pe altár guýpe orrepresenta chupekuéra.

17. Mbaʼéichapa ‘opytuʼuvaʼerã’ umi ijao morotĩva?

¹⁷ Koʼã oñemoingove jeyramóvape ojeʼe “opytuʼu” hag̃ua, térã ohaʼarõ Ñandejára ogueru peve hustísia. Iñermanokuéra ohótava avei yvágape ohechaukavaʼerã gueteri ijerovia. Haʼekuéra ‘opytuʼúta’ og̃uahẽ meve Ñandejára ára (Apocalipsis [Revelación] 7:3). Upérõ omoirũta hikuái Jesucrístope ohundi hag̃ua umi iñañávape, umíva apytépe umi ojuka rei vaʼekue kristianokuérape (2 Tesalonicenses 1:​7-10).

Mbaʼépa heʼise ñandéve g̃uarã

18, 19. a) Mbaʼérepa ikatu jaʼe oñepyrũmahague pe ñemoingove jevy tenondegua? b) Mbaʼéichapa ñañeñandu hesakãgui ñandéve koʼã mbaʼe?

¹⁸ Ñandejára Ñeʼẽ nomombeʼúi arakaʼetépa oñepyrũ pe ñemoingove jevy tenondegua. Péro ohechauka oikoha saʼi saʼípe ha Cristo ogoverna aja. Oñemoingove jey raẽ yvágape umi kristiáno omanovaʼekue Cristo ogoverna mboyve. Upéi, umi kristiáno oĩva gueteri ko Yvy ape ári omanóvo oñemoingove jey yvágape ‘peteĩ tesa pirĩme’ (1 Corintios 15:52). Oĩmbátamapa yvágape hikuái Armagedón mboyve? Ndajaikuaái upéva. Péro jaikuaa Ñandejára oipota vove umi 144.000 oĩmbaitetamaha yvágape.

¹⁹ Jaikuaa avei umi 144.000 apytégui hetaitereíma oĩha Cristo ndive ha mbovymíntema opyta ko Yvy ape ári. Upéva ohechauka hiʼag̃uimbaitemaha Ñandejára ára omopotĩ hag̃ua ko Yvy. Koʼẽrõitéma oñehundíta Satanás múndo aña ha chupe katu oñembotýta peteĩ yvykua pypukúpe. Upérõ ikatúta oñemoingove jey yvyporakuérape ko Yvy ape ári. Jesús sakrifísio rupive umi iñeʼẽrendúva ikatúta oiko Adán oikohaguéicha iñepyrũme. Jehová ñeʼẽ oĩva Génesis 3:​15-pe oikopaitéma ohóvo. Javyʼaite ikatúgui jahecha koʼã mbaʼe!

[Nóta]

Reikuaápa?

Mbaʼéichapa ñanepytyvõ koʼã téysto jaikuaa hag̃ua arakaʼépa oiko “pe ñemoingove jevy tenondegua”?

• Apocalipsis [Revelación] 12:7; 17:14

• Apocalipsis [Revelación] 7:​13, 14

• 1 Corintios 15:23; 1 Tesalonicenses 4:15-17

• Apocalipsis [Revelación] 6:​2, 9-11

[Nóta oĩva taʼanga ndive páhina 29]

Mbaʼépa hína pe ‘ao morotĩ’ oñemeʼẽva umi kristiáno omanovaʼekuépe?

[Nóta oĩva taʼanga ndive páhina 31]

Mávapepa oñemoingove jey raẽ?