Jehová omeʼẽ “espíritu sánto umi ichupe ojerurévape”

“Ha peẽ pene ñañáva pemeʼẽkuaáramo mbaʼe iporãva pende raʼykuérape, pende Ru yvagapeguáma katu omeʼẽvaʼerã Espíritu Sánto umi ichupe ojerurévape.” (LUCAS 11:​13, BNP.)

1. Mbaʼéicha javépa ñaikotevẽterei pe espíritu sánto?

“KÓVA ijetuʼuetereíma chéve g̃uarã. Ñandejára espíritu sánto chepytyvõramo añoite agueropuʼakáta.” Ndépa erémava avei upéicha? Haimete enterove kristiáno ojapóma upéva. Oiméne ererakaʼe upéicha nderasyetéramo guare, térã ne rembireko ỹrõ ne ména omanórõ guare are peiko rire oñondive. Térã ikatu avei reñepyrũrõ guare reñedeprimi ha upévare reju nderevyʼavéi. Umícha jave, nde reñandu reikoveha Ñandejára espíritu sánto rupive añoite, omeʼẽvaʼekue ndéve “pe puʼaka guasuete” nosẽiva ndehegui (2 Corintios 4:​7-9, BNP; Salmo 40:​1, 2).

2. a) Mbaʼe ijetuʼúvapa ombohovái kristianokuéra añetegua? b) Mbaʼe porandúpa ñahesaʼỹijóta koʼág̃a?

² Ko múndo aña ipohyive ohóvo ha pyʼỹi ojopy vaive umi kristiáno añeteguápe (1 Juan 5:19). Avei, ojapohaguére Jesucristo heʼíva, Satanás voi oñemoĩ hesekuéra, oñorairõ mbaretévo umi ‘iñeʼẽrendúva ndive Ñandejárape ha oñeʼẽva Jesús rehe’ (Apocalipsis [Revelación] 12:​12, 17). Upévare, koʼýte ñaikotevẽ koʼág̃a ñanepytyvõ Ñandejára espíritu sánto. Mbaʼépa jajapokuaa oñemeʼẽ meme hag̃ua ñandéve? Ha mbaʼérepa jajeroviakuaa Jehová ñanemombaretetaha ijetuʼuve jave? Upéva jaikuaáta jahecha rire mokõi ehémplo Jesús omoĩvaʼekue.

Ñañemboʼe memékena

3, 4. Mbaʼe ehémplopa omoĩ Jesús, ha mbaʼéichapa oiporu upéva ñane ñemboʼére?

³ Peteĩ hemimboʼe ojerurevaʼekue Jesúspe: “Ore Jára, oremboʼéna roñemboʼe hag̃ua” (Lucas 11:1). Ojapóvo upéva, Jesús omombeʼu chupekuéra mokõi ehémplo ohóva ojuehe. Peteĩva oñeʼẽ peteĩ kuimbaʼe orresivívare peteĩ visíta, ha pe mokõiha katu peteĩ túvare ohendúva itaʼýrape. Jahecha porãvemi koʼág̃a.

⁴ Jesús heʼi hemimboʼekuérape: “Peẽkuéra peteĩvangaʼu oguereko peteĩ amígo, ha pyharepyte oho hógape ha heʼi ichupe: ‘Che amígo, eiporukána chéve mbohapy pán, oiméko che amígo peteĩ og̃uahẽ ógape ohasakuévo, ha ndarekói mbaʼeve haʼukavaʼerã ichupe’. Ha haʼengaʼu pe koty guive heʼi ichupe: ‘Anína che[molesta]; oñembotýmaniko okẽ, ha che mitãnguéra oĩ chendive tupápe; ndaikatumoʼãi apuʼã ameʼẽ ndéve’. Che haʼe peẽme, [“pe okapegua ombota jevy jevýramo”, JMP] opuʼãseʼỹramo jepe omeʼẽ ichupe iñamigohaguére, opáichavo, anive hag̃ua omyangekói [térã omolesta] ichupe opuʼãvaʼerãha omeʼẽ ichupe opa haʼe oikotevẽva”. Upémaramo Jesús ohechauka mbaʼépa ñanemboʼe ko ehémplo umi ñemboʼe jajapóvare Ñandejárape: “Ha che haʼe peẽme: Pejerure, ha oñemeʼẽvaʼerã peẽme; peheka, ha pejuhúne; pembota ha ojepeʼáne peẽme pe okẽ. Upe ojerurévape, oñemeʼẽvaʼerã; ha pe ohekáva ojuhuvaʼerã; ha pe ombotávape, ojepeʼavaʼerã” (Lucas 11:​5-10, BNP).

5. Mbaʼéichapa jahechavaʼerã ñane ñemboʼe ohechaukaháicha ko ehémplo oñeʼẽva pe kuimbaʼe notĩrivaʼekuére?

⁵ Ko ehémplo porãite oñeʼẽva pe karai oñehaʼãitevaʼekuére oñatende porã ivisítare, ohechauka mbaʼéicha vaʼerãpa ñande ñañemboʼe vove. Jahechavaʼerã Jesús heʼiha pe kuimbaʼépe oñemeʼẽhague oikotevẽva ‘oporomyangekói’, térã ojerure jey jey rupi tovaʼatãme [“persistencia atrevida”, NM] (Lucas 11:8). Ko ñeʼẽ la Biblia oiporu upépe añoite, ha ojetradusi peteĩ ñeʼẽ griégope oĩvare heʼiséva “notĩriva hovaʼatãgui”. Añetehápe, pe notĩriva pyʼỹi ojehecha peteĩ mbaʼe ivaívaramo. Upéicharamo jepe, ikatu avei iporã ojeporúramo ojehupyty hag̃ua peteĩ mbaʼe iporãva. Upéva ojehu pe kuimbaʼépe Jesús imanduʼahague, notĩriva ojerure jey jey hag̃ua oikotevẽva. Jesús ñanemboʼe jajapo hag̃ua avei upéicha, ñañemboʼe meme hag̃ua. Jehová oipota ‘jajerure jey jey, jaheka jey jey, ñambota jey jey’. Ombohováivo umi ñemboʼe, Jehová ‘omeʼẽvaʼerã espíritu sánto umi chupe ojerurévape’.

6. Mbaʼéichapa ojehechavaʼekue umi visíta og̃uahẽvape Jesús oikórõ guare?

⁶ Jesús heʼi ñañemboʼe meme vaʼerãha, péro avei ohechauka mbaʼérepa jajapovaʼerã upéva. Ñamyesakã porã hag̃ua pe ehémplo omoĩvaʼekue, jahechami mbaʼéichapa ojehechavaʼekue yma umi visíta og̃uahẽvape. Heta hendápe la Biblia ohechauka yma oñemombaʼetereihague umi visítape, koʼýte umi Ñandejára siervokuéra apytépe (Génesis 18:​2-5; Hebreos 13:2). Noñeñatendeporãiramo hesekuéra ivaietereivaʼekue (Lucas 7:​36-38, 44-46). Jaikuaa rire ko mbaʼe, jahechami jey pe ehémplo Jesús omoĩvaʼekue.

7. Mbaʼérepa notĩri omombáy hag̃ua iñamígope pe óga jára ivisitavaʼekue?

⁷ Pe ehémplope, peteĩ óga jára orresivi peteĩ visíta pyharepyterei. Oikuaa omongaruvaʼerãha, péro ‘ndorekói mbaʼeve hoʼuka hag̃ua chupe’. Pe óga járape g̃uarã ko mbaʼe iñimportanteterei; okonsegivaʼerã pán oimeháicha. Upémaramo, oho iñamígo rógape ha notĩri omombáy hag̃ua chupe. “Che amígo, eiporukána chéve mbohapy pán”, heʼi chupe, ha ndohejái okonsegi peve oikotevẽva. Koʼág̃a, oreko rire pe pán añoite oñatende porãta ivisítare.

Ñaikotevẽramo, jajerurevevaʼerã

8. Mbaʼépa ñanemomýita jajerure jey jey hag̃ua espíritu sánto?

⁸ Mbaʼépa ñanemboʼe ko ehémplo jaikuaa hag̃ua mbaʼérepa ñañemboʼe meme vaʼerã? Pe kuimbaʼe ojerure jey jey vaʼekue okonsegi peve pe pán. Chupe g̃uarã iñimportanteterei upéva ojapo hag̃ua oñehaʼarõva chugui (Isaías 58:​5-7). Ndorekóiramo pe pán ndaikatumoʼãi oñatende porã ivisítare. Upéicha avei, jajerure meméramo Ñandejárape ijespíritu sánto, jahechakuaañaína upevaʼỹre ndaikatumoʼãiha jajapo ñane rembiapo kristiáno teéicha (Zacarías 4:6). Ñandejára espirituʼỹre ndajajapomoʼãi (Mateo 26:41). Jahechápa mbaʼeichaite iñimportánte ko ehémplo ñanemboʼéva? Upéva hína: jahechakuaáramo Ñandejára espirituʼỹre ndaikatumoʼãiha jaservi porã, jajerure jey jeýta chupe omeʼẽ hag̃ua ñandéve.

9, 10. a) Mbaʼe ehémplopa ikatu ñamoĩ jahechauka hag̃ua ñaikotevẽha jajerure jey jey Ñandejára espíritu? b) Mbaʼépa ñañeporanduvaʼerã, ha mbaʼérepa?

⁹ Jaiporumi peteĩ ehémplo koʼag̃agua jahecha porãve hag̃ua ko mbaʼe. Ñapensami peteĩ ñande rogaygua hasyha pyharepyterei. Ñamombáytapa peteĩ doktórpe oñatende hag̃ua hese? Ndajajapomoʼãi ndahasyetéiramo. Ha hasyetéramo ikorasõme? Ajépa upéicha jave nañatĩmoʼãi ñahenói hag̃ua pe doktór? Mbaʼérepa? Jajejopy vaígui upe jave. Ñande jahechakuaa pe doktór ndoúiramo ñande rogaygua ikatuha omano. Upéicha avei, umi kristiáno añetegua haʼete ku manterei ojejopy vaíva. Añetehápe, Satanás oikohína “león okororõvaicha” oñehaʼãva ñanemokõ (1 Pedro 5:​8, BNP). Jasegi hag̃ua jaikove ñaikotevẽterei Ñandejára espíritu ñanepytyvõ, ha ndajajeruréiramo ikatu ñamano. Upévare ñañemboʼe jey jey vaʼerã Ñandejárape ha jajerure chupe ijespíritu sánto (Efesios 3:​14-16). Upéicharõ añoite ñanembaretéta ñaaguanta hag̃ua ipaha peve (Mateo 10:22; 24:13).

¹⁰ Upévare, tekotevẽ sapyʼapyʼa ñañeporandumi: “Añemboʼe vove, ajerure jey jeýpa umi mbaʼe aikotevẽva?”. Aníkena ñanderesarái: jahechakuaáramo ñaikotevẽha Ñandejára ñanepytyvõ, jajerure jey jey vaʼerã chupe ijespíritu sánto.

Mbaʼépa ñanemokyreʼỹ ñañemboʼe hag̃ua?

11. Mbaʼéichapa oiporu Jesús pe ehémplo taʼýra ha túvare oñeʼẽva?

¹¹ Pe ehémplo omoĩvaʼekue Jesús oñeʼẽvo pe óga jára ojerure jey jey vaʼekuére, ohechauka mbaʼéicha vaʼerãpa pe kristiáno oñemboʼéva. Péro, ko ehémplo jahechátava ohechauka mbaʼépa oñandu Jehová, ohendúva ñane ñemboʼe. Jesús oporandu: “Mávapa peẽ tuvakuéra apytépe, taʼýra ojeruréramo ichupe pán, omeʼẽne ichupe ita? Térã ojeruréramo ichupe pira, pira rangue omeʼẽne ichupe mbói? Térã ojeruréramo ichupe ryguasu rupiʼa, omeʼẽne ichupe japeusa [alakrán]?”. Upémaramo Jesús omyesakã mbaʼépa ñanemboʼese: “Ha peẽ pene ñañáva pemeʼẽkuaáramo mbaʼe iporãva pende raʼykuérape, pende Ru yvagapeguáma katu omeʼẽvaʼerã Espíritu Sánto umi ichupe ojerurévape” (Lucas 11:​11-13, BNP).

12. Jahechávo pe túva oñatendeha itaʼýra ojerurévare, mbaʼéichapa jahecha Jehová omeʼẽseha ñandéve umi mbaʼe jajeruréva?

¹² Oiporúvo ko ehémplo oñeʼẽva peteĩ túvare omeʼẽva itaʼýrape ojeruréva, Jesús ohechauka mbaʼéichapa Jehová ohecha umi chupe oñemboʼévape (Lucas 10:22). Jahechami raẽ ko mbaʼe: pe kuimbaʼe jahechavaʼekue primer ehémplope nopuʼãséi oñatende hag̃ua pe oikotevẽvare, péro Jehová katu ojogua pe túva oporohayhúvape oñehaʼãva ikatuhaguéicha omeʼẽ itaʼyrakuérape ojeruréva (Salmo 50:15). Avei, oiporu peteĩ ehémplo iporãitereíva ohechauka hag̃ua mbaʼéichapa Jehová ñanepytyvõse. Upéva hína ko mbaʼe: peteĩ túva, ‘iñañáva’ opekahaguére, omeʼẽkuaáramo iporãva itaʼyrakuérape, koʼýte ñahaʼarõkuaa ñande Ru yvagapegua, imbaʼeporãitevéva, omeʼẽ espíritu sánto itaʼyrakuérape oadoráva chupe (Santiago 1:17).

13. Mbaʼérepa jajeroviakuaa ñañemboʼe jave Jehovápe?

¹³ Mbaʼépa ñanemboʼe koʼã mbaʼe? Ikatuha jajerovia ñande Ru yvagapegua katuete omeʼẽtaha ñandéve espíritu sánto jajeruréramo chupe (1 Juan 5:14). Ñañemboʼe jey jeýramo jepe chupe, arakaʼeve ndeʼimoʼãi ñandéve heʼihaguéicha iñamígope pe kuimbaʼe Jesús oñeʼẽhague: “Anína che[molesta]; ambotýmaniko okẽ” (Lucas 11:7). Upéva rangue, Jesús heʼi: “Pejerure [jey jey], ha oñemeʼẽvaʼerã peẽme; peheka [jey jey], ha pejuhúne; pembota [jey jey] ha ojepeʼáne peẽme pe okẽ” (Lucas 11:​9, 10). Añetehápe, Jehová ñanerendúta ñahenói jave chupe (Salmo 20:9; 145:18).

14. a) Mbaʼépa sapyʼánte opensa kristianokuéra ojejopy vai jave? b) Mbaʼérepa ikatu jajerovia Jehováre ñañemboʼe hag̃ua chupe jajejopy vai jave?

¹⁴ Pe ehémplo omoĩvaʼekue Jesús oñeʼẽvo upe túva oporohayhuetévare ohechauka Jehová ipyʼaporãveha oimeraẽ túvagui. Upévare, nañapensaivaʼerã umi mbaʼe vai jahasáva ouha Jehová ipochyhaguére ñanendive. Satanás katu, ndaijaʼéigui ñanderehe oipota ñapensa upéicha (Job 4:​1, 7, 8; Juan 8:44). Koʼã pensamiénto ndoúi la Bíbliagui, Jehová nañaneraʼãi mbaʼe vai reheve (Santiago 1:13). Ñande Ru yvagapegua nomboúi ñandéve mbaʼe vai haʼetéva peteĩ mbói térã alakrán. Omeʼẽ uvei “mbaʼe iporãva umi ojerurévape ichupe” (Mateo 7:​11, BNP; Lucas 11:13). Jaikuaavévo chupe ha jahechávo mbaʼeichaitépa ñanepytyvõse, jajeroviavéta hese ñañemboʼe hag̃ua. Ha jajapóvo upéicha, ikatúta jaʼe pe salmísta heʼihaguéicha: “Cherendu katu haʼe, chupe añemboʼéramo” (Salmo 10:17; 66:19).

Mbaʼéichapa ñanepytyvõ espíritu sánto

15. a) Mbaʼépa opromete Jesús ojapotaha? b) Mbaʼéichapa avei ñanepytyvõ pe espíritu sánto?

¹⁵ Omano mboyvemi, Jesús imanduʼa jey umi ehémplope omboʼevaʼekuére. Oñeʼẽvo pe espíritu sántore, heʼi umi apostolkuérape: “Ha che ajeruréta che Rúpe ombou hag̃ua peẽme peteĩ penepytyvõvaʼerã, oĩ hag̃ua penendive opa árape” (Juan 14:16). Upéicharamo, Jesús opromete pe espíritu sánto oipytyvõtaha ha oĩtaha hemimboʼekuéra ndive pe ára oútavape, ha upéva hína koʼág̃a. Mbaʼéichapa ñanepytyvõ? Pe espíritu sánto rupive ikatu jagueropuʼaka opaichagua jehasa asy. Ha mbaʼéichapa ojapo upéva? Pe apóstol Pablo heta ohasa asy vaʼekue, peteĩ kárta rupive omombeʼu umi Corintoyguápe mbaʼéichapa pe espíritu sánto oipytyvõvaʼekue chupe. Jahechaʼimíta mbaʼépa heʼi.

16. Mbaʼéichapa ikatu ñande avei ñaime Pablo oĩhaguéicha?

¹⁶ Pablo notĩri omombeʼu hag̃ua iñermanokuérape orekohague ‘peteĩ ñuatĩ oikutúva’ chupe, peteĩ mbaʼe oporombohasa asýva. Upéi heʼi: “Mbohapy jevy ajerurevaʼekue Ñandejárape oipeʼa hag̃ua chehegui ko jehasa asy” (2 Corintios 12:​7, 8). Ojerure asýramo jepe Pablo, Ñandejára ndoipeʼái chugui pe jehasa asy. Ikatu nde avei reñeñandu upéicha. Ojehuhaguéicha Páblope, ikatu reñemboʼe jey jey Ñandejárape oipeʼa hag̃ua ndehegui pe jehasa asy. Rejerure meméramo jepe chupe, pe provléma ndopái. Heʼisépa upéva Jehová nanerenduiha ha ijespíritu nanepytyvõiha? Ni mbaʼevéicharõ! (Salmo 10:​1, 17.) Jahechami mbaʼépa heʼi Pablo upe rire.

17. Mbaʼéichapa Jehová ombohovái Pablo ñemboʼe?

¹⁷ Ñandejára heʼi Páblope: “Che niko romombarete, ha upévante upe nde reikotevẽva, pe che puʼakakue ojehechakuaavégui pe máva ikangýramo”. Ha pe apóstol voi heʼi upémaramo: “Upévare avyʼa uvei chekangykue rehe, ojehechauka hag̃ua che pype pe Cristo puʼaka [‘Cristo puʼaka chemoʼã hag̃ua peteĩ óga kárpaicha’, NM]” (2 Corintios 12:​9, BNP; Salmo 147:5). Pablo ohechauka Ñandejára, Cristo rupive, omyasãihague hiʼári ipuʼaka haʼerõguáicha peteĩ óga kárpa omoʼãva chupe. Koʼág̃a rupi, Jehová avei ombohovái ñane ñemboʼe upéicha, omyasãivo ipuʼaka omoʼã hag̃ua umi chupe oservívape.

18. Mbaʼéicha rupípa ikatu jagueropuʼaka umi jehasa asy ñambohováiva?

¹⁸ Peteĩ óga kárpa ndojokói pe ama oúva térã pe yvytu oipejúva, péro ñanemoʼã chuguikuéra. Upéicha avei, “pe Cristo puʼaka” ndojokói umi jehasa asy oúva ñandéve. Upéicharõ jepe, ñanemoʼã umi mbaʼe vai ko múndope oĩvagui ha umi omboúvagui Satanás, oisãmbyhýva ko múndo (Apocalipsis [Revelación] 7:​9, 15, 16). Upévare, ndojeíriramo jepe ndehegui pe mbaʼe nembohasa asýva, reikuaavaʼerã Jehová ohechaha ha ohenduha ‘rejerurévo chupe nepytyvõ hag̃ua’ (Isaías 30:19; 2 Corintios 1:​3, 4). Pablo ohai: “Pejeroviakuaa [...] Ñandejára rehe, haʼe ndohejavaʼerãi ojehu peẽme mbaʼeve ikatuʼỹvaʼerã peropuʼaka. Upéva rangue, [pejejopy vai vove] [...] Ñandejára penepytyvõvaʼerã peropuʼaka hag̃ua, ha omeʼẽvaʼerã peẽme mbaʼéichapa pesẽ hag̃ua ha ikatu hag̃ua peropuʼaka” (1 Corintios 10:​13, BNP; Filipenses 4:​6, 7).

19. Mbaʼépa jajerurevaʼerã Ñandejárape, ha mbaʼérepa?

¹⁹ Jaikuaa “pe ára paha oñemoag̃uívo heta ojehasa asyta[ha]” (2 Timoteo 3:1). Upéicharamo jepe, ñande jaservíva Ñandejárape ikatu ñasẽ porã. Mbaʼérepa upéva? Ñanepytyvõ ha ñanemoʼãgui espíritu sánto, omeʼẽva Jehová umi chupe ojerure jey jeývape. Upévare, jajerurékena chupe ára ha ára tomeʼẽ ñandéve ijespíritu sánto (Salmo 34:6; 1 Juan 5:​14, 15).

Mbaʼépa ñambohováita?

• Mbaʼépa jajapovaʼerã Ñandejára omeʼẽ hag̃ua ñandéve ijespíritu sánto?

• Mbaʼérepa jajeroviakuaa Jehová omeʼẽtaha ñandéve ijespíritu sánto jajerure vove chupe?

• Mbaʼéichapa ñanepytyvõ pe espíritu sánto jahasa asy jave?

[Nóta oĩva taʼanga ndive páhina 13]

Mbaʼépa ñanemboʼe pe ehémplo omoĩvaʼekue Jesús oñeʼẽvo pe amígo ojerure jey jey vaʼekuére?

[Nóta oĩva taʼanga ndive páhina 14]

Jajerure jey jeýpa Ñandejárape ijespíritu sánto?

[Nóta oĩva taʼanga ndive páhina 15]

Mbaʼépa ñanemboʼe Jehovágui pe ehémplo omoĩvaʼekue Jesús oñeʼẽvo pe túva oporohayhuetévare?