Ñaimékena segúro pe jagueroviáva haʼeha pe añetegua

 1. ¿Mbaʼe rehepa ñañeʼẽ jaʼe jave “pe añetegua”?

¿NDÉPA rehendúmava umi ermanokuéra heʼiha jepi “pe añetegua” térã “la verda”? Ikatu oime nde voi ere jepi upéicha. Péro, ¿mbaʼépa jaʼese jepi jaʼe jave “pe añetegua”? Jaʼe jepi haʼeha pe añetegua umi mbaʼe jagueroviáva, umi mbaʼe jajapóva jaadora hag̃ua Ñandejárape, ha mbaʼéichapa jaiko. Umi persóna oikuaáva pe añetegua oikuaa mbaʼépa la Biblia omboʼe, ha oiko heʼiháicha umi konsého oĩva pype. Upéicha rupi, haʼekuéra ndogueroviavéima umi japu omboʼéva umi rrelihión fálsa, ha oikóramo jepe hikuái Satanás múndope, ndaipóri ótro yvypóra imperfékto ovyʼave vaʼerã chuguikuéra (Juan 8:32).

 2. Heʼiháicha Juan 13:34, 35, ¿mbaʼérepa oĩ umi oñepyrũséva ostudia la Biblia?

² ¿Mbaʼérepa reñepyrũse vaʼekue restudia la Biblia? Ikatu oime rehecha raʼe mbaʼéichapa ikondúkta porã Jehová siervokuéra (1 Ped. 2:12). Térã oiméne rehecha raʼe mbaʼéichapa haʼekuéra oporohayhukuaa. Heta oĩ umi oho vaʼekue rreunionhápe ha ojehechauka chupekuéra upeichagua mborayhu, ha imanduʼa porã hikuái upévare naimanduʼaguasúiramo jepe mbaʼépa ojeʼe raʼe upe rreuniónpe. Ha upéva ndajahecharamói, pórke Jesús heʼi vaʼekue voi idisipulokuérape ojekuaataha ojoayhu rupi hikuái (elee Juan 13:34, 35). Péro ndahaʼéi upévante jajapo vaʼerã ñande jerovia imbarete hag̃ua.

 3. ¿Mbaʼépa oikóta jajeroviáramo Jehováre jahecha rupínte kristianokuéra ojoayhuha?

³ Ñande ningo ndajajeroviái vaʼerã Ñandejárare jahecha rupínte mbaʼéichapa ñande kristianokuéra jajoayhu. ¿Mbaʼérepa? Ñamoĩ chupe peteĩ ñane ermáno térã ermána, ikatu peteĩ ansiáno térã peteĩ prekursór, hoʼa peteĩ pekádo ivaietereívape, ñanembopochy, térã oiko chugui apóstata ha heʼi ñande nañaimeiha pe rrelihión verdadérape. Oikóramo koʼã mbaʼe, ¿ndépa ndepochýta ha ndereservimoʼãvéi Jehovápe? ¿Mbaʼépa ñanemboʼe upéva? Ñande jerovia naimbaretemoʼãi jajeroviáramo Ñandejárare jahecha rupínte umi ótro ojapóva, ha ndahaʼéi jareko rupi peteĩ amista iporãva Jehovándi. Jahayhúramo Jehovápe ha ipuévlope, upéva ñanepytyvõta jajerovia hag̃ua. Péro la iñimportánteva hína jastudia porã la Biblia, ñantende porã umi mbaʼe jaleéva ha ñainvestiga ñaime hag̃ua segúro siertoha umi mbaʼe ñaaprendéva Jehovágui (Rom. 12:2).

 4. Heʼiháicha Mateo 13:3-6, 20, 21, ¿mbaʼépa oiko algúnore ohasa jave provléma?

⁴ Jesús heʼi vaʼekue oĩtaha umi “ohendúva pe mensáhe ha pyaʼe voi oguerovia vyʼápe”, péro ijerovia ikangytaha ombohováivo umi provléma (elee Mateo 13:3-6, 20, 21). Ikatu oime ndohechakuaái raʼe hikuái jasegíramo Jesúspe, jahasatanteha voi umi situasión ijetuʼúva (Mat. 16:24). Térã oiméne opensa raʼe peteĩ kristiáno núnka naiprovlemamoʼãiha, ha Ñandejára siémpre ovendesitaha chupe. Péro ko múndope katuete oĩta provléma, ikatu avei oiko ñanderehe peteĩ mbaʼe ñahaʼarõʼỹva ha upéicha rupi jaju ndajavyʼavéi peteĩ tiémpore (Sal. 6:6; Ecl. 9:11).

 5. ¿Mbaʼéichapa la majoría ñane ermanokuéra ohechauka oĩha segúro umi mbaʼe ogueroviáva haʼeha pe añetegua?

⁵ La majoría ñane ermanokuéra ohechauka oĩha segúro umi mbaʼe ogueroviáva haʼeha pe añetegua. ¿Mbaʼérepa jaʼe upéva? Pórke ijeroviakuéra naikangýi oiméramo jepe peteĩ ermáno térã ermána ombopochy chupekuéra, térã opeka vai (Sal. 119:165). Ha iprovléma jave, haʼekuéra ndaijeroviakangýi síno ijerovia mbareteve (Sant. 1:2-4). ¿Mbaʼépa jajapo vaʼerã péicha avei imbarete hag̃ua ñande jerovia?

 6. ¿Mbaʼérepa umi kristiáno ypykue ojerovia vaʼekue Ñandejárare?

⁶ Umi kristiáno ypykue ojerovia vaʼekue oikuaágui Ñandejára Ñeʼẽ heʼíva ha Jesucristo omboʼéva, upéva hína ‘pe añetegua, upe oúva umi notísia porãgui’ (Gál. 2:5). Upévape oike entéro mbaʼe kristianokuéra ogueroviáva, umíva apytépe Jesús omano hague ñanderehehápe ñandesalva hag̃ua, ha oikove jey hague upe rire. Apóstol Pablo oĩ vaʼekue segúro koʼã mbaʼe jagueroviáva haʼeha pe añetegua. ¿Mbaʼéichapa jaikuaa upéva? Pórke haʼe ohechauka vaʼekue “Ñandejára Ñeʼẽ rupive mbaʼe mbaʼérepa tekotevẽ raʼe Cristo ohasa asy, omano ha opuʼã jey umi omano vaʼekue apytégui” (Hech. 17:2, 3). Umi kristianokuéra ypykue oguerovia vaʼekue koʼã mbaʼe, ha okonfia pe espíritu sánto oipytyvõtaha chupekuéra ontende hag̃ua Ñandejára Ñeʼẽ. Haʼekuéra oinvestiga vaʼekue oĩ hag̃ua segúro koʼã mbaʼe oñemboʼéva oñeguenohẽha Ñandejára Ñeʼẽgui (Hech. 17:11, 12; Heb. 5:14). Haʼekuéra ojerovia hag̃ua ndahaʼéi ojesegínteva umi mbaʼe oñandúvare, ha ndoservíri Jehovápe oñeñandu porã rupínte ojeheʼávo ermanokuérare. Upéva rangue haʼekuéra ojerovia ‘oikuaa porãve rupi Ñandejárape’ (Col. 1:9, 10).

 7. ¿Mbaʼéichapa ñanepytyvõta jajeroviáramo umi mbaʼe omboʼévare la Biblia?

⁷ Pe añetegua oĩva la Bíbliape nokambiái (Sal. 119:160). Por ehémplo upéva nokambiái peteĩ ermáno ñanembopochýramo térã opeka vaíramo, ha nokambiái avei ñaneprovléma jave. Upévare tekotevẽ jaikuaa porã umi mbaʼe omboʼéva la Biblia ha ñaime segúro umíva haʼeha pe añetegua. Peteĩ ánkla ikatu oipytyvõ peteĩ várkope ani hag̃ua oñehundi torménta jave. Upéicha avei jajerovia mbaretéramo umi mbaʼe omboʼévare la Biblia, upéva ñanepytyvõta jasegi hag̃ua ñandefiél Jehovápe ñaneprovléma heta jave. Péro, ¿mbaʼépa jajapo vaʼerã amás día ñaimeve hag̃ua segúro umi mbaʼe jagueroviáva haʼeha pe añetegua?

 8. Heʼiháicha 2 Timoteo 3:14, 15, ¿mbaʼérepa Timoteo oĩ vaʼekue segúro umi mbaʼe ogueroviáva haʼeha pe añetegua?

⁸ Timoteo oĩ vaʼekue segúro umi mbaʼe ogueroviáva haʼeha pe añetegua. Péro, ¿mbaʼérepa haʼe oĩ vaʼekue segúro? (elee 2 Timoteo 3:14, 15). Isy ha ijavuéla oikuaauka ñepyrũ vaʼekue chupe mbaʼépa omboʼe Ñandejára Ñeʼẽ. Péro katuete oñemotiémpo ha oñehaʼãmbaiténe rakaʼe ostudia hag̃ua Ñandejára Ñeʼẽ. Upéicha rupi haʼe oñekonvense vaʼekue umi mbaʼe oĩva pype haʼeha pe añetegua. Tiémpo rire, Timoteo, isy ha ijavuéla oaprende vaʼekue umi mbaʼe kristianokuéra omboʼéva. Timoteo oiméne ohecharamoiterei rakaʼe mbaʼéichapa ojoayhu Jesús segidorkuéra. Haʼe ningo ohasaseterei tiémpo ha oipytyvõse iñermanokuéra kongregasionpeguápe (Filip. 2:19, 20). Péro haʼe ojerovia vaʼekue Ñandejárare ndahaʼéi ohayhu rupínte hapichakuérape, síno ojasegura rupi umi mbaʼe oĩva Ñandejára Ñeʼẽme haʼeha pe añetegua, ha upéva omomýi chupe oikose hag̃ua Jehová amígoramo. Nde avei restudia vaʼerã la Biblia, ha hesakã porã vaʼerã ndéve umi mbaʼe oikuaaukáva Jehovágui haʼeha pe añetegua.

 9. ¿Mbaʼe mbohapy enseñánsarepa reime vaʼerã segúro?

⁹ Ñepyrũrã reime vaʼerã segúro mbohapy enseñánsa iñimportántevare. Primero, reĩ vaʼerã segúro Ñandejára Jehová haʼeha opa mbaʼe Apohare (Éx. 3:14, 15; Heb. 3:4; Apoc. 4:11). Segundo, nde reikuaa vaʼerã mbaʼérepa reĩ segúro la Biblia haʼeha Ñandejára mensáhe yvyporakuérape g̃uarã (2 Tim. 3:16, 17). Ha tercero, reĩ vaʼerã segúro Jehová orekoha peteĩ puévlo organisádo oadoráva chupe Cristo poguýpe, ha umi testígo de Jehová haʼeha upe puévlo (Is. 43:10-12; Juan 14:6; Hech. 15:14). Reime hag̃ua segúro siertoha koʼã mbohapy mbaʼe natekotevẽi reikuaa entéro mbaʼe la Biblia heʼíva. Nde reipuru vaʼerã ‘ne akã ha ne pensamiénto’ reimeve hag̃ua segúro umi mbaʼe regueroviáva haʼeha pe añetegua (Rom. 12:1).

10. Jaikuaa rire pe añetegua, ¿mbaʼépa avei tekotevẽ jajapo?

¹⁰ Nde reime rire segúro umi mbaʼe jaʼe vaʼekue Ñandejárare, la Biblia ha Ñandejára puévlore haʼeha pe añetegua, tekotevẽta avei reime preparádo rehechauka hag̃ua nde rapichakuérape siertoha koʼã mbaʼe. ¿Mbaʼérepa? Pórke ñande kristianokuéra jareko pe rresponsavilida ñamboʼévo pe añetegua ñaaprendéva umi ñande rapichakuéra ñanerendusévapeb (1 Tim. 4:16). Ha ñañehaʼãvo ñaipytyvõ ótrope oguerovia hag̃ua la Biblia omboʼéva haʼeha pe añetegua, ñande voi ñamombarete hína ñande jerovia pe añeteguáre.

11. ¿Mbaʼéichapa Pablo omboʼe vaʼekue umi héntepe, ha mbaʼéichapa ikatu jasegi iñehémplo?

¹¹ Apóstol Pablo omboʼérõ guare la héntepe, “oñehaʼã vaʼekue okonvense chupekuéra ojerovia hag̃ua Jesús rehe, ha upearã oipuru Moisés léi ha umi Proféta oskrivi vaʼekue” (Hech. 28:23). ¿Mbaʼéichapa ikatu jasegi Pablo ehémplo ñamboʼe jave pe añetegua ñande rapichakuérape? Ñande ndahaʼéi jarrepetínte vaʼerã chupekuéra mbaʼépa la Biblia omboʼe. Ñaipytyvõ vaʼerã ñane estudiántepe opensa ha ontende hag̃ua la Biblia heʼíva ikatu hag̃uáicha oñemoag̃ui hikuái Jehováre. Ñande ndajaipotái oguerovia hikuái pe añetegua ñanderrespeta rupínte, síno pórke ostudia ha ohechakuaa ijeheguiete umi mbaʼe oaprendéva Ñandejára ñanderayhuetévagui haʼeha pe añetegua.

12, 13. ¿Mbaʼéichapa tuakuéra ikatu oipytyvõ ifamíliape osegi hag̃ua oservi Jehovápe?

¹² Tuakuéra, katuete ningo peẽ peipota pene familiakuéra osegi oservi Jehovápe. Ikatu pepensa haʼekuéra orekóramo umi amígo ijerovia mbaretéva kongregasiónpe oipytyvõtaha chupekuéra ijerovia mbarete hag̃ua avei. Péro peipotáramo pene família oĩ segúro la Biblia omboʼéva haʼeha pe añetegua, ndahaʼemoʼãi oikotevẽtanteva umichagua amígore. Tekotevẽta haʼekueraite voi oreko peteĩ amista iporãva Ñandejárandi, ha oĩ segúro umi mbaʼe omboʼéva la Biblia haʼeha pe añetegua.

¹³ Peẽ tuakuéra pemboʼeséramo pene famíliape pe añetegua Ñandejáragui, peẽ voi pemoĩ vaʼerã ehémplo pestudia porãvo la Biblia. Peñemotiémpo vaʼerã pejepyʼamongeta hag̃ua umi mbaʼe peaprendévare, upéi ikatútama pemboʼe chupekuéra ojapo hag̃ua avei upéicha. Tekotevẽta avei pemboʼe pene famíliape oipurukuaa hag̃ua umi erramiénta jarekóva jastudia hag̃ua la Biblia, pemboʼeháicha avei pene estudiánte de la Bíbliape. Péicha pejapóramo peipytyvõta chupekuéra ohayhu hag̃ua Jehovápe, ha ojeroviáta hikuái haʼe ñanepytyvõha ñantende hag̃ua la Biblia “pe esklávo de konfiánsa ha iñarandúva” rupive (Mat. 24:45-47). Tuakuéra, napemboʼéi vaʼerã chupekuéra umi mbaʼe ifásilvante la Bíbliagui. Upéva rangue, peipytyvõ vaʼerã pene famíliape omombarete hag̃ua ijerovia pemboʼévo chupekuéra “Ñandejára pensamiénto avave ndoikuaáiva”, ha pejapo vaʼerã upéva asegún mboy áñopa oreko ha mbaʼe kapasidápa oreko hikuái (1 Cor. 2:10).

14. ¿Mbaʼérepa jastudia vaʼerã umi profesía oĩva la Bíbliape? (Ehecha avei pe rrekuádro “¿Ikatúpa jaexplika koʼã profesía?”).

¹⁴ Umi profesía oĩva la Bíbliape ningo iñimportanteterei ha ñanepytyvõ avei ñamombarete hag̃ua ñande jerovia Jehováre. ¿Mbaʼe profesíapa hína umíva? Por ehémplo ikatu ñanemanduʼa umi profesía oñeʼẽva umi ára paháre (2 Tim. 3:1-5; Mat. 24:3, 7). Péro, ¿oĩpa ótra profesía oñekumpli pyréva ikatúva omombarete avei ñande jerovia? Por ehémplo, ¿ikatúpa jaexplika mbaʼéichapa oñekumpli vaʼekue yma umi profesía oĩva Daniel kapítulo 2 térã kapítulo 11-pe, ha mbaʼéichapa osegi gueteri oñekumpli koʼág̃a peve?c Jajeroviáramo jaikuaa rupi la Biblia omboʼéva, ñanepytyvõta ñaaguanta hag̃ua opa mbaʼe. Jahechamína mbaʼe ehémplopa oheja ñandéve umi ermanokuéra ojepersegi vaʼekue Alemániape, pe segunda gérra mundiál aja. Upe tiémpope noñentendeporãiramo jepe umi profesía bíblica oñeʼẽva umi ára paháre, haʼekuéra lomímonte ojerovia mbarete vaʼekue umi mbaʼe oikuaámavare Ñandejára Ñeʼẽgui.

15-17. Umi nazi opersegírõ guare ermanokuérape, ¿mbaʼépa omombarete raʼe chupekuéra oaguanta hag̃ua?

¹⁵ Umi nazi omandaha tiémpope Alemániape, hetaiterei ermáno ha ermánape oñemondo vaʼekue umi kámpo de konsentrasiónpe. Hitler ha peteĩ ofisiál omanda guasúva hérava Heinrich Himmler, ndaijaʼéi vaʼekue testígo de Jehováre. Peteĩ ermána oĩ vaʼekue peteĩva umi kámpo de konsentrasiónpe, omombeʼu Himmler heʼi hague unas kuánta ermánape: “¡Pende Jehová oiméne ogoverna hína yvágape, péro koʼápe ko yvy ape ári, ore hína la romandáva! ¡Jahecháta ág̃a mávapa oho pukuve hese, peẽ térãpa ore!”. ¿Mbaʼépa oipytyvõ raʼe Jehová puévlope osegi hag̃ua ifiél?

¹⁶ Umi Estudiánte de la Biblia oikuaa vaʼekue Ñandejára Rréino oñepyrũ hague ogoverna 1914-pe, ha haʼekuéra noñesorprendéi ojepersegi haguére chupekuéra. Péro Jehová puévlo oĩ vaʼekue segúro ndaiporiha yvypóra goviérno ikatu vaʼerã ojoko Ñandejárape okumpli hag̃ua hembipota. Hitler ndaikatumoʼãi kuri ohundi pe adorasión verdadéra, térã omoĩ peteĩ goviérno ipoderosovéva Ñandejára Rréinogui. Ñane ermanokuéra oĩ vaʼekue segúro tahaʼe haʼeháicha, Hitler goviérno opataha.

¹⁷ Umi ermanokuéra ogueroviáva noĩvaíri kuri. Tiémpo riremi, pe goviérno nazi opa ha Heinrich Himmler, pe kuimbaʼe heʼi vaʼekue “¡koʼápe ko yvy ape ári, ore hína la romandáva!”, amo ipahápe okañy pono ojejuka chupe. Ha Himmler okañy aja ohóvo otopa ermáno Lübke rehe, peteĩ prisionerokue ha oikuaa haʼe Testigoha. Himmler oñeñandu yvýre ha oporandu ermáno Lübkepe: “Nde Estudiánte de la Biblia, ¿mbaʼe piko oikóta koʼágui?”. Upémarõ ermáno Lübke oexplika chupe testígo de Jehová oikuaáma hague voi pe goviérno nazi opataha ha ojeliverataha chupekuéra. Himmler ningo heʼi vaʼekue hetaiterei mbaʼe vai Testigokuérare, péro upe moméntope haʼe ndoikuaái mbaʼépa heʼíta. Upe riremínte haʼe ojesuisida. ¿Mbaʼépa ñanemboʼe upéva? Jastudiáramo la Biblia ha umi profesía oĩva pype, ñanepytyvõta ñamombarete hag̃ua ñande jerovia Ñandejárare ha ani hag̃ua ñañentrega oĩ jave ñandepersegíva (2 Ped. 1:19-21).

18. Heʼiháicha Juan 6:67, 68, ¿mbaʼérepa tekotevẽ ‘jaikuaa porã Ñandejára rembipota ha ñantende porã upéva’, heʼi haguéicha apóstol Pablo Filipenses 1:9-pe?

¹⁸ Ñande ningo jajoayhu vaʼerã jahechauka hag̃ua ñande haʼeha kristiáno teete. Péro tekotevẽ avei ‘jaikuaa porã Ñandejára rembipota ha ñantende porã upéva’ (Filip. 1:9). Pórke ndahaʼéiramo upéicha, ikatu hína jaguerovia “umi japu omboʼéva umi kuimbaʼe oikóva oporombotavy”, umíva apytépe umi apóstata (Efes. 4:14). Pe síglo primérope, heta disípulo ohejárõ guare Jesúspe ha ndosegivéi chupe, apóstol Pedro ohechauka vaʼekue oĩha segúro Jesús ‘ñeʼẽ omeʼẽha jeikove opaveʼỹva’ (elee Juan 6:67, 68). Upe tiémpope, Pedro nontendepáirõ jepe entéro mbaʼe Jesús omboʼéva, haʼe osegi ifiél Ñandejárape pórke oĩ vaʼekue segúro Jehová ombou hague Jesúspe. Ñande avei ikatu ñamombarete ñande jerovia la Biblia omboʼévare. Jajapóramo upéicha, ñande jerovia osegíta imbarete toiko la oikóva ohasáramo jepe la tiémpo, ha ñaipytyvõta avei ótrope ojerovia mbarete hag̃ua (2 Juan 1, 2).