¿Mbaʼépa ñanepytyvõta javyʼa hag̃ua ñande rogapýpe?

1, 2. ¿Mbaʼéichapa Jehová oipota jaiko ñande rogapýpe?

LA Biblia omombeʼu Jehová ojapo hague pe kuña ypykuépe ha upéi ogueraha chupe “pe kuimbaʼe rendápe”. Adán ovyʼaiterei ha heʼi: “Hasypeve rotopa che pehengue, pórke nde ningo che kangue ha che roʼógui rejejapo vaʼekue” (Génesis 2:22, 23). Ko téxto ohechauka Jehová oforma hague pe primer matrimónio ha haʼe oipotaha umi matrimónio ovyʼa.

² Ñambyasýramo jepe, heta oĩ ndovyʼáiva hogapýpe. Péro la Biblia omeʼẽ ñandéve heta konsého iporãitereíva ha ñanepytyvõtava javyʼa hag̃ua. La Bíbliape oĩ konsého ménape g̃uarã, tembirekópe g̃uarã ha familiakuérape g̃uarã. Káda uno ojapóramo la Biblia heʼíva katuete ovyʼáta hikuái hogapýpe (Lucas 11:28).

3, 4. a) ¿Mbaʼéichapa menakuéra otrata vaʼerã hembirekópe? b) ¿Mbaʼérepa iñimportánte ména ha tembireko oñoperdona?

³ La Biblia heʼi menakuéra ohayhu, otrata porã ha orrespeta vaʼerãha hembirekópe. Eleemína Efesios 5:25-29. Menakuéra siémpre otrata vaʼerã mborayhúpe hembirekópe ha oñangareko porã vaʼerã hese. Ndojapói vaʼerã umi mbaʼe omoñeñandu vaítava chupe.

⁴ Péro, ¿mbaʼépa ojapóta hembireko ojavy jave? La Biblia heʼi menakuérape: “Pesegíkena pehayhu pene rembirekópe ha ani perrenega vaipa hesekuéra” (Colosenses 3:19). Menakuéra, penemanduʼa vaʼerã peẽ avei ikatuha pejavy. Ha ndahaʼéi upévante, peipotáramo Ñandejára peneperdona, peẽ avei peperdona vaʼerã pene rembirekópe (Mateo 6:12, 14, 15). Ména ha tembireko oñehaʼãramo oñoperdona ojavy jave, upéva oipytyvõta chupekuéra ovyʼa hag̃ua imatrimóniope.

 5. ¿Mbaʼérepa menakuéra omombaʼe vaʼerã hembirekópe?

⁵ Jehová oipota menakuéra omombaʼe hembirekópe. Menakuéra oñangareko porã vaʼerã hembirekóre, upéva heʼise oñehaʼã vaʼerãha ohechakuaa mbaʼépa oikotevẽ hembireko ovyʼa ha oñeñandu porã hag̃ua. Upéva ningo iñimportanteterei, pórke pe ména ndotrataporãiramo hembirekópe, Jehová ikatu hína nohendúi iñemboʼe (1 Pedro 3:7). Jehová ningo peteĩchaiténte omombaʼe kuimbaʼe ha kuñanguérape. Jehovápe g̃uarã la iñimportantevéva hína jahayhu chupe ñande pyʼaite guive.

 6. ¿Mbaʼépa omboʼese vaʼekue Jesús heʼírõ guare umi omendáva ndahaʼeveimaha mokõi, síno peteĩntema?

⁶ Jesús heʼi vaʼekue peteĩ kuimbaʼe ha kuña omendáva ndahaʼeveimaha mokõi, síno peteĩntema (Mateo 19:6). Upéva heʼise mokõivéva ifiél vaʼerãha ojupe ha ni mbaʼevéicharõ ndovaleiha oñomoakãratĩ hikuái (Proverbios 5:15-21; Hebreos 13:4). La Biblia heʼi avei: “Ména okumpli vaʼerã hembireko ndive ha pe tembireko okumpli vaʼerã iména ndive”. Ko téxto oñeʼẽ hína pe rrelasión sexuál rehe (1 Corintios 7:3-5). Menakuéra imanduʼa vaʼerã avei ko téxto heʼívare: “Ndaipóri ningo kuimbaʼe ndochaʼéiva hetére, upéva rangue mborayhúpe oñangareko hetére”. Upéicharõ, menakuéra ohayhu ha omokunuʼũ vaʼerã hembirekópe. Tembirekokuéra ningo ovyʼaiterei voi iména imbaʼeporã ha ohayhúramo chupe ipyʼaite guive (Efesios 5:29).

 7. ¿Mbaʼérepa peteĩ ogapýpe oĩmante vaʼerã peteĩ omoakãva?

⁷ Peteĩ ogapýpe oĩmante vaʼerã peteĩ omoakãva, ikatu hag̃uáicha ogia ha oipytyvõ hogayguápe ojogueraha porã hag̃ua. La Biblia heʼi voi “Cristo omoakãha entéro kuimbaʼépe. Pe kuimbaʼe katu omoakã kuñáme, ha Ñandejára omoakã hína Crístope” (1 Corintios 11:3).

 8. ¿Mbaʼéichapa tembirekokuéra ikatu ohechauka orrespetaha iménape?

⁸ Enterove ningo ñaneimperfékto, upévare menakuéra sapyʼánte ojavýtante voi, upéicharõ jepe, tembirekokuéra orrespeta vaʼerã iména odesidíva ha oipytyvõ chupe, upéva katuete ou porãta ifamíliape (1 Pedro 3:1-6). La Biblia heʼi: “Tembireko [...] orrespeta vaʼerã iménape ipyʼaite guive” (Efesios 5:33). ¿Péro mbaʼépa ojapóta iména ndoservíriramo Jehovápe? Lomímonte orrespeta vaʼerã chupe ipyʼaite guive. La Biblia heʼi: “Peẽ tembirekokuéra peñemoĩ vaʼerã pene ména poguýpe, ha péicha oĩramo naiñeʼẽrendúiva Ñandejára ñeʼẽme, pene kondúkta rupive ikatúta iñeʼẽrendu pejeʼỹre chupe mbaʼeve. Upéva oikóta haʼekuéra ohecha rupi pene kondúkta porãha ha ohecha rupi perrespetaha chupekuéra pende pyʼaite guive” (1 Pedro 3:1, 2). Peteĩ tembireko oñehaʼãramo ojapo Jehová heʼíva, ikatu hína iména ontendeve chupe ha opermiti chupe oservi Jehovápe.

 9. a) ¿Mbaʼépa ikatu ojapo tembirekokuéra noĩriramo de akuérdo iménandi peteĩ mbaʼépe? b) ¿Mbaʼe konséhopa omeʼẽ tembirekokuérape Tito 2:4, 5?

⁹ ¿Mbaʼépa ikatu ojapo tembirekokuéra noĩriramo de akuérdo iménandi peteĩ mbaʼépe? Pyʼaguapýpe porãnte omombeʼu vaʼerã iménape mbaʼépa haʼe opensa. Por ehémplo, Sara peteĩ jey heʼi porã vaʼekue Abrahánpe peteĩ mbaʼe ndogustáiva chupe, ha Jehová heʼi Abrahánpe: “Ehendu la heʼíva ndéve” (Génesis 21:9-12). Peteĩ ména oservíva Jehovápe ningo katuete oguerekóta enkuénta la Biblia heʼíva odesidi hag̃ua peteĩ mbaʼe. Upévare, oĩ porãma guive, pe tembireko oasepta vaʼerã iména odesidíva ha oapoja chupe (Hechos 5:29; Efesios 5:24). Pe tembireko ivuénava katuete ohayhu ha okuida porãta hogayguakuérare (elee Tito 2:4, 5). Iména ha imembykuéra ohecháramo mbaʼéichapa haʼe oñangareko porã hesekuéra, katuete ohayhu ha orrespetavéta chupe (Proverbios 31:10, 28).

10. ¿Mbaʼépa heʼi la Biblia pe separasión ha divórsiore?

¹⁰ Oĩ matrimónio oimeraẽ mbaʼérentema odesidíva ojesepara térã ojedivorsia. Péro la Biblia heʼi porã: “Tembireko ndohejái vaʼerã iménape. [...] Ha pe ména avei ndohejái vaʼerã hembirekópe” (1 Corintios 7:10, 11). Sapyʼánte ningo tekotevẽtamante umi omendáva ojesepara, péro ndahaʼéi vaʼerã vyroreírente, ha opensa porã vaʼerã ojapo hag̃ua upéva. ¿Ha mbaʼépa heʼi la Biblia pe divórsiore? La Biblia heʼi umi omendáva ikatuha ojedivorsia pe ména térã tembireko omoakãratĩramo añoite hembiayhúpe (Mateo 19:9).

11. ¿Mbaʼépa pe iñimportantevéva pemboʼe vaʼerã pene famíliape?

¹¹ Tuakuéra ojapo vaʼerã opa ikatúva ohasa hag̃ua tiémpo ifamíliandi. Pene familiakuéra ningo oikotevẽ penderehe, ha koʼýte pemboʼe hag̃ua chupekuéra Jehovágui (Deuteronomio 6:4-9).

12. ¿Mbaʼépa ojapo vaʼerã sy ha túa oprotehe hag̃ua ifamíliape?

¹² Ko múndo oĩva Satanás poguýpe ningo amás día ipeligrosove pórke oiko heta mbaʼe vai. Por ehémplo, oĩ heta persóna ojapóva mbaʼe vai umi mitãre térã oviola voi katu chupekuéra. Sapyʼánte sy ha túape ijetuʼu oñeʼẽ hag̃ua koʼã témare ifamíliandi, péro oñeʼẽ vaʼerã hendivekuéra ikatu hag̃uáicha haʼekuéra oikuaa mbaʼéichapa ikatu ojeprotehe umichagua persónagui. Túa ha sy, peñangarekókena pene famíliarea (1 Pedro 5:8).

13. ¿Mbaʼéichapa tuakuéra ohekomboʼe vaʼerã ifamíliape?

¹³ Túa ha sy oreko pe rresponsavilida omboʼévo ifamíliape mbaʼéichapa oñekomporta vaʼerã. Katuete ningo haʼekuéra oikotevẽta avei rekorrehi chupekuéra, péro ndovaléi remaltrata ni rejahéi hesekuéra (Jeremías 30:11). Aníkena rekorrehi ne famíliape pochy reheve. Katuete ningo rembyasýta eréramo peteĩ mbaʼe oikutu rasýva ne famíliape (Proverbios 12:18). Emombeʼu porã vaʼerã chupekuéra mbaʼérepa tekotevẽ iñeʼẽrendu (Efesios 6:4; Hebreos 12:9-11; ehecha nóta 30).

14, 15. ¿Mbaʼérepa mitãnguéra iñeʼẽrendu vaʼerã isy ha itúape?

¹⁴ Jesús iñeʼẽrendu vaʼekue Itúape, sapyʼánte ijetuʼúramo jepe chupe upéva (Lucas 22:42; Juan 8:28, 29). Jehová oipota avei mitãnguéra iñeʼẽrendu itúa ha isýpe (Efesios 6:1-3).

¹⁵ Mitãnguéra, peneñeʼẽrendu vaʼerã pende sy ha pende túape sapyʼánte ijetuʼúramo jepe peẽme upéva. Pejapóramo upéicha, Jehová ha pende tuakuéra ovyʼaitereíta pendereheveb (Proverbios 1:8; 6:20; 23:22-25).

16. a) ¿Mávarepa ikatu ojevale Satanás ojapoka hag̃ua ivaíva mitãrusu ha mitãkuñanguérape? b) ¿Mbaʼérepa iñimportanteterei reheka ne amigorã umi ohayhúva Jehovápe?

¹⁶ Satanás ningo ikatu hína oipuru ne amigokuéra térã ótro nde rapichápe ikatu hag̃uáicha nemboliga rejapo hag̃ua peteĩ mbaʼe noĩporãiva. Haʼe oikuaa ijetuʼuha jagueropuʼaka hag̃ua peichagua tentasión. Por ehémplo, Jacob rajy hérava Dina ojeheʼa vaʼekue umi ndoservírivare Jehovápe. Upéva ogueru vaʼekue heta provléma chupe ha avei ihentekuérape (Génesis 34:1, 2). Nde avei rejeheʼáramo umi ndoservírivare Jehovápe, ikatu hína nemboliga hikuái rejapo hag̃ua peteĩ mbaʼe noĩporãiva. Ha upéva káusare ikatu hína resufri ha remoñeñandu vai ne hentekuérape ha Jehovápe (Proverbios 17:21, 25). Upévare iñimportanteterei reheka ne amigorã umi ohayhúva Jehovápe (1 Corintios 15:33).

17. ¿Mbaʼépa jajapo vaʼerã káda uno ikatu hag̃uáicha javyʼa ñande rogapýpe?

¹⁷ La Biblia rupive Jehová omeʼẽ heta konsého ñanepytyvõva javyʼa hag̃ua ñande rogapýpe, ha enterove jajapóramo haʼe heʼíva, jajehekýita heta provlémagui. Menakuéra, pehayhu ha petrata porãkena pene rembirekópe. Tembirekokuéra, perrespetákena pene ménape, peñemoĩ ipoguýpe ha pesegi pe ehémplo oĩva Proverbios 31:10-31-pe. Túa ha sy, pemboʼékena pene famíliape ohayhu hag̃ua Jehovápe (Proverbios 22:6). Kuimbaʼekuéra, pemoakã porãkena pende rogapy (1 Timoteo 3:4, 5; 5:8). Mitãnguéra, peneñeʼẽrendu vaʼerã pende sy ha pende túape (Colosenses 3:20). Ñanemanduʼa vaʼerã enterovénte ikatuha jajavy, upévare ñaneumílde vaʼerã ha ñañoperdona. Jahechaháicha, la Bíbliape jatopa heta konsého ñanepytyvõtava javyʼa hag̃ua ñande rogapýpe.