¿Rehejápa la Biblia nepytyvõ resegi hag̃ua rekambia?

1-3. a) ¿Mbaʼépa ikatu ijetuʼu ñandéve ñakambia hag̃ua jajevautisa rire? b) Ijetuʼu jave ñandéve ñakambia hag̃ua, ¿mbaʼépa katuete ñañeporandúne? (Ehecha umi taʼanga oĩva iñepyrũme.)

HETA áñore Kevin opita, okaʼu, ojedroga ha ihugadór.^[1] Upéi ou oikuaa Jehovápe ha oikose iñamígoramo. Péro haʼe ohechakuaa tekotevẽha okambia heta mbaʼépe. Ohasávo pe tiémpo, Kevin tuicháma okambia. ¿Mbaʼépa oipytyvõ chupe? Jehová ha la Biblia (Heb. 4:12).

² Kevin ojevautisa rire, tekotevẽ kuri osegi okambia ha oñehaʼãmbaite vaʼerã omehora kómo kristiáno (Efes. 4:31, 32). Por ehémplo, haʼe ipochyparei vaʼekue. Kevin orrekonose: “Ijetuʼu vaʼekue chéve apoi hag̃ua che visiokuéragui, péro ijetuʼuve chéve ajejoko chepochy jave”. Péro upéi Kevin oñemoĩ ostudia porã la Biblia ha ojerure asy Jehovápe toipytyvõ chupe okambia hag̃ua, ha Jehová ohendu chupe.

³ Jajevautisa mboyve ningo tekotevẽ kuri tuicha ñakambia jaiko hag̃ua la Biblia heʼiháicha. Péro koʼág̃a jasegi vaʼerã ñakambia heta mbaʼépe ikatu hag̃uáicha jajogua Jehová ha Crístope (Efes. 5:1, 2; 1 Ped. 2:21). Por ehémplo, ikatu oime jahechakuaa ñaneexihentetereiha ótrondi, jakyhyje oñepensa vaírõ g̃uarã ñanderehe, ñanechismóso térã jareko ambue defékto. ¿Ijetuʼuetereípa ñandéve ñakambia koʼã mbaʼépe? Oiméramo oiko upéva nderehe, katuete reñeporandúne: “Che ningo ahejaitéma heta mbaʼe vai, ¿mbaʼérepa upéicharõ ijetuʼuete chéve asegi hag̃ua amehora? ¿Mbaʼépa ajapo vaʼerã ikatu hag̃uáicha la Biblia chepytyvõ asegi hag̃ua akambia tekotevẽhápe?”.

 4. ¿Mbaʼérepa ndaikatúi jajapo porã opa mbaʼe Jehová oipotáva?

⁴ Ñande ningo jahayhu Jehovápe, ha jaipota haʼe ñandeguerohory. Péro ñambyasýramo jepe, ñaneimperfékto rupi ndaikatúi siémpre jajapo porã opa mbaʼe. Heta vése ñañeñandu apóstol Pablo oñeñandu haguéicha. Haʼe heʼi vaʼekue: “Chéngo ajapose iporãva péro ndaikatúi ajapo” (Rom. 7:18; Sant. 3:2).

 5. a) ¿Mbaʼe mbaʼépa tekotevẽ kuri jajapo jajevautisa mboyve? b) ¿Mbaʼépa jasegi vaʼerã jajapo ñaneimperfékto rupi?

⁵ Ikatu ningo jajevautisa mboyve jajapo raʼe heta mbaʼe Jehovápe ndogustáiva. Péro ikatu hag̃uáicha jaike Jehová organisasiónpe, tekotevẽ kuri jahejaite umi mbaʼe vai (1 Cor. 6:9, 10). Upéicharõ jepe, jasegi ñaneimperfékto (Col. 3:9, 10). Upévare jasegíta jajavy mimi, ojapóramo jepe heta tiémpoma jajevautisa hague. Ikatu voi sapyʼapyʼa ou ñane akãme umi deséo térã pensamiénto naiporãiva, térã ijetuʼu ñandéve ñavense hag̃ua peteĩ devilida. Añetehápe ningo ndaikatumoʼãi voi sapyʼaitépe ñavensepaite umi devilida jarekóva.

6, 7. a) ¿Mbaʼéicha rupípa ikatu oiko ñandehegui Jehová amígo ñaneimperféktoramo jepe? b) ¿Mbaʼérepa nañapensái vaʼerã Jehová nañaneperdonamoʼãiha?

⁶ Ñaneimperféktoramo jepe, ñande ikatu jaservi Jehovápe ha jasegi jaiko iñamígoramo. Aníkena ñanderesarái haʼe raẽ ohecha hague ñanderehe umi mbaʼe porã, ha oipota hague ñañemoag̃ui hese (Juan 6:44). Jehová oikuaáma kuri jajavy mimitanteha voi ha jarekoha algúna devilida. Upéicharõ jepe, haʼe ñandepota kuri iñamigorã.

⁷ Jehová ñanderayhu rupi omeʼẽ ñandéve peteĩ rregálo iporãitereíva: ombou Itaʼýra ko yvy ape ári ikatu hag̃uáicha omano ñanderehehápe (Juan 3:16). Jajavy jave, ñañarrepenti vaʼerã ha jajerure Jehovápe ñaneperdona hag̃ua. Jajerovia rupi Jesús sakrifísiore, ikatu ñaĩ segúro Jehová ñaneperdonataha ha ikatuha jasegi jaiko iñamígoramo (Rom. 7:24, 25; 1 Juan 2:1, 2). Ani ñanderesarái Jesús omano hague ikatu hag̃uáicha oñeperdona umi oñarrepentívape. Upévare, oiméramo japeka, ani ñapensa nañamereseiha Jehová ñaneperdona. Ñapensáramo upéicha haʼetéta ku ñandepokyʼáva, péro ndajajepoheiséi pono jaipuru y. ¡Ajépa jaagradesete Jehovápe ikatu haguére jaiko iñamígoramo ñaneimperféktoramo jepe! (Elee 1 Timoteo 1:15.)

 8. ¿Mbaʼérepa ñarrekonose vaʼerã ñande devilida?

⁸ Añetehápe ningo ñarrekonose vaʼerã ñande devilida, ha ndovaléi ñamoĩ exkúsa jajavy jave. Jehová heʼi porã ñandéve mbaʼeichagua persónapa haʼe oipota iñamigorã (Sal. 15:1-5). Upévare, ñañemoag̃uiséramo hese, ñañehaʼãmbaite vaʼerã jasegi iñehémplo ha Jesús ehémplo. Avei jajapo vaʼerã ikatúva guive jagueropuʼaka hag̃ua umi deséo vai, ha ikatúma guive, jaipeʼaite vaʼerã umíva ñandejehegui. Oiméramo aréma jajevautisa térã ramónte, jasegi vaʼerã ‘jakorrehi ñapensa lája’ ikatu hag̃uáicha ñamehora kómo kristiáno (2 Cor. 13:11).

 9. ¿Mbaʼérepa ikatu jaʼe siémpre tekotevẽtaha ñakambia?

⁹ Apóstol Pablo heʼi vaʼekue: “Pehejaite vaʼerã pende reko tuja ha umi mbaʼe pejapo vaʼekue yma. Umi mbaʼe pejaposéva ha pendegueraháva tape vaíre ombyaíma pende reko tuja. Akóinte pembopyahu vaʼerã pepensa lája, ha pemonde vaʼerã pe teko pyahu ojejapo vaʼekue Ñandejára oipotaháicha ha oñemopyendáva tekojoja ha jerovia teetépe” (Efes. 4:22-24). Pe fráse “akóinte pembopyahu vaʼerã”, heʼise siémpre tekotevẽtaha ñañehaʼã ikatu hag̃uáicha ñakambia ha ‘ñamonde pe teko pyahu’. Upévare, oiméramo jepe are guivéma jaservi Jehovápe, lomímonte jasegíta ñaaprende chugui heta mbaʼe iporãitereíva. La Biblia ikatu ñanepytyvõ ñakambia hag̃ua, ha amás día jasegi porãve hag̃ua iñehémplo.

10. a) ¿Mbaʼépa jajapo vaʼerã ikatu hag̃uáicha la Biblia ñanepytyvõ ñakambia hag̃ua? b) ¿Mbaʼépa ikatu ñañeporandu?

¹⁰ Jaipotáramo la Biblia ñanepytyvõ ñakambia hag̃ua, tekotevẽ ñañehaʼãmbaite. Péro, ¿mbaʼérepa ñañehaʼã vaʼerã? Oiméramo Jehová ñanevendesi ñañehaʼã haguére, ¿mbaʼérepa ijetuʼuete japrogresa espirituálmente? ¿Naiporãvemoʼãi piko Jehová oipeʼáramo ñandehegui umi ñande devilida?

11-13. ¿Mbaʼérepa Jehová oipota ñañehaʼãmbaite ñavense ñande devilida?

¹¹ Ñapensa jave ko univérso tuichaitévare ha umi mbaʼe oĩvare pype, ñañemeʼẽ enkuénta Jehová ipoderosoitereiha. Por ehémplo, haʼe ojapo vaʼekue pe kuarahy. Pe kuarahy káda segúndo oprodusi hetaiterei enerhía. Ha sólamente peteĩ parteʼi pe enerhíagui og̃uahẽ ñande planétape ha upéicha rupi oĩ vída ko yvy ape ári (Sal. 74:16; Is. 40:26). Jehová avei omombarete isiervokuérape oikotevẽ jave (Is. 40:29). Péicha jahecha Jehová ipoderosoitereiha, ha ikatu ombovevyipaite umi mbaʼe ijetuʼuetéva ñandéve, térã oipeʼa ñandehegui umi deséo vai. Péro, ¿mbaʼérepa haʼe ndojapói upéva?

¹² Jehová omeʼẽ ñandéve liverta jadesidi hag̃ua ñandejehegui. Haʼe oipota ñandete jadesidi ñaneñeʼẽrendútapa chupe térãpa nahániri. Jadesidi jave ñaneñeʼẽrendu chupe ha ñañehaʼãmbaitérõ jajapo hembipota, jahechauka jahayhuha chupe ha jaipotaha haʼe ñandeguerohory. Satanás heʼi vaʼekue Jehová ndorekoiha derécho ñanegoverna hag̃ua. Péro ñande ñañemoĩrõ Jehová poguýpe, jahechauka hína jaipotaha haʼe ñanegoverna. Ha ikatu ñaĩ segúro ñande Ru ñanderayhuetéva omombaʼetereiha ñañehaʼã haguére jajapo opa mbaʼe haʼe heʼíva (Job 2:3-5; Prov. 27:11). Ñañehaʼãmbaite jave ñavense ñande devilida, ijetuʼúramo jepe, jahechauka jaapojaha Jehovápe ha ñañemoĩha ipoguýpe.

¹³ Jehová oipota ‘ñañehaʼãmbaite’ jasegi iñehémplo ikatu hag̃uáicha ñamehora kómo kristiáno (elee 2 Pedro 1:5-7; Col. 3:12). Haʼe oipota avei ñañatende umi mbaʼe ñapensávare ha ñakontrola umi mbaʼe ñañandúva (Rom. 8:5; 12:9). Jajapo jave upéicha, jahechakuaa la Biblia ñanepytyvõha ñakambia hag̃ua, ha upéva ñanembovyʼaiterei.

14, 15. ¿Mbaʼépa ikatu jajapo jahechauka hag̃ua umi kualida Jehová oguerohorýva? (Ehecha pe rrekuádro “La Biblia ha pe orasión okambia chupekuéra”.)

¹⁴ ¿Mbaʼépa jajapo vaʼerã ikatu hag̃uáicha ñamehora hag̃ua kómo kristiáno ha ñambovyʼa Jehovápe? Jaiko rangue jadesidi ñandejeheguínte mbaʼépepa ñakambiáta, tekotevẽ jasegi Jehová gía. Romanos 12:2 heʼi: “Anive pehaʼanga umi hénte oĩva ko múndope, pekambia guei pepensa lája, ikatu hag̃uáicha peikuaa porã Ñandejára rembipota iporãva, hekopeguáva ha haʼe oguerohorýva”. Jaikuaa hag̃ua mbaʼépa Jehová oipota jadesidi, tekotevẽ jaasepta pe ajúda omeʼẽva ñandéve. Upearã jalee vaʼerã la Biblia káda día, jajepyʼamongeta hese ha jajerure Jehovápe ijespíritu sánto (Luc. 11:13; Gál. 5:22, 23). Jajapóramo koʼã mbaʼe, ifasilvétama ñandéve ñavense hag̃ua ñande devilida. Avei Jehová oguerohorýta umi mbaʼe ñapensáva, jaʼéva ha jajapóva. Upéicharõ jepe, tekotevẽta káda día jajekuida ani hag̃ua ñandereity ñande devilida (Prov. 4:23).

¹⁵ Iñimportánte ningo jalee la Biblia káda día, péro iñimportánte avei jastudia umi puvlikasión. Péicha ikatúta jahechauka umi kualida porãite Jehová orekóva umi mbaʼe jajapóvape. Oĩ ermáno oanotáva umi téxto bíblico ogustáva chupekuéra ha upe rire orrepasa jey. Térã oñongatu umi artíkulo osẽ vaʼekue ¡Despertad! ha Ñemañaháme oipytyvõta rupi chupekuéra ovense hag̃ua peteĩ devilida térã omehora hag̃ua ambue mbaʼépe.

16. ¿Mbaʼérepa nañañedesanimái vaʼerã mbegueterei ñamehoráramo jahávo?

¹⁶ Ñapensáramo mbegueterei ñamehoraha jahávo, ani ñanderesarái ndaikatumoʼãiha voi ñakambia sapyʼaitépe. Upearã ningo tekotevẽ ñanepasiénsia ha jasegi ñañehaʼã ikatu hag̃uáicha la Biblia ñanepytyvõ ñakambia hag̃ua. Ñepyrũrã ikatu hína jajeovliga jajapo hag̃ua pe iporãva. Péro kon el tiémpo ikatútama ñapensa ha ñañekomporta Jehovápe ogustaháicha, pórke jajoguavétama jahávo chupe (Sal. 37:31; Prov. 23:12; Gál. 5:16, 17).

17. ¿Mbaʼépa ikatu jahupyty jasegíramo ñaneñeʼẽrendu Jehovápe?

¹⁷ Og̃uahẽta hína pe tiémpo enterove jaservíva Jehovápe ñandeperfektotaha, ha ñamombaʼeguasúta chupe pára siémpre. Upérõ natekotevẽmoʼãvéima ñañehaʼã ñavense hag̃ua peteĩ devilida. Ifásiltama ñandéve jahechauka hag̃ua umi kualida porãite Jehová orekóva. Añetehápe ningo igustoitereíta jasegi Jehová ehémplo. Péro koʼág̃a ikatúnte avei jaadora Jehovápe, jajerovia rupi Jesús sakrifísiore. Jasegíramo umi konsého oĩva Ñandejára Ñeʼẽme ha ñañehaʼãmbaite ñamehora, ñambovyʼáta Jehovápe ñaneimperféktoramo jepe.

18, 19. ¿Mbaʼérepa jaʼekuaa la Biblia ikatuha ñanepytyvõ jasegi hag̃ua ñakambia ha ñamehorave?

¹⁸ Oñepyrũre ko artíkulo ñañeʼẽ kuri peteĩ ermáno héravare Kevin. Haʼe ningo ojapo ikatúva guive anivéma hag̃ua ipochyparei. Ojepyʼamongeta vaʼekue unos kuánto téxto bíblicore ha oñehaʼãmbaite okambia. Avei omoĩ en práktika umi konsého omeʼẽva chupe umi ermáno. Tiémpo rire, oñenombra chupe siérvo ministeriál. Ha koʼág̃a ojapóma 20 áño oservi hague kómo ansiáno. Upéicharõ jepe Kevin osegi oñehaʼã, pórke oikuaa porã oúramo ojedeskuida ikatuha ipuʼaka jey hese idevilida.

¹⁹ Kevin ehémplo ohechauka porã entéro kristiáno ikatuha okambia ha omehorave. Upévare ani ñañentrega. Jasegi vaʼerã jaipuru Ñandejára Ñeʼẽ ikatu hag̃uáicha ñakambia ha ñañemoag̃uive jahávo Jehováre (Sal. 25:14). Upéicha haʼe katuete ñanevendesíta, ha ñakomprováta la Biblia ñanepytyvõha jasegi hag̃ua ñakambia (Sal. 34:8).