Luku

9 To whenẹnu, e ylọ omẹ wiawe lẹ pli dopọ bo na yé huhlọn po aṣẹ po do aovi lẹpo ji podọ nado hẹn azọ̀n lẹ gbọ. 2 Enẹwutu, e do yé hlan nado dọyẹwheho ahọluduta Jiwheyẹwhe tọn podọ nado hẹnazọ̀ngbọ, 3 e sọ dọna yé dọmọ: “Mì hẹn nudepope na gbejizọnlin lọ blo, yèdọ opò kavi aglò núdùdù tọn, kavi núdùdù kavi fataka-kuẹ blo; mọdopolọ mì hẹn awù odò tọn awe blo. 4 Ṣigba, fidepope he mì biọ owhé de gbè te, mì nọ finẹ kaka mì nado tọ́n sọn finẹ. 5 Podọ fidepope he gbẹtọ lẹ ma yí mì te, to whenue mì to tintọ́n sọn tòdaho enẹ mẹ, mì húnhún kọ́gudu sẹ̀ sọn afọ mìtọn lẹ go, na okunnu de sọta yé.” 6 Enẹgodo, to whenue yé jẹ yìyì ji, yé gbọn aigba lọ pete ji sọn gbétatò de mẹ jẹ gbétatò de mẹ, bo to wẹndagbe lọ lá bosọ to azọ̀nhẹngbọ to filẹpo.

7 Todin, Hẹlọdi,* yèdọ ogán agbegbe tọn* lọ, sè onú he to jijọ lọ lẹpo, ewọ sọ jẹflumẹ tlala na mẹdelẹ to didọ dọ Johanu ko yin finfọn sọn oṣiọ lẹ mẹ wutu, 8 ṣigba mẹdevo lẹ dọ dọ Elija ko sọawuhia, ṣogan mẹdevo lẹ dọ dọ dopo to yẹwhegán hohowhenu tọn lẹ mẹ ko fọ́n. 9 Hẹlọdi dọmọ: “Yẹn ko gbòtana Johanu. To whelọnu lo, mẹnu wẹ yin mẹlọ he go yẹn to onú ehelẹ sè gando?” Enẹwutu, ewọ to dindin nado mọ ẹn.

10 Podọ to whenue apọsteli lẹ lẹkọ, yé na ẹn linlin nuhe yé ko wà lẹ tọn. Enẹwutu, e plan yé bo yì tòdaho he to olá de mẹ, he nọ yin Bẹtsaida. 11 Ṣigba, to whenue gbẹtọgun lọ lẹ yọnẹn, yé hodo e. Podọ e yí homẹdagbe do yí yé bo jẹ hodọna yé ji gando ahọluduta Jiwheyẹwhe tọn go, e sọ hẹnazọ̀ngbọna mẹhe tindo nuhudo azọ̀nhẹngbọ tọn lẹ. 12 Todin, azán lọ jei vivọnu. Omẹ wiawe lẹ wá bo dọna ẹn dọmọ: “Do gbẹtọgun lọ hlan, na yé nido sọgan yì gbétatò lẹ po glètoho he lẹdo pé lẹ po mẹ bo dín fihe yé na nọ po nuhe yé na dù po, na fihe to olá de wẹ mí te.” 13 Ṣigba, e dọna yé dọmọ: “Mì na nude yé nado dù.” Yé sọ dọmọ: “Mí ma tindo nude hú akla atọ́n po whèvi awe po, adavo mílọsu lẹ ni yì bo họ̀ núdùdù na omẹ ehe lẹpo.” 14 Na nugbo tọn, yé diblayi sunnu degbade-fọtọ́n. Ṣigba, e dọna devi etọn lẹ dọmọ: “Mì dike yé ni jagla taidi to núdùdù kọ̀n, yèdọ nudi omẹ kandeao-kandeao to gọnu-gọnu.” 15 Yé sọ wàmọ bo dike yemẹpo jagla. 16 Enẹgodo, to whenue e yí akla atọ́n po whèvi awe lọ lẹ po, e pọ́n olọn, bo dona yé bosọ wẹ́n yé bo jẹ yíyí na devi etọn lẹ ji nado na gbẹtọgun lọ. 17 Enẹwutu, yemẹpo dù bo gọ́ho, podọ yé bẹ dupò he pò lẹ pli, e sọ gọ́ ohà wiawe.

18 To godo mẹ, to whenue e to dẹ̀ho edeṣo, devi lẹ pli do e dè, e sọ kanse yé dọmọ: “Mẹnu wẹ gbẹtọgun lọ lẹ to didọ dọ yẹn yin?” 19 Yé gblọn dọmọ: “Johanu Baptizitọ; ṣigba mẹdevo lẹ dọ, Elija, podọ mẹdevo lẹ sọ dọ, dopo to yẹwhegán hohowhenu tọn lẹ mẹ ko fọ́n.” 20 To whenẹnu, e dọna yé dọmọ: “Ṣigba, mìwlẹ, mẹnu wẹ mì nọ dọ dọ yẹn yin?” Pita gblọn dọmọ: “Klisti Jiwheyẹwhe tọn.” 21 To whenẹnu, e gbẹ́ na yé sinsinyẹn ma nado nọ dọ ehe na mẹdepope, 22 ṣigba e dọmọ: “Visunnu gbẹtọ tọn dona jiya onú susu tọn bọ sunnu mẹho lẹ po yẹwhenọgán lẹ po gọna wekantọ lẹ na gbẹ́ ẹ dai, bo hù i, bọ e na yin finfọn to azán atọ̀ntọ gbè.”

23 Enẹgodo, e zindonukọn nado dọna yemẹpo dọmọ: “Eyin mẹdepope jlo nado hodo mi, mì gbọ e ni mọ́n ede bo ze yatin etọn egbesọegbesọ bosọ to hihodo mi zọnmii. 24 Na mẹdepope he jlo na whlẹn alindọn etọn na hẹn ẹn bu; ṣigba mẹdepope he hẹn alindọn etọn bu na yẹn tọn wutu, omẹ enẹ wẹ na whlẹn ẹn. 25 Na taun tọn, ale tẹwẹ tin to e mẹ na gbẹtọ eyin e duale aihọn lọ pete tọn ṣigba bo hẹn ogbẹ̀ etọn bu kavi yin awugblena? 26 Na mẹdepope he kuwinyan ṣie podọ na ohó ṣie lẹ, Visunnu gbẹtọ tọn nasọ kuwinyan ewọ tọn ga to whenue e na wá to gigo etọn, podọ Otọ́ tọn, po angẹli wiwe lẹ tọn po mẹ. 27 Ṣigba, nugbo wẹ yẹn dọna mì, Delẹ to mẹhe to ote tofi lẹ mẹ ma na dọ́ okú pọ́n to aliho depope mẹ kaka yé nado mọ ahọluduta Jiwheyẹwhe tọn whẹ́.”

28 Na nugbo tọn, nudi azán ṣinatọ̀n to ohó ehelẹ godo, e plan Pita, Johanu po Jakọbu po bo hẹji yì osó ji nado hodẹ̀. 29 Podọ dile e to dẹ̀ho, awusọhia nukunmẹ etọn tọn diọ bọ avọ̀ etọn lẹzun wewe tété. 30 Humọ, pọ́n! dawe awe, yèdọ Mose po Elija po to hodọ hẹ ẹ. 31 Omẹ ehelẹ sọawuhia po gigo po bo jẹ hodọ ji gando yìyì etọn he e dona hẹndi to Jelusalẹm go. 32 Todin, amlọn to tuklado Pita po mẹhe to finẹ hẹ ẹ lẹ po; ṣigba to whenue amlọn ko họ́n na yé pete, yé mọ gigo etọn po dawe awe he to ote hẹ ẹ lẹ po. 33 Podọ dile omẹ ehelẹ to tintọ́n sọn e dè, Pita dọna Jesu dọmọ: “Nuplọnmẹtọ, e yọ́n taun dọ mí ni nọfi, enẹwutu gbọ mí ni gbá gòhọ atọ̀n, dopo na hiẹ, dopo na Mose podọ dopo na Elija,” na ewọ ma yọ́n nuhe dọ e te. 34 Ṣigba, dile e to onú ehelẹ dọ, aslọ de sọawuhia bo jẹ ṣinṣinyọn yé ji. To whenue aslọ lọ ko ṣinyọ́n yé, yé dibu. 35 Ogbè de sọ dọho sọn aslọ lọ mẹ dọmọ: “Ehe wẹ Visunnu ṣie, mẹhe ko yin dide lọ. Mì nọ dotoaina ẹn.” 36 Podọ to whenue ogbè lọ yin sisè, Jesu kẹdẹ wẹ yé mọ. Ṣigba, yé nabọẹ bo ma dọ nuhe yé mọ lẹ depope na mẹde to azán enẹlẹ mẹ.

37 To aihọngbè, to whenue yé jẹte sọn osó lọ ji, gbẹtọgun daho de wá pé e. 38 Podọ, pọ́n! dawe de sọn gbẹtọgun lọ mẹ dawhá dọmọ: “Mẹplọntọ, yẹn vẹ̀ we nado yìnnukun pọ́n visunnu ṣie, na ewọ wẹ ovi dopo akàn ṣie wutu, 39 podọ, pọ́n! gbigbọ de nọ ze e, bọ ewọ nọ dawhá to ajiji mẹ, podọ e nọ húnhún in gìgìgì bọ e nọ to fútúfútú tún, podọ e ma nọ jlo nado jo e do to aliho depope mẹ to whenue e ko gbleawuna ẹn godo. 40 Podọ yẹn vẹ̀ devi towe lẹ nado yàn ẹn jẹgbonu, ṣigba yé ma sọgan.” 41 Jesu gblọn dọmọ: “Whẹndo mayisenọ podọ bublunọ E, nawẹ yẹn na nọ mì dè bo na sinyẹnlin hẹ mì dẹnsọ? Plan visunnu towe wáfi.” 42 Ṣigba, dile ewọ tlẹ ko to dindọnsẹpọ, aovi lọ dlan ẹn do kọmẹ bo húnhún in gìgìgì. Ṣigba, Jesu gbẹnuna gbigbọ mawé lọ bo hẹnazọ̀ngbọna visunnu lọ bosọ jo e na otọ́ etọn. 43 Nalete, huhlọn gigonọ Jiwheyẹwhe tọn hẹn awuji yemẹpo.

Todin, dile awú to jiji yemẹpo gando nuhe ewọ to wiwà lẹ go, e dọna devi etọn lẹ dọmọ: 44 “Mì hẹn ohó ehelẹ do ayiha mẹ pẹkipẹki, na Visunnu gbẹtọ tọn dona yin didehia do alọ gbẹtọ lẹ tọn mẹ.” 45 Ṣigba, yé ma mọnukunnujẹ hodidọ ehe mẹ janwẹ. Na nugbo tọn, e yin whiwhla do yé na yé ni ma do sọgan mọnukunnujẹemẹ, yé sọ dibu nado kannubiọ ẹ gando hodidọ ehe go.

46 Enẹgodo, linlẹn de fọ́n to ṣẹnṣẹn yetọn gando mẹhe na klohugan to yé mẹ go. 47 Na Jesu yọ́n nuhe lẹn yé te to ahun yetọn mẹ wutu, e ylọ yọpọvu de do ede dè 48 bo dọna yé dọmọ: “Mẹdepope he yí yọpọvu ehe to oyín ṣie mẹ, yí yẹnlọsu ga, podọ mẹdepope he yí mi, yí mẹhe do mi hlan ga. Na ewọ he ze ede whè to mìmẹpo ṣẹnṣẹn wẹ omẹ lọ he klo.”

49 Johanu gblọn dọmọ: “Nuplọnmẹtọ, mí mọ dawe de bọ e to aovi lẹ yàn jẹgbonu to oyín towe mẹ podọ mí tẹnpọn nado glọnalina ẹn, na ewọ ma to hihodo mí wutu.” 50 Ṣigba, Jesu dọna ẹn dọmọ: “Mì tẹnpọn nado glọnalina ẹn blo, na ewọ he ma jẹagọdo mì tin po mì po.”

51 Todin, dile azán he gbè e na yin zize yì olọn mẹ lẹ to pipé, e ze ayiha etọn lẹpo do Jelusalẹm yìyì ji. 52 Enẹwutu, e do wẹnsagun lẹ hlan nado jẹnukọnna ẹn yì. Podọ yé yì bo biọ gbétatò Samalianu lẹ tọn de mẹ, nado wleawudaina ẹn; 53 ṣigba, yé ma yí i, na e ze ayiha etọn do Jelusalẹm yìyì ji wutu. 54 To whenue devi Jakọbu po Johanu po mọ ehe, yé dọmọ: “Oklunọ, be hiẹ jlo dọ mí ni dọna miyọ́n nado flẹ sọn olọn bo hù yé sudo ya?” 55 Ṣigba, e lilẹ́ bo gbẹnuna yé. 56 Enẹwutu, yé yì gbétatò devo mẹ.

57 Todin, dile yé to yìyì to aliho ji, mẹde dọna ẹn dọmọ: “Yẹn na hodo we yì fidepope he hiẹ na yì.” 58 Jesu sọ dọna ẹn dọmọ: “Owọ̀ lẹ tindo odò lẹ podọ ohẹ̀ agahomẹ tọn lẹ tindo adọtẹn lẹ, ṣigba Visunnu gbẹtọ tọn ma tindo fidepope he e na ze ota etọn bọdai do.” 59 Enẹgodo, e dọna mẹdevo dọmọ: “Lẹzun hodotọ ṣie.” Dawe lọ dọmọ: “Nagbè mi nado yì bo dì otọ́ ṣie whẹ́.” 60 Ṣigba, e dọna ẹn dọmọ: “Gbọ oṣiọ lẹ ni dì oṣiọ yetọn lẹ, ṣigba hiẹ ni yì bo lá ahọluduta Jiwheyẹwhe tọn pé.” 61 Podọ mẹdevo sọ dọmọ: “Oklunọ, yẹn na hodo we; ṣigba nagbè mi nado dọ e yì whedenu na mẹhe tin to whédo ṣie mẹ lẹ whẹ́.” 62 Jesu dọna ẹn dọmọ: “Omẹ depope he doalọ glepọnu go bo pọ́n onú he to godo lẹ ma jẹna ahọluduta Jiwheyẹwhe tọn.”