Luku

10 To onú ehelẹ godo, Oklunọ de omẹ kandegbàn devo lẹ bo do yé hlan awe awe jẹnukọnna ẹn yì tòdaho podọ fihe ewọ lọsu na wá yì lẹpo mẹ. 2 To whenẹnu, e jẹ didọna yé ji dọmọ: “Na nugbo tọn, ojijẹ lọ sù, ṣigba azọ́nwatọ lẹ ma sù. Enẹwutu, mì vẹ̀ Ogán jibẹwawhé lọ tọn nado do azọ́nwatọ lẹ hlan ojijẹ etọn mẹ. 3 Mì yì. Mì pọ́n! yẹn to dido mì hlan taidi lẹngbọvu lẹ to ohla lẹ ṣẹnṣẹn. 4 Mì hẹn sẹgẹ, kavi aglò núdùdù tọn, kavi afọpa lẹ blo, podọ mì gbò mẹdepope fán to nudọdomẹ whenu to aliho ji blo. 5 Fidepope he mì biọ owhé de gbè te, mì dọ jẹnukọn dọ, ‘Jijọho ni tin na owhé ehe.’ 6 Podọ eyin họntọn jijọho tọn de tin to finẹ, jijọho mìtọn na tin to e ji. Ṣigba eyin e ma tin, e na lẹkọ do mì dè. 7 Enẹwutu, mì nọ owhé enẹ gbè, bo nọ dù bosọ nọ nù nuhe yé wleawu etọn na mì lẹ, na azọ́nwatọ jẹna azọ́nkuẹ etọn. Mì ma nọ to tẹnsẹ sọn owhé de gbè jẹ owhé de gbè blo.

8 “Humọ, fidepope he mì biọ tòdaho de mẹ te bọ yé yí mì, mì dù nuhe yin zizedonukọnna mì lẹ, 9 bo hẹnazọ̀ngbọna mẹhe to azọ̀njẹ to e mẹ lẹ, bosọ to didọna yé dọmọ, ‘Ahọluduta Jiwheyẹwhe tọn ko dọnsẹpọ mì.’ 10 Ṣigba, fidepope he mì biọ tòdaho de mẹ te bọ yé ma yí mì, mì tọ́nyi alihogbó etọn lẹ ji bo dọ, 11 ‘Yèdọ kọ́gudu he tlẹ tẹdo afọ mítọn lẹ go sọn tòdaho mìtọn mẹ, mí súnsún in sẹ̀ na okunnu de sọta mì. Etomọṣo, mì hẹn ehe do ayiha mẹ dọ, ahọluduta Jiwheyẹwhe tọn ko dọnsẹpọ.’ 12 Yẹn dọna mì dọ, e na pọnte na Sodọmi to azán enẹ gbè hú na tòdaho enẹ.

13 “Dindọn hlan we, Kolazin! Dindọn hlan we, Bẹtsaida! na eyin azọ́n huhlọnnọ he yin bibasi to mì mẹ lẹ ko yin bibasi to Tile po Sidoni po mẹ wẹ, yé na ko lẹnvọjọ hoho gbọn aisinsin to odẹ́vọ̀ po afín po mẹ dali. 14 Enẹwutu, e na pọnte na Tile po Sidoni po to whẹdida whenu hú na mìwlẹ. 15 Podọ hiẹ, Kapẹlnaumi, be vlavo hiẹ na yin zizedaga kakajẹ olọn wẹ? Hiẹ na yìdo kaka yì Hadẹs* mẹ!

16 “Ewọ he dotoaina mì dotoaina yẹnlọsu ga. Podọ ewọ he gbẹ́ mì dai gbẹ́ yẹnlọsu dai ga. Humọ, ewọ he gbẹ́ mi dai gbẹ́ ewọ he do mi hlan dai ga.”

17 To whenẹnu, omẹ kandegbàn lọ lẹ lẹkọwa po ayajẹ po, bo to didọmọ: “Oklunọ, aovi lẹ tlẹ litaina mí to whenue mí yí oyín towe zan.” 18 Enẹwutu, e dọna yé dọmọ: “Yẹn jẹ mimọ ji bọ Satani flẹ taidi abì sọn olọn. 19 Mì pọ́n! yẹn ko na mì aṣẹ nado tùnafọ odàn lẹ po aklekle lẹ po ji, podọ nado duto huhlọn kẹntọ tọn lẹpo ji, podọ nudepope ma na gbleawuna mì to aliho depope mẹ. 20 Etomọṣo, mì jaya na ehe tọn wutu blo, dọ gbigbọ lẹ litaina mì, ṣigba mì jaya na oyín mìtọn ko yin kinkàndai to olọn mẹ wutu.” 21 To ojlẹ enẹ dopolọ mẹ, e gọ́ na ayajẹ susu gbọn gbigbọ wiwe gblamẹ bo dọmọ: “Yẹn pà we to gbangba, hiẹ Otọ́, Oklunọ olọn po aigba po tọn, na hiẹ ko yí sọwhiwhe do whlá onú ehelẹ do nuyọnẹntọ lẹ po weyọnẹntọ lẹ po bo ko de yé hia ovivu lẹ. Mọwẹ, Otọ́ E, na hiẹ mọdọ e yọ́n nado yinuwa to aliho ehe mẹ. 22 Otọ́ ṣie ko ze onú lẹpo do alọmẹ na mi, podọ mẹde ma yọ́n mẹhe Visunnu yin adavo Otọ́; podọ mẹde ma yọ́n mẹhe Otọ́ yin adavo Visunnu, po mẹhe Visunnu lọ jlo nado de e hia hlan lẹ po.”

23 Enẹwutu, e lẹhlan devi etọn lẹ kẹdẹ bo dọmọ: “Ayajẹnọ wẹ nukun he mọ nuhe mì to mimọ ehelẹ. 24 Na yẹn dọna mì dọ, Yẹwhegán po ahọlu susu po wẹ ko jlo nado mọ nuhe mìwlẹ to mimọ ṣigba bo ma mọ, podọ nado sè nuhe mìwlẹ to sisè ṣigba bo ma sè.”

25 Todin, mì pọ́n! dawe de he yọ́n Osẹ́n lọ ganji fọ́n, nado whlé e pọ́n, bo dọmọ: “Mẹplọntọ, gbọn etẹ wiwà dali wẹ yẹn na dugu ogbẹ̀ madopodo tọn?” 26 E dọna ẹn dọmọ: “Etẹwẹ yin kinkàndai to Osẹ́n lọ mẹ? Etẹwẹ hiẹ hia?” 27 E gblọn dọmọ: “‘Hiẹ dona yí ahun towe lẹpo, alindọn towe lẹpo, huhlọn towe lẹpo, podọ ayiha towe lẹpo do yiwanna Jehovah Jiwheyẹwhe towe,’ podọ, ‘na kọmẹnu towe di dewe.’” 28 E dọna ẹn dọmọ: “Hiẹ gblọn ganji; ‘nọ to ehe wà, hiẹ nasọ mọ ogbẹ̀.’”

29 Ṣigba, na dawe lọ jlo nado do ede hia di dodonọ, e dọna Jesu dọmọ: “Mẹnu wẹ kọmẹnu ṣie taun?” 30 Jesu gblọn dọmọ: “Dawe de jẹte sọn Jelusalẹm jei Jẹliko bo jẹ alọ jaguda lẹ tọn mẹ, bọ yé yí onú lẹpo sọn e si bo linú in, bosọ yì, bo jo e do kúdaa-gbẹ̀daa. 31 Todin, gbọn kosọ dali, yẹwhenọ de to tejẹ gbọn aliho enẹ ji, ṣigba, to whenue e mọ ẹn, e gbọn awà awetọ ji yì. 32 Mọdopolọ, Levinu de ga, to whenue e jẹte wá finẹ bo mọ ẹn, e gbọn awà awetọ ji yì. 33 Ṣigba, Samalianu de he to gbejizọnlinzin gbọn aliho lọ dọnsẹpọ ẹ podọ, to whenue e mọ ẹn, lẹblanu whàn ẹn. 34 Enẹwutu, e dọnsẹpọ ẹ bo blá apà etọn lẹ, bosọ kọ̀n amì po ovẹn po do yé mẹ. Enẹgodo, e ze e do kanlin edetiti tọn ji bo hẹn ẹn wá hotẹli pẹvi de bosọ penukundo e go. 35 Podọ to aihọngbè, e de denali* awe tọ́n bo ze e na nukunpedonugotọ hotẹli pẹvi lọ tọn, bo dọmọ, ‘Penukundo ewọ go, nudepope he hiẹ sọ zan gbọnvona ehe, yẹn na suahọ etọn we to whenue yẹn na lẹkọ wáfi.’ 36 Mẹnu to omẹ atọ̀n ehelẹ mẹ wẹ hiẹ mọdọ e do ede hia di kọmẹnu na dawe lọ he jẹ alọ jaguda lẹ tọn mẹ?” 37 Ewọ dọmọ: “Mẹhe do lẹblanu hia hlan ẹn.” To whenẹnu, Jesu dọna ẹn dọmọ: “Yì bo nọ wà onú dopolọ.”

38 Todin, dile yé to yìyì, e biọ gbétatò de mẹ. Tofi, nawe de he nọ yin Malta yí i taidi jonọ do whégbè. 39 Nawe ehe sọ tindo nọviyọnnu de he nọ yin Malia, ṣigba, ewọ sinai to afọ Oklunọ tọn lẹ kọ̀n bo to todoaina ohó etọn. 40 To alọ devo mẹ, nukunpipedo azọ́n susu go fẹayihasẹna Malta. Enẹwutu, e dọnsẹpọ bo dọmọ: “Oklunọ, be hiẹ ma hòpọn dọ nọviyọnnu ṣie jo yẹn dopo do nado to nukunpedo onú lẹ go ya? Enẹwutu, dọna ẹn nado gọalọna mi.” 41 Oklunọ gblọnna ẹn dọmọ: “Malta, Malta, hiẹ yin magbọjẹnọ bo to tuklajẹ na onú susu. 42 Nalete, onú vude wẹ nuhudo tin na, kavi onú dopo poun. Na Malia tọn, ewọ ko de adà he yọ́n hugan, podọ e ma na yin yíyí sọn e si.”