Johanu

4 Todin, to whenue Oklunọ yọnẹn dọ Falesi lẹ ko sè dọ Jesu to gbẹtọ susu hẹn zun devi hú Johanu bosọ to yé baptizi— 2 dile etlẹ yindọ, na nugbo tọn, e ma yin Jesu lọsu wẹ baptizi gbẹtọ lẹ ṣigba devi etọn lẹ wẹ wàmọ— 3 e tọ́n sọn Jude bo dedo Galili whladopo dogọ. 4 Ṣigba, e lẹzun dandan na ẹn nado gbọn Samalia. 5 Enẹwutu, e wá tòdaho Samalia tọn de mẹ he nọ yin Sikali he sẹpọ aigba he Jakọbu na visunnu etọn Josẹfu. 6 Na nugbo tọn, dotọ̀ Jakọbu tọn tin to finẹ. Todin, Jesu he agbọ́ ko pé na gbejizọnlin lọ wutu sinai do mọmọ poun to dotọ̀ lọ kọ̀n. Nudi gànhiho ṣidopotọ* mẹ wẹ.

7 Yọnnu Samalianu de wá nado dọ̀n osin. Jesu dọna ẹn dọmọ: “Na mi osin vude nado nù.” 8 (Na devi etọn lẹ ko tọ́nyi tòdaho lọ mẹ nado họ̀ núdùdù.) 9 Enẹwutu, yọnnu Samalianu lọ dọna ẹn dọmọ: “Naegbọn hiẹ, mahopọnna dọ a yin Ju de, biọ mi osin nado nù, to whenuena e yindọ yọnnu Samalianu de wẹ yẹn?” (Na Ju lẹ ma nọ tindo kanṣiṣa depope hẹ Samalianu lẹ.) 10 Jesu sọ gblọnna ẹn dọmọ: “Eyin hiẹ ko yọ́n nunina vọnu Jiwheyẹwhe tọn po mẹhe dọna we dọ, ‘Na mi osin vude nado nù’ po wẹ, hiẹ na ko biọ ẹ, bọ ewọ na ko na we osin ogbẹ̀ tọn.” 11 Yọnnu lọ dọna ẹn dọmọ: “Mẹdaho, hiẹ ma tlẹ tindo sindànu nado dọ̀n osin, dotọ̀ lọ sọ siso. Enẹwutu, fie wẹ hiẹ hẹn osin ogbẹ̀ tọn ehe sọn? 12 Hiẹ ma saa klohu tọgbo mítọn Jakọbu, mẹhe na mí dotọ̀ lọ bọ ewọ lọsu po ovi etọn lẹ po gọna kanlin whégbè tọn etọn lẹ nù sọn e mẹ, kavi hiẹ klohu i wẹ?” 13 Jesu sọ gblọnna ẹn dọmọ: “Nugbla na vọ́ hù mẹdepope he nù sọn osin ehe mẹ. 14 Nugbla ma na hù mẹdepope he nù sọn osin he yẹn na na ẹn lọ mẹ gbede ba, ṣigba osin he yẹn na na ẹn lọ na lẹzun asisa osin tọn de to ewọ mẹ he na to sisà jẹgbonu nado namẹ ogbẹ̀ madopodo.” 15 Yọnnu lọ dọna ẹn dọmọ: “Mẹdaho, na mi osin ehe, na nugbla ma nado hù mi bọ yẹn na nọ to ofi wá nado to osin dọ̀n.”

16 E dọna yọnnu lọ dọmọ: “Yì, bo ylọ asu towe, na mì ni wáfi.” 17 Yọnnu lọ sọ gblọnna ẹn dọmọ: “Yẹn ma tindo asu de.” Jesu dọna ẹn dọmọ: “Hójọhó wẹ hiẹ dọ, dọ ‘Yẹn ma tindo asu de.’ 18 Na hiẹ ko dà asu atọ́n, podọ dawe he hiẹ tindo todin ma yin asu towe. Nugbo wẹ enẹ he hiẹ dọ.” 19 Yọnnu lọ dọna ẹn dọmọ: “Mẹdaho, yẹn mọdọ yẹwhegán de wẹ hiẹ. 20 Tọgbo mítọn lẹ basi sinsẹ̀n to osó ehe ji; ṣigba mìwlẹ dọ dọ Jelusalẹm wẹ fihe gbẹtọ lẹ dona nọ basi sinsẹ̀n te.” 21 Jesu dọna ẹn dọmọ: “Yọnnu, yí mi sè, Ojlẹ lọ ja to whenue mì na nọ sẹ̀n Otọ́, e ma yin to osó ehe ji kavi to Jelusalẹm gba. 22 Mìwlẹ to nuhe mì ma yọnẹn sẹ̀n; míwlẹ to nuhe mí yọnẹn sẹ̀n, na Ju lẹ dè wẹ whlẹngán wá sọn. 23 Ṣigba, ojlẹ lọ ja, din sọ wẹ, to whenue sinsẹ̀n-basitọ nugbo lẹ na nọ sẹ̀n Otọ́ to gbigbọ mẹ podọ to nugbo mẹ, na nugbo tọn, omẹ mọnkọtọn lẹ dín wẹ Otọ́ te nado nọ basi sinsẹ̀n hlan ẹn. 24 Gbigbọ wẹ Jiwheyẹwhe, podọ mẹhe to sinsẹ̀n ẹn lẹ dona nọ basi sinsẹ̀n hlan ẹn to gbigbọ mẹ podọ to nugbo mẹ.” 25 Yọnnu lọ sọ gblọnna ẹn dọmọ: “Yẹn yọnẹn dọ Mẹssia, mẹhe yè nọ ylọdọ Klisti lọ na wá. To whenue ewọ na wá, e na lá onú lẹpo na mí to gbangba.” 26 Jesu gblọnna yọnnu lọ dọmọ: “Yẹn mẹhe to hodọna we wẹ omẹ lọ.”

27 Todin, devi lẹ wá, e sọ paṣa yé na ewọ to hodọ hẹ yọnnu de wutu. Na nugbo tọn, mẹde ma dọ dọ: “Etẹ dín wẹ a te?” kavi, “Naegbọn hiẹ to hodọ hẹ ẹ?” 28 To whenẹnu, yọnnu lọ jo osinzẹ́n etọn do bo yì tòdaho lọ mẹ bosọ dọna gbẹtọ lẹ dọmọ: 29 “Mì wá pọ́n dawe de he dọ nuhe yẹn ko wà lẹpo na mi. Vlavo, be e ma yin Klisti lọ die nẹ?” 30 Yé tọ́njẹgbonu sọn tòdaho lọ mẹ bo ja e dè.

31 To whenẹnu, devi lẹ to vivẹ ẹ, bo to didọmọ: “Labbi, dùnú.” 32 Ṣigba, e dọna yé dọmọ: “Yẹn tindo núdùdù de nado dù ehe mìwlẹ ma yọnẹn.” 33 Enẹwutu, devi lẹ jẹ didọna ode awetọ ji dọmọ: “Mẹde ma saa ko hẹn nudepope wá na ẹn nado dù, kavi mẹde ko wàmọ wẹ?” 34 Jesu dọna yé dọmọ: “Núdùdù ṣie wẹ nado wà ojlo ewọ he do mi hlan tọn podọ nado dotana azọ́n etọn. 35 Be mìwlẹ ma nọ dọ dọ e pò osun ẹnẹ whẹpo jibẹwawhé whenu ni wá ya? Mì pọ́n! Yẹn dọna mì dọmọ: Mì ze nukun mìtọn lẹ daga bo pọ́n ogle lẹ hlan, mì na mọdọ yé ko bia na gbingbẹ̀n. Todin 36 gbingbẹ̀ntọ lọ ko to azọ́nkuẹ lẹ yí bo to sinsẹ́n bẹpli na ogbẹ̀ madopodo, na nudotọ lọ po gbingbẹ̀ntọ lọ po nido sọgan jaya dopọ. 37 Na nugbo tọn, nugbo wẹ ohó lọ to whẹho ehe mẹ, Mẹde yin nudotọ bọ mẹdevo yin gbingbẹ̀ntọ. 38 Yẹn do mì hlan nado gbẹ̀n nuhe mì ma ko jẹtukla na. Mẹdevo lẹ ko jẹtukla, bọ mìwlẹ duale tuklajijẹ yetọn tọn.”

39 Todin, susu Samalianu lẹ tọn sọn tòdaho enẹ mẹ yí ewọ sè na ohó yọnnu lọ tọn wutu, mẹhe dekunnu dọmọ: “E dọ nuhe yẹn ko wà lẹpo na mi.” 40 Enẹwutu, to whenue Samalianu lẹ wá e dè, yé jẹ bibiọ ẹ ji nado nọ yé dè; ewọ sọ nọ finẹ na azán awe. 41 Taidi kọdetọn de, mẹsusu dogọ yise na ohó he e dọ wutu, 42 yé sọ jẹ didọna yọnnu lọ ji dọmọ: “E ma yin ohó towe wutu wẹ mí yise ba gba; na mílọsu lẹ ko sè podọ mí yọnẹn dọ dawe ehe, na nugbo tọn, yin mẹwhlẹngántọ aihọn tọn.”

43 To azán awe lọ lẹ godo, e tọ́n sọn finẹ yì Galili. 44 Ṣigba, Jesu lọsu dekunnu dọ yẹwhegán de ma nọ tindo gbégbò to otò etọn titi mẹ. 45 Enẹwutu, to whenue e jẹ Galili, Galilinu lẹ yí i, na yé ko mọ nuhe e wà to hùnwhẹ lọ tẹnmẹ to Jelusalẹm lẹpo wutu, na yelọsu yì hùnwhẹ lọ tẹnmẹ ga.

46 Enẹwutu, e sọ wá Kana Galili tọn whladopo dogọ, fihe e ko diọ osin zun ovẹn te. Todin, devizọnwatọ ahọlu tọn de tin he visunnu etọn to azọ̀njẹ to Kapẹlnaumi. 47 To whenue dawe ehe sè dọ Jesu ko tọ́n sọn Jude wá Galili, e yì e dè bo jẹ bibiọ ẹ ji nado wá bo hẹnazọ̀ngbọna visunnu etọn, na e tin to kúdonu. 48 Ṣigba, Jesu dọna ẹn dọmọ: “Eyin mìwlẹ ma mọ ohia lẹ po nujiawu lẹ po, mì ma na yise gbede.” 49 Devizọnwatọ ahọlu tọn lọ dọna ẹn dọmọ: “Oklunọ, wá whẹpo ovi ṣie nido kú.” 50 Jesu dọna ẹn dọmọ: “Yì; visunnu towe ko jẹgangan.” Dawe lọ yí ohó he Jesu dọna ẹn sè bo yì. 51 Ṣigba, dile e gbẹ́ to yìyì to aliho ji, afanumẹ etọn lẹ pé e bo dọna ẹn dọ visunnu etọn ko jẹgangan. 52 Enẹwutu, e kàn gànhiho he mẹ e jẹgangan te lọ biọ yé. To whenẹnu, yé dọna ẹn dọmọ: “Osọ he wayi to gànhiho ṣinawetọ* lọ mẹ wẹ agbasa-hùnmiyọ́n lọ jo e do.” 53 Enẹwutu, otọ́ lọ yọnẹn dọ gànhiho he mẹ Jesu dọna ẹn dọmọ: “Visunnu towe ko jẹgangan” lọ pẹpẹ wẹ. Ewọ po whédo etọn pete po sọ yise. 54 Whladopo dogọ, ehe wẹ ohia awetọ he Jesu basi to whenue e tọ́n sọn Jude wá Galili.