2 Kọlintinu lẹ

7 Enẹwutu, mẹyiwanna lẹ emi, to whenuena e yindọ mí tindo opagbe ehelẹ, mì gbọ mí ni klọ́ míde wé sọn hẹnflu agbasalan tọn podọ gbigbọ tọn lẹpo mẹ, bo nọ to wiwe-yinyin hẹn zun pipé to budisi Jiwheyẹwhe mẹ.

2 Mì hùn ahun mìtọn donuvo na mí. Mí ma ko wà oylan do mẹde, mí ma ko hẹn mẹde gblezọn, mí ma ko hò mẹde dù. 3 Yẹn ma to ehe dọ nado gblewhẹdo mì gba. Na yẹn ko dọ wayi dọ mìwlẹ tin to ahun mítọn mẹ vlavo mí kú wẹo kavi mí to ogbẹ̀. 4 Yẹn nọ dọhona mì po awuvivo hodidọ tọn daho po. Yẹn nọ doawagun tlala to mì mẹ. Yẹn gọ́ na homẹmimiọn, ayajẹ ṣie nọ to gigọfla to yajiji mítọn lẹpo mẹ.

5 Na nugbo tọn, to whenue mí wá Makedonia, agbasalan mítọn ma mọ kọgbọ depope, ṣigba mí to yinyin yasana to aliho lẹpo mẹ—avùn tin to gbonu, obu tin to ṣẹnṣẹn mítọn. 6 Etomọṣo, Jiwheyẹwhe he nọ miọnhomẹna mẹhe jẹflumẹ lẹ, miọnhomẹna mí gbọn tintin tofi Titu tọn dali; 7 ṣogan, e ma yin tintin tofi etọn kẹdẹ gba, ṣigba gbọn homẹmimiọn he e mọyi na mìtọn wutu dali ga, dile ewọ hẹn linlin lẹ gọwá na mí gando ojlo vẹkuvẹku mìtọn, aluẹmẹninọ mìtọn, zohunhun mìtọn na mi go; sọmọ bọ yẹn jaya dogọ.

8 Enẹwutu, eyin wekanhlanmẹ ṣie tlẹ hẹn mì blawu, e ma vẹna mi gba. Eyin e tlẹ vẹna mi dai, (yẹn mọdọ wekanhlanmẹ enẹ hẹn mì blawu, ṣigba na ojlẹ gli de wẹ,) 9 todin yẹn jaya, e ma yin na mìwlẹ yin hinhẹn blawu poun wutu wẹ gba, ṣigba na mì yin hinhẹn blawu nado lẹnvọjọ wutu; na mì yin hinhẹn blawu to aliho Jiwheyẹwhe tọn mẹ, na mì ma nado hẹn nudepope bu na míwlẹ tọn wutu. 10 Na awubla to aliho Jiwheyẹwhe tọn mẹ nọ dekọtọn do lẹnvọjọ he nọ hẹn whlẹngán he ma na vẹnamẹ wá mẹ; ṣigba awubla aihọn tọn nọ hẹn okú wá. 11 Na, mì pọ́n! lehe onú ehe, yèdọ vivẹnudido daho he mẹ hinhẹn mì blawu to aliho Jiwheyẹwhe tọn mẹ ko dekọtọn do na mì, mọwẹ, whẹsuna mìde titi, mọwẹ, homẹgble, mọwẹ, obu, mọwẹ, ojlo vẹkuvẹku, mọwẹ, zohunhun, mọwẹ, nuṣiwa vivọjlado! Mì ko do mìde hia to aliho lẹpo mẹ nado yin wiwe to whẹho ehe mẹ. 12 Na nugbo tọn, dile etlẹ yindọ yẹn kanwehlan mì, yẹn wàmọ, e ma yin na mẹhe wà oylan lọ, kavi na mẹhe go oylan lọ yin wiwà do gba, ṣigba na vivẹnudido mìtọn na míwlẹ nido sọgan yin hinhẹn sọawuhia to ṣẹnṣẹn mìtọn to Jiwheyẹwhe nukọn. 13 Enẹwutu wẹ mí ko yin homẹmiọnna.

Ṣigba, to yidogọ mẹ na homẹmimiọn mítọn, mí sọ jaya tlala na ayajẹ Titu tọn wutu, na gbigbọ etọn ko yin kọfana gbọn mìmẹpo dali wutu. 14 Na eyin yẹn ko doawagun depope na ẹn gando mì go, be yẹn ma ko duwinyan; ṣigba dile mí ko dọ onú lẹpo na mì to nugbo mẹ do, mọdopolọ ga wẹ awagundido mítọn to Titu nukọn ko sọawuhia nado yin nugbo do. 15 Humọ, owanyi sisosiso etọn dohlan mì sù tlala, eyin ewọ flin tonusise mìmẹpo tọn, lehe mì yí sisi sisosiso do yí i do. 16 Yẹn nọ jaya dọ to aliho lẹpo mẹ, yẹn sọgan gọ́ na adọgbigbo na mìtọn wutu.