Malku

9 Humọ, e dọna yé dọmọ: “Nugbo wẹ yẹn dọna mì dọ, delẹ to mẹhe to ote tofi lẹ mẹ ma na dọ́ okú pọ́n to aliho depope mẹ kaka yé nado mọdọ Ahọluduta Jiwheyẹwhe tọn ko wá to huhlọn etọn mẹ whẹ́.”+ 2 To azán ṣidopo godo, Jesu plan Pita, Jakọbu po Johanu po bo hẹn yé yì osó he yiaga taun de ji to olá. Wunmẹ etọn sọ diọ to nukọn yetọn;+ 3 awugbó etọn lẹ jẹ sisẹ́ ji bo lẹzun wewe hú lehe avọ̀yantọ depope sọgan hẹn avọ̀ de zun wewe do to aigba ji. 4 Humọ, Elija po Mose po sọawuhia yé to finẹ, bo to hodọ hẹ Jesu. 5 Whenẹnu, Pita dọna Jesu dọmọ: “Labi, e yọ́n taun dọ mí ni nọfi. Enẹwutu, gbọ mí ni gbá gòhọ atọ̀n, dopo na hiẹ, dopo na Mose podọ dopo na Elija.” 6 Na nugbo tọn, ewọ ma yọ́n nuhe e na dọ, na yé dibu tlala wutu. 7 Podọ aslọ de sọawuhia bo ṣinyọ́n yé ji, ogbè de+ sọ dọho sọn aslọ lọ mẹ dọmọ: “Ehe wẹ Visunnu ṣie, mẹyiwanna lọ.+ Mì nọ dotoaina ẹn.”+ 8 Enẹgodo to ajiji mẹ, yé pọ́n lẹdo pé bo mọdọ mẹdepope masọ to yé dè ba, adavo Jesu.

9 Dile yé to tejẹ sọn osó lọ ji, e dosẹ́n na yé sinsinyẹn ma nado dọ nuhe yé ko mọ lọ na mẹdepope+ kakajẹ whenue Visunnu gbẹtọ tọn na ko fọ́n sọn oṣiọ lẹ mẹ.+ 10 Yé sọ hẹn ohó lọ do ahun mẹ,* ṣigba bo nọ to hodọdopọ to yedelẹ ṣẹnṣẹn gando nuhe finfọn sọn oṣiọ lẹ mẹ ehe lọ zẹẹmẹdo go. 11 Yé sọ jẹ kinkanse e ji dọmọ: “Naegbọn wekantọ lẹ do nọ dọ dọ Elija+ dona wá whẹ́?”+ 12 E dọna yé dọmọ: “Elija na wá whẹ́ bo na hẹn nulẹpo gọwá otẹn yetọn mẹ;+ ṣigba naegbọn e do yin kinkandai gando Visunnu gbẹtọ tọn go dọ e dona jugbọn yajiji susu mẹ+ bo yin nuyiwa hẹ po vlẹko po?+ 13 Ṣigba, yẹn dọna mì dọ, na nugbo tọn, Elija+ ko wá, bọ yé wà nuhe jlo yé lẹpo na ẹn, kẹdẹdile e ko yin kinkandai gando ewọ go do.”+

14 To whenue yé wá devi he pò lẹ dè, yé mọ gbẹtọgun daho de lẹdo yé pé bọ wekantọ lẹ to nudọn hẹ yé.+ 15 Ṣigba, tlolo he gbẹtọgun lọ lẹpo mọ ẹn, e paṣa yé, bọ yé họ̀nwezun wá e dè nado dọnudo e. 16 Whenẹnu, e kanse yé dọmọ: “Etẹ dọ̀n wẹ mì te hẹ yé?” 17 Mẹdopo sọn gbẹtọgun lọ mẹ sọ gblọnna ẹn dọmọ: “Mẹplọntọ, yẹn plan visunnu ṣie wá dè we, na e tindo gbigbọ unbọpẹn tọn de wutu.+ 18 Fidepope he gbigbọ lọ jẹ e ji te, e nọ dlan ẹn do kọmẹ, bọ e nọ to fútúfútú tún sọn nùmẹ bosọ nọ to adúkúnkún dù bo nọ ba huhlọn pò. Yẹn sọ biọ to devi towe lẹ si nado yàn ẹn jẹgbonu, ṣigba yé ma penugo nado wàmọ.” 19 E gblọnna yé dọmọ: “Whẹndo mayisenọ E,+ nawẹ yẹn na nọ mì dè dẹnsọ? Nawẹ yẹn na sinyẹnlin hẹ mì dẹnsọ? Mì hẹn ẹn wá dè e.”+ 20 Enẹwutu, yé hẹn visunnu lọ wá e dè, ṣigba to nukun etọn mẹ, gbigbọ lọ sọ vọ́ wá ovi lọ ji to afọdopolọji bo húnhún in gìgìgì. To whenue e ko jai jẹ kọmẹ godo, e to bibli pé bo to fútúfútú tún sọn nùmẹ. 21 To whenẹnu, Jesu kanse otọ́ etọn dọmọ: “Whetẹnu gbọ́n wẹ ehe ko to jijọ do e go?” E dọmọ: “Sọn ovu whenu gbọ́n, 22 podọ e nọ saba dlan ẹn do miyọ́n mẹ podọ do osin mẹ ga nado hù i. Ṣigba, eyin hiẹ sọgan wà nudepope, wàlẹblanuna mí bo gọalọna mí.” 23 Jesu dọna ẹn dọmọ: “Naegbọn hiẹ do dọ, ‘Eyin hiẹ sọgan’? Na nulẹpo wẹ yọnbasi na mẹhe tindo yise.”+ 24 To afọdopolọji, otọ́ ovi lọ tọn dọho po ogbè lélé po dọmọ: “Yẹn tindo yise! Gọalọna mi to fie yẹn tindo nuhudo yise tọn dogọ te!”+

25 Todin, Jesu doayi e go dọ gbẹtọgun de to whinwhlẹndo nado wá yé dè, enẹwutu e gbẹnuna gbigbọ mawé lọ bo dọna ẹn dọmọ: “Hiẹ gbigbọ unbọpẹnnọ podọ tókunọ, yẹn degbena we, tọ́n sọn ewọ mẹ bo masọ biọ ewọ mẹ ba blo!”+ 26 To whenue gbigbọ lọ ko dawhá po ogbè lélé po bo húnhún in gìgìgì whlasusu godo, e tọ́n sọn ewọ mẹ bọ ovi lọ taidi oṣiọ, suhugan mẹhe to finẹ lẹ tọn sọ to didọmọ: “E ko kú!” 27 Ṣigba, Jesu hẹn alọ etọn go bo fọ́n ẹn ṣite, ewọ sọ fọ́n. 28 Enẹwutu, to whenue e ko biọ owhé de gbè godo, devi etọn lẹ wá e dè dovo bo kanse e dọmọ: “Naegbọn míwlẹ ma do penugo nado yàn ẹn jẹgbonu?”+ 29 E dọna yé dọmọ: “Ehe nkọ ma sọgan tọ́njẹgbonu adavo gbọn odẹ̀ kẹdẹ dali.”

30 Yé tọ́nyi sọn finẹ bo jugbọn Galili, ṣigba e ma jlo dọ mẹdepope ni yọnẹn. 31 Na e to devi etọn lẹ plọn bo to didọna yé dọmọ: “Visunnu gbẹtọ tọn na yin didehia do alọ gbẹtọ lẹ tọn mẹ, bọ yé na hù i,+ ṣigba mahopọnna dọ ewọ yin hùhù, e na fọ́n to azán atọ̀n godo.”+ 32 Etomọṣo, yé ma mọnukunnujẹ nuhe dọ e te mẹ, yé sọ dibu nado kannubiọ ẹ.

33 Yé sọ wá Kapẹlnaumi. Todin, to whenue e to họmẹ, e kanse yé dọmọ: “Etẹ dọ̀n wẹ mì te to aliji?”+ 34 Yé ma kẹnù, na yé ko to nudọn to yedelẹ ṣẹnṣẹn to aliji gando mẹhe klohu go. 35 Enẹwutu, e sinai bo ylọ Omẹ Wiawe lẹ bo dọna yé dọmọ: “Eyin mẹdepope jlo na yin tintan, ewọ dona yin omẹ godo tọn to mẹlẹpo mẹ bo na yin lizọnyitọ na mẹlẹpo.”+ 36 Whenẹnu, e ylọ yọpọvu de wá ede dè bo hẹn ẹn ṣite to ṣẹnṣẹn yetọn; podọ to whenue e plá alọ okọ̀ na ẹn godo, e dọna yé dọmọ: 37 “Mẹdepope he yí yọpọvu ehe nkọtọn dopo+ to oyín ṣie mẹ, yí yẹnlọsu ga; podọ mẹdepope he yí mi, e ma yin yẹn dopo kẹdẹ wẹ e yí, ṣigba Mẹhe do mi hlan lọsu ga.”+

38 Johanu dọna ẹn dọmọ: “Mẹplọntọ, mí mọ mẹde bọ e to aovi lẹ yàn jẹgbonu to oyín towe mẹ podọ mí tẹnpọn nado glọnalina ẹn, na ewọ ma yin dopo to mí mẹ wutu.”+ 39 Ṣigba, Jesu dọmọ: “Mì tẹnpọn nado glọnalina ẹn blo, na mẹdepope ma tin he na wà azọ́n huhlọnnọ de to oyín ṣie mẹ, bo sọgan dọ nuylankan de do go e po awubibọ po. 40 Na mẹdepope he ma jẹagọdo mí tin po mí po.+ 41 Podọ mẹdepope he na mì osin kọfo dopo nado nù, na mì yin Klisti tọn wutu,+ nugbo wẹ yẹn dọna mì dọ, ewọ ma na hẹn ale etọn bu to aliho depope mẹ gba.+ 42 Ṣigba, mẹdepope he hẹn dopo to omẹ pẹvi he tindo yise to yẹn mẹ ehelẹ mẹ dahli, e na pọnte na ẹn hú dọ yè ni sìn gilisé he kẹtẹkẹtẹ lẹ nọ lilẹ́ nkọtọn de dokọna ẹn bo dọ̀n ẹn dlan hùmẹ.+

43 “Eyin alọ towe hẹn we dahli, sán ẹn sẹ̀. E na pọnte na we nado biọ ogbẹ̀ mẹ di klegbesatọ hú dọ hiẹ ni biọ Gẹhẹnna* mẹ po alọ awe po, yèdọ biọ miyọ́n he ma sọgan yin ṣíṣí lọ mẹ.+ 44 *—— 45 Podọ eyin afọ towe hẹn we dahli, sán ẹn sẹ̀. E na pọnte na we nado biọ ogbẹ̀ mẹ di sẹkunọ hú dọ hiẹ ni yin dindlan do Gẹhẹnna* mẹ po afọ awe po.+ 46 *—— 47 Podọ eyin nukun towe hẹn we dahli, ze e dlan.+ E na pọnte na we nado biọ Ahọluduta Jiwheyẹwhe tọn mẹ po nukun dopo po hú dọ hiẹ ni yin dindlan do Gẹhẹnna* mẹ po nukun awe po,+ 48 fie owé lẹ ma nọ kú te bọ miyọ́n lọ ma nọ ṣí te.+

49 “Na omẹ ehe nkọ lẹ ji wẹ yè na húnhún miyọ́n do dile yè nọ húnhún ojẹ̀ do.+ 50 Ojẹ̀ yọ́n, ṣigba eyin ojẹ̀ hẹn otọ́n etọn bu, etẹwẹ mì na yí do hẹn ẹn dotọ́n?+ Mì tindo ojẹ̀ to mìdelẹ mẹ,+ bo nọ jijọho mẹ hẹ ode awetọ mìtọn.”+