Luku

2 Todin, to azán enẹlẹ gbè, Sesali Augusti de gbedide de tọ́n na mẹhe nọ nọ̀ aigba ji lẹpo nado ze yinkọ dai. 2 (Yinkọ zizedai tintan ehe wá aimẹ to whenue Kiliniu yin ayimatẹn-gán Silia tọn.) 3 Gbẹtọ lẹpo sọ yì tòdaho yetọn titi mẹ nado ze yinkọ dai. 4 Na nugbo tọn, Josẹfu+ lọsu tọ́n sọn tòdaho Galili tọn, he nọ yin Nazalẹti mẹ, bo yì tòdaho Davidi tọn he nọ yin Bẹtlẹhẹm mẹ,+ to Jude, na e yin hagbẹ owhé po whẹndo Davidi tọn po wutu. 5 E yì nado ze yinkọ dai po Malia he ko yin nina ẹn to alọwle mẹ lọ po dile e ko dopagbe etọn do,+ yèdọ mẹhe na jivi to madẹnmẹ.+ 6 To whenue yé to finẹ, azán etọn pé nado jivi. 7 Podọ e ji visunnu de, yèdọ plọnji etọn,+ e sọ blá ẹ do avọ̀ mẹ bo tẹ́ ẹ do otò* de mẹ,+ na otẹn ma tin na yé to adọtẹn jonọ tọn lọ mẹ wutu.

8 To lẹdo enẹ dopolọ mẹ, lẹngbọhọtọ lẹ sọ to gbonu bo to lẹngbọpa yetọn lẹ họ́ to zánmẹ. 9 Angẹli Jehovah* tọn de sọ ṣite to nukọnna yé to ajiji mẹ, bọ gigo Jehovah* tọn họ́n lẹdo yé pé, obu sọ di yé tlala. 10 Ṣigba, angẹli lọ dọna yé dọmọ: “Mì dibu blo, na mì pọ́n! wẹndagbe de wẹ yẹn to lilá na mì gando ayajẹ daho de he gbẹtọ lẹpo na tindo go. 11 Na mẹwhlẹngántọ de yin jiji na mì to egbé,+ he yin Klisti Oklunọ lọ,+ to tòdaho Davidi tọn+ mẹ. 12 Podọ ohia de die na mì: Mì na mọ viyẹyẹ de he yin biblá do avọ̀ mẹ bo yin titẹ́ do otò de mẹ.” 13 To ajiji mẹ, awhànpa olọn tọn susugege de wá angẹli lọ dè,+ bo to Jiwheyẹwhe pà bosọ to didọmọ: 14 “Gigo to oji aga hlan Jiwheyẹwhe, podọ jijọho hlan mẹhe tindo ojlo dagbe* to aigba ji lẹ.”

15 Enẹwutu, to whenue angẹli lọ lẹ ko tọ́n sọn yé dè yì olọn mẹ godo, lẹngbọhọtọ lọ lẹ jẹ didọna ode awetọ ji dọmọ: “Mì gbọ mí ni yì Bẹtlẹhẹm tlọlọ nado pọ́n nuhe jọ lọ, ehe Jehovah* ko hẹn zun yinyọnẹn na mí.” 16 Yé sọ yì po awuyiya po bo mọ Malia po Josẹfu po, bọ viyẹyẹ lọ to aimimlọn to otò lọ mẹ. 17 To whenue yé mọ ehe, yé hẹn owẹ̀n he ko yin dido yé gando ovi pẹvi ehe go lọ zun yinyọnẹn. 18 Awú sọ ji mẹlẹpo he sè nuhe lẹngbọhọtọ lọ lẹ dọna yé lẹ, 19 ṣigba Malia yí onú ehe lẹpo whlá do ayiha mẹ bo to nulẹnpọn do nuhe onú ehelẹ zẹẹmẹdo ji to ahun etọn mẹ.+ 20 To whenẹnu, lẹngbọhọtọ lọ lẹ lẹkọyi, bo to gigopana Jiwheyẹwhe bosọ to pipà ẹ na nuhe yé ko sè bo mọ lẹpo, kẹdẹdile e ko yin didọna yé do.

21 To azán ṣinatọ̀n godo, to whenue ojlẹ sọ̀ nado gboadà na ẹn,+ oyín etọn yin yiylọdọ Jesu, yèdọ oyín he angẹli lọ ko na ẹn whẹpo ohò etọn do yin mimọ.+

22 Humọ, to whenue azán lọ pé nado lẹ̀ yé wé sọgbe hẹ Osẹ́n Mose tọn,+ yé hẹn ẹn wá Jelusalẹm nado ze e donukọnna Jehovah,* 23 kẹdẹdile e ko yin kinkandai to Osẹ́n Jehovah* tọn mẹ do dọmọ: “Visunnu plọnji* lẹpo dona nọ yin yiylọdọ wiwe hlan Jehovah.”*+ 24 Yé sọ sanvọ́ sọgbe hẹ nuhe yin didọ to Osẹ́n Jehovah* tọn mẹ dọmọ: “owhlé awe kavi awhànnẹvu awe.”+

25 Podọ pọ́n! dawe de tin to Jelusalẹm he nọ yin Simeoni, dawe ehe yin dodonọ bo nọ dibusi Jiwheyẹwhe, bosọ to tenọpọn homẹmimiọn Islaeli tọn,+ gbigbọ wiwe sọ to e ji. 26 Humọ, Jiwheyẹwhe dehia ẹ gbọn gbigbọ wiwe dali dọ e ma na kú kakajẹ whenue e na ko mọ Klisti Jehovah* tọn. 27 Todin, to huhlọn gbigbọ lọ tọn glọ, e wá tẹmpli mẹ, podọ to whenue mẹjitọ lọ lẹ hẹn Jesu ovi pẹvi lọ wá nado basi sọgbe hẹ nuyiwa aṣa Osẹ́n lọ tọn,+ 28 ewọ yí ovi lọ do alọ etọn lẹ mẹ bo pà Jiwheyẹwhe dọmọ: 29 “Todin, Oklunọ Nupojipetọ, hiẹ to didike afanumẹ towe ni yì gbọjẹ to jijọho mẹ+ sọgbe hẹ ohó towe, 30 na nukun ṣie lẹ ko mọ aliho mẹwhlẹngán tọn towe+ 31 he hiẹ ko wleawuna to gbẹtọ lẹpo nukọn,+ 32 hinhọ́n+ de nado de nukunmẹṣinyọnnu sẹ̀ sọn nukun akọta lẹ tọn mẹ+ podọ gigo de na Islaeli omẹ towe lẹ.” 33 Nuhe yin didọ gando ovi lọ go lẹ sọ nọ to pipaṣa otọ́ etọn po onọ̀ etọn po. 34 Humọ, Simeoni dona yé bo dọna Malia, onọ̀ ovi lọ tọn dọmọ: “Pọ́n! Ovi ehe wẹ yin dide na aijijẹ+ po finfọn mẹsusu tọn po to Islaeli+ podọ na ohia de he yè na dọho sọta+ 35 (mọwẹ, ohí gaa de na yin sisọ́ we* luntọ́n),+ na linlẹn he to ahun mẹsusu tọn mẹ lẹ nido sọgan yin didehia.”

36 Todin, yẹwhegán-yọnnu de tin he nọ yin Anna, viyọnnu Fanuẹli tọn, sọn hẹnnu Aṣeli tọn mẹ. Owhe nawe ehe tọn ko sẹyì taun, podọ owhe ṣinawe poun wẹ ewọ po asu etọn po nọpọ́ na to alọwle yetọn* godo, 37 podọ asuṣiọsi de wẹ ewọ bo tindo owhe 84 todin. Ewọ ma nọ gọ̀n tẹmpli mẹ gbede, bo nọ to sinsẹ̀nzọn wiwe wà to ozán po okle po gọna nùbibla po ovẹ̀ po. 38 To ojlẹ enẹlọ mẹ, e dọnsẹpọ bo jẹ pẹdona Jiwheyẹwhe ji bosọ to ohó ovi lọ tọn dọna mẹhe to tenọpọn whlẹngán Jelusalẹm tọn lẹpo.+

39 Enẹwutu, to whenue yé ko wà nulẹpo sọgbe hẹ Osẹ́n Jehovah* tọn,+ yé lẹkọyi Galili to tòdaho yetọn titi Nazalẹti mẹ.+ 40 Ovi pẹvi lọ sọ to whinwhẹ́n deji bo to huhlọn tindo, bosọ to gigọ́ na nuyọnẹn, e sọ to nukundagbe Jiwheyẹwhe tọn tindo zọnmii.+

41 Todin, aṣa mẹjitọ etọn lẹ tọn wẹ e yin sọn owhe de mẹ jẹ owhe de mẹ nado nọ yì Jelusalẹm na hùnwhẹ Juwayi tọn.+ 42 Podọ to whenue e yin owhe 12 mẹvi, yé hẹji yì sọgbe hẹ aṣa hùnwhẹ lọ tọn.+ 43 Whenue hùnwhẹ lọ wá vivọnu bọ yé lẹkọja, yọpọ sunnu lọ, Jesu gbọṣi Jelusalẹm, mẹjitọ etọn lẹ masọ doayi e go. 44 Yé lẹndọ e to gbejizọnlinzin dopọ hẹ pipli lọ, bọ yé ko zingbejizọnlin azán dopo tọn, enẹgodo yé jẹ dindin in pé ji to hẹnnumẹ lẹ po mẹyinyọnẹn lẹ po ṣẹnṣẹn. 45 Ṣigba, to whenue yé ma mọ ẹn, yé lẹkọyi Jelusalẹm bo yí sọwhiwhe do dín in. 46 To azán atọ̀n godo, yé mọ ẹn to tẹmpli mẹ, bọ e to aisinsin to mẹplọntọ lẹ ṣẹnṣẹn bo to todoaina yé bosọ to kanbiọ lẹ kanse yé. 47 Ṣigba, nukunnumọjẹnumẹ etọn po gblọndo etọn lẹ po nọ jiawu na mẹhe to todoaina ẹn lẹpo.+ 48 Todin, to whenue mẹjitọ etọn lẹ mọ ẹn, awuji yé bọ onọ̀ etọn dọna ẹn dọmọ: “Ovi, naegbọn hiẹ yinuwa hẹ mí dole? Yẹn po otọ́ towe po ko to dindin we pé vẹkuvẹku.” 49 Ṣigba, e dọna yé dọmọ: “Naegbọn mìwlẹ do to dindin mi pé? Be mì ma yọnẹn dọ yẹn dona tin to ohọ̀ Otọ́ ṣie tọn mẹ wẹ?”+ 50 Ṣigba, yé ma mọnukunnujẹ nuhe e to didọna yé lọ mẹ.

51 E sọ hodo yé bo lẹkọwa Nazalẹti, bosọ to mẹmẹglọ yin hlan* yé zọnmii.+ Humọ, onọ̀ etọn hẹn ohó ehelẹ do ahun etọn mẹ po sọwhiwhe po.+ 52 Jesu sọ to whinwhẹ́n deji to nuyọnẹn mẹ, to agbasa mẹ podọ to nukundagbe Jiwheyẹwhe tọn po gbẹtọ tọn po mẹ.