Luku

15 Todin, tòkuẹ-ṣinyantọ po ylandonọ lẹpo po nọ to yede bẹpli lẹdo e nado sè ohó etọn.+ 2 Falesi lẹ po wekantọ lẹ po sọ nọ to hùnhlún dọmọ: “Dawe ehe nọ yí ylandonọ lẹ bo nọ dùnú hẹ yé.” 3 To whenẹnu, e na apajlẹ ehe yé dọmọ: 4 “Mẹnu to mì mẹ wẹ na tindo lẹngbọ 100 bọ eyin e hẹn dopo to yé mẹ bu, e ma na jo 99 he pò lẹ do danfafa ji nado yì dín dehe bu lọ, kakajẹ whenue e na mọ ẹn?+ 5 Podọ to whenue e mọ ẹn, e ze e do abọ́ etọn lẹ ji bosọ jaya. 6 To whenue e lẹkọwa whégbè, e ylọ họntọn po kọmẹnu etọn lẹ po pli, bo dọna yé dọ, ‘Mì jaya hẹ mi, na n’ko mọ lẹngbọ ṣie he bu lọ.’+ 7 Yẹn dọna mì dọ, mọdopolọ ayajẹ na sù humọ to olọn mẹ do ylandonọ dopo he lẹnvọjọ ji+ hugan do dodonọ 99 he ma tindo nuhudo lẹnvọjọ tọn lẹ ji.

8 “Kavi yọnnu tẹwẹ na tindo abọgan-kuẹ dlakma* ao, bọ eyin e hẹn dlakma* dopo bu, e ma na tá miyọ́ngbán bo zà ohọ̀ etọn mẹ bosọ yí sọwhiwhe do dín kakajẹ whenue e mọ ẹn? 9 Podọ to whenue e mọ ẹn, e ylọ họntọn* po kọmẹnu etọn lẹ po pli, bo dọmọ, ‘Mì jaya hẹ mi, na yẹn ko mọ abọgan-kuẹ dlakma* he n’hẹnbu lọ.’ 10 Mọdopolọ, yẹn dọna mì dọ, ayajẹ nọ tin to angẹli Jiwheyẹwhe tọn lẹ ṣẹnṣẹn do ylandonọ dopo he lẹnvọjọ ji.”+

11 Enẹgodo, e dọmọ: “Dawe de tindo visunnu awe. 12 Mẹhe yin yọpọ to yé mẹ lọ sọ dọna otọ́ etọn dọ, ‘Otọ́, na mi dehe yin adà ṣie to nutindo lọ lẹ mẹ.’ Enẹwutu, e má nutindo etọn lẹ na yé. 13 To azán vude godo, visunnu pẹvi lọ bẹ onú etọn lẹpo pli bo zingbejizọnlin yì otò dindẹn de mẹ, podọ finẹ wẹ e zan nutindo etọn lẹ do apà mẹ te gbọn gbẹzan he gblezọn* de zinzan dali. 14 To whenue e ko zan nulẹpo vọ̀, huvẹ sinsinyẹn de tọ́n to otò lọ pete mẹ, e sọ biọ nuhudo mẹ. 15 E tlẹ yì bo jẹ kọ̀ji na dopo to tòvi otò enẹ tọn lẹ mẹ, bọ ewọ do e hlan ogle etọn mẹ nado penukundo ohàn lẹ go.+ 16 E sọ nọ jlo nado dù núdùdù* he ohàn lẹ nọ dù gọ́ho, ṣigba mẹdepope ma nọ na ẹn nudepope.

17 “To whenue e gọ̀ biọ ede mẹ, e dọmọ, ‘Nẹmunẹmu wẹ pakanọ otọ́ ṣie tọn lẹ he tindo núdùdù susugege, bọ yẹn to kúkú na huvẹ tofi! 18 Yẹn na fọ́n bo zingbejizọnlin yì otọ́ ṣie dè bo dọna ẹn dọmọ: “Otọ́, yẹn ko waylando do Jiwheyẹwhe to olọn podọ do hiẹ. 19 Yẹn masọ jẹ nado yin yiylọdọ visunnu towe ba. Yí mi do basi dopo to pakanọ towe lẹ mẹ.”’ 20 Enẹwutu, e fọ́n bo yì otọ́ etọn dè. Dile e gbẹ́ pò to olá, otọ́ etọn mọ ẹn bọ lẹblanu whàn ẹn, e sọ họ̀nwezun bo gbò e fán* bosọ donùnùgo na ẹn. 21 To whenẹnu, visunnu lọ dọna ẹn dọ, ‘Otọ́, yẹn ko waylando do Jiwheyẹwhe to olọn podọ do hiẹ.+ Yẹn masọ jẹ nado yin yiylọdọ visunnu towe ba.’ 22 Ṣigba, otọ́ lọ dọna afanumẹ etọn lẹ dọ, ‘Mì yawu! bo hẹn tewu de wá, yèdọ dehe yọ́n hugan, bo do na ẹn, bosọ do alọkẹ de do alọ na ẹn podọ afọpa do afọ na ẹn. 23 Podọ mì hẹn oyìnvu he dojó de wá, bo hù i bosọ gbọ mí ni dù bo jaya, 24 na visunnu ṣie ehe ko kú, ṣigba e ko gọwá ogbẹ̀ whladopo dogọ;+ e ko bu bo ko sọ yin mimọ.’ Yé sọ jẹ ayajẹ ji.

25 “Todin, visunnu etọn mẹho lọ tin to glemẹ, podọ dile e lẹkọja bo sẹpọ whégbè, e sè ogbè nuhiho po wedudu po tọn. 26 Enẹwutu, e ylọ dopo to devizọnwatọ lẹ mẹ wá ede dè bo kàn nuhe to jijọ biọ. 27 Ewọ dọna ẹn dọ, ‘Nọvisunnu towe ko wá, bọ otọ́ towe hù oyìnvu he dojó, na e mọ ẹn to agbasalilo* mẹ wutu.’ 28 Ṣigba, ewọ gblehomẹ bo gbẹ́ nado biọ whégbè. Whenẹnu, otọ́ etọn tọ́n wá bo jẹ vivẹ̀ ẹ ji. 29 Ewọ gblọnna otọ́ etọn dọ, ‘Pọ́n! Sọn owhe susu ehelẹ die wẹ yẹn ko to sinsẹ̀n we bo ma vẹtolina gbedide towe lẹ pọ́n gbede, ṣogan hiẹ ma na mi gbọgbọẹvu dopo nado jaya hẹ họntọn ṣie lẹ pọ́n gbede. 30 Ṣigba, tlolo he visunnu towe ehe, he zan nutindo towe lẹ do apà mẹ* hẹ galọtọ lẹ wá, hiẹ hù oyìnvu he dojó na ẹn.’ 31 To whenẹnu, e dọna ẹn dọ, ‘Visunnu ṣie, whepoponu wẹ hiẹ tin hẹ mi, podọ towe wẹ nuhe yin ṣie lẹpo. 32 Ṣigba, e jẹ dọ mí ni jaya bo hùnhomẹ, na nọvisunnu towe ko kú, ṣigba e ko gọwá ogbẹ̀; podọ ewọ ko bu bo ko sọ yin mimọ.’”