Ezekiẹli

38 Ohó Jehovah tọn sọ vọ́ wá dè e dọmọ: 2 “Visunnu gbẹtọ tọn, diọnukunsọ Gọgi aigba Magọgi tọn,+ yèdọ ahọvi daho Meṣẹki po Tubali po+ tọn bo dọ dọdai sọta ẹ.+ 3 Dọna ẹn dọ, ‘Nuhe Oklunọ Nupojipetọ Jehovah dọ die: “Yẹn na diọnukunsọ we, hiẹ Gọgi E, yèdọ ahọvi daho Meṣẹki po Tubali po tọn. 4 Yẹn na lilẹ́ we pé bo na yí omlẹn lẹ do aglàn+ towe mẹ bo nasọ dọ̀n we tọ́n to pọmẹ hẹ awhànpa towe lẹpo,+ yèdọ osọ́ po osọ́nọ towe lẹ po he yemẹpo yí gigo do ṣinyọ́n, yèdọ pipli daho de he hẹn awọ̀yinu po gaglo* lẹ po he yemẹpo sọ nọ yí ohí lẹ zan; 5 Pẹlsia, Etiopia po Puti+ po topọ hẹ yé, yemẹpo wẹ sọ hẹn gaglo bo ṣinyọ́n ogangbakun; 6 Gomẹli po awhànfuntọ etọn lẹpo po, yèdọ whédo Togalma+ tọn he wá sọn fie to olá hugan to agewaji to pọmẹ hẹ awhànfuntọ etọn lẹpo—yèdọ gbẹtọ susu wẹ tin po hiẹ po.+

7 “‘“Wleawudai bo tin to aṣeji, hiẹ po awhànpa towe lẹpo po, yèdọ mẹhe pli do dè we lẹ, hiẹ nasọ yin awhàngán daho* yetọn.

8 “‘“Ayidonugo na yin nina we* to owhe susu lẹ godo. To owhe godo tọn lẹ mẹ, hiẹ na tọ́nawhàn aigba he omẹ etọn lẹ yin hinhẹngọwa sọn fie ohí ko hẹnnugble te lẹ, yèdọ mẹhe yin bibẹpli sọn gbẹtọ susu lẹ mẹ wá osó Islaeli tọn he ko yin hinhẹn gbọgbé na ojlẹ dindẹn lẹ ji. Mẹhe nọ nọ̀ aigba ehe ji lẹ yin hinhẹngọwa sọn gbẹtọ susu lẹ mẹ, yemẹpo wẹ sọ tin to jijọho mẹ.+ 9 Hiẹ na wá sọta yé taidi yujẹhọn de, hiẹ nasọ ṣinyọ́n aigba lọ ji taidi aslọ lẹ, yèdọ hiẹ po awhànfuntọ towe lẹpo po gọna gbẹtọ susu he topọ hẹ we lẹ.”’

10 “Nuhe Oklunọ Nupojipetọ Jehovah dọ die: ‘To azán enẹ gbè, linlẹn lẹ na wá ahun towe mẹ, hiẹ nasọ kàn ayiha ylankan de. 11 Hiẹ na dọmọ: “Yẹn na tọ́nawhàn osla he ma tin to hihọ́ glọ lẹ.*+ Yẹn na wá sọta mẹhe nọ nọ̀ jijọho mẹ matin tukla depope lẹ, mẹhe nọ nọ̀ osla he yè ma yí adó, dòtin kavi họngbo lẹ do basi hihọ́na lẹ mẹ lẹpo.” 12 Hiẹ na wàmọ nado bẹ ogblànnu susu yì, podọ nado tọ́nawhàn fie yin hinhẹn gbọgbé+ he mẹhe yè vọ́ bẹpli sọn akọta lẹ mẹ lẹ ko lẹkọ nado wá nọ,+ mẹhe to adọkunnu po nutindo lẹ po bẹpli+ bo nọ nọ̀ aigba ṣẹnṣẹn lẹ.

13 “‘Ṣeba,+ Dedani,+ ajọwatọ Talṣiṣi tọn lẹ+ po awhànfuntọ* etọn lẹpo po na dọna we dọ: “Be hiẹ na tọ́nawhàn aigba lọ nado bẹ ogblànnu susu yì wẹ? Be hiẹ ko pli awhànfuntọ towe lẹ nado bẹ fataka po sika po, nado yí adọkunnu lẹ po nutindo lẹ po podọ nado hò ogblànnu susu tlala yí wẹ ya?”’

14 “Enẹwutu, visunnu gbẹtọ tọn, dọ dọdai bo dọna Gọgi dọ, ‘Nuhe Oklunọ Nupojipetọ Jehovah dọ die: “To azán enẹ gbè, whenue omẹ ṣie Islaelivi lẹ na tin to jijọho mẹ, be hiẹ ma na yọnẹn wẹ ya?+ 15 Hiẹ na wá sọn nọtẹn towe, sọn fie to olá hugan to agewaji,+ yèdọ hiẹ po gbẹtọ susu he topọ hẹ we lẹ po, he yemẹpo hẹ osọ́ lẹ, yèdọ pipli daho de, awhànpa susu tlala de.+ 16 Hiẹ na wá sọta omẹ ṣie Islaelivi lẹ taidi aslọ he ṣinyọ́n aigba lọ ji. Hiẹ Gọgi E, to azán godo tọn lẹ mẹ, yẹn na hẹn we wá sọta aigba ṣie+ na akọta lẹ nido yọ́n mi to whenue yẹn na gbọn hiẹ gblamẹ klan dee do wiwe to nukun yetọn mẹ.”’+

17 “Nuhe Oklunọ Nupojipetọ Jehovah dọ die: ‘Be hiẹ ma wẹ yin mẹdopolọ he go yẹn dọho gando to azán he wayi lẹ mẹ gbọn devizọnwatọ ṣie lẹ gblamẹ, yèdọ yẹwhegán Islaeli tọn lẹ, he dọ dọdai na owhe susu dọ hiẹ na yin hinhẹnwa nado diọnukunsọ yé ya?’

18 “‘To azán enẹ gbè, yèdọ to gbeegbe Gọgi na tọ́nawhàn aigba Islaeli tọn,’ wẹ Oklunọ Nupojipetọ Jehovah dọ, ‘yẹn na biọ adi sinsinyẹn mẹ.+ 19 To homẹgble po adi sinsinyẹn ṣie po mẹ, yẹn na dọho; bọ aigba sisọsisọ daho de na tin to aigba Islaeli tọn ji to azán enẹ gbè. 20 Na yẹn tọn wutu, whèvi hùmẹ tọn lẹ, ohẹ̀ agahomẹ tọn lẹ, gbekanlin danji tọn lẹ, nuhe nọ lìn to aigba ji lẹpo po gbẹtọ he to aigba nukunmẹ lẹpo po na sisọ bọ osó lẹ na yin gbigbà hányán,+ okọ́ta lẹ na họliai podọ adó lẹpo nasọ họliai.’

21 “‘Yẹn na ylọ ohí de sọta ẹ to osó ṣie lẹpo ji,’ wẹ Oklunọ Nupojipetọ Jehovah dọ. ‘Sunnu dopodopo nasọ lilẹ́ ohí etọn pànta nọvisunnu etọn titi.+ 22 Yẹn na yí azọ̀nylankan+ po hùnsọndai po do hẹn whẹdida wá e ji;* yẹn nasọ ja jikun wududu, kẹ́nsu,+ miyọ́n+ po whèmi+ po do ewọ po awhànfun-gbẹ́ etọn lẹ po ji podọ do gbẹtọ susu he topọ hẹ ẹ lẹ ji.+ 23 Na nugbo tọn, yẹn na pagigona dee bo klan dee do wiwe bo nasọ hẹn dee zun yinyọnẹn to nukun akọta susu lẹ tọn mẹ; yé nasọ yọnẹn dọ yẹn wẹ Jehovah.’