Luti

2 Todin, Naomi tindo hẹnnumẹ asu etọn tọn de he yin adọkunnọ taun; Boazi+ wẹ dawe lọ nọ yin bo wá sọn whẹndo Elimelẹki tọn mẹ.

2 Luti Moabinu lọ dọna Naomi dọmọ: “Jaale, gbọ ma tọ́nyi ogle lẹ mẹ bo wéwélu+ to ohín jinukun tọn lẹ ṣẹnṣẹn to godo na mẹdepope he na do nukundagbe hia mi.” Enẹwutu, Naomi dọna ẹn dọmọ: “Yì, viyọnnu ṣie.” 3 Whenẹnu, ewọ tọ́nyi glemẹ bo jẹ wélu wé ji to godo na jibẹwawhétọ lẹ. Gbọn kosọ dali, e wá ogle Boazi tọn mẹ,+ mẹhe wá sọn whẹndo Elimelẹki+ tọn mẹ. 4 To ojlẹ dopolọ mẹ, Boazi lẹkọ sọn Bẹtlẹhẹm bo dọna jibẹwawhétọ lọ lẹ dọmọ: “Jehovah ni tin hẹ mì.” Yé sọ gblọn dọmọ: “Jehovah ni dona we.”

5 Enẹgodo, Boazi kanse dẹpẹ he nọ penukundo jibẹwawhétọ lọ lẹ go dọmọ: “Whẹndo tẹ mẹ wẹ jọja yọnnu ehe wá sọn?” 6 Dẹpẹ he nọ penukundo jibẹwawhétọ lọ lẹ go sọ gblọn dọmọ: “Jọja yọnnu Moabinu+ de wẹ, he hodo Naomi lẹkọ sọn aigba Moabi tọn ji.+ 7 E ko kanse dọ, ‘Jaale, be n’sọgan wéwélu+ to ohín* jinukun tọn he jibẹwawhétọ lẹ ko sán liai bo jodo godo lẹ ṣẹnṣẹn bosọ bẹ yé pli ya?’ Sọn afọnnu gbọ́n he e wá wẹ e ko to ote kakajẹ din he e ṣẹṣẹ wá sinai do yẹtẹn nado gbọjẹ vude.”

8 Whenẹnu, Boazi dọna Luti dọmọ: “Viyọnnu ṣie, dotó mi. A tọ́nyi nado wéwélu to ogle devo mẹ blo, mọ a sọ yì fidevo depope blo; gbọṣi jọja yọnnu ṣie lẹ pá fi.+ 9 Ze nukun towe do ogle he mẹ yé to jibẹwawhé te lọ ji bo to hihodo yé. N’ko degbena dẹpẹ lọ lẹ ma nado doalọ gowe.* Eyin nugbla hù we, nọ yì tọ̀zẹ́n lẹ kọ̀n bo nù sọn osin he dẹpẹ lọ lẹ ko dà mẹ.”

10 Whenẹnu, yọnnu lọ dẹ́ do odò bo ṣinyọ́n nukunmẹ ai bosọ dọna ẹn dọmọ: “Nawẹ yẹn wagbọn do mọ nukundagbe towe, podọ etẹwutu wẹ hiẹ do na mi ayidonugo, to whenuena e yindọ jonọ de wẹ yẹn?”+ 11 Boazi gblọnna ẹn dọmọ: “Linlin ko yin nina mi to gigọ́ mẹ gando nuhe a wà na asu-nọ̀ towe to okú asu towe tọn godo lẹpo go, podọ lehe a jo otọ́ towe, onọ̀ towe po otò hẹnnumẹ towe lẹ tọn po do nado yì mẹhe a ma ko yọnẹn dai lẹ ṣẹnṣẹn do.+ 12 Na Jehovah ni suahọ we na nuhe a ko wà lẹ,+ ale pipé* de nisọ yin nina we sọn Jehovah Jiwheyẹwhe Islaeli tọn dè, awà mẹhe tọn glọ hiẹ ko wá nado dín fibẹtado te.”+ 13 Yọnnu lọ sọ dọmọ: “Gbọ nukundagbe towe ni tin to ji e, oklunọ ṣie, na hiẹ ko miọnhomẹna mi bo ko sọ dọho jidevọnamẹ tọn na* devizọnwatọ towe, mahopọnna dọ yẹn ma tlẹ yin dopo to devizọnwatọ towe lẹ mẹ.”

14 To núdùdù whenu, Boazi dọna ẹn dọmọ: “Wá, dù sọn akla lọ mẹ, bo yí nùdo towe do siọ ovẹn vẹsin lọ.” Enẹwutu, ewọ sinai to jibẹwawhétọ lẹ pá. Dawe lọ sọ ba jinukun sisọ na ẹn bọ e dù gọ́ho bosọ pò vude dai. 15 To whenue e fọnṣite nado wéwélu,+ Boazi degbena dẹpẹ etọn lẹ dọmọ: “Mì gbọ ni wéwélu etlẹ yin to ohín* jinukun tọn he yin sinsánliai lẹ ṣẹnṣẹn, mì sọ doyana ẹn blo.+ 16 Mìwlẹ sọ dona hẹn ẹn diun dọ mì dọ̀n ohín jinukun tọn delẹ tọ́n na ẹn sọn dehe yin biblá do kọnu-kọnu lẹ mẹ bo jo yé do godo, na ewọ nido wéwélu etọn, podọ mì dọ nudepope nado hẹnalọdotena ẹn blo.”

17 Mọ wẹ yọnnu lọ zindonukọn nado to wélu-wé to ogle lọ mẹ do kakajẹ whèjai.+ To whenue e tùn nuhe e bẹpli gbọn wélu-wiwe dali lọ, e sù sọ nudi balekun efa dopo.* 18 Whenẹnu, e hẹn ẹn yì tòdaho lọ mẹ bọ asu-nọ̀ etọn mọ wélu he e ko wé lọ. Luti sọ de núdùdù he e pò dai+ to whenue e dùnú gọ́ho lọ tọ́n bo ze na ẹn.

19 Asu-nọ̀ etọn sọ kanse e dọmọ: “Fie wẹ a wéwélu te to egbé? Fitẹ wẹ a wazọ́n te? Na mẹhe na we ayidonugo ni yin didona.”+ Enẹwutu, e dọhona asu-nọ̀ etọn gando mẹhe e wazọ́n hẹ lọ go dọmọ: “Boazi wẹ dawe he n’wazọ́n hẹ to egbé lọ nọ yin.” 20 Whenẹnu, Naomi dọna ovisi etọn dọmọ: “Ewọ ni yin didona gbọn Jehovah dali, mẹhe ma gboawupo to owanyi nugbo etọn mẹ hlan mẹhe togbẹ̀ po mẹhe ko kú lẹ po.”+ Naomi zindonukọn dọmọ: “Hẹnnumẹ mítọn wẹ dawe lọ.+ Ewọ yin dopo to mẹflitọ+ mítọn lẹ mẹ.”* 21 Luti Moabinu lọ sọ dọmọ: “Dawe lọ sọ dọna mi dọ, ‘Gbọṣi azọ́nwatọ ṣie lẹ pá fi kakajẹ whenue yé na ko dotana jibẹwawhé ṣie pete.’”+ 22 Naomi dọna Luti ovisi etọn dọmọ: “Viyọnnu ṣie, e pọnte dọ hiẹ ni tọ́nyi hodo jọja yọnnu etọn lẹ hú nado yin kọgbidina to ogle devo mẹ.”

23 Enẹwutu, e gbọṣi jọja yọnnu Boazi tọn lẹ pá bo wéwélu kakajẹ whenue jibẹwawhé balekun tọn+ po jibẹwawhé likun tọn po wá vivọnu. E sọ zindonukọn nado nọ nọ̀ asu-nọ̀ etọn dè.+