2 Kọlintinu lẹ

6 Dile mí to azọ́nwa dopọ hẹ ẹ,+ mí sọ to tudohomẹna mì ma nado kẹalọyi nukundagbe majẹhẹ Jiwheyẹwhe tọn bo gbọ lẹndai lọ go.+ 2 Na ewọ dọmọ: “Yẹn sè towe to ojlẹ alọkẹyi tọn mẹ, yẹn sọ gọalọna we to azán whlẹngán tọn gbè.”+ Pọ́n! Din wẹ ojlẹ alọkẹyi tọn lọ na taun tọn. Pọ́n! Din wẹ azán whlẹngán tọn lọ.

3 Mí ma to ahlidanu depope hẹnwa to aliho depope mẹ, na lizọnyizọn mítọn ma nado yin homọdọdego;+ 4 ṣigba míwlẹ nọ do mídelẹ hia taidi lizọnyizọnwatọ Jiwheyẹwhe tọn lẹ to aliho lẹpo mẹ,+ gbọn akọndidona nususu dali, gbọn nukunbibia lẹ dali, gbọn ojlẹ nuhudo tọn lẹ dali, gbọn awusinyẹnnamẹnu lẹ dali,+ 5 gbọn hihò lẹ dali, gbọn gànpamẹninọ lẹ dali,+ gbọn akọndona bẹwlu lẹ dali, gbọn azọ́n sinsinyẹn wiwà dali, gbọn amlọnmadọ́ to zánmẹ dali, gbọn ojlẹ onú ma dù tọn lẹ dali;+ 6 gbọn wiwejininọ dali, gbọn oyọnẹn dali, gbọn homẹfa dali,+ gbọn homẹdagbe dali,+ gbọn gbigbọ wiwe dali, gbọn owanyi matin yẹnuwiwa dali,+ 7 gbọn ohó nugbo didọ dali, gbọn huhlọn Jiwheyẹwhe tọn dali;+ gbọn adánwanu dodowiwa tọn lẹ+ hinhẹn to adusilọ* po amiyọnlọ* mẹ po gblamẹ, 8 gbọn gigo po winyan po gblamẹ, gbọn linlin ylankan po linlin dagbe po gblamẹ. Mí nọ yin pinpọnhlan di mẹklọtọ, ṣogan nugbodọtọ wẹ mí, 9 taidi mẹhe ma diyin, ṣogan mí yin yinyọnẹn ganji, taidi mẹhe jẹna okú, ṣogan pọ́n! mí to ogbẹ̀,+ taidi mẹhe yin yasana,* ṣogan mí ma yin jijona okú,+ 10 taidi mẹhe to awubla, ṣigba nọ to ayajẹ tẹgbẹ, taidi wamọnọ, ṣigba nọ to mẹsusu hẹn zun adọkunnọ, taidi mẹhe ma tindo nude, ṣogan tindo nulẹpo.+

11 Mì Kọlintinu lẹ emi, míwlẹ dọhona mì madoadúdẹji, mí sọ hùn ahun mítọn donuvo. 12 Mí ma dọ̀n owanyi sisosiso mítọn dogodo sọn mì dè gba,+ ṣigba mìwlẹ wẹ glọnalina mìde ma nado do owanyi sisosiso hia míwlẹ. 13 Enẹwutu, to aliho dopolọ mẹ—yẹn to hodọ taidi hlan ovi ṣie lẹ—mìlọsu ga, mì hùn ahun mìtọn lẹ donuvo.*+

14 Mì biọ zẹgẹ he ma sọzẹn de glọ* hẹ mayisenọ lẹ blo.+ Na haṣinṣan tẹwẹ dodowiwa po sẹ́nhẹngba po tindo?+ Kavi mahẹ tẹwẹ hinhọ́n tindo hẹ zinvlu?+ 15 Humọ, kọndopọ tẹwẹ tin to Klisti po Beliali* po ṣẹnṣẹn?+ Kavi kọndopọ* tẹwẹ yisenọ* de tindo hẹ mayisenọ de?+ 16 Podọ kọndopọ tẹwẹ tẹmpli Jiwheyẹwhe tọn tindo hẹ boṣiọ lẹ?+ Na tẹmpli Jiwheyẹwhe ogbẹ̀nọ tọn de wẹ míwlẹ yin;+ kẹdẹdile Jiwheyẹwhe dọ do dọmọ: “Yẹn na nọ nọ̀ ṣẹnṣẹn yetọn+ bo na nọ zinzọnlin to ṣẹnṣẹn yetọn, yẹn nasọ yin Jiwheyẹwhe yetọn, bọ yewlẹ na yin omẹ ṣie lẹ.”+ 17 “‘Enẹwutu, mì tọ́n sọn ṣẹnṣẹn yetọn bo klan mìde dovo,’ wẹ Jehovah* dọ, ‘mì sọ doalọ onú mawé go ba blo’”;+ “‘yẹn nasọ kẹalọyi mì.’”+ 18 “‘Podọ yẹn na lẹzun otọ́ de na mì+ bọ mìwlẹ na lẹzun visunnu lẹ po viyọnnu lẹ po na mi,’+ wẹ Jehovah* Ganhunupotọ lọ dọ.”