2 Ahọlu lẹ

2 Whenue Jehovah jlo na hẹn Elija+ hẹji yì olọn mẹ* to yujẹhọn de mẹ,+ Elija po Eliṣa+ po tọ́nyi sọn Gilgali.+ 2 Elija sọ dọna Eliṣa dọmọ: “Jaale nọte fi, na Jehovah ko do mi hlan Bẹtẹli.” Ṣigba, Eliṣa dọmọ: “Dile Jehovah togbẹ̀ podọ dile hiẹ lọsu* togbẹ̀, yẹn ma na jo we do.” Enẹwutu, yé jẹte yì Bẹtẹli.+ 3 Whenẹnu wẹ visunnu yẹwhegán lẹ tọn* he to Bẹtẹli lẹ tọ́n wá Eliṣa dè bo dọna ẹn dọmọ: “Be a ka yọnẹn dọ Jehovah na ze klunọ towe yì to egbé bọ e ma nasọ yin ogán towe ba ya?”+ Ewọ sọ gblọn dọmọ: “Yẹnlọsu ko yọnẹn. Mì nabọẹ.”

4 Todin, Elija dọna ẹn dọmọ: “Eliṣa, jaale nọte fi, na Jehovah ko do mi hlan Jẹliko.”+ Ṣigba, ewọ dọmọ: “Dile Jehovah togbẹ̀ podọ dile hiẹ lọsu* togbẹ̀, yẹn ma na jo we do.” Enẹwutu, yé wá Jẹliko. 5 Visunnu yẹwhegán lẹ tọn he to Jẹliko lẹ sọ dọnsẹpọ Eliṣa bo dọna ẹn dọmọ: “Be a ka yọnẹn dọ Jehovah na ze klunọ towe yì to egbé bọ e ma nasọ yin ogán towe ba ya?” Ewọ sọ gblọn dọmọ: “Yẹnlọsu ko yọnẹn. Mì nabọẹ.”

6 Todin, Elija dọna ẹn dọmọ: “Jaale nọte fi, na Jehovah ko do mi hlan Jọdani.” Ṣigba, e dọmọ: “Dile Jehovah togbẹ̀ podọ dile hiẹ lọsu* togbẹ̀, yẹn ma na jo we do.” Enẹwutu, yé omẹ awe lẹ dedo. 7 Visunnu yẹwhegán lẹ tọn 50 sọ yì bo ṣite to olá bosọ to yé pọnhlan dile yé omẹ awe lẹ ṣite to Jọdani tó. 8 Whenẹnu wẹ Elija ze awugbó vonọtaun+ etọn bo wló e bosọ yí i do linú otọ̀ lọ bọ e má hlan adusi podọ hlan amiyọn, yé omẹ awe lẹ sọ dasá wayi gbọn aigba húhú ji.+

9 Tlolo he yé ko dasá fó, Elija dọna Eliṣa dọmọ: “Biọ nuhe a jlo dọ ma wà na we whẹpo yẹn nido yin zize yì sọn dè we.” Eliṣa sọ dọmọ: “Jaale, be n’gán mọ mimá awe+ gbigbọ towe tọn yí ya?”+ 10 Ewọ sọ gblọnna ẹn dọmọ: “Nuhe a biọ lọ vẹawu. Eyin a mọ mi to whenue n’na yin zize yì sọn dè we, be e na yì domọ na we; ṣigba eyin a ma mọ mi, be e ma na yì domọ.”

11 Dile yé to zọnlinzin bo to hodọ to aliji, osọ́-kẹkẹ miyọ́nnọ de po osọ́ miyọ́nnọ lẹ po+ wá klan yé omẹ awe lẹ bọ Elija hẹji yì olọn mẹ* to yujẹhọn mẹ.+ 12 Eliṣa sọ to pinpọn bo to awhádo dọmọ: “Otọ́ ṣie, otọ́ ṣie! Osọ́-kẹkẹ Islaeli tọn po osọ́nọ etọn lẹ po!”+ Whenue e masọ sọgan mọ ẹn hlan ba, e hẹn awù edetiti tọn lẹ bo tlẹ́n yé do awe.+ 13 Enẹgodo, e ze awugbó vonọtaun+ Elija tọn he ko flẹ sọn okọ̀ na ẹn lọ bo lẹkọyi ṣite to Jọdani tó. 14 E sọ yí awugbó vonọtaun Elija tọn he ko flẹ sọn okọ̀ na ẹn lọ do linú otọ̀ lọ bo dọmọ: “Fie wẹ Jehovah, yèdọ Jiwheyẹwhe Elija tọn te?” Whenue e linú otọ̀ lọ, tọ̀sisa lọ má hlan adusi podọ hlan amiyọn bọ Eliṣa dasá wayi.+

15 Whenue visunnu yẹwhegán lẹ tọn he to Jẹliko lẹ mọ ẹn hlan olá, yé dọmọ: “Gbigbọ Elija tọn ko wá Eliṣa ji.”+ Enẹwutu, yé tọ́nyi pé e bosọ dẹ́ do odò na ẹn. 16 Yé sọ dọna ẹn dọmọ: “Sunnu nugopetọ 50 delẹ tin tofi hẹ devizọnwatọ towe lẹ. Jaale, gbọ yé ni yì dín klunọ towe mọ. Vlavo gbigbọ* Jehovah tọn na ko ze e yiaga bo dlan ẹn do osó de ji kavi agbàdo de mẹ.”+ Ṣigba, ewọ dọmọ: “Mì do yé hlan blo.” 17 Etomọṣo, yé to vivẹ̀ ẹ kaka bọ agbọ́ yetọn pé e bọ e gbọ bo dọmọ: “Mì do yé hlan.” Yé sọ do sunnu 50 lọ lẹ hlan, bọ yé to dindin in mapote na azán atọ̀n, ṣigba bo ma mọ ẹn. 18 Whenue yé lẹkọwa e dè, ewọ tin to Jẹliko.+ E sọ dọna yé dọmọ: “Be n’ma ko dọna mì dai dọ mì ni ma yì blo ya?”

19 To nukọn mẹ, sunnu tòdaho lọ tọn lẹ dọna Eliṣa dọmọ: “Klunọ ṣie lọsu sọgan mọdọ lẹdo dagbe de mẹ wẹ tòdaho lọ te;+ ṣigba osin lẹdo lọ tọn ma yọ́n, mọ aigba lọ ma nọ de sinsẹ́n tọ́n.”* 20 Ewọ sọ gblọn dọmọ: “Mì ze agbán yọyọ pẹvi de wá na mi bo yí ojẹ̀ do e mẹ.” Yé sọ ze wá na ẹn. 21 E sọ tọ́nyi asisa osin lọ tọn kọ̀n bo kọ̀n ojẹ̀ do e mẹ+ bosọ dọmọ: “Nuhe Jehovah dọ die, ‘Yẹn ko hẹnazọ̀ngbọna osin ehe. E ma nasọ hẹn okú wá kavi hẹnmẹ zun wẹnsinọ* ba.’” 22 Osin lọ sọ yin azọ̀nhẹngbọna kakajẹ egbé, sọgbe hẹ ohó he Eliṣa dọ.

23 Ewọ sọ hẹji sọn finẹ yì Bẹtẹli. Dile e to yìyì to aliji, yọpọ sunnu delẹ tọ́n sọn tòdaho lọ mẹ bo jẹ ṣinṣàn ẹn kò ji+ bosọ to didọna ẹn mapote dọmọ: “Hẹji yì, hiẹ ahọ̀n mimọ́nọ! Hẹji yì, hiẹ ahọ̀n mimọ́nọ!” 24 To godo mẹ, e lilẹ́ bo pọ́n yé bosọ hodẹ̀do yé to oyín Jehovah tọn mẹ. Beali+ asi awe sọ tọ́n wá sọn zungbo mẹ bo tlẹ́n ovi 42 do flinflin sọn ovi lọ lẹ mẹ.+ 25 Ewọ sọ zindonukọn sọn finẹ yì Osó Kalmẹli kọ̀n,+ podọ sọn finẹ e lẹkọyi Samalia.