Be Hiẹ Yọ́n Pinpẹn Yisenọ Hatọ Yọnhonọ lẹ Tọn Ya?

TO WHENUENA Islaelivi hohowhenu tọn lẹ tin to kanṣiṣa alẹnu tọn de mẹ hẹ Jiwheyẹwhe, yé yin gbedena dọmọ: “Hiẹ na fọ́n ṣite to ota owhànọ lọ nukọn, bo gbògbéna nukunmẹ omẹ yọnhonọ lọ tọn, hiẹ nasọ nọ dibusi Jiwheyẹwhe towe.” (Levitiku 19:32) Enẹwutu, sisi nina yọnhonọ lẹ yin azọngban wiwe de, bo tindo kanṣiṣa hẹ taliliaina Jiwheyẹwhe. Dile etlẹ yindọ Klistiani lẹ ma tin to Osẹ́n Mose tọn glọ to egbehe ba, e nọ flinnu mí dọ Jehovah nọ yọ́n pinpẹn devizọnwatọ etọn yọnhonọ lẹ tọn bo nọ pọ́n yé di nuhọakuẹ. (Howhinwhẹn lẹ 16:31; Heblu lẹ 7:18) Be mí tindo pọndohlan dopolọ hẹ Jehovah ya? Be mí nọ yọ́n pinpẹn mẹmẹsunnu po mẹmẹyọnnu mítọn lẹ po tọn he yin Klistiani yọnhonọ lẹ ya?

Eliṣa Yọ́n Pinpẹn Họntọn Yọnhonọ Etọn Tọn

Dopo to kandai Biblu tọn lẹ mẹ he zinnudo sisi didohia yọnhonọ lẹ ji yin mimọ to owe Ahọlu lẹ Awetọ mẹ. E basi zẹẹmẹ lehe yẹwhegán jọja Eliṣa jẹ otẹn yẹwhegán Elija tọn mẹ do. Gbadopọnna nuhe jọ to azán godo tọn Elija tọn gbè taidi yẹwhegán de to ahọluduta whẹndo-ao Islaeli tọn mẹ.

To azán enẹ gbè, Jehovah degbena yẹwhegán yọnhonọ lọ nado zingbejizọnlin sọn Gilgali yì Bẹtẹli, podọ sọn Bẹtẹli yì Jẹliko, podọ sọn Jẹliko yì Otọ̀ Jọdani tọn kọ̀n. (2 Ahọlu lẹ 2:1, 2, 4, 6) To gbejizọnlin nudi kilomẹtlu 50 tọn enẹ whenu, whla atọ̀n wẹ Elija dọna Eliṣa nado lẹkọ sọn hihodo e mẹ. Ṣigba, kẹdẹdile jọja Luti gbẹ́ gbidigbidi to owhe kanweko susu die jẹnukọn ma nado lẹkọ sọn Naomi godo do, mọwẹ Eliṣa lọsu gbẹ́ nado lẹkọ sọn yẹwhegán yọnhonọ lọ godo do niyẹn. (Luti 1:16, 17) Whla atọ̀n wẹ Eliṣa dọ po nujikudo po dọmọ: “Le OKLUNỌ to ogbẹ̀, podọ le alindọn towe sọ to ogbẹ̀, yẹn ma na jo we do gba.” (2 Ahọlu lẹ 2:2, 4, 6) To ojlẹ enẹ mẹ, Eliṣa ko gọalọna Elija na owhe ṣidopo. Ṣogan, e gbẹ́ jlo nado wà sinsẹ̀nzọn hẹ Elija dile e sọgan dẹnsọ. Kandai lọ tlẹ yidogọ dọmọ: “E sọ wá jọ, le yé gbẹsọ to yìyì, bo to hodọ, wẹ, doayi e go, . . . Elija sọ hẹji.” (Wefọ 11) Elija po Eliṣa po to hodọ dopọ kakajẹ ojlẹ godo tọn lizọnyizọn Elija tọn mẹ to Islaeli. E họnwun dọ, yẹwhegán jọja lọ jlo nado sè ayinamẹ po tulinamẹ susu po sọn yẹwhegán yọnhonọ, he tindo numimọ taun lọ dè. Na jide tọn, e yọ́n pinpẹn họntọn yọnhonọ etọn tọn.

‘Taidi Otọ́ po Onọ̀ Po’

E bọawu nado mọ nuhewutu Eliṣa yiwanna yẹwhegán yọnhonọ lọ taidi họntọn de—etlẹ yin taidi otọ́ gbigbọmẹ tọn de. (2 Ahọlu lẹ 2:12) Whẹpo azọ́ndenamẹ Elija tọn do wá vivọnu to Islaeli, e dọna Eliṣa dọmọ: “Biọ nuhe yẹn na wà na we, whẹpo yẹn [ni] do yin zize sọn dè we.” (Wefọ 9) Enẹwutu ehe dohia dọ kakajẹ opodo, Elija hò dagbemẹninọ gbigbọmẹ mẹhe na jẹ otẹn etọn mẹ tọn pọ́n bọ nukọnyiyi azọ́n Jiwheyẹwhe tọn tọn sọ duahunmẹna ẹn.

To egbehe ga, homẹ mítọn nọ hùn nado mọ mẹtọnhopọn taidi otọ́ po onọ̀ po tọn mọnkọtọn sọn mẹmẹsunnu po mẹmẹyọnnu mítọn mẹhomẹ lẹ po dè dile yé nọ má oyọnẹn po nuyọnẹn yetọn lẹ po hẹ jọja lẹ. Di dohia, mẹdezejotọ he ko wà sinsẹ̀nzọn na whenu dindẹn to wekantẹn alahọ Kunnudetọ Jehovah tọn lẹ tọn mẹ lẹ nọ desọn ojlo mẹ nado gọalọna hagbẹ whẹndo Bẹtẹli tọn yọyọ lẹ nado yin azọ́nyọnẹntọ dogọ to azọ́n heyin nina yé mẹ. Mọdopolọ, nugopọntọ tomẹyitọ lẹ po asi yetọn lẹ po he ko to agun lẹ dlapọn na owhe susu lẹ nọ yí ayajẹ do má numimọ susugege yetọn hẹ mẹhe to azọ́nplọn nado lẹzun lizọnyizọnwatọ tomẹyitọ lẹ. Humọ, to agun Kunnudetọ Jehovah tọn lẹ tọn mẹ lẹdo aihọn pé, mí tindo mẹmẹsunnu po mẹmẹyọnnu mẹhomẹ lẹ po he ko to Jehovah sẹ̀n po nugbonọ-yinyin po na owhe susu lẹ podọ he nọ yí homẹhunhun do má nuyọnẹn yọn-na-yizan po numimọ yetọn lẹ po hẹ hagbẹ yọyọ agun lọ tọn lẹ.—Howhinwhẹn lẹ 2:7; Filippinu lẹ 3:17; Titu 2:3-5.

Mẹtọnhopọn sọn ahun mẹ wá he Klistiani mẹhomẹ yiwanna ehelẹ to didohia nọ hẹn sisi didohia yé yin nuhe bọawu. Enẹwutu, mì gbọ mí ni hodo apajlẹ Eliṣa tọn nado nọ do pinpẹn nutọn sisosiso hia na yisenọ hatọ yọnhonọ lẹ. Dile apọsteli Paulu flinnu mí do, mì gbọ mí ni nọ yinuwahẹ “mẹho de . . . di otọ́” podọ “yọnnu mẹho lẹ di onọ̀.” (1 Timoti 5:1, 2) Gbọn mọwiwa dali, mí na to mahẹ daho tindo to nukọnyiyi dagbe po whinwhẹ́n agun Klistiani tọn po mẹ lẹdo aihọn pé.

[Yẹdide to weda 30]

Eliṣa jlo nado wà sinsẹ̀nzọn hẹ Elija dile e sọgan dẹnsọ

[Yẹdide to weda 31]

Jọja lẹ nọ duale Klistiani yọnhonọ lẹ tọn taun