1 Samuẹli

25 To ojlẹ de godo, Samuẹli+ kú; omẹ Islaeli tọn lẹpo sọ pli dopọ nado nọ aluẹmẹ na ẹn podọ nado dì i do owhé etọn gbè to Lama.+ Enẹgodo, Davidi fọ́n bo jẹte yì danfafa Palani tọn ji.

2 Todin, dawe de tin to Maoni+ he nọ wazọ́n to Kalmẹli.*+ Dawe lọ yin adọkunnọ taun; e tindo lẹngbọ 3 000 po gbọgbọẹ 1 000 po, podọ to ojlẹ enẹ mẹ, e to ofún pà na lẹngbọ etọn lẹ to Kalmẹli. 3 Nabali+ wẹ dawe lọ nọ yin, bọ asi etọn nọ yin Abigaili.+ Asi lọ yin zinzintọ bosọ yọnwhanpẹ, ṣigba asu lọ, he yin Kalẹbinu+ de yin fifiẹtọ bo tindo walọ ylankan.+ 4 Davidi sè to danfafa ji dọ Nabali to ofún pà na lẹngbọ etọn lẹ. 5 Enẹwutu, Davidi do jọja sunnu ao hlan ẹn, Davidi sọ dọna jọja sunnu lọ lẹ dọmọ: “Mì hẹji yì Kalmẹli, podọ eyin mì jẹ Nabali dè, mì kàn dagbemẹninọ etọn biọ do ota ṣie mẹ. 6 Enẹgodo, mì dọna ẹn dọ, ‘Hiẹ ni nọgbẹ̀ dẹn podọ jijọho ni tin na we, na whédo towe podọ na nuhe a tindo lẹpo. 7 Todin, n’sè dọ a to ofún pà na lẹngbọ towe lẹ. To whenue lẹngbọhọtọ towe lẹ tin hẹ mí, mí ma wà danú de do yé+ podọ nudepope ma bu do yé to ojlẹ he yé yí do nọ Kalmẹli lẹpo mẹ. 8 Kanhose dẹpẹ towe lẹ, yé nasọ dọna we. Gbọ jọja sunnu ṣie lẹ ni mọ nukundagbe towe, na ojlẹ ayajẹ tọn mẹ* wẹ mí wá dè we te. Jaale, na nudepope he alọ towe plá devizọnwatọ towe lẹ po visunnu towe Davidi po.’”+

9 Jọja sunnu Davidi tọn lẹ sọ yì bo dọ ehe lẹpo na Nabali to yinkọ Davidi tọn mẹ. Whenue yé dọho fó, 10 Nabali gblọnna devizọnwatọ Davidi tọn lẹ dọmọ: “Mẹnu wẹ yin Davidi, podọ mẹnu wẹ yin visunnu Jẹsse tọn? To azánvi ehelẹ mẹ, devizọnwatọ susu wẹ to hinhọ̀n sọn ogán yetọn lẹ glọ.+ 11 Be yẹn na yí núdùdù ṣie po osin ṣie po, gọna olàn he n’hù na fúnpatọ ṣie lẹ bo yí i na sunnu he wá sọn fihe mẹde ma yọnẹn lẹ wẹ ya?”

12 Jọja sunnu Davidi tọn lẹ sọ lẹkọwa bo dọ ohó ehe lẹpo na ẹn. 13 To afọdopolọji, Davidi dọna sunnu etọn lẹ dọmọ: “Mìmẹpo ni blá ohí mìtọn dogo!”+ Enẹwutu, yemẹpo blá ohí yetọn dogo, Davidi lọsu sọ blá ohí etọn dogo, bọ nudi sunnu 400 hẹji dedo po Davidi po bọ sunnu 200 gbọṣi ai to agbàn lẹ kọ̀n.

14 To ojlẹ enẹ gblamẹ, dopo to devizọnwatọ lẹ mẹ ko na linlin Abigaili, asi Nabali tọn dọmọ: “Pọ́n! Davidi do wẹnsagun lẹ hlan sọn danfafa ji nado wá biọ jijọho na ogán mítọn, ṣigba awhá wẹ ewọ bẹ do yé ji bo zun yé.+ 15 Dagbe kẹdẹ wẹ sunnu lọ lẹ ka wà na mí. Yé ma wà danú de do mí pọ́n gbede, podọ nudepope ma bu do mí to ojlẹ he mí yizan dopọ hẹ yé to danji lọ lẹpo whenu.+ 16 Yé taidi adó hihọ́-basinamẹ tọn de lẹdo mí to okle po ozán po, to ojlẹ he mí yizan hẹ yé bo to lẹngbọpa lọ yìn lẹpo whenu. 17 Todin, yọ́n nuhe a dona wà, na yè ko magbe nugbajẹmẹji tọn sọta ogán mítọn po whédo etọn pete po,+ podọ ewọ yin nuvọ́nọ*+ sọmọ bọ mẹdepope ma gán dọho hẹ ẹ.”

18 Enẹwutu, Abigaili+ yawu bẹ akla 200, ovẹn ozẹ́n daho awe, lẹngbọ he ko yin awuwlena atọ́n, jinukun sisọ ojlẹnu sea tọn* atọ́n, akla hìhì ovẹn sinsẹ́n tọn 100 po akla hìhì ovò sinsẹ́n he yin finfinyọ́n dopọ tọn 200 po bo bẹ popolẹpo do kẹtẹkẹtẹ lẹ ji.+ 19 Whenẹnu, e dọna devizọnwatọ etọn lẹ dọmọ: “Mì jẹnukọnna mi zọnmii; yẹn na to godo na mì.” Amọ́, e ma dọ nudepope na asu etọn Nabali.

20 Dile yọnnu lọ to kẹtẹkẹtẹ etọn ji bo to tejẹ gbọn oyẹ̀ osó lọ tọn glọ, whenẹnu pẹẹ wẹ Davidi po sunnu etọn lẹ po to tejẹ ja e dè, yọnnu lọ sọ pé yé. 21 Todin, Davidi ko to didọ dọmọ: “Ovọ́ mẹ wẹ n’basi hihọ́na nutindo dawe ehe tọn lẹpo te to danfafa ji. Dopo tata to nutindo etọn lẹ mẹ ma bu,+ ṣogan oylan wẹ e yí do suahọ dagbe tọn na mi.+ 22 Na Jiwheyẹwhe ni sayana kẹntọ Davidi tọn lẹ* sinsinyẹn eyin n’dike bọ dopo tata to sunnu* etọn lẹ mẹ pò togbẹ̀ jẹ wunkẹngbe afọnnu.”

23 Whenue Abigaili mọ Davidi, e yawu jẹte sọn kẹtẹkẹtẹ lọ ji bo dẹ́ do odò pete bosọ ṣinyọ́n nukunmẹ ai to Davidi nukọn. 24 Enẹgodo, e jẹklo to afọ Davidi tọn lẹ kọ̀n bo dọmọ: “Oklunọ ṣie, dike whẹgbledomẹ lọ ni tin to ota na mi; dike deviyọnnu towe ni dọhona we, na hiẹ ni dotoaina ohó deviyọnnu towe tọn lẹ. 25 Jaale oklunọ ṣie, a na ayidonugo Nabali nuvọ́nọ enẹ blo,+ na yinkọ etọn wẹ e nọ yinuwa sọgbe hẹ. Nabali* wẹ e nọ yin, podọ gúgú wẹ to yadona ẹn. Ṣigba, yẹn deviyọnnu towe ma mọ jọja sunnu oklunọ ṣie tọn lẹ he a dohlan gba. 26 Enẹwutu oklunọ ṣie, dile Jehovah togbẹ̀ podọ dile hiẹ lọsu* togbẹ̀, Jehovah wẹ hẹnalọdotena we+ sọn hùnhọ́dudu+ mẹ podọ sọn alọ towe titi yíyí do yiahọsu* mẹ. Na kẹntọ towe lẹ po mẹhe to oylan oklunọ ṣie tọn dín lẹ po ni lẹzun Nabali nkọ. 27 Todin, gbọ nunina*+ he deviyọnnu towe ko hẹnwa na oklunọ ṣie ni yin bibẹ na jọja sunnu he to hihodo oklunọ ṣie lọ lẹ.+ 28 Jaale, jo nuṣiwa deviyọnnu towe tọn na ẹn, na Jehovah na hẹn whédo oklunọ ṣie tọn dẹn-to-aimẹ dandan,+ na awhàn Jehovah tọn lẹ fùn wẹ oklunọ ṣie te,+ podọ oylan depope ma yin mimọ to hiẹ mẹ to gbẹzan towe lẹpo mẹ.+ 29 Eyin mẹde fọ́n nado dómọna we bo dín okú* towe, ogbẹ̀* oklunọ ṣie tọn na yin biblá do aglò ogbẹ̀ tọn mẹ to hihọ́ mẹ to Jehovah Jiwheyẹwhe towe dè, ṣigba ogbẹ̀* kẹntọ towe lẹ tọn wẹ ewọ na dlan di zannu lẹ sọn akòtopẹ́ de mẹ.* 30 Podọ to whenue Jehovah na ko wà nudagbe he e dopà etọn na oklunọ ṣie lọ lẹpo bo na ko de we taidi nukọntọ do Islaeli ji+ pó godo, 31 e ma na wá vẹna we kavi doadi na we* to ahun towe mẹ dọ hiẹ oklunọ ṣie ko sọ̀n ohùn dai matin whẹwhinwhẹ́n de bo ko sọ yí alọ towe titi do yiahọsu.*+ To whenue Jehovah na ko kọ̀n dagbe do oklunọ ṣie ji pó godo, hiẹ ni flin deviyọnnu towe.”

32 Whenẹnu, Davidi dọna Abigaili dọmọ: “Pipà wẹ na Jehovah Jiwheyẹwhe Islaeli tọn, mẹhe do we hlan to egbé nado wá pé mi! 33 Podọ Jiwheyẹwhe ni dona zinzin he a tindo! Ewọ nisọ dona we, na ali he a glọn na mi to egbé ma nado duhùnhọ+ podọ ma nado yí alọ ṣie titi do yiahọsu.* 34 Eyin e ma yinmọ, dile Jehovah Jiwheyẹwhe Islaeli tọn he hẹnalọdotena mi ma nado wà danú do we+ lọ togbẹ̀, eyin hiẹ ma ko yawu wá pé mi+ wẹ, dopo tata to sunnu* Nabali tọn lẹ mẹ ma na pò to wunkẹngbe afọnnu.”+ 35 Whenẹnu, Davidi kẹalọyi nuhe yọnnu lọ hẹnwa na ẹn lẹ bo dọna ẹn dọmọ: “Hẹji yì owhé towe gbè to jijọho mẹ. Pọ́n, n’ko dotoaina we, yẹn nasọ hẹn obiọ towe di.”

36 Enẹgodo, Abigaili lẹkọyi Nabali dè, mẹhe to hùnwhẹ basi to whégbè di ahọlu de, Nabali* sọ to ayajẹ bo ko nùahànmú petepete. Yọnnu lọ masọ dọ nudepope na ẹn kakajẹ wunkẹngbe afọnnu. 37 To wunkẹngbe afọnnu, whenue ahàn ko họ́n na Nabali godo, asi ẹ dọ onú ehelẹ na ẹn. Ahun etọn kú, awú sọ kú i pete bọ e taidi zannu de. 38 To nudi azán ao godo, Jehovah linú Nabali bọ e kú.

39 Whenue Davidi sè dọ Nabali ko kú, e dọmọ: “Pipà wẹ na Jehovah, mẹhe ko yiavùnlọna mi+ sọn vlẹko Nabali tọn+ si bo ko hẹn devizọnwatọ etọn ma nado wà nuylankan depope,+ podọ Jehovah ko hẹn oylan Nabali tọn wá ewọ lọsu titi ji!” Enẹgodo, Davidi dowẹn hlan nado dọhona Abigaili, na e nido lẹzun asi etọn. 40 Enẹwutu, devizọnwatọ Davidi tọn lẹ wá Abigaili dè to Kalmẹli bo dọna ẹn dọmọ: “Davidi wẹ do mí hlan dè we, na hiẹ nido lẹzun asi etọn.” 41 Ewọ sọ fọ́n to afọdopolọji bo ṣinyọ́n nukunmẹ ai bosọ dọmọ: “Afanumẹ towe ko wleawufo nado lẹzun devizọnwatọ de he na nọ klọ́ afọ+ na devizọnwatọ oklunọ ṣie tọn lẹ.” 42 Whenẹnu, Abigaili+ yawu fọ́n bo hẹ kẹtẹkẹtẹ etọn ji bọ atọ́n to deviyọnnu etọn lẹ mẹ to zọnlinzin hodo e; ewọ sọ hodo wẹnsagun Davidi tọn lẹ bo lẹzun asi etọn.

43 Davidi ko sọ dà Ahinoami+ sọn Jezleẹli,+ bọ yọnnu awe lọ lẹ lẹzun asi etọn.+

44 Ṣigba, Sauli ko yí viyọnnu etọn Mikali,+ yèdọ asi Davidi tọn na Palti+ visunnu Laiṣi tọn, mẹhe wá sọn Galimi.