Yin Whinwhàn Gbọn “Azọ́n Huhlọnnọ Jiwheyẹwhe Tọn” lẹ Dali
“Mí to sisè yé to ohó azọ́n huhlọnnọ Jiwheyẹwhe tọn dọ to ogbè mítọn mẹ.”—OWALỌ LẸ 2:11.
1, 2. Onú ayidego tọn tẹwẹ jọ to Jelusalẹm to Pẹntikọsti owhe 33 W.M.?
TO AFỌNNU amakikọ-whenu tọn dopo to owhe 33 W.M., onú ayidego tọn de jọ do pipli sunnu po yọnnu lẹ tọn de po, yèdọ devi Jesu Klisti tọn lẹ he pli do abò de mẹ to Jelusalẹm go. “Ogbè de sọn olọn mẹ wá ajiji di ogbè jẹhọn sinsinyẹn tọn, bosọ gọ́ ohọ̀ he mẹ yé sinai te. Owhẹ̀ odẹ́ tọn taidi miyọ́n tọn tọ́n do yé ji . . . , yé omẹ pó sọ gọ́ na [gbigbọ wiwe] bosọ ṣẹ ogbè devo yí do to hodọ.”—Owalọ lẹ 2:2-4, 15.
2 Gbẹtọgun daho de pli do owhé lọ nukọn. Juvi heyin jiji to tògodo, “ayihawiwenọ lẹ” he ko wá Jelusalẹm nado basi hùnwhẹ Pẹntikọsti tọn tin to yé mẹ. Awuji yé na dopodopo yetọn se bọ devi lọ lẹ to hodọ to ogbè etọn titi mẹ dogbọn “azọ́n huhlọnnọ Jiwheyẹwhe tọn” lẹ dali. Nawẹ enẹ sọgan yinmọ gbọn to whenuena e yindọ Galilinu lẹ wẹ mẹhe to hodọ lẹpo yin?—Owalọ lẹ 2:5-8, 11.
3. Owẹ̀n tẹwẹ apọsteli Pita dó na gbẹtọgun lọ to Pẹntikọsti gbè?
3 Dopo to Galilinu enẹlẹ mẹ wẹ apọsteli Pita. E basi zẹẹmẹ dọ to osẹ vude die wayi, mawadodonọ lẹ ko hù Jesu Klisti. Ṣigba, Jiwheyẹwhe ko fọ́n Ovi etọn sọn oṣiọ lẹ mẹ. Enẹgodo, Jesu sọawuhia susu to devi etọn lẹ mẹ, gọna Pita po mẹdevo he tin to finẹ lẹ po. Azán ao die poun wayi, Jesu ko hẹji yì olọn mẹ. Ewọ wẹ omẹ lọ he kọ̀n gbigbọ wiwe jẹgbonu do devi etọn lẹ ji. Be ehe tindo zẹẹmẹ depope na mẹhe to hùnwhẹ Pẹntikọsti tọn basi lẹ ya? Na nugbo tọn, mọwẹ. Okú Jesu tọn hẹn ẹn yọnbasi na yé nado mọ jona ylando yetọn tọn lẹ yí bo mọ ‘nunina vọ́nu gbigbọ wiwe tọn’ yí eyin yé yí yise zan to ewọ mẹ. (Owalọ lẹ 2:22-24, 32, 33, 38) Enẹwutu nawẹ nupọntọ enẹlẹ yigbe hlan “azọ́n huhlọnnọ Jiwheyẹwhe tọn” he yé ko se lẹ gbọn? Podọ nawẹ kandai ehe sọgan gọalọna mí nado vọ́ dogbapọnna sinsẹ̀nzọn mítọn hlan Jehovah gbọn?
Yin Whinwhàn Nado Yinuwa!
4. Dọdai Joẹli tọn tẹwẹ yin hinhẹndi to azán Pẹntikọsti owhe 33 W.M.?
4 To gbigbọ wiwe mimọyi godo, devi lẹ to Jelusalẹm jẹ wẹndagbe whlẹngán tọn má hẹ mẹdevo lẹ ji to afọdopolọji, bo bẹsọn gbẹtọgun he ko pli to afọnnu amakikọ-whenu enẹ tọn ji. Yẹwhehodidọ yetọn hẹn dọdai ayidego tọn heyin kinkàndai to owhe kanweko donu ṣinatọ̀n jẹnukọn gbọn Joẹli, visunnu Pẹtuẹli tọn dali di dọmọ: “Yẹn na kọ̀n gbigbọ ṣie jẹgbonu do agbasalan lẹpo ji, bọ visunnu mìtọn lẹ po viyọnnu mìtọn lẹ po na to dọdai dọ, omẹ hoho mìtọn lẹ na to odlọ lẹ kú, omẹ winyanwinyan mìtọn lẹ nasọ to numimọ lẹ mọ, podọ to azán nẹlẹ mẹ ga wẹ yẹn na kọ̀n gbigbọ ṣie jẹgbonu do devisunnu lẹ ji podọ do deviyọnnu lẹ ji . . . whẹpo azán daho bosọ dobu OKLUNỌ tọn lọ nado wá.”—Joẹli 1:1; 2:28, 29, 31; Owalọ lẹ 2:17, 18, 20.
5. Linlẹn tẹmẹ wẹ Klistiani owhe kanweko tintan tọn lẹ dọ dọdai te? (Pọ́n nudọnamẹ odò tọn.)
5 Be ehe zẹẹmẹdo dọ Jiwheyẹwhe na ze pipli yẹwhegán lẹ tọn blebu de, he bẹ sunnu po yọnnu lẹ po hẹn, taidi Davidi, Joẹli po Debola po tite, bo yí yé zan nado dọ dọdai nujijọ sọgodo tọn lẹ wẹ ya? Lala. ‘Visunnu po viyọnnu lẹ po, devisunnu po deviyọnnu lẹ po’ heyin Klistiani lẹ na dọ dọdai to linlẹn lọ mẹ dọ gbigbọ Jehovah tọn na whàn yé nado lá “azọ́n huhlọnnọ” he Jehovah ko wà bo na gbẹsọ wà lẹ. Enẹwutu yé na yin hoyidọtọ na Gigogán lọ.a Ṣigba, nawẹ gbẹtọgun lọ yinuwa gbọn?—Heblu lẹ 1:1, 2.
6. To hodidọ Pita tọn sisè godo, etẹwẹ susu gbẹtọgun lọ tọn yin whinwhàn nado wà?
6 To whenuena gbẹtọgun lọ se zẹẹmẹ Pita tọn godo, susu to yé mẹ yin whinwhàn nado yinuwa. Yé “yí homẹhunhun do yí ohó etọn” bosọ ‘yin bibaptizi, podọ yè sọ hia dogọ yé alindọn foofọtọ́n nkọ to gbenẹgbe.’ (Owalọ lẹ 2:41) Na Juvi jọnun po mẹdiọzun Juvi lẹ po wẹ yé yin wutu, yé ko tindo oyọnẹn dodonu Owe-wiwe tọn. Oyọnẹn enẹ po yise to nuhe yé plọn sọn Pita dè po mẹ, wleawuna dodonu lọ na yé nado yin bibaptizi “do oyín Otọ́ tọn, po Ovi tọn po, po [gbigbọ wiwe] tọn po mẹ.” (Matiu 28:19) To baptẹm yetọn godo ‘yé sọ nọte gligli to oplọn apọsteli lẹ tọn mẹ.’ To ojlẹ dopolọ mẹ, yé jẹ yise he yé ṣẹṣẹ mọ lọ má hẹ mẹdevo lẹ ji. Na nugbo tọn, “yé sọ yí ayiha dopo do nọte gbepogbe to tẹmpli mẹ, . . . yé to Jiwheyẹwhe pà, bosọ mọ nukundagbe to gbẹtọ lẹpo dè.” Taidi kọdetọn nuwiwa yẹwhehodidọ tọn ehe tọn, ‘Jehovah sọ to dide dogọ agun lọ egbesọegbesọ mẹhe nkọ yè na whlẹngán lẹ.’ (Owalọ lẹ 2:42, 46, 47) Agun Klistiani tọn yin didoai to niyaniya mẹ to aigba susu he ji yisenọ yọyọ ehelẹ nọ nọ̀. Matin ayihaawe, jẹ obá de mẹ, jideji ehe yin kọdetọn vivẹnudido zohunhun tọn yetọn nado dọyẹwheho “wẹndagbe” lọ tọn to whenuena yé lẹkọyi owhé.—Kọlọsinu lẹ 1:23.
Ohó Jiwheyẹwhe Tọn Tindo Huhlọn
7. (a) Etẹwẹ nọ dọ̀n gbẹtọ akọta lẹpo tọn wá titobasinanu Jehovah tọn kọn to egbehe? (b) Yọnbasi jideji yinukọn dogọ tọn tẹwẹ hiẹ mọ lẹdo aihọn pé podọ to otò towe mẹ? (Pọ́n nudọnamẹ odò tọn.)
7 Etẹwẹ dogbọn mẹhe jlo nado lẹzun devizọnwatọ Jiwheyẹwhe tọn lẹ to egbehe dali? Yé lọsu dona yí sọwhiwhe do plọn Ohó Jiwheyẹwhe tọn. Dile yé to mọwà, yé nọ wá yọ́n Jehovah taidi Jiwheyẹwhe ‘lẹblanunọ podọ homẹdagbenọ, awuwhletọ nado sadi, podọ susunọ to dagbewanyi po nugbo po mẹ.’ (Eksọdusi 34:6; Owalọ lẹ 13:48) Yé nọ plọnnu gando awuwledainanu owanyinọ Jehovah tọn heyin ofligọ lọ gbọn Jesu Klisti gblamẹ go, hùnsọndai mẹhe tọn sọgan klọ́ yé wé sọn ylando lẹpo mẹ. (1 Johanu 1:7) Homẹ yetọn sọ nọ hùn nado yọ́n lẹndai Jiwheyẹwhe tọn heyin “fọnsọnku dodonọ lẹ tọn, po mawadodonọ lẹ po tọn de.” (Owalọ lẹ 24:15) Owanyi na Asisa “azọ́n huhlọnnọ” ehelẹ tọn nọ gọ́ ahun yetọn mẹ bọ yé nọ yin whinwhàn nado dọyẹwheho nugbo họakuẹ ehelẹ tọn. Enẹgodo yé nọ klan yede do wiwe bo nọ lẹzun devizọnwatọ Jiwheyẹwhe tọn he yí baptẹm lẹ bosọ nọ zindonukọn nado ‘to jijideji to oyọnẹn he pegan Jiwheyẹwhe tọn mẹ.’b—Kọlọsinu lẹ 1:10b; 2 Kọlintinu lẹ 5:14.
8-10. (a) Nawẹ numimọ yọnnu Klistiani dopo tọn dohia dọ Ohó Jiwheyẹwhe tọn “tindo huhlọn” gbọn? (b) Etẹwẹ numimọ ehe plọn we dogbọn Jehovah po lehe e nọ yinuwa hẹ devizọnwatọ etọn lẹ do po dali? (Eksọdusi 4:12)
8 Oyọnẹn he devizọnwatọ Jiwheyẹwhe tọn lẹ nọ mọyi sọn Biblu pinplọn yetọn mẹ nọ siso taun. Oyọnẹn mọnkọtọn nọ whàn ahun yetọn, nọ diọ nulẹnpọn yetọn, bo nọ gbọṣi yé mẹ. (Heblu lẹ 4:12) Di apajlẹ, yọnnu de he nọ yin Camille yin yíyí do azọ́nmẹ taidi mẹhe na nọ penukundo yọnhonọ lẹ go. Martha, heyin Kunnudetọ Jehovah tọn yin dopo to mẹhe go e nọ penukundo lẹ mẹ. Martha dona yin nukunpedego whẹwhẹ na e tindo apọ̀nmẹ-zọ̀n sinsinyẹn de wutu. E dona yin finflin nado dùnú—bo tlẹ dona yin didọna nado mì núdùdù etọn. Ṣigba, onú dopo gbọṣi ahun Martha tọn mẹ sisosiso, dile mí na mọ do.
9 To gbèdopo, Martha mọ bọ Camille to avivi na ayimajai do nuhahun he e tindo delẹ ji wutu. Martha dọ̀n Camille dogo bo basi oylọna ẹn nado plọn Biblu hẹ ẹ. Ṣigba be mẹhe tin to ninọmẹ Martha tọn mẹ nkọ sọgan deanana plọnmẹ Biblu de ya? Mọwẹ, e sọgan wàmọ! Dile etlẹ yindọ e ko wọn nususu, Martha ma ko wọn Jiwheyẹwhe huhlọnnọ etọn gba; mọjanwẹ e ma ko wọn nugbo họakuẹ he e ko plọn sọn Biblu mẹ lẹ do niyẹn. To oplọn lọ whenu, Martha nọ dọna Camille nado hia hukan dopodopo, hia wefọ dide lẹ, bo hia kanbiọ he tin to odò weda lọ tọn podọ to enẹgodo na gblọndo etọn. Ehe zindonukọn na ojlẹ de, podọ mahopọnna dogbó Martha tọn lẹ, Camille yinukọn to oyọnẹn Biblu tọn mẹ. Martha yọnẹn dọ Camille dona dogbẹ́ hẹ mẹdevo he jlo na sẹ̀n Jiwheyẹwhe lẹ. Enẹwutu, e na Camille awu po afọpa po, na e nido sọgan doaṣọ ganji to whenuena e na to opli tintan etọn yì to Plitẹnhọ Ahọluduta tọn mẹ.
10 Ojlo owanyinọ Martha tọn gọna apajlẹ po nujikudo etọn po whàn Camille tlala. E wá tadona lọ kọ̀n dọ nuhe Martha to tintẹnpọn nado plọn ẹn sọn Biblu mẹ yin nujọnu taun, na Martha ko dibla wọn nulẹpo adavo nuhe e ko plọn sọn Owe-wiwe mẹ lẹ. To nukọnmẹ, to whenuena Camille yin tẹnsẹna yì fidevo, e mọ dọ ojlẹ lọ ko sọ nado yinuwa. To dotẹnmẹ tintan he hundote na ẹn mẹ, e yì Plitẹnhọ Ahọluduta tọn mẹ, bo dó avọ̀ po afọpa he Martha ko na ẹn po, bosọ biọ oplọn Biblu tọn de. Camille basi nukọnyiyi dagbe bo yin bibaptizi.
Yin Whinwhàn Nado Setonuna Nujinọtedo Jehovah Tọn Lẹ
11. To yidogọmẹ na zohunhunnọ yinyin to azọ́n yẹwhehodidọ tọn mẹ, nawẹ mí sọgan dohia dọ owẹ̀n Ahọluduta lọ tọn ko whàn mí gbọn?
11 To egbehe, Kunnudetọ Jehovah tọn hugan livi ṣidopo wẹ tin he, taidi Martha po Camille po, to yẹwheho “wẹndagbe ahọludu tọn” lọ dọ lẹdo aihọn pé. (Matiu 24:14; 28:19, 20) Taidi Klistiani owhe kanweko tintan whenu tọn lẹ, “azọ́n huhlọnnọ Jiwheyẹwhe” tọn lẹ whàn yé sisosiso. Yé yọ́n pinpẹn etọn dọ yé tindo lẹblanulọkẹyi lọ nado tindo oyín Jehovah tọn to ota podọ dọ e ko kọ̀n gbigbọ etọn jẹgbonu do yé ji. Enẹwutu, yé nọ dovivẹnu lẹpo ‘nado zinzọnlin dole e jẹ na Jehovah do to nukundagbe lẹpo mẹ,’ bo nọ setonuna nujinọtedo etọn lẹ to gbẹzan yetọn lẹpo mẹ. Ehe bẹ sisi nina nujinọtedo Jiwheyẹwhe tọn lẹ to aṣọdido po nusísọ́ po mẹ hẹn, gọna onú devo lẹ.—Kọlọsinu lẹ 1:10a; Titu 2:10.
12. Ayinamẹ tlọlọ tẹwẹ yin kinkàndai to 1 Timoti 2:9, 10 mẹ gando aṣọdido po nusísọ́ po go?
12 Mọwẹ, Jehovah ko ze nujinọtedo lẹ dai gando awusọhia mẹdetiti tọn mítọn go. Apọsteli Paulu slẹ nubiọtomẹsi Jiwheyẹwhe tọn delẹ to whẹho ehe mẹ. ‘Na yọnnu lẹ ni nọ yí avọ̀ jlẹmẹjlẹmẹ do doaṣọna yede, po jlẹkajininọ po gọna ayiha zìnzìn tọn; e ma yin oda biblá, kavi sika, kavi osé dagbedagbe, kavi avọ̀ akuẹgegenu sọ dogo tọn gba; ṣigba ehe jẹ na yọnnu he yigbena jijọ-di-Jiwheyẹwhe tọn gbọn azọ́n dagbe lẹ mẹ.’c Etẹwẹ mí plọn sọn hogbe ehelẹ mẹ?—1 Timoti 2:9, 10.
13. (a) Etẹwẹ hodidọ lọ “avọ̀ jlẹmẹjlẹmẹ” zẹẹmẹdo? (b) Naegbọn mí sọgan dọ dọ nujinọtedo Jehovah tọn lẹ yin lẹnpọn dagbenu?
13 Ohó Paulu tọn lẹ dohia dọ Klistiani lẹ dona “yí avọ̀ jlẹmẹjlẹmẹ do doaṣọna yede.” Awusọhia yetọn ma dona to hànyàn kavi kudiho gba. Diblayin mẹlẹpo, etlẹ yin wamọnọ lẹ, wẹ sọgan jẹ nujinọtedo lẹnpọn dagbe tọn enẹ kọ̀n gbọn hinhẹn ẹn diun dọ avọ̀ yetọn mẹ́n, tin to wiweji, bo yọ́npọ́n dali. Di apajlẹ, to owhe lẹpo mẹ, Kunnudetọ lẹ to otò Hùwaji Amelika tọn de mẹ nọ zinzọnlin gbọ̀n zungbo mẹ na kilomẹtlu susu bo nọ wá yí ganhiho susu zan to wétè mẹ nado sọgan yì plidopọ agbegbe tọn yetọn. E nọ saba jọ bọ mẹde na jai do otọ̀ mẹ kavi dọ avọ̀ etọn ni plá do zùnkan go bo tlẹ́n dile yé to gbejizọnlin lọ zìn. Enẹwutu to whenuena yé jẹ aigba plidopọ lọ tọn ji, awusọhia yetọn ma nọ yọ́npọ́n sọmọ gba. Todin yé nọ yí whenu zan nado dó agbó lẹ, vọ́ avọ̀ he yé jlo na dó na plidopọ lọ lẹ jlado, bo nọ yàn yé bosọ nọ lì yé. Yé yọ́n pinpẹn oylọ heyin bibasina yé nado wá dùnú to tafo Jehovah tọn ji tọn, podọ yé jlo na doaṣọ to aliho he sọgbe mẹ.
14. (a) Etẹwẹ e zẹẹmẹdo nado doaṣọ ‘po jlẹkajininọ po gọna ayiha zìnzìn tọn’? (b) Etẹwẹ nusísọ́ to ‘obu gbégbò tọn na Jiwheyẹwhe’ mẹ bẹhẹn na mí?
14 Paulu sọ dohia yinukọn dogọ dọ mí dona doaṣọ ‘po jlẹkajininọ po gọna ayiha zìnzìn tọn.’ Ehe zẹẹmẹdo dọ awusọhia mítọn ma dona yin adọkun jijlá tọn, he hẹnmẹjọsi, he sọgan fọ́n ojlo zanhẹmẹ tọn dote, he nọ dó fie ma dona nọ gbonu lẹ hia, kavi he tin to zoji lẹ gba. To yidogọmẹ, mí dona doaṣọ to aliho he do ‘obu gbégbò tọn na Jiwheyẹwhe’ hia mẹ. Be enẹ ma wleawuna nuhe ji mí dona lẹnnupọndo lẹ ya? Whẹho lọ mayin nado doaṣọ ganji to whenuena mí jei opli agun tọn lẹ bo ma kiya dogbọn aṣọdido mítọn dali to ojlẹ devo lẹ mẹ gba. Awusọhia mítọn dona nọ do walọ gbégbò po yẹyi tọn po hia to whepoponu na mí yin Klistiani bosọ yin lizọnyizọnwatọ lẹ to nukunwhiwhe lẹpo mẹ wutu. Nugbo wẹ dọ azọ́nvọ̀ po awu wehọmẹ tọn mítọn lẹ po dona sọgbe hẹ wunmẹ azọ́n he mí to wiwà tọn. Etomọṣo, aṣọdido mítọn dona tin to jlẹkaji bo tindo yẹyi. Eyin aṣọdido mítọn nọ do nuyise mítọn to Jiwheyẹwhe mẹ hia to whepoponu, mí ma na dọ̀n yonu do godo gbede sọn kunnudide mayin aṣa tọn mẹ na nusísọ́ mítọn huwinyan na mí wutu.—1 Pita 3:15.
“Mì Yiwanna Aihọn Blo”
15, 16. (a) Naegbọn e yin nujọnu dọ mí ni dapana apajlẹ aihọn tọn hihodo gando aṣọdido po nusísọ́ po go? (1 Johanu 5:19) (b) Whẹwhinwhẹ́n tangan tẹ wutu wẹ mí dona dapana hihodo aṣọdido po nusísọ́ he tin to zoji lẹ po?
15 Ayinamẹ heyin kinkàndai to 1 Johanu 2:15, 16 mẹ sọ wleawuna anademẹ to nudide mítọn gando aṣọdido po nusísọ́ po go mẹ. Mí hia dọmọ: “Mì yiwanna aihọn blo, kavi nuhe tin to aihọn mẹ. Eyin mẹde yiwanna aihọn, owanyi Otọ́ tọn matin to ewọ mẹ gba. Na nuhe tin to aihọn mẹ lẹpo, wantuntun agbasalan tọn, wantuntun nukun tọn, po gigovọ́ ogbẹ̀ tọn po, e ma tin to Otọ́ tọn mẹ gba, ṣigba aihọn tọn wẹ.”
16 Lehe ayinamẹ enẹ wá do ganmẹ do sọ! To ojlẹ de he kọgbidinamẹ hagbẹ tọn ko sinyẹn taun mẹ, mí ma dona dike aihọn ni deanana nudide aṣọdido mítọn tọn gba. Wunmẹ aṣọdido po nusísọ́ po tọn lẹ ko gblezọn to owhe agọe tọn lẹ mẹ. Yèdọ aṣọdido ajọwatọ po ahọluzọnwatọ lẹ tọn po ma tlẹ nọ wleawuna nujinọtedo dejidego de na Klistiani lẹ to whepoponu gando nuhe sọgbe go gba. Whẹwhinwhẹ́n devo niyẹn he wutu mí dona yin ahunmẹduna gando nuhudo lọ go ma nado “yin mẹkọndopọ hlan aihọn he blo” eyin mí jlo na nọgbẹ̀ sọgbe hẹ nujinọtedo Jiwheyẹwhe tọn lẹ bo gbọnmọ dali “doaṣọna oplọn Jiwheyẹwhe Whlẹngantọ mítọn tọn to onú popo mẹ.”—Lomunu lẹ 12:2; Titu 2:10.
17. (a) Kanbiọ tẹlẹ ji wẹ mí sọgan lẹnnupọndo to whenuena mí jlo na họ̀ avọ̀ kavi de lehe e na yin titọ̀ gbọn? (b) Naegbọn tatọ́ whẹndo tọn lẹ dona yin ahunmẹduna dogbọn awusọhia hagbẹ whẹndo yetọn tọn lẹ dali?
17 Whẹpo do basi dide nado họ̀ avọ̀ de, nuyọnẹnnu wẹ e yin nado kanse dewe dọ: ‘Naegbọn avọ̀ ehe do jlo mi taun? Be aihundatọ nukundeji he yẹn yiwanna de nọ dó e wẹ? Be avọ̀ lọ wẹ yè do nọ yọ́n hagbẹ gbévùn lẹ tọn kavi pipli he nọ ze gbigbọ mẹdekannujẹ po atẹṣiṣi tọn po daga ya?’ Mí sọ dona pọ́n avọ̀ lọ tlintlin. Eyin awu kavi yẹli de wẹ, etẹwẹ dogbọn tedidi etọn dali? Aliho he mẹ e yin titọ̀ te? Be e tin to jlẹkaji, sọgbe, bo tindo yẹyi, kavi e finyọ́n gbanun-gbanun bo nọ fọ́n ojlo zanhẹmẹ tọn dote wẹ ya? Kanse dewe dọ, ‘Be avọ̀ ehe didó na hẹn mẹde dahli wẹ ya?’ (2 Kọlintinu lẹ 6:3, 4) Etẹwutu enẹ dona duahunmẹna mí? Na Biblu dọmọ: “Yèdọ Klisti ma [tlẹ] hẹn homẹ ede tọn hùn gba.” (Lomunu lẹ 15:3) Tatọ́ whẹndo Klistiani tọn lẹ dona yin ahunmẹduna dogbọn awusọhia hagbẹ whẹndo yetọn tọn lẹ dali. Na sisi tintindo na Jiwheyẹwhe gigonọ he yé to sinsẹ̀n wutu, tatọ́ whẹndo tọn lẹ ma dona whleawu nado na ayinamẹ tlọlọ, owanyinọ to whenuena e jẹ.—Jakobu 3:13.
18. Etẹwẹ nọ whàn we nado na ayidonugo sọwhiwhe tọn hlan aṣọdido po nusísọ́ towe po?
18 Owẹ̀n mítọn wá sọn Jehovah dè, mẹhe yin apajlẹ pipé yẹyi po wiwejininọ po tọn. (Isaia 6:3) Biblu na tuli mí nado hodo apajlẹ etọn “di ovi yiwanna lẹ.” (Efesunu lẹ 5:1) Aṣọdido po nusísọ́ mítọn po sọgan do Otọ́ olọn mẹ tọn mítọn hia to aliho dagbe kavi ylankan mẹ. Na jide tọn mí jlo na hẹn homẹ etọn hùn!—Howhinwhẹn lẹ 27:11.
19. Ale tẹlẹ wẹ nọ wá sọn “azọ́n huhlọnnọ Jiwheyẹwhe tọn” lẹ hinhẹn zun yinyọnẹn na mẹdevo lẹ mẹ?
19 Etẹwẹ yin numọtolanmẹ towe gando “azọ́n huhlọnnọ Jiwheyẹwhe tọn” he hiẹ ko plọn lẹ go? Na nugbo tọn, lehe mí gọ́ na pẹdido dọ mí ko plọn nugbo lọ do sọ! Na mí yí yise zan to hùnsọndai Jesu Klisti tọn mẹ wutu, ylando mítọn lẹ yin jijona. (Owalọ lẹ 2:38) Taidi kọdetọn de, mí tindo awuvivo hodidọ tọn to Jiwheyẹwhe nukọn. Mí ma nọ dibuna okú dile mẹhe ma tindo todido lẹ nọ wà do gba. Kakatimọ, mí dejido nuhe Jesu dọ go dọ to gbèdopo “mẹhe tin to yọdò [oflin tọn] mẹ lẹpo na se ogbè etọn, bo na tọnjẹgbonu.” (Johanu 5:28, 29) Jehovah ko yin homẹdagbenọ to onú ehe lẹpo didehia mí mẹ. Humọ, e ko kọ̀n gbigbọ wiwe etọn jẹgbonu do mí ji. Enẹwutu, pinpẹn-nutọn-yinyọnẹn na nunina dagbedagbe ehe lẹpo dona whàn mí nado tindo sisi na nujinọtedo yiaga etọn lẹ bo pagigona ẹn po zohunhun po, bosọ lá “azọ́n huhlọnnọ” ehelẹ na mẹdevo lẹ.
[Nudọnamẹ odò tọn]
a To whenuena Jehovah de Mose po Aalọn po nado dọho na Falo do ota omẹ etọn lẹ tọn mẹ, E dọna Mose dọmọ: ‘Yẹn ko yí we do basi yẹwhe de hlan Falo: Aalọn nọvisunnu towe na yin yẹwhegán towe.’ (Eksọdusi 7:1) Aalọn yinuwa taidi yẹwhegán de, e mayin nado dọ dọdai nujijọ sọgodo tọn lẹ gba, ṣigba nado yin hoyidọtọ Mose tọn.
b To gbẹtọgun susugege he pli na hùnwhẹ whemẹwhemẹ Tenu Núdùdù Oklunọ tọn heyin bibasi to 28 mars 2002 mẹ, livi susu ma ko jẹ Jehovah sẹ̀n to gigọ́mẹ ji. Odẹ̀ mítọn wẹ yindọ ahun jlodotọ susu ehelẹ tọn ni yin whinwhàn to madẹnmẹ nado dovivẹnu bo lẹzun lilatọ wẹndagbe lọ tọn lẹ.
c Dile etlẹ yindọ ohó Paulu tọn lẹ yin didọna Klistiani yọnnu lẹ, nunọwhinnusẹ́n dopolọ gando Klistiani sunnu lẹ po jọja lẹ po go.
Nawẹ Hiẹ Na Na Gblọndo Gbọn?
• “Azọ́n huhlọnnọ” tẹlẹ wẹ gbẹtọ lẹ se to Pẹntikọsti owhe 33 W.M., podọ nawẹ yé yigbe gbọn?
• Nawẹ mẹde nọ lẹzun devi Jesu Klisti tọn gbọn, podọ etẹwẹ devi-yinyin bẹhẹn?
• Naegbọn e do yin nujọnu dọ mí ni payi aṣọdido po nusísọ́ mítọn po go?
• Etẹlẹ wẹ dona yin nulẹnpọndeji to whenuena mí to nudide basi nado yọnẹn eyin avọ̀ de kavi titọ̀ etọn wunmẹ de sọgbe?
[Yẹdide to weda 15]
Pita lá dọ Jesu ko yin finfọ́n sọn oṣiọ lẹ mẹ
[Yẹdide to weda 17]
Be awusọhia towe nọ do Jiwheyẹwhe he a to sinsẹ̀n lọ hia ganji ya?
[Yẹdide to weda 18]
Awusọhia hagbẹ whẹndo tọn lẹ tọn dona duahunmẹna mẹjitọ Klistiani lẹ