Etẹwẹ to Jijọ Do Gbigbọ Nunamẹ Tọn Go?

BỌDO nugbajẹmẹji 11 septembre 2001 tọn to Tòdaho New York po Washington, D.C. po tọn mẹ go, godonọnamẹ tovi lẹ tọn dohlan mẹhe adán gbò lẹ yin ayidego. E paṣa ogbẹ́ he nọ deanana nunina lẹblanu tọn lẹ nado mọ dọla Amelika tọn liva 2,7 heyin nina nado penukundo whẹndo mẹhe kú lẹ tọn go. Na obá he mẹ gbakija lọ yiaga jẹ hẹn mẹsusu jọsi wutu, gbẹtọ lẹ to filẹpo wẹ jlo na gọalọ.

Ṣigba adi mẹdelẹ tọn yin finfọndote to niyaniya mẹ to whenuena e lẹzun yinyọnẹn dọ ogbẹ́ nukundeji he nọ yí nunina lẹ to akuẹ lọ yizan na lẹndai devo lẹ. Linlin lọ dọ ogbẹ́ mọnkọtọn daho dopo basi tito nado whla nudi odaa to dọla Amelika tọn livi 546 he e mọyi lẹ mẹ bo yí i zan na lẹndai devo lẹ fọ́n adidudu susu dote. Dile etlẹ yindọ ogbẹ́ lọ diọ nudide etọn to godo mẹ bo vẹvẹ, linlin-kàntọ dopo dọmọ: “Homọdọdonugotọ lẹ mọ afọdide titengbe ehe taidi nuhe ma sọgan gọ̀ jidide” he ogbẹ́ lọ nọ duvivi etọn jẹnukọnna mẹgbeyinyan lọ mọyi ba. Hiẹ lo? Be jidide towe to ogbẹ́ mọnkọtọn lẹ mẹ ko depò to agọe wẹ ya?

Alọgọ Kavi Nuhẹngu?

Nunina lẹblanu tọn bibasi hlan ogbẹ́ ehelẹ nọ saba yin pinpọnhlan taidi jijọ dagbe de. Ṣogan, mẹlẹpo ma kọngbedopọ hẹ ehe gba. Hugan owhe 200 die wayi, Samuel Johnson, wekantọ Glẹnsinu de, wlan dọmọ: “Hiẹ nọ deji dogọ dọ a to dagbewa to whenuena a sú akuẹ na azọ́nwatọ lẹ, taidi ale tuklajijẹ yetọn tọn, hugan whenuena a na akuẹ taidi nunina de poun.” To egbehe, mẹdelẹ nọ whleawu nado nanú, podọ linlin lẹ dọ ogbẹ́ he nọ deanana nunina lẹblanu tọn lẹ to nunina lẹ ṣizan ma nọ hẹn jidide gbẹtọ lẹ tọn lodo gba. Apajlẹ agọe tọn awe die.

Ogán he nọ deanana nunina sinsẹ̀n tọn to San Francisco yin yinyan to whenuena e biọ akuẹ na agbasa ede tọn jijlado podọ na ahọ́ nudutẹn tọn etọn súsú heyin nudi 350 000F CFA to osẹ dopo mẹ na owhe awe. To Grande-Bretagne, mẹhe nọ deanana nujijọ nunina lẹblanu tọn tangan de to televiziọn ji lẹ yin winyando to whenuena aṣli lọ gbà dọ sọn nudi dọla Amelika tọn livi 10 heyin didohlan nado gbá owhé tọṣiọvi lẹ tọn to Roumanie mẹ, ohọ̀ flinflin 12 poun wẹ ko yin gbigbá sọn whenẹnu, bọ akuẹ dọla fọtọ́n kanweko susu yin alọṣinyọn e ji. Linlin ylankan taidi ehelẹ ko hẹn nunamẹtọ delẹ tin to aṣeji dogọ gando lehe nunina yetọn na sù sọ podọ mẹhe yé na basi i na go.

Awuwhiwhle Nado Nanú

Nalete, e na blawu susu nado dike nuyiwa omẹ vude tọn kavi ogbẹ́ delẹ tọn ni dekanpona mẹtọnhopọn nujọnu tọn po awuvẹmẹ he mí tindo na mẹdevo lẹ po. Biblu dọmọ: “Sinsẹ̀n wiwe magble to Jiwheyẹwhe Otọ́ nukọn wẹ ehe, nado nọ dla tọṣiọvi po asuṣiọsi lẹ po pọ́n to nukunbibia yetọn mẹ.” (Jakobu 1:27) Mọwẹ, mẹtọnhopọn nujọnu tọn tintindo na wamọnọ po mẹhe tin to nuhudo mẹ lẹ po yin adà tangan sinsẹ̀n Klistiani tọn.

Etomọṣo, hiẹ sọgan kanse dọ, ‘Be yẹn dona gbẹsọ nọ basi nunina lẹblanu tọn wẹ, kavi be yẹn dona tẹnpọn bo gọalọna mẹdelẹ gbọn onú lẹ nina yé tlọlọ dali poun wẹ ya?’ Nunamẹ nankọtọn wẹ Jiwheyẹwhe to nukundo? Hosọ he bọdego na dọhodo kanbiọ ehelẹ ji.