Weta 77

Nudindọn Do Ogú Ji

KUNNUDENU dohia dọ gbẹtọ lẹ yọnẹn dọ Jesu ko to núdù to owhé Falesi lọ tọn gbè. Enẹwutu fọtọ́n susu yetọn lẹ pli do gbonu bo to tenọpọn whenuena Jesu na tọ́njẹgbonu. To ma taidi Falesi lẹ he diọnukunsọ Jesu bo tẹnpọn nado wle e to nuhe jẹagọ didọ mẹ, gbẹtọ lẹ yí jejejininọ do dotoai hlan ẹn po pinpẹn-nutọn-yinyọnẹn po.

To lilẹhlan devi etọn lẹ jẹnukọn, Jesu dọmọ: “Mì payi otọ́n Falesi lẹ tọn go, he yin yẹnuwiwa.” Dile e yin didohia do to núdùdù lọ whenu, tito sinsẹ̀n Falesi lẹ tọn pete yin gigọ́ po yẹnuwiwa po. Ṣigba dile etlẹ yindọ kanyinylan Falesi lẹ tọn sọgan yin whiwhla gbọn dohia nugbonọ-yinyin hlan sinsẹ̀n dali, e na yin dide jẹ gbangba to godo mẹ. “Nude ma tin he yè ṣinyọ́n nudo,” wẹ Jesu dọ, “bọ yè ma na dehia; kavi ehe whlá, bọ yè ma na yọ́n ẹn.”

Jesu zindonukọn nado basi dọvọdọ tulinamẹ he e ko na hlan omẹ 12 lẹ to whenuena e do yé hlan na gbejizọnlin yẹwhehodidọ tọn yì Galili. E dọmọ: “Mì dibu blo na yé he nọ hù agbasa, to enẹgodo, yé ma sọ do nude bosọ sọgan wà ba.” To whenuena e yindọ Jiwheyẹwhe ma nọ wọnji etlẹ yin oblẹnọ dopo tata go, Jesu hẹn hodotọ etọn lẹ deji dọ Jiwheyẹwhe ma na wọnji yé go gba. E dọmọ: “Whenuena yè hẹn mì wá sinagọgu lẹ po ogán lẹ po, po aṣẹnọ lẹ po nukọn, . . . [gbigbọ wiwe] na plọn onú he mì na dọ mì to ojlẹ lọ mẹ.”

Dawe de sọn gbẹtọgun lọ mẹ dọho jẹgbonu. E vẹvẹ dọmọ: “Mẹplọntọ, degbèdo nọvisunnu ṣie ni má ogú lọ hẹ mi.” Osẹ́n Mose tọn biọ dọ visunnu he yin ovi plọnji lọ wẹ na yí adà awe ogú lọ tọn, enẹwutu whẹwhinwhẹ́n depope ma dona tin na nudindọn gba. Ṣigba e họnwun dọ dawe lọ jlo hugan mimá sọgbe hẹ osẹ́n ogú lọ tọn etọn.

Po gbesisọ po Jesu gbẹ́ nado dádemẹ. “Dawe, mẹnu wẹ yí mi do basi whẹdatọ de, kavi mimátọ de do mì ji?” wẹ e kanse. Enẹgodo e na avase titengbe ehe hlan gbẹtọgun lọ dọmọ: “Mì họ́ mìde, bosọ payi do nukunkẹn: to ogege gbẹtọ tọn de mẹ ma wẹ ogbẹ̀ etọn nọte te sọn onú he ewọ tindo lẹ mẹ gba.” Mọwẹ, mahopọnna lehe nuhe mẹde tindo sọgan sù sọ, to jọwamọ liho ewọ na kú bo na jo yé dai. Nado zinnudo nugbo ehe ji, podọ nado dohia lehe e yin nulunu do nado gboawupo nado wleawuna yinkọ dagbe de hẹ Jiwheyẹwhe, Jesu yí oló de zan. E basi zẹẹmẹ dọmọ:

“Aigba dawe adọkunnọ de tọn hẹn sinsẹ́n susu jẹgbonu: E sọ lẹn to ede homẹ dọ, Etẹ yẹn na wà, na yẹn ma tindo otẹn fihe yẹn na bẹ sinsẹ́n ṣie pli do? E sọ dọmọ, Ehe wẹ yẹn na wà; yẹn na họ́ zínhọ ṣie liai, bo dó klohu; finẹ yẹn na bẹ sinsẹ́n ṣie lẹ, po adọkun ṣie lẹ po pli do. Yẹn nasọ dọ hlan ayiha ṣie, dọ, Ayiha, hiẹ tindo agbàn susu he yè bẹpli na owhe susu: yí awubọ towe, to dùdù, to nùnù, bo to ayajẹ. Ṣigba Jiwheyẹwhe dọ hlan ẹn, dọmọ, Hiẹ nulunọ, ozán he mẹ yè na kàn ogbẹ̀ towe biọ sọn dè we: be mẹnu tọn wẹ onú he hiẹ wleawu etọn dai helẹ na yin?”

To tadona mẹ, Jesu dohia dọmọ: “Mọkẹdẹ wẹ ewọ he bẹ adọkun pli na ede, bo ma yin adọkunnọ gbọn Jiwheyẹwhe dali.” Dile e yindọ devi lọ lẹ sọgan gọ̀n ma yin wiwle do omọ̀ mẹ gbọn nululu yí do bẹ adọkun pli dali, na nukunpedonugo egbesọegbesọ gbẹzan tọn wutu yé sọgan yin ayihafẹsẹna sọn sinsẹ̀nzọnwiwa hlan Jehovah po alindọn lẹpo po mẹ. Enẹwutu Jesu yí nujijọ lọ zan nado vọ́ ayinamẹ dagbe he e ko na to nudi owhe dopo daa die to Yẹwhehodidọ Osó ji tọn mẹ lọ dọ. To lilẹhlan devi etọn lẹ, e dọmọ:

“Enẹwutu wẹ yẹn to didọ hlan mì, dọmọ, Mì yin whlẹndonọ na ogbẹ̀ mìtọn blo, dọ, Etẹ mì na dù: kavi na awutu mìtọn, etẹ mì na ṣinyọ́n. . . . Mì lẹn ohọ́n lẹ tọn pọ́n: yé ma nọ dó bo ma sọ nọ gbẹ̀n; yé ma do agbànhọ, kavi zínhọ: Jiwheyẹwhe sọ to yé yìn. . . . Mì sọ lẹn li lẹ tọn pọ́n, le yé to whinwhẹ́n: yé ma nọ wazọ́n, yé ma nọ gbẹnsekan; ganṣo yẹn dọ hlan mì, yè ma doaṣọna Sọlọmọni to gigo etọn lẹpo mẹ di dopo to ehelẹ mẹ gba. . . .

“Mì dín etẹ mì na dù, kavi etẹ mì na nù blo, mì sọ yin nuhatọ ayiha tọn blo. Na onú helẹ pó wẹ akọta aihọnmẹ tọn lẹ to dindin pé: Otọ́ mìtọn sọ yọnẹn dọ mìwlẹ ma sọgan nọ ma tindo onú helẹ gba. Ṣogan mì dín ahọludu Jiwheyẹwhe tọn; onú helẹ pó wẹ yè na yí dogọ na mì.”

Titengbe to ojlẹ awusinyẹn akuẹzinzan tọn lẹ whenu wẹ ohó Jesu tọn lẹ biọ dogbapọnna sisosiso. Na nugbo tọn, mẹhe lẹzun magbọjẹnọ zẹjlẹgo dogbọn nuhudo agbasa tọn etọn lẹ dali bo jẹ agọjoyigodo ji to yanwle gbigbọnu lẹ tọn mẹ, to yise matindo dohia to nugopipe Jiwheyẹwhe tọn nado penukundo devizọnwatọ Etọn lẹ go mẹ. Luku 12:1-31; Deutelonomi 21:17.

▪ Vlavo, naegbọn dawe lọ do kàn kanbiọ sè dogbọn ogú dali, podọ ayinamẹ tẹwẹ Jesu na?

▪ Oló tẹwẹ Jesu yizan, podọ etẹwẹ yin nuagokun etọn?

▪ Ayinamẹ tẹwẹ Jesu vọ́ na, podọ naegbọn e do sọgbe?