Nudepope Ma Gán Hẹnalọdotena Yé

Dawe he ma gán zinzọnlin de nọ sinai to họntonu tẹmpli lọ tọn bo nọ to nubiọ to azán lẹpo gbè. To whèmẹ gbèdopo, e mọdọ Pita po Johanu po to tẹmpli lọ mẹ biọ. E dọna yé dọmọ: ‘Mì jaale bo na mi nude.’ Pita dọmọ: ‘N’na na we nude he pọnte hugan akuẹ. To oyín Jesu tọn mẹ, fọnṣite bo zinzọnlin!’ To whenẹnu, Pita gọalọna ẹn nado fọnṣite bọ dawe lọ jẹ zọnlinzin ji! Azọ́njiawu ehe hẹn homẹhun gbẹtọgun he to finẹ lọ sọmọ bọ mẹsusu dogọ lẹzun yisenọ.

Ṣigba, homẹgble yẹwhenọ lẹ po Sadusi lẹ po. Yé sọ wle apọsteli lọ lẹ, bo plan yé yì whẹdatẹn bosọ kanse yé dọmọ: ‘Mẹnu wẹ na mì huhlọn nado gbọazọ̀nna dawe ehe?’ Pita dọmọ: ‘Jesu Klisti, mẹhe mì ko hù lọ, wẹ na mí huhlọn.’ Sinsẹ̀ngán lọ lẹ dawhá dọmọ: ‘Mì gbọ hodọ gando Jesu go!’ Ṣigba, apọsteli lẹ dọmọ: ‘Mí dona dọho gandego. Mí ma na nabọẹ.’

Tlolo he Pita po Johanu po yin tuntundote, yé yì devi he pò lẹ dè bo dọ nuhe jọ lẹ na yé. Yé sọ hodẹ̀ dopọ bo biọ to Jehovah si dọmọ: ‘Jaale, gọalọna mí nado gboadọ bo zindonukọn to azọ́n towe wiwà mẹ.’ Jehovah na yé gbigbọ wiwe etọn bọ yé zindonukọn nado to yẹwhehodọ bo to azọ̀nhẹngbọna mẹlẹ. Mẹsusu dogọ fọ́n bo to lilẹzun yisenọ. Sadusi lẹ jẹ awuwhàn yé ji sọmọ bọ yé wle apọsteli lẹ do gànpamẹ. Ṣigba to zánmẹ, Jehovah do angẹli de hlan bọ e hùn ohọ̀n gànpa lọ tọn lẹ bo dọna apọsteli lẹ dọmọ: ‘Mì lẹkọyi tẹmpli mẹ bo plọnmẹ to finẹ.’

To wunkẹngbe afọnnu, Whẹdatẹn Daho Ju lẹ tọn he bẹ nukọntọ sinsẹ̀n tọn lẹ hẹn sè dọ: ‘Gànpa lọ gbẹ́ pò to súsú, ṣigba mẹhe mì wle lọ lẹ masọ to finẹ ba! Yé tin to tẹmpli mẹ bo to mẹplọn!’ Whladopo dogọ, apọsteli lọ lẹ yin wiwle bo yin hinhẹnwa Whẹdatẹn lọ nukọn. Yẹwhenọ daho sọ dọna yé dọmọ: ‘Mí ko degbena mì ma nado dọho gando Jesu go ba!’ Amọ́, Pita gblọn dọmọ: “Míwlẹ dona setonuna Jiwheyẹwhe taidi ogán kakati nido yin gbẹtọ lẹ.”

Adi do nukọntọ sinsẹ̀n tọn lọ lẹ sọmọ bọ yé jlo na hù apọsteli lẹ. Ṣigba, Falesi de he nọ yin Gamalieli fọnṣite bo dọmọ: ‘Mì payi! Vlavo, Jiwheyẹwhe wẹ tin hẹ omẹ ehelẹ. Be mì jlo na hoavùn hẹ Jiwheyẹwhe nugbonugbo wẹ ya?’ Yé kẹalọyi ayinamẹ etọn. Enẹwutu, yé hò apọsteli lẹ bo degbena yé whladopo dogọ ma nado dọyẹwheho ba, enẹgodo yé jo yé. Amọ́, ehe ma hẹnalọdotena apọsteli lẹ. Yé zindonukọn nado to wẹndagbe lọ lá po adọgbigbo po, to tẹmpli mẹ podọ sọn whédegbè jẹ whédegbè.