“Míwlẹ Ma Hà Nọma Setonuna Jiwheyẹwhe Hú Gbẹtọ”

‘Míwlẹ Ma Sọgan Nọma Dọho Gando Jesu Go’

NUJIJỌ lọ wá aimẹ to owhe 33 W.M., to whẹdọhọsa daho Ju lẹ tọn mẹ to Jelusalẹm. Tohodọtọ Ju lẹ tọn pli nado gbeje owhẹ̀ hodotọ 12 Jesu Klisti tọn lẹ tọn pọ́n. Etẹwutu? Na yé to yẹwhehodọ gando Jesu go. Whlaawetọ die he apọsteli Pita po Johanu po sọawuhia to whẹdatẹn lọ nukọn. Ṣigba whla tintan wẹ ehe yin na apọsteli he pò lẹ.

Yẹwhenọ daho lọ flinnu apọsteli 12 lọ lẹ gando gbedide tintan he whẹdatẹn lọ ko na yé jẹnukọn go. To ojlẹ enẹ mẹ, whenuena yé yin gbedena ma nado plọnmẹ gando Jesu go ba, apọsteli Pita po Johanu po gblọn dọmọ: “Eyin e jlọ to nukun Jiwheyẹwhe tọn mẹ nado sè mìtọn hú Jiwheyẹwhe tọn, mì yí lẹnpọn. Na míwlẹ ma sọgan nọma dọ nuhe mí ko mọ, bosọ sè.” To adọgbigbo bibiọ to odẹ̀ mẹ godo, devi Jesu tọn lẹ zindonukọn to wẹndagbe lọ lilá mẹ.—Owalọ lẹ 4:18-31.

To yinyọnẹn dọ budonamẹ etọn he jẹnukọn lẹ ma tindo kọdetọn dagbe, yẹwhenọ daho lọ lá to ojlẹ ehe mẹ dọmọ: “Míwlẹ ma ko kọ́ na mì susu dọ, mì sọ hà plọnmẹ to oyín he mẹ bà blo? Pọ́n, mìwlẹ yí nuplọnmẹ mìtọn do gọ́ Jelusalẹm, mìwlẹ sọ to linlẹn nado hẹn ohùn dawe he tọn wá ota mítọn.”—Owalọ lẹ 5:28.

Gbemima He Dolido

Pita po apọsteli he pò lẹ po gblọn po adọgbigbo po dọmọ: “Míwlẹ ma hà nọma setonuna Jiwheyẹwhe hú gbẹtọ.” (Owalọ lẹ 5:29) Na nugbo tọn, kakati nado setonuna gbẹtọvi tata lẹ, mí dona setonuna Jehovah to whenuena nubiọtomẹsi gbẹtọ lẹ tọn sọta gbedide etọn lẹ.a

Hodidọ apọsteli lẹ tọn he do nugbonọ-yinyin yetọn hlan Jiwheyẹwhe hia dona duto hagbẹ Tohodọtọ Ju lẹ tọn ji. Eyin nukọntọ Ju tọn ehelẹ lọsu yin hokanse gando whẹho tonusisena Jiwheyẹwhe tọn go, yé dona penugo nado yigbe to pọmẹ dọmọ: “Setonuna Jiwheyẹwhe.” To popolẹpo mẹ, be yé ma yise dọ Jiwheyẹwhe wẹ Ganhunupotọ wẹkẹ lọ tọn ya?

Pita he kunnudenu dohia dọ ewọ wẹ nọ dọho do ota apọsteli he pò lẹpo tọn mẹ, dọ dọ to whẹho he gando lizọnyizọn yetọn go lẹ mẹ, yé nọ setonuna Jiwheyẹwhe hú gbẹtọ. Enẹwutu, e do owhẹ̀ tonumase tọn he yin sisadokọna apọsteli lẹ hia nado yin lalo. Sọn whenuho akọta yetọn tọn mẹ, hagbẹ Tohodọtọ Ju lẹ tọn yọnẹn dọ nuhe sọgbe wẹ e yin to whedelẹnu nado setonuna Jiwheyẹwhe hú gbẹtọ. Ajinọ Egipti tọn awe dibusi Jiwheyẹwhe kakati nido yin Falo gbọn ogbẹ̀ visunnu he yin jiji na yọnnu Heblu lẹ tọn hihladote dali. (Eksọdusi 1:15-17) Ahọlu Hẹzekia setonuna Jehovah kakati nido yin Ahọlu Sẹnnakelibi, to whenuena e yin kọgbidina nado jogbe. (2 Ahọlu lẹ 19:14-37) Owe Wiwe Heblu tọn, ehe hagbẹ Tohodọtọ Ju lẹ tọn jẹakọ hẹ, zinnudeji dọ Jehovah nọ donukun omẹ etọn lẹ nado setonuna ẹn.—1 Samuẹli 15:22, 23.

Tonusise Yin Ahọsuna

E whè gbau, e taidi dọ ohó lọ “míwlẹ ma hà nọma setonuna Jiwheyẹwhe hú gbẹtọ” yinuwado dopo to hagbẹ whẹdatẹn daho lọ tọn lẹ mẹ ji. Gamalieli, whẹdatọ he tindo yẹyi to Tohodọtọ Ju lẹ tọn mẹ de, biọ to whẹdatọ lẹ si nado dotoaina ayinamẹ nuyọnẹn tọn etọn he e na yé to nuglọ. Gamalieli na apajlẹ nuhe jọ wayi delẹ tọn bo zinnudeji dọ nulunu wẹ e yin nado hẹnalọdotena azọ́n apọsteli lẹ tọn. E wá tadona kọ̀n dọmọ: “Mì jagọ sọn dawe helẹ dè, bosọ gbọ sọn yé go abọẹ: . . . na e nikaa yin dọ, yè mọ mì to avùnho hẹ Jiwheyẹwhe.”—Owalọ lẹ 5:34-39.

Ohó lẹnpọn dagbe tọn he Gamalieli dọ lẹ diọlinlẹnna whẹdatẹn daho lọ nado jo apọsteli lẹ do. Dile etlẹ yindọ apọsteli lẹ yin hihò, ehe ma dobuna yé paali. Kakatimọ, kandai Biblu tọn dọmọ: “Egbesọegbesọ to tẹmpli mẹ podọ to owhé dopodopo gbè, yé ma nọ omẹ ma plọn, yé masọ nọ yẹwheho Jesu Klisti tọn ma dọ.”—Owalọ lẹ 5:42.

Lehe apọsteli lẹ yin didona na nugbo lọ go titẹdo dọ aṣẹpipa Jiwheyẹwhe tọn wẹ yiaga hugan do sọ! Pọndohlan dopolọ wẹ Klistiani nugbo lẹ tindo to egbehe. Kunnudetọ Jehovah tọn lẹ zindonukọn nado ganjẹ Jehovah go taidi Nupojipetọ Daho yetọn. Eyin yé yin gbedena nado yinuwa jẹagọdo anademẹ Jiwheyẹwhe tọn lẹ, yé nọ yigbe dile apọsteli lẹ wà do dọmọ: “Míwlẹ ma hà nọma setonuna Jiwheyẹwhe hú gbẹtọ.”

[Nudọnamẹ Odò Tọn]

[Apotin/Yẹdide to weda 9]

BE HIẸ KO KÀN KANBIỌ EHE SÈ DEWE PỌ́N YA?

Nawẹ Biblu-kàntọ lọ Luku mọ nudọnamẹ yí gando nuhe Gamalieli dọna Tohodọtọ Ju lẹ tọn to nuglọ go gbọn? Jiwheyẹwhe lọsu sọgan ko de hodidọ Gamalieli tọn lẹ hia Luku. Podọ vlavo, Paulu (he yin dopo to nuplọntọ Gamalieli tọn lẹ mẹ dai) sọgan ko dọ nuhe Gamalieli dọ lẹ na Luku. Kavi Luku lọsu sọgan ko mọ hagbẹ whẹdatẹn daho lọ tọn he jọmẹ de.