Nawẹ Jesu Klisti Nọ Yinuwado Jiwe Gbọn?

TO PỌNDOHLANMẸ na nuhe mí gbadopọnna to hosọ he jẹnukọn mẹ, be ayihaawe depope tin dọ nuplọnmẹ Jesu tọn lẹ ko yinuwado aihọn lọ blebu ji ya? Ṣigba, nuhe dopodopo mítọn dona kanse ede wẹ yindọ, “Nawẹ nuplọnmẹ Jesu tọn lẹ nọ yinuwado ji e gbọn?”

Nuplọnmẹ Jesu tọn lẹ gando hosọ voovo lẹ go. Anademẹ họakuẹ he yé bẹhẹn lẹ sọgan yinuwado adà gbẹzan towe tọn lẹpo ji. Mì gbọ mí ni ze ayidonugo do nuhe Jesu plọnmẹ gando nuhe jẹ lẹ zizedo otẹn tintan mẹ to gbẹzan mítọn mẹ, awuwiwlena họntọnjiji hẹ Jiwheyẹwhe, haṣinṣan dagbe tintindo hẹ mẹdevo lẹ, nuhahun lẹ dididẹ, po nuyiwa danú tọn lẹ didapana po go ji.

Ze Nuhe Jẹ lẹ do Otẹn Tintan Mẹ

Aihọn egbezangbe tọn he tin to mizọnmizọn ji nọ hò whenu po huhlọn po yí sọn mí si sọmọ bọ onú gbigbọmẹ tọn lẹ ma nọ saba tindo tẹnmẹ ba. Lẹnnupọndo apajlẹ dẹpẹ owhe 20-mẹvi he mí na ylọ dọ Jerry tọn ji. Dile etlẹ yindọ Jerry yiwanna hodọdopọ he sinai do Biblu ji lẹ bosọ yọ́n pinpẹn nuhe e nọ plọn sọn yé mẹ lẹ tọn, e wule dọmọ: “nulọ poun wẹ yindọ, yẹn ma nọ mọ whenu nado tindo hodọdopọ mọnkọtọn lẹ whẹwhẹ. Azán ṣidopo wẹ yẹn nọ wazọ́n na to osẹ dopo mẹ. Dimanche kẹdẹ wẹ yin gbọjẹzan ṣie. Podọ to whenuena yẹn ko wà nuhe n’dona wà lẹ fó godo, onú nọ ṣikọna mi zẹjlẹgo.” Eyin ninọmẹ he ma bọawu enẹ nkọtọn mẹ wẹ hiẹ tin te, a sọgan mọaleyi sọn nuhe Jesu plọnmẹ to Yẹwhehodidọ Osó ji tọn etọn mẹ.

Jesu dọna gbẹtọgun he plidopọ nado sè ohó etọn lẹ dọmọ: “Mì yin vivẹnunọ na ogbẹ̀ mìtọn blo, dọ, etẹ mì na dù podọ etẹ mì na nù, kavi na agbasa mìtọn dọ etẹ mì na ṣinyọ́n. Be ogbẹ̀ ma hú núdùdù, agbasa masọ hú avọ̀? Mì pọ́n ohẹ̀ he to aga lẹ; yé ma doji, mọ yé ma gbẹ̀n, mọ yé ma nọ bẹpli do zínhọ lẹ mẹ; ṣigba Otọ́ mìtọn olọn tọn to núdù na yé. Be mìwlẹ ma pọnte hú yé? . . . Enẹwutu mì yin vivẹnunọ blo, dọ, etẹ mí na dù? kavi, etẹ mí na nú? kavi, etẹ mí na do yin mẹṣinyọnavọ̀na? Na onú helẹ pó wẹ Kosi lẹ to dindin pé: Otọ́ mìtọn olọn tọn sọ yọnẹn dọ mì ma sọgan nọma tindo onú helẹ pó gba. Ṣigba mì din ahọludu Jiwheyẹwhe tọn, po dodo etọn po whẹ́; onú helẹ pó wẹ yè na dogọ hlan mì.” (Matiu 6:25-33) Etẹwẹ mí plọn sọn ehe mẹ?

Jesu ma to didọ dọ mí dona dovọ́na nukunpipedo nuhudo agbasamẹ tọn mítọn titi lẹ po whẹndo mítọn tọn lẹ po go gba. Biblu dọ dọ “Eyin mẹde ma wleawudai na etọn titi lẹ, humọ na whédo etọn lọsu lẹ, e mọ́n yise lọ, e sọ ylan hú mayisenọ.” (1 Timoti 5:8) Ṣigba, Jesu dopagbe dọ eyin mí ze nuhe jẹ lẹ do otẹn tintan mẹ bo ze gbigbọnu lẹ do nukọn, Jiwheyẹwhe na penukundo nuhudo mítọn he pò lẹ go. Nuplọnmẹ he tin tofi lọ gando nuhe jẹ lẹ zize do otẹn tintan mẹ go. Ayinamẹ ehe hihodo nọ dekọtọn do ayajẹ mẹ, na “ayajẹnọ wẹ mẹhe nuhudo gbigbọmẹ tọn yetọn nọ duahunmẹna lẹ.”—Matiu 5:3, NW.

Wleawuna Họntọnjiji hẹ Jiwheyẹwhe

Mẹhe nuhudo gbigbọmẹ tọn yetọn nọ duahunmẹna lẹ yọ́n nujọnu-yinyin awuwiwlena haṣinṣan dagbe hẹ Jiwheyẹwhe tọn. Nawẹ mí nọ wleawuna haṣinṣan dagbe hẹ mẹde gbọn? Be e ma yin vivẹnu wẹ mí nọ dó nado yọ́n mẹlọ ganji dogọ ya? Mí dona yí whenu zan nado yọ́n pọndohlan, walọ, nugopipe, po nuwadotana etọn lẹ po, gọna nuhe e yiwanna, po nuhe e gbẹwanna lẹ po. Nudopolọ wẹ e nọ biọ to mí si nado wleawuna họntọnjiji hẹ Jiwheyẹwhe. Oyọnẹn he pegan tintindo gando ewọ go yin dandannu. To whenuena Jesu to dẹ̀ho hlan Jiwheyẹwhe do devi etọn lẹ tamẹ, e dọmọ: “Ehe wẹ ogbẹ̀ madopodo, dọ yé ni yọ́n hiẹ ṣokẹdẹ Jiwheyẹwhe nugbo, podọ ewọ mẹhe hiẹ dohlan, yèdọ Jesu Klisti.” (Johanu 17:3) Mọwẹ haṣinṣan pẹkipẹki tintindo hẹ Jiwheyẹwhe nọ biọ dọ mí ni jẹakọ hẹ ẹ ganji. Asisa dopo gee he mẹ oyọnẹn enẹ nọ wá sọn wẹ Ohó gbọdo Jiwheyẹwhe tọn, Biblu. (2 Timoti 3:16) Mí dona de whenu dovo nado nọ plọn Owe-wiwe.

Ṣigba oyọnẹn tintindo poun ma pé gba. To odẹ̀ dopolọ mẹ, Jesu dọmọ: “yé [devi etọn lẹ] ko . . . yìn ohó towe.” (Johanu 17:6) Mí ma dona plọnnu gando Jiwheyẹwhe go poun gba, ṣigba mí sọ dona yinuwa sọgbe hẹ nuhe mí plọn lẹ. Mọwẹ, aliho devo de ma tin nado lẹzun họntọn Jiwheyẹwhe tọn. Be mí sọgan donukun dọ haṣinṣan he mí tindo hẹ mẹde na lodo, eyin mí nọ desọn ojlo mẹ bo nọ wà nuhe ma sọgbe hẹ linlẹn po nunọwhinnusẹ́n omẹ lọ tọn lẹ po ya? Enẹwutu, pọndohlan po nunọwhinnusẹ́n Jiwheyẹwhe tọn lẹ po wẹ dona nọ deanana afọdide mítọn lẹpo to gbẹ̀mẹ. Mì gbọ mí ni gbadopọnna lehe awe to nunọwhinnusẹ́n etọn lẹ mẹ gando haṣinṣan mítọn hẹ gbẹtọvi hatọ lẹ go gbọn.

Wleawuna Haṣinṣan Dagbe hẹ Mẹdevo Lẹ

To gbèdopo, Jesu pìn otàn kleun de nado plọnmẹ onú titengbe de gando haṣinṣan gbẹtọvi tọn lẹ go. E dọho gando ahọlu de go he jlo na basi akọ́nnta hẹ devizọnwatọ etọn lẹ. Ṣigba dopo to yé mẹ duahọ sọmọ bọ e ma sọgan sú i. Ahọlu lọ degbè dọ dawe lọ, asi etọn po ovi etọn lẹ po ni yin sisà nado sú ahọ́ lọ. Ahọ́tọnọ lọ họ́ jẹklo bo vẹvẹ dọmọ: “Fahomẹ to dè e, yẹn nasọ suahọ lẹpo we.” Lẹblanu etọn wà ahọlu lọ sọmọ bọ e jo ahọ́ etọn na ẹn. Ṣigba to whenuena afanumẹ lọ tlọ́n finẹ, e mọ afanumẹ hatọ etọn de he dù ahọ́ pẹvide do e, bo biọ ahọsumẹ. Mahopọnna dọ afanumẹ hatọ ehe vẹvẹna omẹ tintan lọ nado mọ lẹblanu etọn, e ze e dlan ganpamẹ kakajẹ whenue e na sú ahọ́ he e dù lẹpo. To whenuena ahọlu lọ sè linlin ehe tọn, e gblehomẹ taun. “Be hiẹ . . . ma do sọ tindo lẹblanu to devi hatọ towe ji yèdọ dile yẹn tindo lẹblanu to hiẹ ji do?” wẹ e kanse. To enẹgodo, e do afanumẹ he ma jonamẹ lọ hlan ganpamẹ kakajẹ whenue e na sú ahọ́ he e dù lẹpo. Jesu de nuplọnmẹ de sọn otàn lọ mẹ dọmọ: “Mọkẹdẹ ga wẹ Otọ́ ṣie olọn tọn na wà hlan mì do, eyin dopodopo mìtọn sọn ayiha mìtọn mẹ ma jona mẹmẹsunnu etọn lẹ.”—Matiu 18:23-35.

Taidi gbẹtọvi mapenọ lẹ, mí tindo awugbopo susu. Mí ma sọgan sú ahọ́ susugege oylan he mí nọ wà do Jiwheyẹwhe lẹpo tọn na ẹn gba. Nuhe mí sọgan wà lẹpo wẹ nado dín jona etọn. Podọ Jehovah Jiwheyẹwhe ko wleawufo nado jo ylanwiwa mítọn lẹpo na mí kiki eyin mí nọ jona mẹmẹsunnu mítọn lẹ na oylan he yé wà do mí lẹ. Nuplọnmẹ huhlọnnọ nankọtọn die! Jesu plọn hodotọ etọn lẹ nado nọ hodẹ̀ dọ: “Jo ahọ́ mítọn lẹ na mí, dile mí ko jona ahọ́tọnọ mítọn lẹ do.”—Matiu 6:12.

Họ̀n Adọ̀ Nuhahun lẹ Tọn Sẹ

Jesu tindo nugopipe vonọtaun na nuhe dù nukunnumimọjẹ walọ gbẹtọvi tọn mẹ. Ayinamẹ he e na gando nuhahun lẹ dididẹ go nọ gọalọ nado họ̀n adọ̀ yetọn sẹ. Lẹnnupọndo apajlẹ awe ehelẹ ji.

“Mì ko sè dọ yè dọ hlan omẹ hohowhenu tọn lẹ, dọ, Hiẹ ma na hùmẹ; mẹdepope he hùmẹ, e na tin to owù whẹdida tọn mẹ,” wẹ Jesu dọ. “Ṣigba yẹn dọ hlan mì, dọ, Mẹdepope he gblehomẹ do mẹmẹsunnu etọn go, na tin to owù whẹdida tọn mẹ.” (Matiu 5:21, 22) Jesu dohia tofi dọ e ma yin danuwiwa poun wẹ yin adọ̀ whẹho mẹhuhu tọn gba. Linlẹn he nọ doadọ̀do to ayiha mẹhutọ lọ tọn mẹ wẹ nuhahun lọ nọ wá sọn. Eyin gbẹtọ lẹ ma nọ na dotẹnmẹ numọtolanmẹ mẹhẹndohomẹ po homẹgble tọn po nado doadọ̀do do ayiha yetọn lẹ mẹ, danú he nọ yin wiwà sọn ojlo mẹ lẹ na busẹ. Lehe hùnsọndai na yin didapana eyin nuplọnmẹ ehe yin yíyí do yizan mẹ do sọ!

Pọ́n lehe Jesu de asisa nuhahun devo he nọ hẹn awubla susu wá tọn hia gbọn. E dọna gbẹtọgun lẹ dọmọ: “Mì ko sè dọ yè dọmọ, Hiẹ ma na deayọ: ṣigba yẹn dọ hlan mì, dọ, Eyin mẹdepope pọ́n yọnnusi de nado wà nugbigble hẹ ẹ, e ko deayọ hẹ ẹ to ayiha etọn mẹ dote. Eyin nukun towe adusi tọn hẹn we dahli, sún in sẹ, bosọ de e sọn ogo we.” (Matiu 5:27-29) Jesu dohia dọ nuhahun lọ ma sinai do walọ mawé lọ kẹdẹ ji gba. Nuhe jẹnukọnna ẹn lẹ wẹ nọ hẹn nuhahun lọ wá, yèdọ ojlo mawé lẹ. Eyin mẹde gbẹ́ ojlo he ma sọgbe lẹ dai bo ‘sún yé sẹ’ sọn ayiha etọn mẹ, e na duto nuhahun walọ mawé tọn he sọgan fọndote lẹ ji.

“Yí Ohí Towe do Otẹn Etọn Mẹ”

To ozán he mẹ Jesu yin didehia bo yin wiwle, dopo to devi etọn lẹ mẹ dọ̀n ohí etọn sún nado yiavunlọna ẹn. Jesu degbè na ẹn dọmọ: “Yí ohí towe do otẹn etọn mẹ; na mẹhe ze ohí lẹpo wẹ na dọ̀n po ohí po.” (Matiu 26:52) To wunkẹngbe etọn, Jesu dọna Pọntiu Pilati dọmọ: “Ahọludu ṣie ma yin aihọn he tọn gba: eyin ahọludu ṣie ko yin aihọn he tọn, be [devizọnwatọ] ṣie lẹ do hoavùn, na yè ma nado jo mi hlan Ju lẹ: ṣigba dinvie ahọludu ṣie ma yin sọn ofi gba.” (Johanu 18:36) Be nuplọnmẹ he ma yọn-na-yizan de wẹ ehe yin ya?

Nawẹ Klistiani dowhenu tọn lẹ yinuwa sọgbe hẹ nuplọnmẹ Jesu tọn lọ ma nado yí danuwiwa zan gbọn? Owe lọ Walọyizan Klistiani Dowhenu Tọn lẹ Tọn Hlan Awhàn (Glẹnsigbe) dọmọ: “Na yé [nuplọnmẹ Jesu tọn lẹ] gbẹ́ danuwiwa po awugbigble na mẹdevo lẹ po dai taidi nuhe ma sọgbe hẹ osẹ́n wutu, ehe dohia hezeheze dọ mahẹ tintindo to awhàn mẹ ma yin nuhe sọgbe . . . Klistiani dowhenu tọn lẹ setonu mlẹnmlẹn na gbedide Jesu tọn, bosọ mọnukunnujẹemẹ dọ nuplọnmẹ etọn lẹ dohia dọ yé dona yin homẹdagbenọ bo dapana danuwiwa to paa mẹ. Yé dohiagona sinsẹ̀n-bibasi yetọn gbọn jijọho-dindin dali; yé gblewhẹdo awhàn sinsinyẹn na hùnsọndai he e nọ bẹhẹn wutu.” Eyin mẹhe nọ sọalọakọ́n nado yin Klistiani lẹ ko setonuna nuplọnmẹ ehe wẹ, lehe whenuho gbẹtọvi tọn na ko gbọnvo do sọ!

Hiẹ Sọgan Mọaleyi sọn Nuplọnmẹ Jesu Tọn Lẹpo Mẹ

Nuplọnmẹ Jesu tọn he mí gbadopọnna lẹ yọ́nsè, bọawu, bo dohuhlọn. Gbẹtọvi lẹ sọgan mọaleyi eyin yé jẹakọ hẹ nuplọnmẹ etọn lẹ bo yí yé do yizan mẹ.a

Homẹ Kunnudetọ Jehovah tọn he tin to lẹdo towe mẹ lẹ tọn na hùn taun nado gọalọna we nado yọ́n lehe hiẹ sọgan mọaleyi sọn nuplọnmẹ dagbe hugan he ma ko yin nina gbọn gbẹtọvi depope dali mẹ do. Mí yí zohunhun do basi oylọna we nado dín yé mọ kavi nado kanwe hlan adlẹsi he tin to weda 2 linlinnamẹwe ehe tọn ji.

[Nudọnamẹ odò tọn]

[Yẹdide to weda 5]

“Otọ́ mìtọn olọn tọn to núdù na yé”

[Yẹdide to weda 7]

Nuplọnmẹ Jesu tọn lẹ sọgan yinuwado gbẹzan towe ji to aliho dagbe mẹ