NUPINPLỌN 28
Nọ Yọ́n Pinpẹn Nuhe Jehovah po Jesu po Wà Na We Tọn
Nawẹ e nọ ṣí na we eyin họntọn de na we nunina dagbedagbe de? E yọnbasi dọ homẹ towe nọ hùn sọmọ bọ a nọ jlo na dohia họntọn towe dọ a yọ́n pinpẹn nunina lọ tọn. Jehovah po Jesu po ko na mí nunina dagbe hugan he mí sọgan mọyi. Etẹwẹ yin nunina lọ, podọ nawẹ mí sọgan dohia dọ mí yọ́n pinpẹn etọn gbọn?
1. Aliho tẹ mẹ wẹ mí sọgan dohia dọ mí yọ́n pinpẹn nuhe Jiwheyẹwhe po Klisti po wà na mí tọn te?
Biblu dopà dọ “mẹdepope he do yise hia to [Jesu] mẹ” sọgan nọgbẹ̀ kakadoi. (Johanu 3:16) Etẹwẹ e zẹẹmẹdo nado do yise hia? E bẹ nususu hẹn hugan yise tintindo to Jesu mẹ poun. Mí dona nọ do yise hia to nudide he mí nọ basi po nuhe mí nọ wà lẹ po mẹ. (Jakọbu 2:17) Eyin walọyizan po hodidọ mítọn po nọ dohia dọ mí do yise, mí na hẹn haṣinṣan mítọn hẹ Jesu po Otọ́ etọn Jehovah po lodo.—Hia Johanu 14:21.
2. Nujijọ vonọtaun tẹ tẹnmẹ wẹ mí gán dohia dọ mí yọ́n pinpẹn nuhe Jehovah po Jesu po wà na mí tọn te?
To ozán he jẹnukọnna okú Jesu tọn mẹ, e dọhona hodotọ etọn lẹ gando aliho devo he mẹ yé sọgan nọ do pinpẹn-nutọn-yinyọnẹn yetọn hia na avọ́sinsan etọn te go. E ze hùnwhẹ vonọtaun de dai, he Biblu ylọdọ “Tenu-Núdùdù Oklunọ tọn,” he sọ nọ yin yiylọdọ Oflin Okú Klisti tọn. (1 Kọlintinu lẹ 11:20) Jesu ze hùnwhẹ ehe dai na apọsteli etọn lẹ—po mẹdevo he na wá lẹzun Klistiani nugbo lẹpo po—nido nọ flindọ ewọ ze ogbẹ̀ etọn jo do ota mímẹpo tọn mẹ. Na nuhe dù hùnwhẹ ehe, Jesu degbe dọmọ: “Mì nọ wà ehe to oflin ṣie mẹ.” (Luku 22:19) Eyin a yì hùnwhẹ Oflin tọn, a na dohia dọ a yọ́n pinpẹn owanyi daho he Jehovah po Jesu po tindo na mí tọn.
DINDONANU DOGỌ
Gbadopọnna aliho devo lẹ he mẹ a sọgan dohia te dọ a yọ́n pinpẹn owanyi daho he Jehovah po Jesu po dohia we tọn, gọna nuhewutu Oflin okú Klisti tọn do yin nujọnu.
3. Pinpẹn-nutọn-yinyọnẹn nọ whàn mí nado yinuwa
Mí ni dọ dọ a to tọ̀kú bọ mẹde whlẹn we. Be a gán wọn nuhe e wà na we gbede ya? Kavi a na nọ dín dotẹnmẹ hundote lẹ nado dohia ẹ dọ a yọ́n pinpẹn nuhe e wà na we tọn?
Mí duahọ ogbẹ̀ mítọn tọn do Jehovah. Hia 1 Johanu 4:8-10, enẹgodo dọhodo kanbiọ ehelẹ ji:
Naegbọn avọ́sinsan Jesu tọn do yin nunina vonọtaun de?
Numọtolanmẹ tẹwẹ nuhe Jehovah po Jesu po ko wà na we hẹn we tindo?
Nawẹ mí sọgan nọ dohia dọ mí yọ́n pinpẹn nuhe Jehovah po Jesu po wà na mí lẹ tọn gbọn? Hia 2 Kọlintinu lẹ 5:15; gọna 1 Johanu 4:11; 5:3. To wefọ dopodopo hihia godo, dọhodo kanbiọ ehe ji:
Sọgbe hẹ wefọ enẹ, etẹwẹ mí sọgan wà nado do pinpẹn-nutọn-yinyọnẹn mítọn hia?
4. Nọ hodo apajlẹ Jesu tọn
Aliho devo he mẹ mí sọgan nọ do pinpẹn-nutọn-yinyọnẹn mítọn hia te wẹ nado nọ hodo apajlẹ Jesu tọn. Hia 1 Pita 2:21, enẹgodo dọhodo kanbiọ ehe ji:
Aliho tẹlẹ mẹ wẹ a sọgan nọ hodo afọdòmẹ Jesu tọn lẹ pẹkipẹki te?
Jesu yiwanna Ohó Jiwheyẹwhe tọn, nọ dọyẹwheho bosọ nọ gọalọna mẹdevo lẹ
5. Nọ yì hùnwhẹ Oflin okú Klisti tọn
Nado mọ nuhe jọ to hùnwhẹ Tenu-Núdùdù Oklunọ tọn tintan whenu, hia Luku 22:14, 19, 20. Enẹgodo dọhodo kanbiọ ehelẹ ji:
Etẹwẹ jọ to Tenu-Núdùdù Oklunọ tọn lọ whenu?
Etẹwẹ akla po ovẹn lọ po nọtena?—Pọ́n wefọ 19 po 20 po.
Jesu jlo dọ devi etọn lẹ ni nọ basi Tenu-Núdùdù Oklunọ tọn whladopo to whemẹwhemẹ to azán oflin okú etọn tọn gbè. Enẹ wẹ zọ́n bọ Kunnudetọ Jehovah tọn lẹ do nọ pli dopọ to whemẹwhemẹ nado flin okú Klisti tọn to aliho he mẹ ewọ degbe dọ mí ni nọ basi i te. Nado mọ lehe opli vonọtaun ehe nọ yì do, hò VIDEO lọ. Enẹgodo dọhodo kanbiọ he bọdego ji.
Etẹwẹ nọ jọ to Oflin lọ whenu?
Akla lọ po ovẹn lọ po yin yẹhiadonu lẹ. Akla lọ nọtena agbasa gbẹtọvi pipé tọn Jesu tọn he e zejo do ota mítọn mẹ. Ovẹn lọ nọtena ohùn etọn
MẸDELẸ NỌ DỌ DỌ: “Eyin a gbẹ́ yise to Jesu mẹ poun, a na yin whinwhlẹngán.”
Nawẹ a sọgan zan Johanu 3:16 po Jakọbu 2:17 po do dohia yé dọ whlẹngán nọ biọ nususu hugan mọ gbọn?
BLADOPỌ
Mí nọ dohia dọ mí yọ́n pinpẹn nuhe Jesu wà na mí tọn gbọn yise didohia to ewọ mẹ po hùnwhẹ Oflin okú etọn tọn yìyì po dali.
Dogbapọn
Etẹwẹ e zẹẹmẹdo nado do yise hia to Jesu mẹ?
Etẹwẹ e na jlo we dọ a ni wà nado do pinpẹn-nutọn-yinyọnẹn towe hia na nuhe Jehovah po Jesu po wà na we?
Naegbọn hùnwhẹ Oflin okú Klisti tọn yìyì do yin nujọnu taun?
PỌ́N NUDỌNAMẸ DEVO LẸ
Etẹwẹ okú Klisti tọn nọ whàn mí nado wà?
Plọn nususu dogọ gando yise go, gọna lehe mí sọgan nọ do e hia do.
“Do Yise Hia to Opagbe Jehovah Tọn lẹ Mẹ” (Atọ̀họ̀-Nuhihọ́ lọ Tọn, octobre 2016 tọn)
Pọ́n lehe nupinplọn gando avọ́sinsan Klisti tọn go diọ gbẹzan nawe de tọn do, to otàn gbẹzan tọn lọ “N’Jo Gbẹzan Gblezọn Ṣie Dai Tọn Do Bosọ to Vivi Ogbẹ̀ Tọn Dù” mẹ.
“Biblu Nọ Diọ Gbẹzan Mẹtọn” (Alọnuwe Atọ̀họ̀-Nuhihọ́ lọ Tọn, 1er août 2011 tọn)
Pọ́n nuhewutu omẹ vude poun wẹ nọ dù akla lọ bo nọ nù ovẹn lọ.