Aihọn Yọyọ de He Jiwheyẹwhe Dopagbe Etọn

OHÓ kandai Jiwheyẹwhe tọn, Biblu, na mí todido to whenuena e dọmọ: “Di opagbe etọn, míwlẹ to nukundo olọn yọyọ lẹ, po aigba yọyọ de po, ofi he dodo nọ nọ̀.”—2 Pita 3:13.

Etẹwẹ “olọn yọyọ lẹ” nọtena? Biblu nọ ylọ gandudu dọ olọn lẹ. (Owalọ lẹ 7:49) Gandudu yọyọ de he na paṣẹ do aigba ji wẹ “olọn yọyọ lẹ” nọtena. E yin yiylọdọ yọyọ na e na diọtẹnna tito gandudu tọn dintọn; e sọ yin onú doai yọyọ de he gblamẹ Jiwheyẹwhe na hẹn lẹndai etọn lẹ di te debọdo-dego. Ahọluduta he Jesu plọn mí nado nọ hodẹ̀ na lọ niyẹn. (Matiu 6:10) To whenuena e yindọ Jiwheyẹwhe he nọ nọ̀ olọn mẹ lọ wẹ yin Dowatọ etọn, e nọ yin yiylọdọ “ahọludu olọn tọn.”—Matiu 7:21.

Etẹwẹ “aigba yọyọ” lọ nọtena? E mayin planẹti yọyọ de gba, na Biblu ko dọ hezeheze dọ aigba na yin fininọ kakadoi. Ogbẹ́ gbẹtọvi tọn yọyọ de wẹ “aigba yọyọ” lọ nọtena. E na yin yọyọ na mẹylankan lẹ na ko yin sinsán sẹ̀ wutu. (Howhinwhẹn lẹ 2:21, 22) Mẹhe na nọgbẹ̀ to whenẹnu lẹpo na nọ pagigona Mẹdatọ lọ bo nọ setonuna ẹn bo nasọ nọgbẹ̀ sọgbe hẹ nubiọtomẹsi etọn lẹ. (Psalm 22:27) Gbẹtọ lẹ sọn akọta lẹpo mẹ to yinyin oylọ-basina nado wá plọn nubiọtomẹsi enẹlẹ bo nọgbẹ̀ sọgbe hẹ yé todin. Be hiẹ to mọwà ya?

Mẹlẹpo wẹ na litaina gandudu Jiwheyẹwhe tọn to aihọn yọyọ etọn mẹ. Be owanyina Jiwheyẹwhe nọ whàn we nado setonuna ẹn ya? (1 Johanu 5:3) Be tonusisena osẹ́n Jiwheyẹwhe tọn nọ sọawuhia to owhé towe gbè? to azọ́nmẹ kavi to wehọmẹ? to aliho he mẹ hiẹ to gbẹnọ te mẹ ya?

To aihọn yọyọ enẹ mẹ, gbẹtọvi lẹ na yin kinkọndopọ to sinsẹ̀n-bibasi na Jiwheyẹwhe nugbo lọ mẹ. Be hiẹ to Didatọ olọn po aigba po tọn lọ sẹ̀n ya? Be sinsẹ̀n-bibasi towe nọ kọ̀n we dopọ nugbonugbo hẹ yisenọ hatọ akọta lẹpo, sinmẹ lẹpo, gọna ogbè lẹpo tọn ya?—Psalm 86:9, 10; Isaia 2:2-4; Zẹfania 3:9.

[Apotin to weda 17]

Jiwheyẹwhe He Dopagbe Onú Helẹ Tọn

Ewọ wẹ Didatọ nudida yinukundomọ agahomẹ tọn lẹ po Aigba mítọn po tọn. Ewọ wẹ mẹhe Jesu Klisti ylọdọ ‘Jiwheyẹwhe nugbo dopo akàn lọ.’—Johanu 17:3.

Suhugan gbẹtọvi lẹ tọn nọ gbògbéna yẹwhe he yé lọsu basi lẹ. Gbẹtọ livi susu wẹ nọ litai to boṣiọ he ma tindo gbọfufu lẹ nukọn. Mẹdevo lẹ nọ ze nuzedai gbẹtọvi tọn lẹ, ojlo agbasanu bibẹpli tọn, kavi ojlo yetọn titi lẹ daga. Etlẹ yin mẹhe nọ sọalọakọ́n dọ yé nọ yí Biblu zan lẹ ma nọ pagigona oyín mẹhe Biblu ylọ dọ ‘Jiwheyẹwhe nugbo lọ’ tọn gba.—Deutelonomi 4:35.

Mẹdatọ lọ dọ gando ede go dọ: “yẹn wẹ [Jehovah; NW ] enẹ wẹ oyín ṣie.” (Isaia 42:5, 8) Oyín ehe sọawuhia hugan whla 7 000 to Biblu mẹ to ogbè dowhenu tọn etọn lẹ mẹ. Jesu Klisti plọn hodotọ etọn lẹ nado nọ hodẹ̀ dọmọ: “Otọ́ mítọn he tin to olọn mẹ, hihiọ wẹ oyín towe.”—Matiu 6:9.

Omẹ nankọtọn wẹ Jiwheyẹwhe nugbo lọ yin? E do ede hia nado yin ‘lẹblanunọ podọ homẹdagbenọ, awuwhletọ nado sadi, podọ susunọ to dagbewanyi po nugbo po mẹ’ podọ mẹhe ma nọ miyọnnukundo ylanwiwa mẹhe nọ gbà osẹ́n etọn sọn ojlo mẹ wá lẹ tọn to aliho depope mẹ. (Eksọdusi 34:6, 7) Aliho he mẹ e yinuwa hẹ gbẹtọvi lẹ te to whenuho gblamẹ do nugbo-yinyin hogbe enẹlẹ tọn hia.

Oyín lọ po ewọ he tindo e po dona yin kinklandowiwe, kavi yin nuyiwahẹ taidi wiwe. Taidi Mẹdatọ podọ Gigogán Wẹkẹ lọ tọn, e jẹ dọ mí ni setonuna ẹn bosọ sẹ̀n ẹn. Be hiẹ nọ wà ehelẹ hlan ẹn ya?

[Apotin/Yẹdide to weda 18]

Diọdo Tẹlẹ Wẹ “Olọn Yọyọ lẹ po Aigba Yọyọ de po” Na Hẹnwa?

Aigba yin didiọzun Paladisi Luku 23:43

[Apotin/Yẹdide to weda 19]

Be Hiẹ Na Mọ Ale lọ Yí Ya?

Jiwheyẹwhe ma nọ dolalo!—Titu 1:2.

Jehovah dọmọ: “Ohó ṣie . . . ma na lẹgọ wá dè e agbá, ṣigba e na dotana nuhe yẹn jlo, e na wadagbe to nuhe mẹ yẹn do e hlan te.”—Isaia 55:11.

Jehovah ko to awuwlena “olọn yọyọ lẹ po aigba yọyọ de po” to alọnu. Gandudu olọn tọn lọ ko bẹ azọ́n jẹeji. Dodonu “aigba yọyọ” lọ tọn ko yin didoai.

To whenuena e ko dọ delẹ to onú jiawu he “olọn yọyọ de, po aigba yọyọ de po” na wadotana na gbẹtọvi lẹ godo, owe Osọhia tọn yihodọ sọn Jiwheyẹwhe lọsu titi, yèdọ Nupojipetọ Wẹkẹ tọn dè dọmọ: “Pọ́n, yẹn diọ onú lẹpo zun yọyọ.” E sọ dọmọ: “Wlanwe: ohó helẹ dodo po nugbo po wẹ.”—Osọhia 21:1, 5.

Kanbiọ titengbe lọ wẹ, Be mí to diọdo he jẹ lẹ basi nado sọgan yin pinpọnhlan taidi mẹhe jẹ nado yin apadewhe “aigba yọyọ” lọ tọn to “olọn yọyọ lẹ” glọ ya?