Indi ang Pinakamaayo nga mga Paagi sa Pagbag-o

SA TION nga matukod na ang mga bitula sang batasan, paano mahimo ang pagbag-o? Sin-o ang imo makadtuan, kag anong mga metodo ang magamit sa pagpatubas sing dayon nga pag-uswag?

Binagbinagon naton ang pila sang sobra nga mga paagi nga ginagamit karon.

Politikal nga Pag-ipit

Minilyon ka tawo karon ang nagakabuhi sa idalom sang pagginahom nga nagatinguha sa pagkontrol sang mga prinsipio kag sang talaksan sang paggawi. Ginagamit sina nga mga panguluhan ang ila gahom sa pagpahanabo sing pagbag-o​—ang iban sing malalangon, ang iban sing pilit. Ang iban nagagamit sing brainwashing nga mga teknik, sa masami lakip ang pagpamahog, pagbilanggo, kag pagpaantos. Ginakontrol ang mga balita kag ang iban pa nga sistema sang edukasyon, ginatinguhaan nila nga islan ang tanan nga natukod na nga mga ideya sing mga naluyagan sang nagagahom nga kadalagkuan. Ang tanan nga pagpamatok pilit nga ginapahipos. Ang bisan sin-o nga indi magpatudlo liwat mahimo nga ipadayag sa makahaladlok nga pagtratar nga sa masami nagabuong sang espiritu sang isa ka indibiduwal.

Pag-opera sa Utok kag Elektrikal nga Pagpukaw

Ang pila ka bahin sang utok napamatud-an nga nagaapektar sa ispisipiko nga mga panimuot kag mga porma sang paggawi. Ang pag-opera sa utok nagadalahig sang pisikal nga pagkuha ukon pagpierdi sa tisyo sang utok sa sina nga bahin sang utok. Sa tion nga makuha ini, ini nga bahin sang imo utok indi na liwat makapanghikot, kag ang batasan nga ginaimpluwensiahan sini madula.

Ginasiling nga linibo sina nga operasyon ang nahimo na, labi na sa mga tawo nga may dikinaandan kag makatalagam nga batasan sa sekso. Ang iban may diutay nga mga electrode nga ginsal-ot sa sulod sang ila utok, kag sang magamitan ini sing koryente, ginpukaw sini ukon ginbalabagan ang ginahimo sang utok sa sina nga bahin. Ginasiling nga ginabag-o sini ang mga sugyot nga nagaapektar sa batasan nga ginakontrol sina nga bahin sang utok.

Mga Droga

Lapnag ang paggamit sing droga sa sikyatriya kag sa masami kinahanglanon. May mga droga sa pagpakalma, mga droga sa pagpatulog, mga droga sa pagpapagsik, kag mga droga sa pagtadlong sang pagkaditimbang sang mga kemikal sa utok. May yara man mga droga nga gingamit subong silot sa mga bilangguan kag sa iban pa nga correctional institution. Ang duha sina nga mga droga amo ang apomorpina kag ang Anectine.

Ang apomorpina ginagamit sa mga bilanggo nga ang ila batasan ginakabig nga indi kalahamut-an. Nagapalingin ini sang ulo kag nagapasuka. Ang bilanggo ginasilingan nga kon magtinonto sia liwat, hatagan sia sing dugang nga apomorpina. Ginatawag man ini nga aversive therapy. Ang Anectine ginabangdan sang daw ginahapo kag indi makaginhawa nga balatyagon sa nagatinonto nga bilanggo. Nagadumdom sia nga mapatay sia. Kon magtinonto sia liwat, ginahatagan sia sing dugang nga Anectine.

Amo bala ini ang mga paagi nga gamiton mo sa pagbag-o sang imo batasan?

Ang kalabanan sang mga metodo sa ibabaw nagasumpakil sa hilway nga kinamatarong sa pagdesisyon. Nagadalahig man ini sang impluwensia sang mga tawo nga may gahom sa isa ka tawo apang wala pirme nagahunahuna sang kaayuhan sina nga tawo. Ginatinguhaan bala sang politikal nga gahom ang iya kaugalingon nga bentaha ukon ang iya sang indibiduwal? Sa pag-opera sa utok, sin-o ang nagauyat sang kutsilyo nga inug-opera? Sin-o ang nagakontrol sang switch kon elektrikal nga pagpukaw ang ginagamit? Daw ano ka dugay ang epekto sang aversive therapy? Masaligan bala ang terapista?

Binagbinagon naton ang kapin ka kahalamut-an nga paagi.