Pagkalipay sa Musika​—⁠Ano ang Sekreto?

ANG malaut nga imoralidad kag idolatriya ginbuhat anay sa dumaan nga kalibutan. Busa, nasapwan ni apostol Pablo nga kinahanglanon gid nga maghatag sia sing mabaskog nga laygay tuhoy sa Cristianong paggawi. Ginsulatan niya ang kongregasyon sa Efeso: “Karon nagasiling ako sini kag nagapamatuod sa Ginuo, nga wala na kamo nagagawi subong sang paggawi sang mga pungsod sa pagkawalay pulos sang ila mga hunahuna, samtang nadulman sila sa ila paghangop, kag nahamulag sa kabuhi nga iya sang Dios, bangod sang ila pagkawalay hinalung-ong, bangod sang pagkatig-a sang ila tagipusuon.”​—⁠Efeso 4:​17, 18.

Indi bala ina sibu man nga paglaragway sa mga butang karon? Nagalakip ini sa latagon sang musika. Ang kalabanan sang modernong musika nagapabanaag sing estilo nga ‘dumuluong sa diosnon nga kabuhi.’ Sa masami ang liriko nagapakita sing ‘matig-a nga tagipusuon,’ nga wala sing kaluoy ukon kaawa.

Apang gindugangan pa ni Pablo ang iya laygay sa pagsiling: “Ang ila pagbatyag kon ano ang husto kag sayop naghabol, gintugyan nila ang ila kaugalingon sa kaulag kag ginabuhat nila ang tanan nga sahi sang kahigkuan.”​—⁠Efeso 4:​19, The Jerusalem ­Bible.

Ining ‘pagbuhat sang tanan nga sahi sang kahigkuan’ ginapabanaag sa kalabanan nga musika karon. Ang mga liriko kag kahulugan sang musika nagapaayaw sa isa ka kaliwatan nga nagapatuyang sa sekso, kasingki, droga, kag pagpangalipay. Paano dapat tamdon sang mga Cristiano ina nga mga bisyo? Talupangda ang ginpamulong ni Pablo: “Indi amo sina ang naton-an ninyo kay Cristo, luwas kon wala kamo mamati sa iya sing nagakaigo sang gintudluan kamo kon ano ang kamatuoran nga yara kay Jesus.”​—⁠Efeso 4:​20, 21, JB.

Kinahanglanon ang “Espirituwal nga Pagbag-o”

Paano naton maaplikar ining laygay kon tuhoy sa musika nga nagapabanaag sang espiritu sang kalibutan? Kon may yara kita sang “hunahuna ni Cristo,” kon sayoron, kon may yara kita sang iya panghunahuna, indi kita mamati sa musika nga “dutan-on, sapat-sapaton, demonyohanon.”​—⁠1 Corinto 2:​16; Santiago 3:⁠15.

Apang mahimo mamangkot ka, ‘Paano ko mabag-o ang luyag ko sa musika?’ Sa liwat makabulig si Pablo, kay nagasiling sia: “Dapat ninyo biyaan ang inyo daan nga pagkabuhi; dapat ninyo isikway ang inyo daan nga pagkatawo, nga ginpalain sang inyo pagsunod sa malimbungon nga mga kailigbon. Dapat ninyo bag-uhon ang inyo hunahuna paagi sa espirituwal nga pagbag⁠-⁠o.”​—⁠Efeso 4:​22, 23, JB.

Yara ang sabat, pagbag-o sang hunahuna paagi sa espirituwal nga pagbag-o. Kapin pa sa aton luyag sa musika ang nadalahig sa sini. Nagakinahanglan ini sing pagtuon liwat kag pagpataas sang mga talaksan kag mga prinsipio. Nagakahulugan ini nga bag-uhon naton ang aton panghunahuna, isa ka tuhay nga mga talaksan. Kag nagadalahig ini sang pagtamod sa mga butang gikan sa pagtamod sang Dios kag ni Cristo. Subong maathag gid nga ginpabutyag ni Pablo: “Bisan nagakaon kamo ukon nagainom ukon bisan ano ang inyo ginahimo, himua ang tanan sa himaya sang Dios.”​—⁠1 Corinto 10:⁠31.

Ang kalabanan sang modernong musika wala nagadala sing himaya sa Dios. Sa kabaliskaran, ginasikway sini ang mga prinsipio nga ginatindugan sang mga Cristiano kag bangod sini madamo ang nangin handa sa pagpanginmatay sa mga bilangguan kag sa mga kampo konsentrasyon. Busa, ngaa pa kabigon naton nga isa ini ka sakripisyo kon dapat naton bag-uhon ang aton luyag sa musika agod indi ‘mahigugma ang kalibutan ukon ang mga butang sa kalibutan’?​—⁠1 Juan 2:​15-17.

Maayong Musika​—⁠Ano ang Sekreto?

Kon, bangod sang aton pag-apresyar sa Makasulatanhon nga mga prinsipio, ginasikway naton ang malaw-ay nga musika, ano ang maibulos naton sa sini? Ti, ngaa indi pag-usisaon ang bag-o nga mga sahi sang musika? Mahimo nga mas makalilipay ini kag mas makapalig-on sang sa naluyagan naton sang una. Halimbawa, ang isa ka musikero anay sa rock nagsiling sini nahanungod sa mga pagbag-o nga iya ginhimo:

“Nagpanikasog ako sa pagsaylo halin sa mahapos nga tunog sang rock pakadto sa nahamut-an nga popular nga sahi sang musika kag sinadto nga klasikal nga musika. Apang sang mahangpan ko nga may kapin ini nga kahulugan kag indi na ako makilal-an upod sa espiritu sang kalabanan sang modernong musika, nangin mas mahapos ini kag mas makaalayaw. Sa hinali nangin matahom ini. Narealisar ko kon ano ang nawasi ko bangod sang akon pagkaugot sa iban nga sahi sang musika.”

Ang klasikal nga musika may daku nga pagkananuhaytuhay, subong man ang balitaw kag pila ka modernong musika, nga may matahom nga lanton, matinlo nga liriko, kag wala nagapabutyag sing pilosopiya nga batok sa mga prinsipio sang Biblia. Ang sekreto amo ang pagpangita kag pagkalipay sa musika nga indi magaimpluwensia sa aton panghunahuna sa malain, musika nga ‘matarong, putli, dungganon, maayo, kag dalayawon.’​—⁠Filipos 4:⁠8.

Ang Papel sang Musika sa Cristianong Kabuhi

Para sa iban, ang isa ka paagi sa pagkalipay sa maayong musika amo ang pag-amba ukon pagtuon sa pagtokar sing isa ka instrumento. Daku nga kalipay ang matigayon gikan sa solo kag grupo nga pag-amba upod sa pamilya kag mga abyan. Apang, subong sang sa tanan nga butang, kinahanglan ang pagkabalanse. Ang kalingawan ukon dibersion indi dapat mangin una nga butang sa kabuhi sang isa ka Cristiano. Kon matabo ina, bisan ang maayong musika, bangod sang pagpasobra, makahatag sing indi maayo nga mga epekto. Nian ang Cristiano yara sa katalagman nga mangin ‘mahigugmaon sa kinasadya sa baylo nga sa Dios.’​—⁠2 Timoteo 3:⁠4.

Ang musika isa man ka kinahanglanon gid nga bahin sang aton pagsimba kay Jehova. Sa dumaan nga Israel, si Asap kag ang iya kauturan nag-amba: “Pasalamat kamo kay Jehova, kamo nga katawhan; magtawag sa iya ngalan, ipakilala ninyo ang iya mga binuhatan sa mga katawhan! Amba kamo sa iya, amba sing pagdayaw sa iya, hambal kamo sang tanan niya nga makatilingala nga mga binuhatan.” Huo, ang musika sarang makadayaw sa Dios kag makapahamuot sa iya.​—⁠1 Cronica 16:​8, 9.

Ang mga ambahanon sang Ginharian nga ginagamit sang mga Saksi ni Jehova sa ila Kingdom Hall napasad sa mga teksto, mga salmo, mga pangamuyo, kag mga panudlo sa Biblia. Indi man bala kita malipay sing daku sa sining balaan nga musika? Kag indi bala dapat naton ipakita ang aton kalipay paagi sa pag-amba sining mga ambahanon nga may balatyagon kag kapagsik? Bisan sa mga okasyon luwas sa Cristianong mga miting, indi bala naton mapahalipay ang aton kabuhi paagi sa matahom nga mga pag-areglar sining mga ambahanon nga ginatawag Kingdom Melodies?

Sa sining paglanton sang orkestra, ang tanan nga musikero mga Saksi ni Jehova. Ang iban mga propesyonal nga nagatokar sa sym­phony nga orkestra. Ang iban, lakip ang musikero anay sa rock nga ginbalikwat kaina, mga hoben pa nga mga tawo nga may kinaadman kag nalipay sa madamo nga sahi sang desente nga musika. Wala nila ginabatyag nga may nawasi sila bangod sang pagsikway nila sa musika nga nagapabanaag sing dutan-on kag demonyohanon nga mga panimuot. Ang ila maayong huwaran nagapakita nga, kon tugutan naton ang mga prinsipio sang Biblia nga mag-impluwensia sa aton pagpili, makasapo man kita sing daku nga kalipay sa kalibutanon kag balaan nga musika.​—⁠Efeso 5:​18-20.

[Kahon sa pahina 28]

“Ang rock nga musika may isa lamang ka ganyat, isa ka magaris nga ganyat, sa seksuwal nga kailigbon​—⁠indi gugma, indi eros, kundi seksuwal nga kailigbon nga wala mabag-o kag wala madisiplina. . . . Nahibaluan sang mga pamatan-on nga ang rock may ritmo sa seksuwal nga paghiusa.”​—⁠The Closing of the American Mind, ni Allan Bloom.