Bawtismo sa Ngalan sang Amay kag sang Anak kag sang Balaan nga Espiritu

“Busa lakat kamo kag maghimo sang mga disipulo . . . , nga nagabawtismo sa ila sa ngalan sang Amay kag sang Anak kag sang balaan nga espiritu.”—MAT. 28:19.

1, 2. (a) Ano ang natabo sa Jerusalem sang Pentecostes 33 C.E.? (b) Ngaa madamo ang nagpabawtismo?

MADAMO nga tawo gikan sa nagkalainlain nga pungsod ang nagdugok sa Jerusalem. Sang adlaw sang Pentecostes 33 C.E., samtang ginasaulog ang isa ka importante nga kapiestahan nga ginpakigbahinan sang madamo nga bisita, may natabo nga isa ka pinasahi nga butang. Pagkatapos sini, si apostol Pedro naghatag sang isa ka makapahulag nga pamulongpulong. Subong resulta, mga 3,000 ka Judiyo kag mga proselita ang natandog sa iya pinamulong, naghinulsol, kag nagpabawtismo sa tubig. Ina nga kadamuon gindugang sa bag-o ginporma nga Cristianong kongregasyon. (Binu. 2:41) Ang pagbawtismo sa madamo nga tawo sa mga punong ukon mga suluptan sang tubig sa palibot sang Jerusalem mahimo nga gintunaan gid sang daku nga kinagula!

² Ano ang nagpahulag sa madamo nga magpabawtismo? Sang temprano pa sina nga adlaw, “may gahod gikan sa langit subong sang nagahagunos nga huyop sang hangin.” Sa naibabaw nga hulot sang isa ka balay, mga 120 ka disipulo ni Jesus ang napuno sang balaan nga espiritu. Pagkatapos sini, nakibot ang pila ka lalaki kag babayi nga nagatilipon sang nabatian nila ang mga disipulo nga ‘naghambal sang lainlain nga hambal.’ Sang nabatian nila ang ginsiling ni Pedro, lakip ang iya prangka nga pinamulong tuhoy sa kamatayon ni Jesus, “napilasan ang ila tagipusuon.” Ano ang dapat nila himuon? Si Pedro nagsabat: “Maghinulsol kamo, kag ang tagsatagsa sa inyo magpabawtismo sa ngalan ni Jesucristo . . . , kag mabaton ninyo ang wala bayad nga dulot nga balaan nga espiritu.”—Binu. 2:1-4, 36-38.

 3. Sang adlaw sang Pentecostes, ano ang kinahanglan himuon sang mga naghinulsol nga mga Judiyo kag mga proselita?

³ Hunahunaa ang espirituwal nga kahimtangan sang mga Judiyo kag mga proselita nga nakabati kay Pedro. Mga sumilimba na sila ni Jehova. Kag sa Hebreong Kasulatan, nahangpan nila nga ang balaan nga espiritu amo ang aktibo nga puersa sang Dios nga gingamit niya sa tion sang pagpanuga kag padayon niya nga ginagamit. (Gen. 1:2; Huk. 14:5, 6; 1 Sam. 10:6; Sal. 33:6) Apang, may butang pa sila nga dapat himuon. Importante nga mahangpan nila kag batunon ang paagi sang Dios sang pagluwas—ang Mesias nga si Jesus. Gani, ginpadaku ni Pedro nga kinahanglan sila “magpabawtismo sa ngalan ni Jesucristo.” Mga pila ka adlaw antes sini, ginsugo sang ginbanhaw nga si Jesus si Pedro kag ang iban pa nga bawtismuhan ang mga tawo “sa ngalan sang Amay kag sang Anak kag sang balaan nga espiritu.” (Mat. 28:19, 20) Ina nga pinamulong may daku nga kahulugan sang unang siglo, kag tubtob subong. Ano ang kahulugan sini?

Sa Ngalan sang Amay

 4. Ano nga pagbag-o ang natabo sa mga tawo nga may yara anay kaangtanan kay Jehova?

⁴ Subong sang nasambit na, ang mga napahulag sa pamulongpulong ni Pedro mga sumilimba ni Jehova nga may yara anay kaangtanan sa iya. Gintinguhaan nila nga sundon ang iya Kasuguan, kag amo ini ang rason kon ngaa madamo sa ila nga gikan sa iban nga pungsod ang nagkadto sa Jerusalem. (Binu. 2:5-11) Apang, naghimo ang Dios sang isa ka daku nga pagbag-o sa iya pagpakig-angot sa mga tawo. Ginsikway niya ang mga Judiyo subong iya pinasahi nga pungsod; indi na nila matigayon ang iya kahamuot paagi sa pagtuman sang Kasuguan. (Mat. 21:43; Col. 2:14) Agod mahuptan sadtong mga tagpalamati ang ila kaangtanan kay Jehova, may iban pa sila nga dapat himuon.

5, 6. Ano ang ginhimo sang madamo nga Judiyo kag proselita sang unang siglo agod matigayon nila ang kaangtanan sa Dios?

⁵ Pat-od gid nga wala ini nagakahulugan nga talikdan nila si Jehova, ang ila Manughatag sing Kabuhi. (Binu. 4:24) Labi nga nahangpan sang mga nakabati sa paathag ni Pedro nga si Jehova isa ka maluluy-on nga Amay. Ginpadala niya ang Mesias agod luwason kag patawaron pati ang mga tawo nga ginhambalan mismo ni Pedro: “Hibaluon sing pat-od sang bug-os nga panimalay sang Israel nga ginhimo sia sang Dios nga Ginuo kag Cristo, si Jesus nga ginlansang ninyo sa usok.” Sa pagkamatuod, ang mga nag-aplikar sa mga pinamulong ni Pedro may daku gid nga rason nga mangin mapinasalamaton sa ginhimo sang Amay para sa tanan nga luyag makatigayon sang kaangtanan sa Dios!—Basaha ang Binuhatan 2:30-36.

⁶ Huo, nahangpan sang mga Judiyo kag mga proselita nga agod makatigayon sila sing kaangtanan kay Jehova dapat nila sia kilalahon subong Manug-aman sing kaluwasan paagi kay Jesus. Gani, mahangpan mo kon ngaa naghinulsol sila sang ila mga sala, lakip na sang ila hungod ukon di-hungod nga pagpakigbahin sa pagpatay kay Jesus. Kag nahangpan man naton kon ngaa sa masunod nga mga inadlaw “nagpadayon sila sa paghugod sa panudlo sang mga apostoles.” (Binu. 2:42) Mahimo sila “magpalapit . . . sa trono sang wala tupong nga kaayo nga may kahilwayan sa paghambal, agod matigayon . . . ang kaluoy kag ang wala tupong nga kaayo.”—Heb. 4:16.

 7. Paano ginbag-o sang madamo karon ang ila pagtamod tuhoy sa Dios kag nagpabawtismo sa ngalan sang Amay?

⁷ Sa karon, minilyon ka tawo gikan sa nagkalainlain nga ginhalinan ang nakatuon sang mga kamatuoran sa Biblia tuhoy kay Jehova. (Isa. 2:2, 3) Ang pila mga ateista ukon deistaa anay, apang sang ulihi nakumbinsi sila nga may yara Manunuga kag posible sila makatigayon sing suod nga kaangtanan sa iya. Ang iban nagasimba anay sa trinidad ukon sa madamo nga diosdios. Apang natun-an nila nga si Jehova amo lamang ang labing gamhanan nga Dios, kag ginatawag nila sia sa iya ngalan. Nahisanto ina sa ginsiling ni Jesus sa iya mga disipulo nga dapat sila bawtismuhan sa ngalan sang Amay.

 8. Ano ang dapat marealisar tuhoy sa Amay sang mga tawo nga wala nakahangop sang napanubli nga sala gikan kay Adan?

⁸ Natun-an man nila nga nakapanubli sila sing sala gikan kay Adan. (Roma 5:12) Bag-o ini nga kamatuoran nga dapat nila batunon. Daw kaangay sila sa isa ka tawo nga nagamasakit apang wala nakahibalo sang iya balatian. Mahimo may nabatyagan sia nga mga sintomas, subong sang panalagsa nga pagpalanakit. Bangod wala pa sia masayasat, mahimo maghunahuna sia nga wala sia sing balatian. Pero ang matuod, indi maayo ang iya panglawas. (Ipaanggid ang 1 Corinto 4:4.) Kamusta kon matukiban nga may balatian sia? Indi bala maalamon nga mangita sia sang kilala, napamatud-an, kag epektibo nga pagbulong? Sing kaanggid, sang natun-an sang madamo ang kamatuoran tuhoy sa napanubli nga sala, ginbaton nila ang “pagsayasat” sang Biblia kag nahangpan nila nga may ginatanyag ang Dios nga “bulong.” Huo, ang tanan nga nahamulag sa Amay kinahanglan gid magdangop sa Isa nga ‘makabulong’ sa ila.—Efe. 4:17-19.

 9. Ano ang ginhimo ni Jehova agod makatigayon kita sing kaangtanan sa iya?

⁹ Kon nadedikar mo na ang imo kabuhi kay Jehova nga Dios kag isa ka na ka bawtismado nga Cristiano, nahibaluan mo nga isa gid ka dalayawon nga butang nga makatigayon sing kaangtanan sa iya. Napamatud-an mo nga si Jehova isa gid ka mahigugmaon nga Amay. (Basaha ang Roma 5:8.) Bisan pa nagpakasala sanday Adan kag Eva sa iya, ang Dios amo ang naghimo sang una nga tikang agod ang ila mga kaliwat—lakip kita—makatigayon sing kaangtanan sa iya. Apang agod mahimo ina, kinahanglan batason sang Dios ang kasakit nga makita ang pag-antos kag kamatayon sang iya pinalangga nga Anak. Indi bala nga ining ihibalo makabulig sa aton nga batunon ang awtoridad sang Dios kag tumanon ang iya mga sugo bangod sang aton gugma sa iya? Kon wala mo pa ina mahimo, madamo ka sing rason nga idedikar ang imo kaugalingon sa Dios kag magpabawtismo.

Sa Ngalan sang Anak

10, 11. (a) Daw ano kadaku ang imo kabalaslan kay Jesus? (b) Ano ang ginabatyag mo tuhoy sa ginhimo ni Jesus para gawaron ka?

¹⁰ Hunahunaa liwat ang ginsiling ni Pedro sa kadam-an. Ginpadaku niya nga ang pagbaton kay Jesus direkta nga naangot sa pagpabawtismo “sa ngalan . . . sang Anak.” Ngaa importante ina sadto, kag ngaa masiling naton nga importante man ina sa karon? Bueno, ang pagbaton kay Jesus kag ang pagpabawtismo sa iya ngalan nagakahulugan nga ginakilala naton ang iya papel sa aton kaangtanan sa Manunuga. Ginlansang si Jesus sa usok sang pag-antos agod madula ang sumpa sang Kasuguan sa mga Judiyo; apang, ang iya kamatayon may mas daku nga benepisyo. (Gal. 3:13) Gin-aman niya ang halad gawad nga kinahanglan sang bug-os nga katawhan. (Efe. 2:15, 16; Col. 1:20; 1 Juan 2:1, 2) Agod mahimo ina, nagbatas si Jesus sang inhustisya, pagpasipala, tuman nga pag-antos, kag kamatayon. Ginapabaloran mo bala ang iya pagsakripisyo? Hunahunaa nga ikaw isa ka 12 anyos nga bata nga nagasakay sa Titanic, ang barko nga nakabunggo sa iceberg kag nalunod sang 1912. Luyag mo kuntani magsakay sa lifeboat, apang wala na sing bakante. Nian, may isa ka tawo sa lifeboat nga pagkatapos halukan ang iya asawa, nagbalik sa barko kag ginkuha ka kag ginpasakay sa lifeboat. Ano ang batyagon mo? Pat-od gid nga magapasalamat ka sa sina nga tawo! Kon amo, mahangpan mo kon ano ang ginbatyag sang isa ka bata nga lalaki nga aktual nga nakaeksperiensia sina.b Apang, kapin pa sa sina ang ginhimo ni Jesus para sa imo. Napatay sia para matigayon mo ang kabuhi nga walay katapusan.

¹¹ Ano ang imo ginbatyag sang natun-an mo ang ginhimo sang Anak sang Dios para sa imo? (Basaha ang 2 Corinto 5:14, 15.) Mahimo nga nagpasalamat gid ikaw. Nakabulig ina sa imo nga idedikar ang imo kabuhi sa Dios kag indi na ‘magkabuhi para sa imo kaugalingon, kundi para sa iya nga napatay para sa imo.’ Ang pagpabawtismo sa ngalan sang Anak nagakahulugan sang pagkilala sa ginhimo ni Jesus para sa imo kag sa pagbaton sang iya awtoridad subong “ang Pangulo nga Ahente sang kabuhi.” (Binu. 3:15; 5:31) Sang una, wala ka sing kaangtanan sa Manunuga, kag wala sing matuod nga paglaum. Apang, paagi sa imo pagtuo sa ginpaagay nga dugo ni Jesucristo kag sa pagpabawtismo, natigayon mo ang kaangtanan sa Amay. (Efe. 2:12, 13) “Kamo nga sadto nahamulag kag mga kaaway bangod ang inyo hunahuna yara sa mga buhat nga malaut,” sulat ni apostol Pablo, “ginapasag-uli niya [sang Dios] kamo karon paagi sa undanon nga lawas sinang isa [ni Jesus] paagi sa iya kamatayon, agod ipresentar kamo nga balaan kag wala sing depekto.”—Col. 1:21, 22.

12, 13. (a) Paano ang pagpabawtismo sa ngalan sang Anak makaapektar sa imo reaksion kon may isa nga makasaklaw sa imo? (b) Subong isa ka Cristiano nga nabawtismuhan sa ngalan ni Jesus, ano ang imo obligasyon?

¹² Bisan pa nabawtismuhan ka sa ngalan sang Anak, nahibaluan mo nga may yara ka makasasala nga mga huyog. Ang pagdumdom sina makabulig sa imo sa kada adlaw. Halimbawa, kon may makasaklaw sa imo, ginadumdom mo bala nga pareho kamo nga makasasala? Pareho kamo nga nagakinahanglan sing kapatawaran sang Dios, kag dapat mangin mapinatawaron. (Mar. 11:25) Agod ipadaku ina nga punto, naghatag si Jesus sing isa ka ilustrasyon: Ginkanselar sang agalon ang utang sang isa ka ulipon nga napulo ka libo ka talanton (60 ka milyon ka denario). Apang, wala ginpatawad sining ulipon ang iya masigkaulipon nga nakautang lamang sa iya sing 100 ka denario. Si Jesus naghinakop: Indi pagpatawaron ni Jehova ang isa nga wala nagapatawad sa iya utod. (Mat. 18:23-35) Huo, ang pagpabawtismo sa ngalan sang Anak nagakahulugan sang pagkilala sa awtoridad ni Jesus kag sa pagpanikasog nga sundon ang iya halimbawa kag mga panudlo, lakip na ang kahanda sa pagpatawad sa iban.—1 Ped. 2:21; 1 Juan 2:6.

¹³ Bangod indi ka himpit, indi mo mailog sing bug-os si Jesus. Apang, luyag mo himuon ang imo bug-os nga masarangan nga ilugon sia nahisuno sa imo bug-os tagipusuon nga dedikasyon sa Dios. Nagalakip ini sang padayon nga pag-uba sang daan nga personalidad kag sa pagsuklob sang bag-o nga personalidad. (Basaha ang Efeso 4:20-24.) Kon ginatahod mo ang isa ka abyan, ginatinguhaan mo nga makatuon sa iya halimbawa kag maayo nga mga kinaiya. Sing kaanggid, luyag mo man makatuon tuhoy kay Cristo kag ilugon sia.

14. Paano mo mapakita nga ginakilala mo ang awtoridad ni Jesus subong langitnon nga Hari?

¹⁴ May isa pa ka paagi nga mapakita mo nga nahangpan mo kon ano ang nadalahig sa pagpabawtismo sa ngalan sang Anak. Ginpasakop sang Dios “ang tanan nga butang sa idalom sang iya [ni Jesus] mga tiil, kag ginhimo sia nga ulo sa ibabaw sang tanan nga butang sa kongregasyon.” (Efe. 1:22) Gani, dapat mo tahuron ang paagi ni Jesus sa pagtuytoy sa mga nakadedikar kay Jehova. Ginagamit ni Cristo ang di-himpit nga mga tawo sa lokal nga kongregasyon, partikular na ang hamtong sa espirituwal nga mga lalaki nga amo ang gintangdo nga mga gulang. Ina nga mga lalaki gintangdo “agod pasibuon ang mga balaan, . . . sa pagpabakod sa lawas ni Cristo.” (Efe. 4:11, 12) Bisan pa makasayop ang di-himpit nga mga tawo, sarang malubad ni Jesus, subong Hari sang langitnon nga Ginharian, ina nga problema nahisuno sa iya tion kag pamaagi. Nagapati ka bala sa sina?

15. Kon nagaplano ka nga magpabawtismo, ano nga mga pagpakamaayo ang imo mapaabot pagkatapos sang imo bawtismo?

¹⁵ May pila nga wala pa makadedikar kay Jehova kag wala pa mabawtismuhan. Kon isa ikaw sa ila, nahangpan mo bala suno sa ginbinagbinag naton nga ang pagkilala sa Anak amo ang pinakamaayo nga paagi nga mapakita mo ang imo pagpasalamat? Paagi sa pagpabawtismo sa ngalan sang Anak mangin posible para sa imo nga mabaton ang madamo nga pagpakamaayo.—Basaha ang Juan 10:9-11.

Sa Ngalan sang Balaan nga Espiritu

16, 17. Ano ang kahulugan sang pagpabawtismo sa ngalan sang balaan nga espiritu para sa imo?

¹⁶ Ano ang buot silingon sang pagpabawtismo sa ngalan sang balaan nga espiritu? Subong sang nabinagbinag na naton, nahibaluan na sang mga tagpalamati ni Pedro sang Pentecostes kon ano ang balaan nga espiritu. Sa pagkamatuod, nasaksihan sang ila mga mata nga padayon nga ginagamit sang Dios ang balaan nga espiritu. Si Pedro amo ang isa sa mga “napuno . . . sing balaan nga espiritu kag nagsugod . . . sa paghambal sa lainlain nga hambal.” (Binu. 2:4, 8) Ang ekspresyon nga “sa ngalan sang” wala pirme nagapatuhoy sa ngalan sang isa ka persona. Sa karon, madamo nga butang ang ginahimo “sa ngalan sang gobierno,” nga indi isa ka persona. Buot silingon, ginahimo ini sa awtoridad sina nga gobierno. Sing kaanggid, ang isa nga nabawtismuhan sa ngalan sang balaan nga espiritu nagakilala nga ang balaan nga espiritu, indi isa ka persona, kundi amo ang aktibo nga puersa ni Jehova. Ina nga bawtismo nagakahulugan nga ginakilala sang isa ang papel sang balaan nga espiritu sa katuyuan sang Dios.

¹⁷ Natun-an mo na bala ang tuhoy sa balaan nga espiritu sa imo pagtuon sa Biblia? Halimbawa, mahimo nga nahangpan mo na nga ang Kasulatan ginsulat paagi sa pagtuytoy sang balaan nga espiritu. (2 Tim. 3:16) Samtang padayon nga nagauswag ang imo espirituwalidad, mahimo nagadalom man ang imo paghangop sa kamatuoran nga ‘ang Amay sa langit nagahatag sang balaan nga espiritu sa mga nagapangayo sa iya,’ lakip sa imo. (Luc. 11:13) Mahimo nga nakita mo ang pagpanghikot sang balaan nga espiritu sa imo kabuhi. Sa pihak nga bahin, kon nagaplano ka sa pagpabawtismo sa ngalan sang balaan nga espiritu, ang pasalig ni Jesus nga ang Amay nagahatag sang balaan nga espiritu, nagakahulugan nga may bugana ka nga mga pagpakamaayo kon mabaton mo na ina nga espiritu.

18. Ano nga mga pagpakamaayo ang matigayon sang mga nagpabawtismo sa ngalan sang balaan nga espiritu?

¹⁸ Makita man naton karon nga ginagiyahan kag ginapangunahan ni Jehova ang Cristianong kongregasyon paagi sa iya espiritu. Ina nga espiritu nagabulig man sa aton sa aton matag-adlaw nga hilikuton. Ang aton pagpabawtismo sa ngalan sang balaan nga espiritu nagakahulugan sang pagkilala naton sa papel sini sa aton kabuhi kag sa pagkooperar sa sina nga espiritu. Apang, ang iban mahimo mamangkot kon paano nila matuman ang ila dedikasyon kay Jehova kag kon paano nadalahig sa sini ang balaan nga espiritu. Amo ini ang masunod naton nga binagbinagon.

[Mga Nota]

Nadumduman Mo Bala?

• Ano ang kahulugan sang pagpabawtismo sa ngalan sang Amay para sa imo?

• Ano ang kahulugan sang pagpabawtismo sa ngalan sang Anak?

• Paano mo mapakita nga nahangpan mo ang kahulugan sang pagpabawtismo sa ngalan sang Amay kag sang Anak?

• Ano ang kahulugan sang pagpabawtismo sa ngalan sang balaan nga espiritu?

[Mga Retrato sa pahina 10]

Sa tapos sang Pentecostes 33 C.E., ano nga kaangtanan sa Amay ang natigayon sang bag-o nga mga disipulo?

[Credit Line]

By permission of the Israel Museum, Jerusalem