Mabatuan Mo si Satanas​—Kag Madaug!

 1. (a) Ngaa ang aton pagpakig-away kay Satanas importante gid sa karon? (b) Paano naton mahibaluan nga madaug naton si Satanas?

NAGAPAKIG-AWAY si Satanas sa mga hinaplas nga nagkalabilin kag sa “iban nga mga karnero.” (Juan 10:16) Luyag gid sang Yawa nga tukbon ang madamo nga alagad ni Jehova tubtob sa iya masarangan sa nabilin niya nga malip-ot nga tion. (Basaha ang Bugna 12:​9, 12.) Madaug bala naton si Satanas? Huo! Ang Biblia nagsiling: “Pamatuki ang Yawa, kag magapalagyo sia sa inyo.”​—Sant. 4:7.

2, 3. (a) Paano ang ideya nga wala nagaluntad si Satanas pabor sa Yawa? (b) Paano mo nahibaluan nga matuod si Satanas?

² Madamo ang naham-ot sa ideya nga nagaluntad si Satanas. Para sa ila, si Satanas kag ang mga demonyo mga karakter lamang sa mga nobela, kalahadlukan nga mga pelikula, kag mga video game. Nagapati sila nga ang maalam nga mga tawo wala nagapati sa malaut nga mga espiritu. Sa banta mo naakig bala si Satanas kay ginapatihan nga mga uluistorya lamang sia kag ang iya indi makita nga mga kaupod? Wala gid! Kay man, mas mahapos bulagon ni Satanas ang mga hunahuna sang mga nagaduhaduha nga nagaluntad sia. (2 Cor. 4:4) Ang pagpasanyog sa ideya nga wala nagaluntad ang mga espiritu amo ang isa sa madamo nga paagi ni Satanas para patalangon ang mga tawo.

³ Bilang mga alagad ni Jehova, wala kita napatalang. Nahibaluan naton nga may Yawa gid, kay si Satanas ang nakig-istorya kay Eva paagi sa man-ug. (Gen. 3:​1-5) Si Satanas ang nagyaguta kay Jehova bangod kay Job. (Job 1:​9-​12) Si Satanas man ang nagtinguha nga sulayon si Jesus. (Mat. 4:​1-​10) Kag pagkatapos mabun-ag ang Ginharian sang Dios sang 1914, ginsugdan ni Satanas ang ‘pagpakig-away’ sa mga hinaplas nga nagkalabilin. (Bug. 12:17) Nagapadayon pa ina nga inaway bangod nagapangita sing paagi si Satanas nga maguba ang pagtuo sang mga nabilin sa 144,000 kag sang iban nga mga karnero. Agod madaug naton si Satanas, dapat kita magbato sa iya kag magpabilin nga malig-on sa aton pagtuo. Binagbinagon sa sini nga artikulo ang tatlo ka paagi para mahimo naton ini.

 4. Paano ginpakita ni Satanas nga puno sia sang bugal?

⁴ Si Satanas indi gid mapainubuson. Ang matuod, ang paghangkat sang isa ka espiritu nga tinuga sa soberanya ni Jehova kag naghimo sang iya kaugalingon nga tupong sa Dios amo ang pinakadaku nga halimbawa sang bugal kag pagkamahamkunon. Gani, ang isa ka paagi nga mabatuan naton si Satanas amo ang paglikaw sa bugal kag pagpalambo sang pagkamapainubuson. (Basaha ang 1 Pedro 5:5.) Pero ano ang bugal? Pirme bala ini malain?

5, 6. (a) Malain bala pirme ang bugal? Ipaathag. (b) Ano nga bugal ang makatalagam, kag ano ang mga halimbawa sa Biblia nga nagapakita sini?

⁵ Ang isa ka diksionaryo naglaragway sa bugal subong “pagbatyag nga may dignidad kag pagtahod sa kaugalingon” kag “ang kalipay nga nabatyagan bangod ikaw ukon ang mga tawo nga suod sa imo nakahimo ukon nakatigayon sing maayo nga butang.” Wala sing malain sa sini. Si apostol Pablo nagsiling sa mga taga-Tesalonica: “Ginapabugal namon kamo sa mga kongregasyon sang Dios bangod sang inyo pagbatas kag pagtuo bisan pa sang mga paghingabot kag mga kabudlayan nga inyo ginaantos.” (2 Tes. 1:4) Gani indi malain nga malipay sa hinimuan sang iban ukon magbatyag sing bugal sa aton kaugalingon. Wala man ginapaabot nga ikahuya naton ang aton pamilya, kultura, ukon lugar nga aton gindak-an.​—Binu. 21:39.

⁶ Sa pihak nga bahin, may bugal nga makaguba sang aton kaangtanan sa iban kag pagpakig-­abyan kay Jehova. Ini nga bugal amo ang rason kon ngaa maakig kita kag ginasikway naton ang kinahanglanon nga laygay imbes nga batunon ini sing mapainubuson. (Sal. 141:5) Ini nga sahi sang bugal ginlaragway subong “sobra nga pagpabalor sa kaugalingon” ukon “matinaastaason nga panimuot sang mga tawo nga nagapati, sa masami sing indi makatarunganon, nga mas maayo sila sangsa iban.” Ginakaugtan ni Jehova ang pagpabugal. (Ezeq. 33:28; Amos 6:8) Pero nalipay si Satanas kon mangin bugalon ang mga tawo, kay amo sini mismo ang iya kinaiya. Nanamian gid si Satanas sa pagpabugal ni Nimrod, sang Paraon, kag ni Absalom​—tanan sila nangin biktima sang indi nagakaigo nga bugal. (Gen. 10:​8, 9; Ex. 5:​1, 2; 2 Sam. 15:​4-6) Bangod man sa bugal nga napukan si Cain. Ang Dios mismo ang naglaygay sa iya, pero bangod sa sobra nga bugal wala niya ginbaton ang pagtadlong. Hungod nga ginbalewala niya ang laygay ni Jehova kag naghimo sing malain.​—Gen. 4:​6-8.

7, 8. (a) Ano ang rasismo, kag ngaa isa ini ka sahi sang bugal? (b) Ipaathag kon paano maguba sang bugal ang paghidait sang kongregasyon.

⁷ Sa karon, ang mga tawo nangin bugalon sa pila ka makatalagam nga paagi. Ang bugal naangot kon kaisa sa rasismo. Ang isa ka diksionaryo naglaragway sa rasismo nga “diskriminasyon ukon kaakig sa mga tawo nga lain ang rasa” kag “ang pagpati nga ang mga tawo sa lainlain nga rasa may lainlain nga kinaiya kag ikasarang, gani may mga rasa nga mas mataas ukon mas manubo.” Ang bugal sa rasa nagresulta sa kinagamo, inaway, kag pagpatay pa gani sa madamo.

⁸ Siempre, indi ini dapat matabo sa kongregasyon. Pero, ang pagbaisay sang mga masigkatumuluo, nga kon kaisa bangod sa bugal, mahimo maglala. Matuod gid ini sang unang siglo nga mga Cristiano nga ginsulatan ni Santiago kag ginpamangkot: “Ano ang kabangdanan nga nagainaway kag nagabinangig kamo?” (Sant. 4:1) Huo, ang aton kaakig kag pagbatyag nga mas superyor kita makaapektar sa aton panghambal kag buhat, nga makasakit sa iban. (Hulu. 12:18) Maathag nga maguba sang bugal ang paghidait sang kongregasyon.

 9. Paano ang Biblia nagabulig sa aton nga mabatuan ang rasismo kag iban pa nga sahi sang indi nagakaigo nga bugal? (Tan-awa ang piktyur sa umpisa sini nga artikulo.)

⁹ Kon may huyog kita nga magbatyag nga superyor sa iban, kinahanglan dumdumon naton nga “ginakangil-aran ni Jehova ang bisan sin-o nga bugalon sing tagipusuon.” (Hulu. 16:5) Kinahanglan man naton usisaon ang aton pagtamod sa mga tuhay ang rasa, nasyonalidad, ukon kultura. Kon indi naton pagdulaon ang bugal sa aton rasa kag pungsod, ginapanghiwala naton ang kamatuoran nga “ginhimo [sang Dios] halin sa isa ka tawo ang tagsa ka pungsod sang mga tawo.” (Binu. 17:26) Buot silingon, isa lang ang aton rasa kag ang tanan nga katawhan naghalin sa isa lang ka katigulangan, si Adan. Gani, wala gid sing pulos ang pagpati nga ang iban nga rasa mas superyor ukon mas manubo. Ini nga panghunahuna nahisuno gid sa padihot ni Satanas nga gub-on ang gugma kag paghiusa sang mga Cristiano. (Juan 13:35) Para mabatuan naton si Satanas kag madaug, dapat naton likawan ang tanan nga sahi sang indi nagakaigo nga bugal.​—Hulu. 16:18.

10, 11. (a) Ngaa mahapos magtubo ang aton gugma sa kalibutan? (b) Paano mahimo ginhigugma ni Demas ang kalibutan?

¹⁰ Si Satanas “ang manuggahom sini nga kalibutan,” kag yara ini sa iya gahom. (Juan 12:31; 1 Juan 5:​19) Gani, ang kalabanan nga ginapasanyog sini nga kalibutan supak sa mga talaksan sa Biblia. Siempre, indi tanan nga ginatanyag sini nga kalibutan malain. Pero, mapaabot naton nga gamiton ni Satanas ang iya kalibutan para hingalitan ang aton mga handum kag hayluhon kita nga makasala ukon magtubo ang aton gugma sa kalibutan kag pasapayanan ang aton pagsimba kay Jehova.​—Basaha ang 1 Juan 2:​15, 16.

¹¹ Maathag nga ang gugma sa kalibutan nakaapektar sa pila ka Cristiano sang unang siglo. Halimbawa, si Pablo nagsulat: “Ginbayaan ako ni Demas bangod ginhigugma niya ini nga sistema sang mga butang.” (2 Tim. 4:​10) Wala espesipiko nga ginhambal sang Biblia kon ano nga aspekto sang kalibutan ang ginhigugma ni Demas, amo nga ginbayaan niya si Pablo. Mahimo nga ginhigugma ni Demas ang materyal nga mga butang sangsa espirituwal. Kon matuod ini, nawasi ni Demas ang espirituwal nga mga pribilehiyo​—kag ano ang kabaylo sini? Mas labaw pa bala ang matanyag sang kalibutan kay Demas sangsa mga pagpakamaayo ni Jehova sa iya bilang kaupod ni Pablo?​—Hulu. 10:22.

12. Sa ano nga mga paagi mahimo kita mabiktima sang “limbong sang manggad”?

¹² Mahimo man ini matabo sa aton. Subong mga Cristiano, normal lamang nga gusto naton iaman ang aton materyal nga kinahanglanon kag sang aton pamilya. (1 Tim. 5:8) Gusto ni Jehova nga komportable ang aton kabuhi​—maathag ini bangod gin-amanan niya sing matahom nga palibot sanday Adan kag Eva. (Gen. 2:9) Pero mahimo hingalitan ni Satanas ang aton handum paagi sa “limbong sang manggad.” (Mat. 13:22) Madamo ang nagapati nga kuarta ang makahatag sing kalipay ukon ang ila materyal nga mga butang amo ang yabi sa kadalag-an. Madaya gid ini nga panghunahuna, kag mahimo sini madula ang pinakabilidhon nga butang nga aton ginapanag-iyahan​—ang aton pagpakig-abyan kay Jehova. Ginpaandaman ni Jesus ang iya mga sumulunod: “Wala sing tawo nga makapaulipon sa duha ka agalon; kay dumtan niya ang isa kag higugmaon ang isa, ukon unungan niya ang isa kag tamayon ang isa. Indi kamo makapaulipon sing dungan sa Dios kag sa Manggad.” (Mat. 6:​24) Kon magpaulipon kita sa Manggad, indi na kita makaalagad kay Jehova, kag amo gid sina ang gusto ni Satanas nga himuon ta! Kabay nga indi gid naton pagtugutan ang kuarta ukon ang mga butang nga mabakal sini nga maglabaw sa aton pagpakig-abyan kay Jehova. Para mabatuan si Satanas, kinahanglan naton huptan ang balanse nga pagtamod sa materyal nga mga butang.​—Basaha ang 1 Timoteo 6:​6-​10.

13. Paano ginpasanyog sang kalibutan ang tiko nga pagtamod sa kasal kag pagpakigsekso?

¹³ Ang isa pa ka siod sa kalibutan ni Satanas amo ang seksuwal nga imoralidad. Para sa madamo karon, tama ka estrikto kag dinumaan na ang pagkamainunungon sa tiayon, kag bisan ang kasal mismo. Halimbawa, ang isa ka sikat nga artista nga babayi nagsiling: “Pareho nga imposible ang monogamya sa lalaki kag sa babayi. Wala ako sang kilala nga mainunungon ukon gusto mangin mainunungon.” Ang isa ka artista nga lalaki nagsiling: “Indi ko sigurado kon natural gid man sa aton nga makaupod ang isa ka tawo sa bilog naton nga kabuhi.” Nalipay gid si Satanas kon ginaguba sang sikat nga mga tawo ang regalo sang Dios nga pag-asawahay. Pat-od nga indi gusto sang Yawa nga ipasanyog ini nga kahimusan ukon makita ini nga magmadinalag-on. Para mabatuan naton kag madaug si Satanas, dapat naton tumanon ang kahimusan sang Dios sa pag-asawahay.

14, 15. Paano naton malikawan ang seksuwal nga imoralidad?

¹⁴ May tiayon man kita ukon wala, dapat gid naton panikasugan nga likawan ang tanan nga sahi sang seksuwal nga imoralidad. Mahapos bala ini? Indi gid! Halimbawa, kon pamatan-on ka pa mahimo nabatian mo ang imo mga klasmeyt nga nagapabugal nga nakapakigsekso na sila ukon parte sa sexting, nga ginakabig sa iban nga lugar nga porno­grapiya. Ang Biblia nagsiling: “Ang padayon nga nagahimo sing seksuwal nga imoralidad nagapakasala batok sa iya kaugalingon nga lawas.” (1 Cor. 6:​18) Ang pag-antos kag kamatayon nangin resulta sang paglapnag sang mga balatian nga nagalaton paagi sa pagpakigsekso. Kag ang kalabanan nga wala makasal nga mga pamatan-on nga nadula ang ila pagkaulay nagsiling nga naghinulsol gid sila. Ang realidad parte sa imoral nga pagpakigsekso kabaliskaran gid sa ginapakita sa media, nga nagapapati sa aton nga ang pagsupak sa kasuguan sang Dios wala sing malain nga resulta. Ini nga panghunahuna nagahimo sa mga tawo nga biktima sang “madaya nga gahom sang sala.”​—Heb. 3:​13.

¹⁵ Kon ginasulay ka nga maghimo sang seksuwal nga imoralidad, ano ang himuon mo? Batuna nga may mga kaluyahon ka. (Roma 7:​22, 23) Ipangamuyo sa Dios nga hatagan ka sing kabakod. (Fil. 4:​6, 7, 13) Likawi ang mga kahimtangan nga mahimo magresulta sa imoralidad. (Hulu. 22:3) Kag kon mag-abot ang tentasyon, sikwaya ini dayon.​—Gen. 39:12.

16. Paano gin-atubang ni Jesus ang pagsulay ni Satanas, kag ano ang matun-an naton sa iya halimbawa?

¹⁶ Si Jesus naghatag sa aton sing maayo nga halimbawa kon paano batuan ang mga pagsulay. Wala sia madaya sang mga promisa ni Satanas, ukon ginpamensaran pa niya kon ano ang maayo kag indi. Sa baylo, gilayon sia nga nagsabat: “Nasulat na.” (Basaha ang Mateo 4:​4-​10.) Nahibaluan ni Jesus ang Pulong sang Dios, gani nakasabat sia gilayon kag nagkutlo sang kasulatan sang nakaatubang sia sing pagsulay. Para mabatuan naton kag madaug si Satanas, indi naton dapat pagtugutan nga masulay kita nga maghimo sing seksuwal nga imoralidad.​—1 Cor. 6:​9, 10.

17, 18. (a) Ano pa ang iban nga ginagamit ni Satanas, kag ngaa indi na kita dapat makibot sa sini? (b) Ano ang matabo kay Satanas, kag paano ini makapalig-on sa imo nga magbatas?

¹⁷ Ang bugal, materyalismo, kag seksuwal nga imoralidad tatlo lamang sa mga paagi ni Satanas. Madamo pa sia sing ginagamit. Halimbawa, ang pila ka Cristiano nagaatubang sing pagpamatok sang ila pamilya, pagpakahuya sang ila mga klasmeyt, ukon bisan gani pagdumili sang gobierno sa pagbantala. Wala na kita nakibot sa sini nga mga kabudlayan, kay si Jesus nagpaandam sa iya mga sumulunod: “Dumtan kamo sang tanan nga tawo bangod sa akon ngalan, apang ang nagbatas tubtob sa katapusan maluwas.”​—Mat. 10:22.

¹⁸ Paano naton mabatuan si Satanas kag madaug? Ginsilingan ni Jesus ang iya mga disipulo: “Paagi sa inyo pagbatas, matipigan ninyo ang inyo kabuhi.” (Luc. 21:19) Wala sing mahimo ang tawo nga permanente nga makahalit sa aton. Wala sing makakuha sang aton hamili nga pagpakig-abyan sa Dios luwas lang kon tugutan naton ini. (Roma 8:​38, 39) Bisan ang kamatayon sang mga alagad ni Jehova wala nagahatag sing kadalag-an kay Satanas, kay pat-uron ni Jehova nga banhawon sila! (Juan 5:​28, 29) Pero, si Satanas wala na sing palaabuton. Pagkatapos malaglag ang indi diosnon nga sistema ni Satanas, itagbong sia sa kadadalman sa sulod sang 1,000 ka tuig. (Bug. 20:​1-3) Sa katapusan sang Isa ka Libo ka Tuig nga Paggahom ni Jesus, “buy-an si Satanas sa iya bilangguan” sing makadali para sa katapusan niya nga higayon sa pagpatalang sa himpit nga katawhan. Pagkatapos sini, laglagon ang Yawa. (Bug. 20:​7-​10) Pat-od ang kalaglagan ni Satanas, pero indi ini matabo sa imo! Batui si Satanas, mangin malig-on sa imo pagtuo. Mabatuan mo si Satanas kag madaug!