Kapitulo Trese

“Magsinggit sa Kalipay Sing Dungan”!

Isaias 52:1-12

 1. Ngaa makalilipay ang matagnaon nga mga pulong sang Isaias kapitulo 52, kag ano ang duha ka katumanan sini?

KAHILWAYAN! May kapin pa bala ka makalilipay nga palaabuton para sa isa ka bihag nga katawhan? Sanglit ang panguna nga tema sa tulun-an sang Isaias amo ang kahilwayan kag pagpasag-uli, indi makapakibot nga luwas sa Mga Salmo, ini nga tulun-an sang Biblia nagaunod sing kapin nga pagpabutyag sing kalipay sangsa iban nga tulun-an. Ang Isaias kapitulo 52 labi na nga nagahatag sing rason sa katawhan sang Dios nga magkasadya. Ang matagnaon nga mga pulong sini natuman sa Jerusalem sang 537 B.C.E. Kag may daku pa ini nga katumanan nga nagadalahig sa “Jerusalem sa ibabaw,” ang iya ni Jehova langitnon nga organisasyon sang espiritu nga mga tinuga, nga ginalaragway kon kaisa subong iloy kag asawa.—Galacia 4:​26; Bugna 12:1.

“Magsuklob Ka Sang Imo Kusog, O Sion!”

 2. San-o magamata ang Sion, kag paano ini mahanabo?

² Si Jehova, paagi kay Isaias, nagasinggit sa Iya hinigugma nga siudad, ang Sion: “Magmata, magmata, magsuklob ka sang imo kusog, O Sion! Magsuklob ka sang imo matahom nga mga panapton, O Jerusalem, ang balaan nga siudad! Kay indi na magsulod liwat sa imo ang di-sirkunsidado kag di-matinlo. Panuk-ap ka sing yab-ok, magbangon ka, maglingkod ka, O Jerusalem. Hubaron mo ang mga higot sa imo liog, O bihag nga anak nga babayi sang Sion.” (Isaias 52:1, 2) Bangod ginpaakig sang mga pumuluyo sang Jerusalem si Jehova, nagpabilin ini nga nahapay sing 70 ka tuig. (2 Hari 24:​4; 2 Cronica 36:​15-​21; Jeremias 25:​8-​11; Daniel 9:2) Tion na karon nga magmata sia gikan sa iya madugay nga pagpahimunong kag magsuklob sing matahom nga mga panapton sang kahilwayan. Ginpahulag ni Jehova ang tagipusuon ni Ciro nga buy-an ang “bihag nga anak nga babayi sang Sion” agod nga ang mga pumuluyo anay sang Jerusalem kag ang ila mga anak makabiya sa Babilonia, makabalik sa Jerusalem, kag ipasag-uli ang matuod nga pagsimba. Wala dapat sing di-sirkunsidado kag di-matinlo nga masapwan sa Jerusalem.​​—Esdras 1:​1-4.

 3. Ngaa ang kongregasyon sang hinaplas nga mga Cristiano sarang matawag nga “anak nga babayi sang Sion,” kag sa anong kahulugan ginahilway sila?

³ Natuman man ining mga pulong ni Isaias sa Cristianong kongregasyon. Ang kongregasyon sang hinaplas nga mga Cristiano sarang malaragway subong ang modernong-adlaw nga “anak nga babayi sang Sion,” kay ang “Jerusalem sa ibabaw” amo ang ila iloy.a Bangod nahilway na sila gikan sa paganong mga panudlo kag apostata nga mga doktrina, dapat huptan sang mga hinaplas ang matinlo nga panindugan sa atubangan ni Jehova, indi, indi paagi sa pagpasirkunsidar sa unod, kundi paagi sa pagpasirkunsidar sa ila tagipusuon. (Jeremias 31:​33; Roma 2:​25-​29) Nagalakip ini sang paghupot sing katinlo sa espirituwal, hunahuna, kag moral sa atubangan ni Jehova.​​—1 Corinto 7:​19; Efeso 2:3.

 4. Bisan pa ang “Jerusalem sa ibabaw” wala gid maglalis kay Jehova, ano nga mga eksperiensia sang iya mga tiglawas sa duta ang nagaanggid sa dumaan nga mga pumuluyo sang Jerusalem?

⁴ Matuod, ang “Jerusalem sa ibabaw” wala gid maglalis kay Jehova. Apang sa tion sang nahauna nga bug-os kalibutan nga inaway, ang iya mga tiglawas sa duta​—ang hinaplas nga mga Cristiano​—​indi hungod nga naglapas sa sugo ni Jehova bangod wala nila mahangpi sing husto ang matuod nga Cristianong neutralidad. Bangod nadula nila ang kahamuot sang Dios, nangin bihag sila sa espirituwal sa “Babilonia nga Daku,” ang bug-os kalibutan nga emperyo sang butig nga relihion. (Bugna 17:5) Ang ila kahimtangan subong ulipon nagdangat sa putukputukan sang Hunyo 1918 sang ang walo ka katapo sang talapuanan sang Watch Tower Society ginbilanggo sa butig nga mga panumbungon, lakip ang paghimbon. Sadto nga tion halos nagdulog ang organisado nga pagbantala sing maayong balita. Apang, sang 1919, ginpalanog ang isa ka maathag nga panawagan para sa espirituwal nga pagmata. Ang hinaplas nga mga Cristiano nagsugod sa pagpain sang ila kaugalingon sing kapin ka bug-os gikan sa moral kag espirituwal nga pagkadimatinlo sang Babilonia nga Daku. Nagbangon sila gikan sa yab-ok sang pagkabihag, kag naangkon sang “Jerusalem sa ibabaw” ang katahom sang isa ka “balaan nga siudad” diin wala ginatugutan ang espirituwal nga pagkadimatinlo.

 5. Ngaa si Jehova may bug-os nga kinamatarong sa pagtubos sa iya katawhan nga wala sing ibayad sa mga nagbihag sa ila?

⁵ Sang 537 B.C.E. kag sang 1919 C.E., si Jehova may bug-os nga kinamatarong sa paghilway sa iya katawhan. Si Isaias nagpaathag: “Amo ini ang ginsiling ni Jehova: ‘Ginbaligya kamo nga wala sing bili, kag tubson kamo nga wala sing kuwarta.’” (Isaias 52:3) Wala sing bisan ano nga ginbayad ang dumaan nga Babilonia ukon ang Babilonia nga Daku sang gin-ulipon nila ang nakigkatipan nga katawhan sang Dios. Sanglit wala sing transaksion sa kuwarta nga nadalahig, si Jehova gihapon ang legal nga Tag-iya sang iya katawhan. Dapat bala sia magbatyag nga nakautang sa kon sin-o man? Sa pagkamatuod indi. Sa duha ka hitabo, nagakaigo lamang nga tubson ni Jehova ang iya mga sumilimba nga wala sing bisan ano nga ibayad sa mga nagbihag sa ila.​​—Isaias 45:13.

 6. Ano nga mga leksion gikan sa maragtas ang wala ginpamatian sang mga kaaway ni Jehova?

⁶ Ang mga kaaway ni Jehova wala gid makatuon sing bisan ano nga mga leksion gikan sa maragtas. Aton mabasa: “Amo ini ang ginsiling sang Soberanong Ginuong Jehova: ‘Ang akon katawhan nagdulhog sa una nga higayon sa Egipto agod magpuyo didto subong mga dumuluong; kag sa wala sing kabangdanan ang Asiria, sa iya bahin, nagpigos sa ila.’” (Isaias 52:4) Gin-ulipon ni Paraon sang Egipto ang mga Israelinhon, nga gin-agda sa iya pungsod sa pagpuyo subong mga dumuluaw. Apang ginlumsan ni Jehova si Paraon kag ang iya hangaway sa Dagat nga Mapula. (Exodo 1:​11-​14; 14:​27, 28) Sang ginpahog ni Hari Senaquerib sang Asiria ang Jerusalem, ginpatay sang anghel ni Jehova ang 185,000 ka soldado sang hari. (Isaias 37:​33-​37) Sing kaanggid, ang dumaan nga Babilonia ukon ang Babilonia nga Daku indi makalikaw sa mga resulta sang ila pagpigos sa katawhan sang Dios.

“Makilala Sang Akon Katawhan ang Akon Ngalan”

 7. Ano ang epekto sa ngalan ni Jehova sang pagkabihag sang iya katawhan?

⁷ Ang pagkabihag sang katawhan ni Jehova may epekto sa iya ngalan, subong sang ginapakita sang tagna: “ ‘Karon, ano ang interes ko diri?’ siling ni Jehova. ‘Kay ang akon katawhan ginkuha nga wala sing bili. Ang mismo mga nagagahom sa ila padayon nga nagaudyak sing mayubiton,’ siling ni Jehova, ‘kag sa dalayon, sa bug-os nga adlaw, ang akon ngalan wala ginatahod. Sa sina nga rason makilala sang akon katawhan ang akon ngalan, sa sina gid nga rason sa sina nga adlaw, bangod ako ang Isa nga nagapamulong. Yari karon! Ako ini.’” (Isaias 52:5, 6) Ano ang interes ni Jehova sa kahimtangan? Ano ang iya ginaulikdan nga ang Israel naulipon sa Babilonia? Dapat maghikot si Jehova bangod ginbihag sang Babilonia ang iya katawhan kag nagaudyak sing mayubiton bangod sang kadalag-an batok sa ila. Ina nga pagpabugal nagresulta sa pagtamay sang Babilonia sa ngalan ni Jehova. (Ezequiel 36:​20, 21) Wala niya mahangpan nga ang kabangdanan sang pagkahapay sang Jerusalem amo ang kaakig ni Jehova sa iya katawhan. Sa baylo, gintamod sang Babilonia ang pagkaulipon sang mga Judiyo subong ebidensia nga maluya ang ila Dios. Ginyubit pa gani si Jehova ni Belsasar, nga nagahari man sa Babilonia, paagi sa paggamit sang mga suludlan gikan sa Iya templo sa tion sang isa ka sinalusalo para sa kadungganan sang Babilonianhon nga mga dios.​​—Daniel 5:​1-4.

 8. Paano gintamod ang ngalan ni Jehova sugod sang mapatay ang mga apostoles?

⁸ Paano ini tanan naaplikar sa “Jerusalem sa ibabaw”? Sugod gid sang manggamot ang apostasya sa tunga sang nagapangangkon nga mga Cristiano, sarang masiling nga “ang ngalan sang Dios ginapasipalahan bangod [sadto nga mga tawo] sa tunga sang mga pungsod.” (Roma 2:​24; Binuhatan 20:​29, 30) Tuhoy sina, bangod sang disparatis ginlikawan sang ulihi sang mga Judiyo nga gamiton ang ngalan sang Dios. Wala magdugay sa tapos mapatay ang mga apostoles, gin-ilog ini sang apostata nga mga Cristiano kag gin-untatan nila ang paggamit sang personal nga ngalan sang Dios. Ang apostasya nagresulta sa paglutaw sang Cristiandad, ang nagapanguna nga bahin sang Babilonia nga Daku. (2 Tesalonica 2:​3, 7; Bugna 17:5) Ang mapatuyangon nga imoralidad kag makahas nga kasal-anan sa dugo sang Cristiandad naghatag sing kahuy-anan sa ngalan ni Jehova.​​—2 Pedro 2:​1, 2.

9, 10. Ano ang dugang pa nga nahangpan sang nakigkatipan nga katawhan sang Dios sa modernong mga tion tuhoy sa mga talaksan ni Jehova kag sa iya ngalan?

⁹ Sang ginhilway sang Daku Pa nga Ciro, nga si Jesucristo, ang nakigkatipan nga katawhan sang Dios gikan sa pagkabihag sa Babilonia nga Daku sang 1919, nag-uswag ang ila paghangop sa mga ginapatuman ni Jehova. Natinluan na nila ang ila kaugalingon gikan sa madamo nga panudlo sang Cristiandad nga naghalin sa paganismo sa wala pa ang Cristianong panahon, subong sang Trinidad, pagkadimamalatyon sang kalag, kag dayon nga pagpaantos sa isa ka kalayuhon nga impierno. Nian ginsugdan nila nga dulaon sa ila kaugalingon ang tanan nga agi sang Babilonianhon nga impluwensia. Narealisar man nila ang importansia sang pagpabilin gid nga walay nadampigan sa may dampiganay nga mga nagakatabo sa kalibutan. Luyag pa gani nila nga tinluan ang ila kaugalingon gikan sa bisan ano nga kasal-anan sa dugo nga mahimo natigayon sang pila sa ila.

¹⁰ Dugang pa nga nahangpan man sang modernong-adlaw nga mga alagad sang Dios ang importansia sang ngalan ni Jehova. Sang 1931 ginbaton nila ang ngalan nga mga Saksi ni Jehova, sa amo dayag nga ginpahibalo nila nga ginasakdag nila si Jehova kag ang iya ngalan. Dugang pa, paagi sa pagbalhag sing New World Translation sugod sang 1950, ginpasag-uli sang mga Saksi ni Jehova ang ngalan sang Dios sa nagakaigo nga duog sini sa Biblia. Huo, ginaapresyar nila ang ngalan ni Jehova kag ginapakilala ini tubtob sa mga ukbong sang duta.

“Ang Isa nga Nagadala Sing Maayong Balita”

11. Ngaa nagakaigo ang pagtuaw sing “Ang imo Dios nangin hari!” may kaangtanan sa mga natabo sang 537 B.C.E.?

¹¹ Ginabalik liwat karon ang aton igtalupangod sa Sion sang ini yara pa gihapon sa iya nahapay nga kahimtangan. Ang isa ka mensahero nagpalapit nga may maayong balita: “Daw ano katahom sa mga bukid ang mga tiil sang isa nga nagadala sing maayong balita, ang isa nga nagabantala sing paghidait, ang isa nga nagadala sing maayong balita tuhoy sa butang nga maayo pa, ang isa nga nagabantala sing kaluwasan, ang isa nga nagasiling sa Sion: ‘Ang imo Dios nangin hari!’ ” (Isaias 52:7) Sang 537 B.C.E., paano masiling nga ang Dios sang Sion nangin Hari? Indi bala si Jehova padayon nga nangin Hari? Sa pagkamatuod, sia ang “Hari nga Dayon”! (Bugna 15:3) Apang ang pagtuaw sing “Ang imo Dios nangin hari!” nagakaigo bangod ang pagkapukan sang Babilonia kag ang pahibalo sang hari nga patindugon liwat ang templo sa Jerusalem kag ipasag-uli ang putli nga pagsimba didto isa ka bag-o nga pagpahayag sang pagkahari ni Jehova.​​—Salmo 97:1.

12. Sin-o ang nanguna sa ‘pagdala sing maayong balita,’ kag paano?

¹² Sang panahon ni Isaias, wala sing indibiduwal ukon grupo sang mga indibiduwal nga nakilala subong “isa nga nagadala sing maayong balita.” Apang, kilala sa karon kon sin-o ang nagadala sing maayong balita. Si Jesucristo amo ang iya ni Jehova labing daku nga mensahero sang paghidait. Sang sa duta sia, ginbantala niya ang maayong balita nga magaabot ang kahilwayan gikan sa tanan nga epekto sang sala nga napanubli kay Adan lakip ang balatian kag kamatayon. (Mateo 9:35) Naghatag si Jesus sing isa ka makugi nga huwaran sa pagbantala sining maayong balita tuhoy sa butang nga maayo pa, kag ginhimuslan niya ang tanan nga kahigayunan agod tudluan ang katawhan tuhoy sa Ginharian sang Dios. (Mateo 5:​1, 2; Marcos 6:​34; Lucas 19:​1-​10; Juan 4:​5-​26) Kag ginsunod sang iya mga disipulo ang iya huwaran.

13. (a) Paano ginpasangkad ni apostol Pablo ang kahulugan sang ekspresyon nga “Daw ano katahom sa mga bukid ang mga tiil sang isa nga nagadala sing maayong balita”? (b) Ngaa sarang masiling nga ‘matahom’ ang mga tiil sang mga mensahero?

¹³ Sa iya sulat sa mga taga-Roma, ginbalikwat ni apostol Pablo ang Isaias 52:7 agod ipadaku ang importansia sang hilikuton nga pagbantala sing maayong balita. Nagpautwas sia sing makapahunahuna nga mga pamangkot, lakip ang ‘Paano makabati ang mga tawo kon wala sing magbantala?’ Nian nagsiling sia: “Subong sang nasulat na: ‘Daw ano katahom ang mga tiil sang mga nagabantala sing maayong balita sang maayong mga butang!’ ” (Roma 10:​14, 15) Sa amo ginpasangkad ni Pablo ang aplikasyon sang Isaias 52:​7, nga ginagamit ang pangmadamo nga porma nga “mga” sa baylo sang pang-isahan nga “isa,” nga makita sa orihinal nga teksto sang Isaias. Bilang pag-ilog kay Jesucristo, ang tanan nga Cristiano mga mensahero sing maayong balita sang paghidait. Paano nangin ‘matahom’ ang ila mga tiil? Si Isaias nagapamulong nga subong bala ang mensahero nagapadulong sa Jerusalem gikan sa malapit nga kabukiran sang Juda. Gikan sa malayo, imposible nga makita ang mga tiil sang mensahero. Sa baylo, ang ginapadaku diri amo ang mensahero, kag ang mga tiil nagarepresentar sa mensahero mismo. Subong nga si Jesus kag ang iya mga disipulo isa ka matahom nga talan-awon para sa mga mahagop sang nahauna nga siglo, ang mga Saksi karon matahom nga talan-awon para sa mga mapainubuson nga nagapamati sa nagaluwas-kabuhi nga mensahe sang maayong balita.

14. Paano si Jehova nangin Hari sa modernong mga tion, kag sugod san-o ginpahibalo ini sa katawhan?

¹⁴ Sugod san-o sa modernong mga tion ang singgit nga “Ang imo Dios nangin hari!” nabatian? Sugod sang 1919. Sadto nga tuig sa isa ka kombension sa Cedar Point, Ohio, ginpukaw ni J. F. Rutherford, presidente sadto sang Watch Tower Society, ang iya mga manugpalamati paagi sa isa ka pamulongpulong nga natig-uluhan “Pamulongpulong sa mga Masigkamanugpangabudlay.” Ang pamulongpulong, nga ginpasad sa Isaias 52:7 kag Bugna 15:​2, nagpalig-on sa tanan nga nagtambong nga makigbahin sa pagbantala nga hilikuton. Sa amo, ang ‘matahom nga mga tiil’ nagsugod nga makita sa “mga bukid.” Una anay ang hinaplas nga mga Cristiano kag sang ulihi ang ila mga kaupod nga “iban nga mga karnero” makugi nga nagbantala sing maayong balita nga si Jehova nangin Hari. (Juan 10:16) Paano si Jehova nangin Hari? Ginpahayag niya liwat ang iya pagkahari sang 1914 sang ginpalingkod niya ang iya Anak, si Jesucristo, subong Hari sa bag-o lamang matukod nga langitnon nga Ginharian. Kag ginpahayag pa liwat ni Jehova ang iya pagkahari sang 1919 sang ginhilway niya ang “Israel sang Dios” gikan sa Babilonia nga Daku.​​—Galacia 6:​16; Salmo 47:​8; Bugna 11:​15, 17; 19:6.

“Ang Imo mga Manugbantay Nagpabaskog Sang Ila Tingog”

15. Sin-o ang “mga manugbantay” nga nagpabaskog sang ila tingog sang 537 B.C.E.?

¹⁵ Ang singgit nga “Ang imo Dios nangin hari!” ginsabat bala? Huo. Si Isaias nagsulat: “Pamati! Ang imo mga manugbantay nagpabaskog sang ila tingog. Sing dungan nagsinggit sila sa kalipay; kay magakitaay sila sing mata sa mata kon tipunon liwat ni Jehova ang Sion.” (Isaias 52:8) Wala sing literal nga mga manugbantay nga nagpuwesto sa ila ginabantayan sa Jerusalem sang 537 B.C.E. agod sug-alawon ang una nga mga bihag nga nagbalik. Ang siudad nagpabilin nga nahapay sing 70 ka tuig. (Jeremias 25:​11, 12) Gani mahimo gid nga ang “mga manugbantay” nga nagpabaskog sang ila tingog amo yadtong mga Israelinhon nga abanse nga nakabati sang balita tuhoy sa pagpasag-uli sang Sion kag amo ang nagpalapta sang balita sa tanan nga anak sang Sion. Sang makita nga gintugyan ni Jehova ang Babilonia sa mga kamot ni Ciro sang 539 B.C.E., walay duhaduha nga nahunahuna sang mga manugbantay nga hilwayon ni Jehova ang iya katawhan. Upod sa mga nagsabat sa ila panawagan, ang mga manugbantay padayon nga nagasinggit sa kalipay, sing dungan, agod mabatian sang iban pa ang maayong balita.

16. Kay sin-o ang mga manugbantay nagtulukay sing “mata sa mata,” kag sa anong kahulugan?

¹⁶ Ang alisto nga mga manugbantay nagtukod sing isa ka suod, personal nga kaangtanan kay Jehova, nga subong bala nagatulukay sila sing “mata sa mata,” ukon nawong sa nawong. (Numeros 14:14) Ang ila suod nga pagpakig-angot kay Jehova kag sa isa kag isa nagapadaku sang ila paghiusa kag sang ila makalilipay nga mensahe.​​—1 Corinto 1:10.

17, 18. (a) Paano ginpabaskog sang modernong-adlaw nga manugbantay nga klase ang iya tingog? (b) Sa anong kahulugan ang manugbantay nga klase nagsinggit sing dungan?

¹⁷ Sa modernong-adlaw nga katumanan, ang manugbantay nga klase, “ang matutom kag mainandamon nga ulipon,” nagapabaskog sang ila tingog indi lamang sa ila nga yara na sa sulod sang kitaon nga organisasyon sang Dios kundi sa mga tagaguwa man. (Mateo 24:​45-​47) Sang 1919 ginpalanog ang panawagan nga tipunon ang mga nagkalabilin sang mga hinaplas, kag sang 1922 ginpabaskog pa ang panawagan sa Cedar Point, Ohio, nga kombension upod ang pangabay nga “ibantala, ibantala, ibantala, ang Hari kag ang iya ginharian.” Sugod sang 1935, ginliso ang igtalupangod sa pagtipon sa isa ka dakung kadam-an sang mga tulad-karnero. (Bugna 7:​9, 10) Sining karon nga tinuig nagbaskog pa ang pagbantala sa pagkahari ni Jehova. Paano? Sang tuig 2000, mga anom ka milyon ang nagpakigbahin sa pagsugid tuhoy sa pagkahari ni Jehova sa kapin sa 230 ka kadutaan kag mga teritoryo. Dugang pa, ginapalanog sang Ang Lalantawan, ang panguna nga instrumento sang manugbantay nga klase, ang makalilipay nga mensahe sa kapin sa 130 ka lenguahe.

¹⁸ Kinahanglan ang pagkamapainubuson kag utudnon nga gugma agod makapakigbahin sa sining nagapahiusa nga hilikuton. Agod mangin epektibo ang panawagan, dapat pareho nga mensahe ang ibantala sang tanan nga nadalahig, nga ginapatalupangod ang ngalan ni Jehova, ang iya gawad nga aman, ang iya kaalam, ang iya gugma, kag ang iya Ginharian. Samtang nagabuligay ang mga Cristiano sa bug-os nga kalibutan, ang ila personal nga kaangtanan kay Jehova ginapabakod agod ipalanog sing dungan ang makalilipay nga balita.

19. (a) Paano ang “nahapay nga mga duog sang Jerusalem” nangin masadya? (b) Sa anong kahulugan “ginpadayag ni Jehova ang iya balaan nga butkon”?

¹⁹ Bangod nagasinggit sa kalipay ang katawhan sang Dios, bisan gani ang duog nga ila ginapuy-an daw masadya tulukon. Ang tagna nagpadayon: “Magkasadya kamo, magsinggit sa kalipay sing dungan, kamo nga nahapay nga mga duog sang Jerusalem, kay ginlipay ni Jehova ang iya katawhan; gintubos niya ang Jerusalem. Ginpadayag ni Jehova ang iya balaan nga butkon sa atubangan sang mga mata sang tanan nga pungsod; kag ang tanan nga ukbong sang duta makakita sang pagluwas sang aton Dios.” (Isaias 52:9, 10) Bangod nag-abot na ang mga bihag gikan sa Babilonia, ang masubo tulukon nga mga duog sang nahapay nga Jerusalem nangin masadya bangod ang putli nga pagsimba ni Jehova sarang na mapasag-uli karon. (Isaias 35:​1, 2) Maathag nga si Jehova ang nagmaniobra sini. ‘Ginpadayag niya ang iya balaan nga butkon,’ nga subong bala ginkalukos niya ang iya mga pako sa paghikot agod luwason ang iya katawhan.​​—Esdras 1:​2, 3.

20. Ano ang nangin resulta kag ano pa ang mangin resulta sang pagpadayag ni Jehova sang iya balaan nga butkon sa modernong mga tion?

²⁰ Sa sining “katapusan nga mga adlaw,” ginpadayag ni Jehova ang iya balaan nga butkon agod papagsikon liwat ang hinaplas nga mga nagkalabilin, ang “duha ka saksi” sa tulun-an sang Bugna. (2 Timoteo 3:​1; Bugna 11:​3, 7-​13) Sugod sang 1919, ginpasulod sila sa isa ka espirituwal nga paraiso, ang espirituwal nga kahimtangan nga ginaambitan nila karon upod sa minilyon sang ila mga kaupod, ang iban nga mga karnero. Sa ulihi, ipadayag ni Jehova ang iya balaan nga butkon agod luwason ang iya katawhan sa “Har–​Magedon.” (Bugna 16:​14, 16) Nian, “ang tanan nga ukbong sang duta makakita sang pagluwas sang aton Dios.”

Isa ka Butang nga Dapat Tumanon sa Gilayon

21. (a) Ano ang ginapatuman sa mga “nagadala sang mga gamit ni Jehova”? (b) Ngaa wala sing rason nga magsalasala ang mga Judiyo nga magabiya sa Babilonia?

²¹ Ang mga nagguwa sa Babilonia kag nagbalik sa Jerusalem may dapat tumanon. Si Isaias nagsulat: “Palayo kamo, palayo kamo, guwa kamo dira, indi kamo magtandog sing butang nga di-matinlo; guwa kamo gikan sa tunga niya, hupti ang inyo kaugalingon nga matinlo, kamo nga nagadala sang mga gamit ni Jehova. Kay magaguwa kamo nga wala kahadlok, kag magalakat kamo nga wala nagapalagyo. Kay si Jehova magauna sa inyo, kag ang Dios sang Israel ang mangin bantay ninyo sa likuran.” (Isaias 52:11, 12) Dapat ibilin sa Babilonia sang manuglakat nga mga Israelinhon ang bisan ano nga may mantsa sang butig nga pagsimba sang Babilonia. Sanglit ginadala nila ang mga gamit ni Jehova nga naghalin sa templo sa Jerusalem, dapat sila mangin matinlo, indi lamang sa guwa paagi sa seremonya, kundi labi na gid sa ila tagipusuon. (2 Hari 24:​11-​13; Esdras 1:7) Dugang pa, si Jehova magauna sa ila, gani indi sila dapat magsalasala, ukon maghuyab sa pagdalagan, nga subong bala ginalagas sila sang uhaw-sa-dugo nga mga tawo. Ang Dios sang Israel amo ang ila bantay sa likuran.​​—Esdras 8:​21-​23.

22. Paano ginapadaku ni Pablo sa hinaplas nga mga Cristiano nga dapat mangin matinlo sila?

²² Ang mga pulong ni Isaias tuhoy sa pagpabilin nga matinlo may daku nga katumanan sa mga kaliwat sang “Jerusalem sa ibabaw.” Sang ginlaygayan ni Pablo ang mga Cristiano sa Corinto nga indi magpagota sing sampihakan upod sa mga di-matinuuhon, ginbalikwat niya ang mga pulong sang Isaias 52:​11: “ ‘Busa guwa kamo gikan sa tunga nila, kag magpain kamo gikan sa ila,’ siling ni Jehova, ‘kag mag-untat kamo sa pagtandog sing di-matinlo nga butang.’ ” (2 Corinto 6:​14-​17) Kaangay gid sang mga Israelinhon nga manugpauli gikan sa Babilonia, dapat gid likawan sang mga Cristiano ang Babiloniko nga butig nga pagsimba.

23. Sa anong mga paagi ang mga alagad ni Jehova karon nagatinguha sa paghupot sang ila kaugalingon nga matinlo?

²³ Nagmatuod ini ilabi na sa hinaplas nga mga sumulunod ni Jesucristo nga nagpalagyo sa Babilonia nga Daku sang 1919. Amat-amat nga gintinluan nila ang ila kaugalingon gikan sa tanan nga mantsa sang butig nga pagsimba. (Isaias 8:​19, 20; Roma 15:4) Dugang pa nga narealisar man nila ang importansia sang katinlo sa moral. Bisan pa ginasakdag sang mga Saksi ni Jehova ang mataas nga mga talaksan sa moral halin pa sang una, Ang Lalantawan nag-unod sing mga artikulo sang 1952 nga nagapadaku sang kinahanglanon nga disiplinahon ang mga imoral agod mahuptan nga matinlo ang kongregasyon. Ini nga disiplina nagaparealisar man sa nakasala mismo nga dapat sia magpakita sing sinsero nga paghinulsol.​​—1 Corinto 5:​6, 7, 9-​13; 2 Corinto 7:​8-​10; 2 Juan 10, 11.

24. (a) Sa modernong mga tion, ano ang “mga gamit ni Jehova”? (b) Ngaa makasalig ang mga Cristiano karon nga si Jehova padayon nga magauna sa ila kag magabantay man sa likuran nila?

²⁴ Determinado gid ang hinaplas nga mga Cristiano upod sa dakung kadam-an sang iban nga mga karnero nga indi magtandog sing bisan ano nga di-matinlo sa espirituwal. Ang ila ginpaputli, natinluan nga kahimtangan nagakalipikar sa ila nga mangin mga manugdala sang “mga gamit ni Jehova”​—ang hamili nga mga aman nga ginahimo sang Dios para sa sagrado nga pag-alagad sa pamalaybalay kag pagtuon sa Biblia nga ministeryo kag iban pa nga porma sang Cristianong hilikuton. Paagi sa paghupot sing matinlo nga panindugan, makasalig ang katawhan sang Dios karon nga si Jehova padayon nga magauna sa ila kag magabantay man sa ila likuran. Subong matinlo nga katawhan sang Dios, may bugana sila nga rason sa ‘pagsinggit sa kalipay sing dungan’!

[Nota]

[Piktyur sa pahina 183]

Ang Sion hilwayon gikan sa pagkabihag

[Retrato sa pahina 186]

Sugod sang 1919, ang ‘matahom nga mga tiil’ nakita liwat sa “mga bukid”

[Retrato sa pahina 189]

Ang mga Saksi ni Jehova nagapamulong nga may paghiusa

[Piktyur sa pahina 192]

Ang mga “nagadala sang mga gamit ni Jehova” dapat mangin matinlo sa moral kag sa espirituwal