Si Jehova kag si Cristo—Nagapanguna nga mga Manugkomunikar

“Ang Soberanong Ginuong Jehova indi maghimo sing bisan ano nga butang nga indi niya anay mapahayag ang iya tinago sa iya mga alagad nga mga manalagna.”—AMOS 3:⁠7.

1. Anong mga metodo sang komunikasyon ang ginagamit karon?

ANG komunikasyon karon isa ka multimilyon dolyar nga negosyo. Ang tanan nga libro nga ginabalhag, tanan nga pamantalaan kag mga magasin nga regular nga ginaimprinta, tanan nga programa sa radyo kag telebisyon nga ginapalayag, subong man ang tanan nga mga pelikula kag mga drama sa entablado, mga panikasog sa pagkomunikar. Amo man ang tanan nga sulat nga ginahimo kag ginapadala subong man ang tanan nga tawag sa telepono. Ang tanan mga panikasog sa pagkomunikar.

2. Ano ang pila ka halimbawa sang pag-uswag nga nahimo sang mga tawo sa teknikal nga mga bahin sang komunikasyon?

² Ang mga pag-uswag nga nahimo sang mga tawo sa teknikal nga bahin sang komunikasyon makahalawhaw. Halimbawa, ang fiber-optic nga mga kable, nga isa ka daku nga pag-uswag sang sa saway nga mga kable, makadala sing linibolibo ka hambalanay sa telepono sing dungan. Nian yara man ang mga satelayt sang komunikasyon, nga nagalibot sa duta sa kahawaan kag may kasangkapan para sa pagpaalinton sang mga sinyales sang telepono, telegrapo, radyo, kag telebisyon. Ang isa sina nga satelayt may ikasarang sa pagpaalinton sing 30,000 ka mensahe paagi sa telepono sing dungan!

3. Ano ang nagakatabo kon may yara mga kal-ang sa komunikasyon?

³ Apang walay sapayan sining tanan nga paagi sang komunikasyon, may daku nga kasisit-an sa kalibutan bangod sang kakulang sing komunikasyon sa ulot sang mga indibiduwal. Sa amo, ginasugiran kita nga “may nagadaku nga kal-ang​—⁠isa ka nagasangkad nga ‘kal-ang sa komunikasyon’⁠—​sa ulot sang mga nagagahom kag sang ginagamhan.” Kag indi bala ang ginatawag nga kal-ang sang kaliwatan isa ka kapaslawan sang mga ginikanan kag sang ila mga anak sa pagkomunikar sa isa kag isa sing madinalag-on? Ang mga manuglaygay sa pag-asawahay nagareport nga ang labing daku nga problema sa mga pag-asawahay amo ang indi pagkomunikar sang mag-asawa. Ang kakulang sing nagakaigo nga komunikasyon mahimo pa gani tunaan sang kamatayon. Sang maaga nga bahin sang 1990, 73 ka tawo ang nadulaan sing kabuhi sa pagkahulog sang eroplano, nga ang isa ka kabangdanan mahimo nga amo ang kakulang sing komunikasyon sa ulot sang piloto kag sang kontrol sa duta. Ang isa ka ulong-dinalan sang pamantalaan nagsiling: “Balagbag sa Komunikasyon Nagdul-ong sa Trahedya.”

4. (a) Ano ang kahulugan sang “komunikasyon”? (b) Ano ang tulumuron sang komunikasyon sa tunga sang mga Cristiano?

⁴ Ano ang komunikasyon para sa mga Cristiano? Suno sa isa ka diksionaryo, ang “komunikasyon” nagakahulugan sing “pagpaalinton sing kasayuran, panghunahuna, ukon balatyagon agod nga ini mabaton ukon mahangpan.” Ang isa pa ka diksionaryo nagapaathag sini subong “isa ka teknik sa pagpabutyag sang mga ideya sing epektibo.” Talupangda ang, “pagpabutyag sang mga ideya sing epektibo.” Ang pagkomunikar sang mga Cristiano labi na nga dapat mangin epektibo bangod may tulumuron ini nga malab-ot ang tagipusuon sang mga tawo paagi sa kamatuoran gikan sa Pulong sang Dios agod nga, kabay unta, nga sila maghikot sa ila ginatun-an. Sing tumalagsahon, ginapahulag ini sang pagkadimakagod, sang gugma.

Si Jehova Subong Manugkomunikar

5. Ano ang isa sang una nga mga paagi nga si Jehova nga Dios nagkomunikar sa tawo?

⁵ Si Jehova nga Dios wala sing duhaduha nga amo ang labing daku nga Manugkomunikar. Bangod gintuga niya kita sa iya larawan kag kaangay, makakomunikar sia sa aton, kag posible nga makakomunikar man kita sa iban nahanungod sa iya. Sugod sang gintuga ang tawo, si Jehova nagkomunikar sa iya dutan-on nga mga tinuga nahanungod sa iya kaugalingon. Ang isa ka paagi nga nahimo niya ini amo ang iya kitaon nga mga tinuga. Sa amo, ang salmista nagasugid sa aton: “Ang mga langit nagapahayag sang himaya sang Dios; kag ang kahawaan nagasugid sang binuhatan sang iya mga kamot. Ang adlaw-adlaw nagahambal, kag ang gab-i-gab-i nagapakita sing ihibalo.” (Salmo 19:​1, 2) Kag ang Roma 1:​20 nagapahibalo sa aton nga ang “dimakita nga mga kinaiya [sang Dios] maathag nga makita kutob sa pagtuga sa kalibutan.” Ang mga tinaga nga “maathag nga makita,” nagapakita sing epektibo nga komunikasyon!

6. Ano ang ginkomunikar ni Jehova sa iya dutan-on nga mga tinuga samtang didto sila sa hardin sang Eden?

⁶ Ang mga wala nagatuo sa Dios kag sa iya balaan nga pagpahayag nagapapati sa aton nga ang tawo dapat magdiskobre sa iya kaugalingon kon ngaa nagaluntad sia. Apang maathag nga ginapakita sang Pulong sang Dios nga ang Dios nagkomunikar sa tawo kutob sa ginsuguran. Sa amo, sa una nga lalaki kag babayi ginhatag sang Dios ang sugo sa pagpanganak: “Magmabungahon kag magbuad kag magtugob sang duta kag magpakaagalon sa sini, kag maggahom . . . sa tagsa ka buhi nga tinuga.” Gintugot man sang Dios nga magpakabusog sila sa mga prutas sang hardin​—⁠luwas sa isa lamang. Nian, sang maglalis si Adan kag si Eva, ginkomunikar ni Jehova ang una nga Mesianikong saad, nagahatag sa katawhan sing paglaum: “Butangan ko sing kaawayon sa tunga mo [ang man-ug] kag sang babayi kag sa tunga sang imo binhi kag sang iya binhi. Sia magadugmok sang imo ulo kag dugmukon mo ang iya tikod.”​—⁠Genesis 1:28; 2:16, 17; 3:⁠15.

7. Ano ang ginapahayag sang tulun-an sang Genesis tuhoy sa pagkomunikar ni Jehova sa iya mga alagad?

⁷ Sang ang anak ni Adan nga si Cain puno sing makapatay nga kahisa, si Jehova nga Dios nagkomunikar sa iya, nga nagasiling sa epekto: “Mag-andam ka! Nagapadulong ka sa gamo!’ Apang wala mamati si Cain sa sadto nga paandam kag ginpatay niya ang iya utod. (Genesis 4:​6-8) Nian, sang ang duta napuno sing kasingki kag kalautan, ginkomunikar ni Jehova sa matarong nga tawo nga si Noe ang Iya katuyuan nga laglagon sa duta ang tanan nga nagahigko sini. (Genesis 6:​13⁠–​7:5) Sa tapos sang Anaw, sang magguwa si Noe kag ang iya pamilya gikan sa arka, ginkomunikar sa ila ni Jehova ang iya katuyuan tuhoy sa pagkabalaan sang kabuhi kag dugo, kag paagi sa balangaw naghatag sia sing pasalig nga indi na niya liwat laglagon ang tanan buhi nga butang paagi sa anaw. Pila ka siglo sang ulihi, ginkomunikar ni Jehova kay Abraham ang Iya katuyuan nga pakamaayuhon sang tanan nga pamilya sang katawhan ang ila kaugalingon paagi sa Binhi ni Abraham. (Genesis 9:​1-17; 12:​1-3; 22:​11, 12, 16-18) Kag sang mamat-od ang Dios nga laglagon ang mga malauton sang Sodoma kag Gomorra, mahigugmaon nga ginkomunikar niya ina nga butang kay Abraham, nga nagasiling: “Likman ko bala si Abraham sang akon ginahimo?”​—⁠Genesis 18:⁠17.

8. Sa anong apat ka paagi nagkomunikar si Jehova sa iya mga alagad sa duta?

⁸ Sugod kay Moises, gingamit ni Jehova ang isa ka malaba nga linya sang mga manalagna sa pagkomunikar sa Israel. (Hebreo 1:1) Kon kaisa gingamit niya ang pagdikta, subong sang ginsugo niya si Moises: “Isulat mo ining mga pulong.” (Exodo 34:27) Sing mas masunson nagkomunikar si Jehova sa iya mga humalambal paagi sa mga palanan-awon, subong sang nahimo na niya kay Abraham.⁠a Gingamit man ni Jehova ang mga damgo sa pagkomunikar sa mga tawo, kag indi lamang sa iya mga alagad kundi sa mga nagapakig-angot man sa iya mga alagad. Halimbawa, ginpahanabo ni Jehova nga magdamgo ang duha ka kaupod nga bilanggo ni Jose, nga ginpatpat ni Jose para sa ila. Ginpahanabo man ni Jehova nga magdamgo si Paraon kag si Nabokodonosor, nga ginpatpat para sa ila sang iya mga alagad nga si Jose kag si Daniel. (Genesis 40:​8⁠–​41:32; Daniel, kapitulo 2 kag 4) Dugang pa, sa madamo nga okasyon gingamit ni Jehova ang anghel nga mga mensahero sa pagkomunikar sa iya mga alagad.​—⁠Exodo 3:​2; Hukom 6:​11; Mateo 1:​20; Lucas 1:⁠26.

9. Ano ang nagpahulag kay Jehova sa pagkomunikar sa iya katawhan nga Israel, subong makita sa ano nga ginpamulong niya?

⁹ Ini tanan nga pagkomunikar ni Jehova paagi sa iya mga manalagna nagpakita sang iya gugma para sa iya katawhan nga Israel. Sa amo, sia nagsiling paagi sa iya manalagna nga si Ezequiel: “Wala ako nagakalipay sa kamatayon sang makasasala, kundi nga ang malauton magbiya sa iya dalanon kag magkabuhi. Biya kamo, biya kamo sa inyo malaut nga dalanon, kay ngaa bala nga magkalamatay kamo, O panimalay sang Israel?” (Ezequiel 33:11) Si Jehova isa ka mainantuson kag mapailubon nga Manugkomunikar sa iya rebelyuso nga dumaan nga katawhan, subong makita sa 2 Cronica 36:​15, 16: “Si Jehova nga Dios sang ila mga ginikanan padayon nga nagpadala batok sa ila paagi sa iya mga mensahero, sa liwat kag liwat, bangod nga naluoy sia sa iya katawhan kag sa iya puluy-an. Apang . . . gintamay nila ang iya mga pulong kag ginyubitan ang iya mga manalagna . . . tubtob nga wala na sing tambal.”

10. Paano karon nagakomunikar si Jehova sa iya katawhan, kag tubtob sa anong kasangkaron sia isa ka Dios sang komunikasyon?

¹⁰ Sa karon, may yara kita inspirado nga Pulong sang Dios, ang Balaan nga Biblia, nga paagi sa sini ginakomunikar ni Jehova sa aton ang impormasyon nahanungod sa iya kaugalingon, ang iya mga katuyuan, kag ang iya kabubut-on para sa aton. (2 Timoteo 3:​16, 17) Sa kamatuoran, subong ang Supremo nga Manugkomunikar, si Jehova, nagapahayag: “Ang Soberanong Ginuong Jehova indi maghimo sing bisan ano nga butang kon indi niya anay mapahayag ang iya tinago sa iya mga alagad nga ­mga manalagna.” (Amos 3:7) Ginapahibalo niya sa iya mga alagad ang iya ginatuyo nga himuon.

Ang Anak sang Dios Subong Manugkomunikar

11. Sin-o ang nagapanguna nga instrumento ni Jehova sa pagkomunikar sa tawo, kag ngaa nagakaigo ang iya titulo nga “ang Pulong”?

¹¹ Sa tanan nga ahente nga gingamit ni Jehova sa pagkomunikar sang Iya kabubut-on, ang nagapanguna amo ang Pulong, ang Logos, nga nangin si Jesucristo. Ano ang ginapahangop sang pagtawag sa iya nga Pulong, ukon Logos? Nga sia amo ang Puno nga Humalambal ni Jehova. Kag ano ang isa ka humalambal? Isa nga nagakomunikar sang luyag ipaalinton sang isa. Gani ang Logos nangin ang manugkomunikar sang pulong ni Jehova nga Dios sa Iya intelihente nga dutan-on nga mga tinuga. Ina nga papel tuman ka importante amo kon ngaa gintawag sia nga Pulong.​—⁠Juan 1:​1, 2, 14.

12. (a) Sa anong katuyuan nagkari si Jesus sa duta? (b) Ano ang nagapamatuod sa iya matutom nga pagtuman sa sina nga katuyuan?

¹² Si Jesus mismo nagsiling kay Poncio Pilato nga ang iya una nga katuyuan sa pagkari sa duta amo ang pagkomunikar sang kamatuoran sa katawhan: “Tungod sini natawo ako, kag tungod sini nagkari ako sa kalibutan, agod nga magpanaksi ako sa kamatuoran.” (Juan 18:37) Kag ang rekord sa Mga Ebanghelyo nagasugid kon daw ano kaayo nga gintuman niya ina nga tulumanon. Ang iya Sermon sa Bukid ginakilala subong amo ang labing dungganon nga sermon nga nabantala sang isa ka tawo. Daw ano katahom nga ginkomunikar niya yadto nga sermon! “Ang epekto amo nga ang mga kadam-an [nga nakabati sa sermon] natingala sa iya paagi sa pagpanudlo.” (Mateo 7:28) Tuhoy sa isa pa ka okasyon, aton mabasa: “Ang dakung kadam-an nagpamati sa iya sing malipayon.” (Marcos 12:37) Sang ginpadala ang pila ka tulugyanan sa pagdakop kay Jesus, nagbalik sila nga indi sia dala. Ngaa? Sila nagsabat sa mga Fariseo: “Wala pa gid sing tawo nga nagpamulong sing subong sini.”​—⁠Juan 7:⁠46.

Ang mga Disipulo ni Cristo Ginsugo nga Mangin mga Manugkomunikar

13. Ano ang nagapakita nga si Cristo indi kontento nga mangin isahanon nga manugkomunikar?

¹³ Indi kontento nga mangin isahanon nga manugkomunikar, si Jesus nagpadala una sing 12 ka apostoles kag dayon sing 70 ka ebanghelisador subong mga manugkomunikar sing maayong balita sang Ginharian. (Lucas 9:​1; 10:1) Nian antes sia nagkayab sa langit, ginsugo niya ang iya mga disipulo sa paghimo sing isa ka pinasahi nga hilikuton. Ano nga hilikuton? Subong aton mabasa sa Mateo 28:​19, 20, ginsugo niya sila nga mangin mga manugkomunikar; kag tudluan man nila ang iban nga mangin mga manugkomunikar.

14. Daw ano ka epektibo ang unang Cristianong mga manugkomunikar?

¹⁴ Epektibo bala nga mga manugkomunikar ang mga disipulo? Amo gid sa pagkamatuod! Subong resulta sang ila pagbantala sang adlaw sang Pentecostes 33 C.⁠E., 3,000 ka kalag ang gindugang sa bag-o naporma nga Cristianong kongregasyon. Wala magdugay ini nga kadamuon nagdugang sa 5,000 ka tawo. (Binuhatan 2:​41; 4:4) Indi katingalahan nga ang ila Judiyong mga kasumpong nagsumbong sa ila nga ginpuno nila ang bug-os nga Jerusalem sang ila panudlo kag sang ulihi nagreklamo nga ginbaliskad nila ang napuy-an nga duta paagi sa ila pagbantala!​—⁠Binuhatan 5:​28; 17:⁠6.

15. Ano nga instrumento ang gingamit ni Jehova sa modernong mga tion sa pagkomunikar sa mga tawo?

¹⁵ Kamusta sa modernong mga tion? Subong gintagna sa Mateo 24:3,45-47, ang Agalon, nga si Jesucristo, nagtangdo sing “matutom kag mainandamon nga ulipon,” nga ginahuman sang hinaplas nga mga Cristiano, sa pag-atipan sang tanan niya nga pagkabutang sa duta sa sining adlaw sang iya presensia. Inang matutom kag mainandamon nga ulipon ginatiglawas karon sang Nagadumala nga Hubon sang mga Saksi ni Jehova, nga nagagamit sang Watch Tower Bible and Tract Society subong ahente sa pagbantala sini. Sing labing nagakaigo, inang matutom kag mainandamon nga ulipon gintawag man nga alagyan sang pagkomunikar sang Dios. Nian, ini man, nagapalig-on sa aton nga mangin maayong mga manugkomunikar. Sa kamatuoran, ang una gid nga guwa sang Zion’s Watch Tower and Herald of Christ’s Presence naglaygay sa mga bumalasa sini: “Kon may kaingod ka ukon abyan nga sa banta mo interesado ukon makapulos sa mga instruksion [sining magasin], mahimo mo ini ipatalupangod sa iya; sa amo ginabantala mo ang Pulong kag nagahimo ka sing maayo sa tanan nga tawo kon may kahigayunan ka.”

16. Ano ang nagapakita nga kapin pa ang kinahanglanon sang sa Biblia lamang agod ang Dios epektibo nga makakomunikar sa iya dutan-on nga mga alagad?

¹⁶ Apang, ang pagtigayon sing Pulong sang Dios kag ang personal nga pagbasa sini indi pa tuman agod makatigayon sing sibu nga ihibalo nga nagapahamtang sang isa ka tawo sa dalan padulong sa kabuhi. Dumduma ang Etiopianhon nga tulugyanan sang korte nga nagabasa sang tagna ni Isaias apang wala makahangop sang iya ginabasa. Ginpaathag ni Felipe nga ebanghelisador ang tagna sa iya, kag sa tapos sini nagpabawtismo sia subong isa ka disipulo ni Cristo. (Binuhatan 8:​27-38) Nga kapin pa ang kinahanglanon sang sa pagbasa lamang sing Biblia sarang makita sa Efeso 4:​11-13, nga sa diin ginapakita ni Pablo nga si Cristo wala lamang maghatag sa iban nga mangin inspirado nga mga apostoles kag mga manalagna kundi naghatag man sa “iban nga mangin mga ebanghelisador, ang iban mga manugbantay kag mga manunudlo, sa tuyo nga pasibuon liwat ang mga balaan, para sa ministeryal nga hilikuton, para sa pagpalig-on sa lawas ni Cristo, tubtob nga makadangat kita tanan sa paghiusa sa pagtuo kag sa sibu nga ihibalo tuhoy sa Anak sang Dios, sa isa ka hamtong nga tawo.”

17. Paagi sa anong nagapakilala nga mga tanda makilala naton ang ahensya nga ginagamit karon ni Jehova sa pagkomunikar sang iya mga katuyuan sa katawhan?

¹⁷ Paano naton makilala kon sin-o ang ginagamit ni Jehova nga Dios kag ni Jesucristo sa pagbulig sa mga tawo nga nangin mga Cristiano nga makalab-ot sa kahimtangan sang isa ka hamtong nga tawo? Suno kay Jesus, ang isa sang nagapakilala nga mga tanda amo nga ini sila nagahigugmaanay subong nga ginhigugma ni Jesus ang iya mga sumulunod. (Juan 13:​34, 35) Ang isa pa ka nagapakilala nga tanda amo: Indi sila bahin sang kalibutan, subong nga si Jesus indi bahin sang kalibutan. (Juan 15:​19; 17:6) Ang isa pa ka tanda amo nga ginakilala nila ang Pulong sang Dios subong amo ang kamatuoran, subong sang ginhimo ni Jesus, padayon nga nagapangabay sa awtoridad sini. (Mateo 22:​29; Juan 17:17) Ang pag-una sa ngalan sang Dios, subong sang ginhimo ni Jesus, isa pa ka tanda. (Mateo 6:​9; Juan 17:6) Kag ang isa pa ka tanda amo ang pagsunod sa halimbawa ni Jesus sa pagbantala sang Ginharian sang Dios. (Mateo 4:​17; 24:14) Ang isa lamang ka grupo nga nakatuman sining mga kinahanglanon amo ang internasyonal nga mga manugkomunikar nga nakilal-an subong Cristianong mga Saksi ni Jehova.

18. Anong tatlo ka bahin para sa komunikasyon ang binagbinagon sang dugang pa nga mga artikulo?

¹⁸ Apang, ang komunikasyon nagapahangop sing salabton sa iban. Sa kay sin-o may salabton ang mga Cristiano sa pagkomunikar? Sing sadsaran, may tatlo ka bahin nga sa diin dapat mangin interesado ang mga Cristiano nga huptan nga bukas ang mga linya sang komunikasyon: ang pamilya, ang Cristianong kongregasyon, kag ang Cristianong ministeryo sa latagon. Binagbinagon sang masunod nga mga artikulo ining mga bahin sang aton tema.

[Footnote]

Paano Mo Sabton?

◻ Ano nga halit ang mahimo mangin resulta sang kakulang sing komunikasyon?

◻ Sin-o ang duha ka nagapanguna nga manugkomunikar?

◻ Anong nanuhaytuhay nga mga paagi ang gingamit sang Dios sa pagkomunikar sa tawo?

◻ Paano si Jesus nagapangibabaw subong isa ka manugkomunikar?

◻ Daw ano ka madinalag-on ang unang mga Cristiano sa pagkomunikar?

[Laragway sa pahina 18]

Kaangay sang iya langitnon nga Amay, si Jesus isa ka maluluy-on nga manugkomunikar