Kon Paano mo Mabag-o ang Imo Pagkatawo

ANO ang kulang sa mga metodo sa pagtukod kag sa pagbag-o sang batasan nga nahambalan na? Amo ang mga handum kag paggamit sang isa ka tawo sang iya ikasarang sa pagbuot! Ang paggamit sang iya hilway nga kabubut-on paagi sa personal nga pagpili. Sa malip-ot, kulang ang iya pagkontrol sa kaugalingon!

Nasapwan sang mga terapista sa pagpabag-o sang batasan nga sila may mas maayo nga kahigayunan nga matigayon ang nagadugay nga mga resulta kon ang indibiduwal nga ginabulong ginapadesisyon sa paghimo sang iya kaugalingon nga mga tulumuron tuhoy sa iya mga batasan. Si Vance Packard nagsulat sa iya libro nga The People Shapers: “Paagi sa diutay lamang nga paglaygay, ang bisan sin-o nga haganhagan sa kaalam nga tawo makabag-o na karon sang iya kaugalingon nga batasan.” Ginatawag ini nga pag-atipan sa kaugalingon. Kon sa aton pa, sang gingamit ang pagkontrol sa kaugalingon, talalupangdon nga mga pag-uswag ang natalupangdan.

Ang mga Cristiano may bentaha kon kinahanglan ang pagpugong sa kaugalingon, kay nakatuon sila sa pagpakita sini subong isa sang siam ka bunga sang balaan nga espiritu sang Dios. (Galacia 5:​22, 23) Nagakahulugan ini nga ang aktibo nga puwersa sang Labing Gamhanan nga Dios may epekto sa pagbag-o ninyo sang inyo batasan kag makabulig sa inyo nga magmadinalag-on.

Gani, ano ang luyag mo himuon sa imo batasan? Luyag mo gid bala magbag-o? Kon amo, gikan sa ano? Padulong sa ano? Kag ngaa? Masaligan mo bala ang imo kaugalingon nga pagkontrol? Sa diin ka makakita sing bulig nga nagahatag sing mga kaayuhan lamang?

Usisaon naton ang pila sang mga metodo kag mga ingrediente sa pagbag-o sang mga batasan.

Tikang 1: Hibalua Kon Ano Gid ang Imo Pagkatawo

Ikaw ang hilaw nga materyalis para sa pagkatawo nga luyag mo. Ang imo bag-o nga pagkatawo dapat tukuron paagi sa pagbag-o sang imo daan nga pagkatawo. Gani dapat mo makilala sing sibu ang imo kaugalingon. Masiling mo bala kon ano nga mga bahin sang imo pamatasan ang luyag mo bag-uhon?

Sanglit mabudlay timbangtimbangon ang imo batasan, dapat mo konsultahon ang isa ka ginakilala kag mapatihan nga talaksan. Ang Balaan nga Biblia ginarekomendar para sa sini. Gamita ang Biblia, kag makatigayon ka sing pagtamod sa imo kaugalingon nga ayhan wala mo makita anay. Mahimo nga indi mo pa gani maluyagan ang imo makita, apang mapat-od mo nga isa ini ka sibu nga laragway.

Ang Biblia ginpaangay sa isa ka espeho, kag ang mga tawo ginapalig-on sa pagtulok sa sini. “Kon ang bisan sin-o manugpamati sang pulong kag indi manugtuman, kaangay sia sa tawo nga nagatan-aw sang iya kinaugali nga nawong sa espeho. Kay ginatan-aw niya ang iya kaugalingon, kag nagahalin kag sa gilayon nalimot kon ano nga sahi sang tawo sia. Apang ang nagatulok sa himpit nga kasuguan, ang kasuguan sang kahilwayan kag nagapadayon sa sini, nga indi malimuton nga manugpamati kundi manugtuman nga nagabuhat, ining tawo mangin malipayon sa iya paghimo sini.” (Santiago 1:​23-25) Ang Biblia, kon hangpon kag gamiton sing nagakaigo, may yara madalom kag nagapangusisa nga gahom nga indi lamang magapadayag kon ano ikaw subong isa ka tawo kundi magapahayag pa sang imo mga motibo kag mga panimuot. Sa amo, si Pablo nagsulat: “Ang pulong sang Dios buhi kag gamhanan kag matalom pa sa bisan ano nga espada nga duha sing sulab . . . kag nagahantop sang mga hunahuna kag mga tinutuyo sang tagipusuon.” Ang Pulong sang Dios nagahatag pa sing panuytoy sa kon ano gid ang husto kag kon ano gid ang malain.​—Hebreo 4:​12; 5:14.

Ini tanan mahimo sang Biblia para sa imo bangod Pulong ni Jehova ini, ang mahinantupon nga matuod nga Dios. Suno sa Salmo 139, ginausisa ka sang Dios kag nagahimo sia sing sibu nga pag-usisa sang imo pagkatawo. Subong ginasiling sang bersikulo 1: “O Jehova, nausisa mo ako, kag nakilala ako.” Ginabantayan ka sang Dios sugod sang ginpanamkon ka. Nakilala ka niya sing bug-os. May mga komentaryo sia tuhoy sa kabuhi sang tawo nga ginpasulat niya sa Biblia sa tanan nga posible nga kombinasyon. Masapwan mo ang imo kaugalingon nga ginalaragway sa mga pahina sini, sing positibo ukon negatibo.

Sa amo, masapwan mo kon ano gid ang imo pagkatawo​—kon luyag mo.

Tikang 2: Mamat-od Kon Ano ang Luyag Mo nga Pagkatawo

Kon magbag-o ka, pat-ura nga ang pagbag-o takus sini. Pat-ura nga amo sina ang luyag mo kag nga mas maayo ina sa imo pagkatawo karon. Anong napauswag nga mga batasan ang luyag mo tinguhaan? Sa diin ka makakuha sing husto nga laygay tuhoy sa halandumon nga mga batasan? Sa liwat, ang Biblia ginarekomendar para sa sini.

Ginapalig-on ka sang Biblia nga mag-uswag para sa kaayuhan, isuklob ang isa ka “bag-ong personalidad.” Si Pablo naglaygay: Dapat ninyo ubahon ang daan nga personalidad nga iya sang inyo una nga paggawi kag dunot paagi sa madaya nga mga kailigbon; kundi . . . dapat kamo magbag-o sa kusog nga nagapahikot sang inyo hunahuna, kag dapat kamo magsuklob sing bag-ong personalidad nga gintuga suno sa kabubut-on sang Dios sa matuod nga pagkamatarong kag pagkatutom.” (Efeso 4:​22-24) Ginapakita sa imo sang Biblia kon ano ining mas maayo nga mga kinaiya. Nadumduman mo bala ang himpit nga kalibutan nga ginlaragway kaina? Kon luyag mo mangin bahin sina nga kalibutan, dapat makita mo ang kinahanglanon nga palambuon ang mga kinaiya nga ginlaragway sa Colosas 3:​12-17, mga kinaiya subong sang pagkamaluluy-on, pagkalulo, pagkamapainubuson, pagkalum-ok, pagkamapailubon, pagkamapinatawaron, gugma, paghidait, kag pagkamapinasalamaton.

Gani sa tapos makonsulta ang imo Biblia, ipahamtang ang imo mga tulumuron. Isulat ini. Unaha ang tagsa ka tulumuron. Panikasugi ini!

Tikang 3: Mangita sing Takus nga mga Halimbawa

Ang daku nga bahin sang imo batasan natukod paagi sa imo pag-ilog sa iban​—mga abyan, mga kaupod, mga ginikanan, mga manunudlo.

Ngaa indi na lang, nian, sa tapos mo mapamat-uran ang imo ginatinguhaan nga mga batasan, mangita ka sing isa nga nagagawi sa isa ka paagi nga luyag mo ilugon? Dayon tinguhaa ang bulig sina nga tawo. Ang isa ka hulubaton sang Biblia maalamon nga nagasiling: “Sia nga nagalakat upod sa maalam nga mga tawo magaalam man.”​—Hulubaton 13:20.

Ginaunod sang Biblia ang kasaysayan sang kabuhi sang labing maayo nga halimbawa para sa aton tanan, si Jesucristo mismo. Basaha kon paano sia naggawi sa idalom sang tanan nga kahimtangan, ang iya moralidad, ang iya paghantop kag kaalam, ang iya dignidad, ang iya pagkamadinumdumon kag tumalagsahon nga kalulo kag kabalaka sa iya isigkatawo. Daw ano ka makarepresko sia kon magsiling sia: “Kari sa akon, tanan kamo nga ginabudlayan kag ginabug-atan, kag parepreskuhan ko kamo. Itakod ang akon gota sa inyo kag magtuon kamo sa akon, kay ako malulo kag mapainubuson sing tagipusuon, kag marepreskuhan ang inyo mga kalag. Kay ang gota mahapos kag ang akon lulan mamag-an”!​—Mateo 11:​28-30.

Minilyon sa tanan nga pungsod ang nagliso na kay Cristo Jesus subong ila halimbawa kag nagahimo sang ila labing masarangan sa pagsunod sang iya mga tikang, subong nga sia man, naglakat suno sa dalanon nga gintudlo sang iya langitnon nga Amay, si Jehova nga Dios. Ining minilyon, bangod natak-an na sila sa malain nga batasan sang kalibutan sa kabilugan karon, nagliso sa lokal nga kongregasyon sang mga Saksi ni Jehova para sa bulig kag pagtuytoy kag wala sila mapaslawi. Sa ila mga Kingdom Hall, madamo sing ekselente nga tulad-Cristo nga mga modelo, kag daku nga bulig ang ginaaman para sa mga luyag magbag-o sang ila batasan padulong sa mas maayo. Sa pagkamatuod, ang mga Saksi may mga kaluyahon man nga kinaandan sa dihimpit nga mga tawo; apang may yara man sila positibo nga espirituwal nga kusog nga nagapahikot sang hunahuna.​—Efeso 4:23.

Tikang 4: Tigayuna ang Kusog nga Kinahanglan Mo Agod Magmadinalag-on

Makapalig-on para sa mga luyag magbag-o sang ila mga dalanon ang mahibal-an nga matigayon nila ina nga bulig. “Ang bag-ong personalidad” ginalaragway subong “gintuga suno sa kabubut-on sang Dios sa matuod nga pagkamatarong kag pagkatutom.” (Efeso 4:24) Nagagarantiya ini nga ang labaw sa tawo nga bulig matigayon gikan sa Dios mismo para sa mga nagahandum sini. Paano mo matigayon ang bulig ni Jehova nga Dios?

Ang isa sang labing daku nga bulig amo ang personal nga pangamuyo. Ang pangamuyo nagaaman sing importante nga serbisyo sa pagkonsulta sa Tuburan sang gahom nga kinahanglanon sa pagbag-o sang imo mga dalanon. Ang pangamuyo nagatugot sa imo sa paghambal sing hilway kag sing prangka sa bisan ano nga tion, bisan sa tunga sang problema. Ina nga pagpalapit sa matuod kag nagaulikid nga Dios nagalabaw gid sa pagpalapit sa bisan ano nga bulig sang tawo kag epektibo sa gilayon. Sa amo, si apostol Juan nakasulat: “Ini amo ang pagsalig naton sa iya, nga, kon magpangayo kita sing bisan ano suno sa iya kabubut-on, magapamati sia sa aton.” (1 Juan 5:14) Kag ang mga pulong ni manalagna Isaias nagapalig-on sa aton: “Pangitaa si Jehova, ninyo nga katawhan, samtang nga makita pa sia. Tawga ninyo sia samtang nga malapit pa sia. Magbiya ang malauton sang iya dalanon, kag ang makahalalit nga tawo sang iya mga painuino; kag magbalik sia kay Jehova, nga magakaluoy sa iya, kag sa aton Dios, kay sia magapatawad sing bugana.”​—Isaias 55:​6, 7.

Ang pagtuon sang Biblia nagahatag man sing kusog, kag nagaparepresko sa imo, nagabulig sa imo sa pagpatin-aw liwat sang imo mga tulumuron. Ang Biblia nagahatag sing positibo nga pagpalig-on samtang ginapanikasugan mo ang imo napilian nga batasan. Dugang pa, ginapukaw sini ang pagbatyag sing kaugot sa imo daan nga mga dalanon. Ang adlaw-adlaw nga pagkuha sing ihibalo tuhoy sa Biblia kag sa kaundan sini magawahig man sang bisan anong sayop nga impormasyon nga mahimo magasulod gikan sa media kag edukasyunal nga sistema sang kalibutan.

Ang Cristianong mga miting sa lokal nga Kingdom Hall sang mga Saksi ni Jehova wala lamang nagahatag sing edukasyon tuhoy sa mga talaksan sang Biblia kundi isa man ini ka pagsakdaganay sang grupo kag pagpalig-unay para sa napauswag nga batasan. Ining pagsakdag nga ginaaman paagi sa kongregasyon nakabulig sa madamo sa pagbag-o sang ila batasan sing madinalag-on. Ngaa indi hambalan ini nga bulig upod sa tawo nga ginkuhaan mo sini nga magasin?

Tikang 5: Landasa ang Pagbalik sa Daan nga Pagkatawo

Madamo ang nagtinguha nga pauswagon ang ila mga dalanon apang nagluya sila bangod sang pagbalik sa daan nga pagkatawo nga mahimo indi malikawan. Ang resulta amo nga ang iban nag-ampo sing bug-os. Ini sila pirme nagahunahuna nga kon ang ila ginkabig nga amo lamang ang ila paglaum napaslawan, wala na gid sila sing paglaum. Dayon ginatugyan nila ang ila kaugalingon sa mga impluwensia sang kalibutan. Sa masami nagalain pa sila sang sa antes sila magtinguha sa pagbag-o.

Pasaliga pirme ang imo kaugalingon nga ang bisan anong indi halandumon nga dalanon anay takus palayuan. Ginpatuhuyan ni apostol Pablo ang iya daan nga batasan kag estilo sang pagkabuhi subong isa ka tumpok sang sagbot, ukon basura. (Filipos 3:8) Gani, kon sa imo pagtinguha nga magbag-o ka, nasandad ka sang isa ka balagbag ukon sang pagbalik sa daan nga pagkatawo, magtindog liwat, kag magpadayon sa pag-abante. Indi magdulog! Padayon nga magpakig-away! Mangin takus gid ini sini!

Dumduma, madamo sang imo mga dalanon kag mga kinaiya ang ginpilit sa imo sang naguwa nga mga kusog nga wala mo ginpili ukon indi mo makontrol sadtong tion. Ining mga kusog nagapanghikot gihapon. Tugutan mo bala ini nga idasok ka sa hurmahan sini? Indi? Nian indi gid mag-ampo!

Minilyon ka tawo gikan sa nanuhaytuhay nga mga kultura​—mga kriminal pa gani kag mga tawo nga nadalahig sing daku sa imoral nga paggawi​—ang madinalag-on nga nagbag-o sang ila batasan. Nahuptan nila ang ila napauswag nga mga talaksan tubtob karon, madamo sa ila sing mga dekada na, nagaunong sa ila mas maayo nga mga dalanon nga may dalayawon nga kinabubut-on nga integridad. Apang ginapasalamatan nila ang Dios sa kusog kag motibasyon sa paghimo sini. Subong sang ginsiling ni apostol Pablo: “May kusog ako para sa tanan nga butang bangod sa iya nga nagapabakod sa akon.”​—Filipos 4:13.

Nagadaug sila sa pagpakig-away sa paghimo sing husto. Ikaw man magbag-o kon luyag mo gid kag makatigayon ka sing kabuhi sa bag-ong kalibutan sang Dios.​—Salmo 37:​29; 2 Pedro 3:13.

[Picture on page 7]

Tikang 1: Hibalua kon ano gid ang imo pagkatawo

[Picture on page 8]

Tikang 2: Mamat-od kon ano ang luyag mo nga pagkatawo

[Picture on page 9]

Tikang 3: Mangita sing takus nga mga halimbawa

[Picture on page 9]

Tikang 4: Tigayuna ang kusog nga kinahanglan mo agod magmadina-lag-on

Tikang 5: Landasa ang pagbalik sa daan nga pagkatawo

[Picture on page 10]

Ang mga magabag-o makapanubli man sing nabag-o nga duta