Revareva ta Heberu Taudia Dekenai

11 Abidadama ena anina be inai, oi daradara lasi to oi diba oi naria noho gauna be do ia vara.+ Bona oi diba momokani, oi abia dae gaudia be momokani, ena be unai gaudia oi itaia lasi. 2 Guna idia noho taudia* be edia abidadama dainai, Dirava ese ia gwauraia hedinarai ia be idia dekenai ia moale.

3 Abidadama dainai ita diba Dirava ena hereva amo inai nega oromana* ia vara. Unai amo Dirava ese ita itaia lasi gaudia amo ita itaia gaudia ia havaraia.

4 Abela ia abidadama dainai, Dirava dekenai ia henia boubou gauna ese Kaino ena ia hereaia,+ unai dainai Dirava ese ia gwauraia kara maoromaoro tauna. Dirava ese ena harihari gaudia ia abia dae,+ bona ena be ia mase vadaeni, to ena abidadama dainai ia do hereva noho.+

5 Enoka+ ia abidadama dainai, Dirava ese ia abia lao, unai amo mase ia itaia lasi, bona ia idia davaria lasi.+ To unai ia do vara lasi neganai, Dirava ia hahedinaraia ia be Enoka dekenai ia moale. 6 Danu, bema tau ta be abidadama lasi, ia ese Dirava ia hamoalea diba lasi, badina Dirava kahirakahira ia lao tauna ia abia dae Dirava be ia noho bona Dirava ese mai momokani ida ia idia tahua taudia edia davana do ia henia.+

7 Noa ia abidadama dainai,+ Dirava ese do idia vara gaudia ia hadibaia murinai,+ ia ese Dirava gari henia karana ia hahedinaraia bona ena ruma bese hamauria totona bouti* ta ia karaia.+ Bona iena abidadama amo ia ese tanobada ia hahemaoro henia,+ bona abidadama amo ia vara kara maoromaoro ia abia.

8 Aberahamo ia abidadama dainai,+ Dirava ese ia boiria neganai, ia kamonai henia bona Dirava ia gwauhamata ia dekenai do ia henia gabuna dekenai ia lao, ena be unai gabu ia diba lasi.+ 9 Ia abidadama dainai, ia be idau tauna bamona gwauhamata tano dekenai ia noho.+ Ia be Isako bona Iakobo ida palai rumadia dekenai ia noho,+ idia dekenai danu Dirava ese unai gwauhamata tamona ia henia.+ 10 Badina ia be siti mai ena badina aukana ia naria noho, unai siti ena palani karaia tauna bona haginia tauna be Dirava.+

11 Sara danu be ia abidadama dainai, ia rogorogo bona natuna ta ia abia, ena be ia buruka bona natuna havaraia lagani ia hanaia,+ to ia diba gwauhamata ia karaia Diravana ese ena hereva do ia badinaia. 12 Unai dainai, tau tamona amo natudia momo idia vara,+ ena be ia hegeregere lasi natudia ia havaraia totona.+ Oibe, ia amo natudia momo herea idia vara, guba ena hisiu bona kone ena miri edia momo hegeregerena, duahia diba lasi.+

13 Idia ibounai be edia abidadama idia dogoatao ela bona idia mase, ena be Dirava ese idia dekenai ia gwauhamatalaia gaudia idia abia lasi.+ To idia ese daudau amo unai gaudia idia itaia+ bona mai moale ida idia abia dae, bona taunimanima vairanai idia gwau idia be idau taudia bona unai tano dekenai do idia noho daudau lasi. 14 Unai bamona idia hereva taudia idia hahedinaraia, idia be mai momokani ida edia gabu korikorina idia tahua noho. 15 To bema idia ese idia rakatania vadaeni gabuna idia do laloa noho,+ dala do ia noho idia giroa lou totona. 16 To hari idia ura gabu namona ta dekenai idia lao, unai gabu be guba dekenai. Idia ese Dirava be edia Dirava idia gwauraia neganai, ia be idia dainai ia hemarai lasi,+ badina ia ese idia totona siti ta ia hegaegaelaia vadaeni.+

17 Aberahamo ia abidadama dainai, Dirava ese ia tohoa neganai,+ Isako be boubou gauna bamona ia henia, oibe, mai moale ida unai gwauhamata ia abia tauna be ia hegaegae, ena natuna tamona sibona ia bouboulaia totona,+ 18 ena be ia dekenai inai hereva idia gwauraia: “Inai tauna do idia gwauraia oiemu natuna, ia be Isako amo do ia mai.”+ 19 To Aberahamo ia laloa Dirava ese mase amo Isako ia hatorea isi lou diba, bona iena natuna be mase amo ia abia lou, unai be gau ta ia laulaulaia.+

20 Danu, Isako ia abidadama dainai, Iakobo+ bona Esau+ ia hanamoa bona idia dekenai gabeai do idia vara gaudia ia gwauraia.

21 Iakobo ia abidadama dainai, kahirakahira ia mase neganai,+ ia ese Iosepa ena natudia memero rua ia hanamoa+ bona ena itotohi latanai ia tabekau bona Dirava ia tomadiho henia.+

22 Iosepa ia abidadama dainai, kahirakahira ia mase neganai, ia ese Israela besena be Aigupito do idia rakatania sivaraina ia gwauraia, bona hadibaia hereva* ia henia ena turia be unuseni amo do idia abia lao.+

23 Mose ena tama sina idia abidadama dainai, ia vara murinai hua toi lalonai ia idia hunia,+ badina idia itaia ia be mai ena hairai+ bona king ena oda dekenai idia gari lasi.+ 24 Mose ia abidadama dainai, ia bada neganai+ ia ura lasi ia idia gwauraia Farao ena natuna kekeni ena natuna.+ 25 Mose be ena lalona ia hadaia Dirava ena taunimanima ida hisihisi ia abia hebou, to kara dika ena moale, nega sisina do ia noho gauna ia ura henia lasi, 26 badina ia laloa Horoa Tauna dainai ia abia hemarai be dava bada gauna bamona, bona unai ese Aigupito ena dava bada gaudia ia hereaia, bona do ia abia davana namona sibona ia laloa. 27 Abidadama dainai, ia ese Aigupito ia rakatania+ bona king ena badu karana dainai ia gari lasi,+ badina ia gini goada noho, ita itaia diba lasi Diravana ia itaia bamona.+ 28 Ia abidadama dainai, ia ese Pasova ia karaia bona rara be iduara dekenai ia atoa, unai amo Dirava ena aneru ese edia vara guna natudia do ia hamasea* lasi.+

29 Israela taudia idia abidadama dainai, Davara Kakakaka idia raka hanai, hegeregere idia be tano kaukau ai idia raka hanai bamona,+ to Aigupito taudia be idia raka hanai gwauraia neganai, idia maloa mase.+

30 Israela taudia idia abidadama dainai, dina 7 Ieriko ena magu idia raka hagegea murinai, magu ia moru.+ 31 Ariara hahine Rahaba ia abidadama dainai, ia be gwau-edeede taudia ida ia mase lasi, badina spai taudia dekenai kara namo ia hahedinaraia.+

32 Bona ma dahaka do lau gwau? Nega do ia ore bema lau ese Gideona,+ Baraki,+ Samson,+ Iepeta,+ Davida,+ Samuela,+ bona peroveta taudia ma haida lau herevalaia. 33 Unai taudia be idia abidadama dainai, basileia idauidau idia halusia,+ kara maoromaoro idia hahedinaraia, Dirava amo gwauhamata herevadia idia abia,+ laiona edia uduna idia koua,+ 34 lahi ena siahu idia koua,+ tuari kaia amo idia heau mauri,+ idia manoka to ma idia goada,+ tuari lalonai idia gari lasi,+ bona tuari taudia idia lulua.+ 35 Hahine edia lalokau taudia be mase amo idia toreisi lou,+ to tatau ma haida be idia ura lasi edia abidadama idia negea bena do idia ruhaia dainai idia hahisia ela bona idia mase. Unai bamona idia karaia, unai amo toreisi lou hereadaena do idia abia. 36 Oibe, ma haida be inai dala ai hahetoho idia davaria, hegeregere haida ese idia kirikirilaia, idia kwadidia, bona unai sibona lasi to seini amo idia guia+ bona dibura ruma ai idia atoa danu.+ 37 Idia be nadi amo idia hodoa,+ edia abidadama idia tohoa, idia be iri amo kahana rua ai idia utua, tuari kaia amo idia hamasea,+ bona mamoe bona nanigosi kopina amo idia karaia dabua idia atoa.+ Idia be idia dabu, hisihisi idia davaria,+ idia kara auka henia,+ 38 bona tanobada be ia hegeregere lasi idia totona. Idia be taunimanima lasi gabuna ai, ororo ai, kohua+ bona guri lalodiai idia noho.

39 Bona edia abidadama dainai, Dirava ese ia hahedinaraia ia be idia dekenai ia moale, ena be ia gwauhamatalaia gauna idia abia lasi, 40 badina Dirava ese ita totona gau hereana ta ia itaia vadaeni,+ unai amo unai taudia be ita amo do idia goevadae guna lasi.